Kotea ʼAe ʼe Ina Uga Tatou Ke Tou Faifakamafola?
1. Kotea te pikipikiga ʼo te ʼofa pea mo tatatou minisitelio?
1 Ko tatatou fakamafola te logo lelei ʼo te Puleʼaga ʼo te ʼAtua, ʼe ko te gaue maʼuhiga ʼaupito ʼaia ʼe feala ke tou fai ia ʼaho nei. ʼE mahino ia, ʼaki tatatou fakahoko te gaue ʼaia, ʼe tou fakaha ai ʼe tou fakalogo ki te ʼu fakatotonu lalahi ʼe lua, ʼae ke tou ʼofa kia Sehova pea ke tou ʼofa ki totatou tatau. (Mko. 12:29-31) Ko te ʼofa, ʼe ko te malohi ʼae ʼe ina uga tatou ke tou liliu ko he ʼu minisi faʼafai.—1 Soa. 5:3.
2. ʼE tou fakaha feafeaʼi totatou ʼofa ʼae kia Sehova ʼi tatatou faifakamafola?
2 Tatatou ʼOfa ʼAe Kia Sehova: Ko tatatou ʼofa ʼae kia Sehova, totatou Kaumeʼa ʼofaina, ʼe ina uga tatou ke tou tala te moʼoni ʼo ʼuhiga mo ia. Kua teitei taʼu 6 000 nei te fasituʼu ʼa Satana kia te ia. (2 Ko. 4:3, 4) Koia ʼae kua tui ai e te hahaʼi ko te ʼAtua ʼe ina fakamamahiʼi natou ʼae neʼe agahala ʼi he ʼifeli kakaha, ʼe ko he Tahitolutapu fakamisitelio, pea ʼe mole tokaga ia ki te hahaʼi. Tokolahi ʼe mole kei tui ʼe ʼi ai he ʼAtua. ʼE tou fakaʼamu lahi ke iloʼi e te hahaʼi te moʼoni ʼo ʼuhiga mo totatou Tamai ʼae ʼi selo! ʼE fiafia tona loto ʼi tatatou gaue malohi ʼi te minisitelio, kaʼe ʼe ita ai Satana.—Taag. 27:11; Hep. 13:15, 16.
3. ʼE tou fakaha feafeaʼi tatatou ʼofa ki totatou tatau ʼi tatatou minisitelio?
3 Tatatou ʼOfa ʼAe Ki Totatou Tatau: ʼI te temi fuli pe ʼae ʼe tou faifakamafola ki he tahi, ʼe tou fakaha ai ʼe tou ʼofa ki ai. ʼE ʼaoga ʼaupito ki te hahaʼi ke natou logo ki te logo lelei ʼi te ʼu temi faigataʼa ʼaeni. Tokolahi ʼe natou hage ko te kau Ninive ʼo te temi ʼo Sonasi ʼae neʼe “mole pe natou iloi tonatou nima matau mai tonatou nima hema.” (Son. 4:11) ʼI tatatou minisitelio ʼe tou akoʼi ki te hahaʼi pe feafeaʼi hanatou maʼuli lelei mo fiafia. (Esa. 48:17-19) Pea ʼe natou maʼu ai he ʼamanaki. (Loma 15:4) Kapau ʼe natou fakalogo mo maʼuliʼi te ʼu meʼa ʼae ʼe natou ako, pea “e haofaki anai” natou.—Loma 10:13, 14.
4. Kotea ʼae ʼe mole galoʼi anai e Sehova?
4 Ko te fanau ʼae ʼe lelei ʼe mole natou ʼofa pe ki ʼanatou matuʼā ʼi te ʼu lakaga kua natou fakatuʼutuʼu ki ai, kaʼe ʼe ʼofa ia ʼi te temi fuli pe. ʼO toe feia, ko tatatou ʼofa lahi ʼae ki te ʼAtua mo totatou tatau, ʼe ina uga anai tatou ke tou lamalama te ʼu faigamalie ke tou faifakamafola ai ʼi te temi fuli, kaʼe mole ʼi te ʼu temi pe ʼae kua tou fakatuʼutuʼu ke tou faifakamafola ai. ʼE tou faifakamafola tuʼumaʼu pe anai. (Gaue 5:42) ʼE mole galoʼi anai e Sehova totatou ʼofa ʼaia.—Hep. 6:10.