“Ko He ʼu Alatike ʼe ʼAoga Anai Ki Tatatou Faifakamafola”
1. Kotea te ʼu fakatuʼutuʼu ʼe lua ʼo te ʼu alatike ʼae ko tona kupu tafitō: “Ko He Faipalalau Mo He Vahaʼa Fale”?
1 ʼE tautau fakaha ʼi Te Tule Leʼo ki te tufa ia te ʼu alatike ʼae ko tona kupu tafitō: “Ko He Faipalalau Mo He Vahaʼa Fale.” Neʼe fakatuʼutuʼu te ʼu alatike ʼaia, ʼuluaki moʼo fakamahino fakalelei te ʼu akonaki Fakatohi-tapu, pea lua, moʼo fakaha mai pe lava feafeaʼi hatatou faipalalau ʼaki he aga fakaʼapaʼapa mo te hahaʼi ki ʼihi manatu. (1 Pet. 3:15) ʼE tou lava fakaʼaogaʼi lelei feafeaʼi te ʼu alatike ʼaia?
2. ʼE tou lava fakaʼaogaʼi feafeaʼi te ʼu alatike ʼaia ʼi tatatou faifakamafola?
2 Tou Fakaʼaogaʼi ʼi Te Faifakamafola: ʼE feala ke kotou taupau te ʼu Tule Leʼo ʼae ʼe tuʼu ai te ʼu alatike ʼaia. Pea ka lagaʼi e he tahi ʼi he ʼapi, peʼe ko he ʼaʼahi, peʼe ko he tahi ʼe ako he fehuʼi ʼe tali ki ai he alatike, kotou fakaha age te alatike pea mo kole age ke kotou faipalalau ki ai. Kapau ʼe mole kotou maʼu Te Tule Leʼo ʼae ʼe tuʼu ai te alatike, ʼe lagi feala ke kotou toʼo mai tatatou tuʼasila ʼi te Neti, www.jw.org/wls.
3. ʼE lava feafeaʼi hatatou faipalalau mo he tahi ki he alatike ʼi te ʼu alatike ʼaia?
3 ʼE lava feafeaʼi hakotou faipalalau mo he tahi ki he alatike ʼi te ʼu alatike ʼaia? Ko ʼihi ʼe natou kole kia ia ke ina lau leʼo lahi te ʼu palalau ʼo te vahaʼa fale, kaʼe natou lau natou te ʼu palalau ʼae ʼe fai e te Fakamoʼoni. Neʼe natou tokagaʼi, ʼe fua lelei tona vakaʼi feia te alatike koteʼuhi ʼe feala ai hana vakavakaʼi ʼatatou akonaki kaʼe mole ita ai.—Tet. 32:2.
4. ʼE tou lava fakaʼaogaʼi feafeaʼi te ʼu alatike ʼaia moʼo akoʼi ʼo tatou?
4 Kotou Akoʼi Ia Koutou Pea Mo ʼIhi: ʼI takotou lau te ʼu alatike ʼaia, kotou tokagaʼi te ʼu vaega, mo te ʼu lea fakata pea mo te ʼu manatu tafitō ʼo te fakamahino. Kotou toe tokagaʼi mo te faʼahiga ʼaveʼave ʼo te ʼu manatu. Pea kotou faiga leva ke kotou faʼifaʼitakiʼi ʼi takotou faifakamafola. (Taag. 1:5; 9:9) Neʼe ui fenei e te tuagaʼane: “Ko taku lau te ʼu alatike ʼaia ʼe hage pe ʼe akoʼi au e he pionie ‘kua poto,’ ʼe ina iloʼi tuʼumaʼu pe te tali ʼae ʼe totonu!”
5. ʼE tou lava tokoni feafeaʼi ki ʼatatou ako Tohi-Tapu ke natou teuteuʼi tanatou faifakamafola?
5 ʼE feala ke kotou toe fakaʼaogaʼi te ʼu alatike ʼaia moʼo tokoni ki ʼakotou ako Tohi-Tapu ke natou teuteuʼi tanatou faifakamafola. Kotou lau fakatahi te alatike, ʼo kotou tuku ke lau e ia ʼae ʼe ako te ʼu palalau ʼo te Fakamoʼoni. ʼE feala ai ki te kau ako ke natou akoako te palalau ʼaki he aga fakaʼapaʼapa ki te ʼu meʼa ʼae ʼe natou tui ki ai. (Kol. 4:6) ʼE mahino ia, ʼe toe fakaʼaogaʼi e Sehova te ʼu alatike ʼaia moʼo tokoni mai ke tou “fai ke katoa lelei” tatatou faifakamafola.—2 Tim. 4:5.