ʼE Tou Lava Tokoni Feafeaʼi Kia Natou ʼAe ʼe Mole Faʼa Popoto Lelei ʼi Te Lautohi?
1. Kotea ia te faigataʼaia ʼae ʼe tou tau mo ia moka tou akoʼi te Tohi-Tapu kia natou ʼae ʼe mole faʼa popoto lelei ʼi te lautohi?
1 ʼE feala pe ke fia logo ia te hahaʼi ʼae ʼe mole faʼa popoto lelei ʼi te lautohi ki te ʼu manatu fakalaumalie, kaʼe ʼe natou tuʼania moka natou sisio ki te Tohi-Tapu pea mo ʼihi atu tohi. ʼE lagi mole natou fia toʼo anai te tohi Te Ako Mai Te Tohi-Tapu ʼi te ʼuluaki faipalalau. Kaʼe ʼe tou lava tokoni feafeaʼi anai ki te hahaʼi ʼaia ʼi te faʼahi fakalaumalie? ʼI te ʼu fenua ʼe 20 tupu, neʼe fakalavelave ki te ʼu tehina mo tuagaʼane kua mahani ʼi te faifakamafola pe ʼe kotea ʼae neʼe natou fai. ʼE tou vakaʼi anai ʼanatou manatu.
2. Kotea te ʼu meʼa gaue lelei ʼae ʼe lava tokoni ki he tahi ʼe mole faʼa poto lelei ʼi te lautohi?
2 Kapau ʼe faigataʼa kia ia ʼae ʼe tou ako ia te lautohi peʼe mole poto, ʼe lagi feala ke tou kamata ʼaki te kaupepa lahi Tou Fakalogo Ki Te ʼAtua Pea Ke Tou Māʼuʼuli ʼo Heʼegata. ʼE fakamatala e te filiale ʼo Kenya, ʼe fua lelei ia te meʼa gaue ʼaia koteʼuhi ʼe mahani te hahaʼi Afelika ʼi te akoʼi ʼo natou ʼaki he ʼu fakamatala kaʼe mole ʼaki he ʼu faipalalau ʼe fai ai ni fehuʼi. Logo la ʼe faigafua kia natou ʼae neʼe olo ʼo ako ia te lautohi pea mo tanatou tali ki te ʼu fehuʼi ʼi tanatou ako Tohi-Tapu, kaʼe ko te faʼahiga fai ʼaia ʼe faigataʼa kia natou ʼae ʼe mole faʼa popoto lelei ʼi te lautohi. Kapau ʼe poto ʼi te lautohi, pea ʼe feala ke tou fakaʼaogaʼi te ʼu kaupepa lalahi Te ʼu Logo Lelei Mai Te ʼAtua, ʼE Koutou Lava Kaumeʼa Mo Te ʼAtua! peʼe ko te tohi Hisitolia Faka Tohi-Tapu.
3. Kotea ʼae ka tokoni mai anai ke fua lelei tatatou akoʼi ia natou ʼae ʼe mole faʼa popoto lelei ʼi te lautohi?
3 Tou Fakamalō Kia Natou: ʼE lagi ufiufi ia natou ʼae ʼe mole faʼa popoto lelei ʼi te lautohi pea ʼe mole natou maʼu ia te lotofalala. Koia, ʼe lelei ke tou tokoni muʼa kia natou ke ʼaua naʼa natou ufiufi ke feala ai hatatou akoʼi age te moʼoni. Tokolahi ia natou ʼaia, logo la ʼe mole natou popoto ʼi te lautohi kaʼe ʼe natou ʼatamai pea ʼe natou maʼu te fealagia ʼae ki te ako. Tou fakaʼapaʼapa pea mo fakamaʼuhigaʼi natou. (1 Pet. 3:15) ʼE natou fia hoko atu anai tanatou ako mo kapau ʼe natou tokagaʼi ʼe ʼi ai te ʼaoga ʼo tanatou faiga pea ʼe natou tuputupu anai ʼi te faʼahi fakalaumalie. Koia, tou haga fakamalō kia natou ʼo ʼuhiga mo ʼanatou faiga.
ʼE lagi ufiufi ia natou ʼae ʼe mole faʼa popoto lelei ʼi te lautohi pea ʼe mole natou maʼu ia te lotofalala. Koia, ʼe lelei ke tou tokoni muʼa kia natou ke ʼaua naʼa natou ufiufi ke feala ai hatatou akoʼi age te moʼoni
4. ʼE tou lava fakalotomalohiʼi feafeaʼi ia natou ʼae ʼe mole faʼa popoto lelei ʼi te lautohi ke natou teuteuʼi tanatou ako?
4 Tatau aipe pe ʼe mole faʼa poto lelei ia ia ʼae ʼe tou ako ʼi te lautohi, kaʼe tou fakalotomalohiʼi ia ia ke ina teuteuʼi tana ako. ʼI Afelika Saute, neʼe fakalotomalohiʼi e ʼihi kau faifakamafola ʼanatou kau ako ke natou kole tokoni ki he tahi ʼo tonatou famili peʼe ko honatou kaumeʼa ʼe poto lelei ʼi te lautohi. Neʼe fakaha e te tehina ʼi Pilitania ki tana kau ako ia te maʼuhiga ʼae ke teuteuʼi te ako. ʼI te lolotoga ʼo te ako, neʼe ina fakasio ki tana ako ia tana tohi ʼae kua fakaʼiloga ai te ʼu tali, ke ina tokagaʼi ʼe faigafua age tana tali moka kua fakaʼiloga mo tana tohi. Pea ʼi Initia leva, neʼe uga e te tehina tana kau ako ke natou sioʼi te ʼu pakī ʼo te ako ʼae ka hoa mai pea ke natou metitasioʼi.
5. ʼE tou lava fakaha feafeaʼi tatatou faʼa kataki moka fai te ako?
5 Tou Faʼa Kataki: Tatau aipe pe ʼe kotea te meʼa gaue ʼae ʼe tou fakaʼaogaʼi ki te ako, tou talanoa tafitō ki te ʼu manatu maʼuhiga, pea tou tokoni ki tatatou ako ke mahino lelei ki te ʼu manatu ʼaia. ʼI muʼa ʼo te kamata ʼo te ako, ʼe lagi lelei ke tou faipalalau lolotoga minuta ʼe 10 peʼe 15. Pea ʼaua naʼa tou faiga ke lahi fau te ʼu manatu ʼae ka tou vakaʼi anai, kaʼe ke tou fakaʼutaʼuta pe te ʼu palakalafe. Tou faʼa kataki mo kapau ʼe mole lautohi vave ia ia ʼae ʼe ako. ʼI te tuputupu ʼo tana lotofakafetaʼi kia Sehova, ʼe faiga anai ke lelei age tana lautohi. Moʼo tokoni ki takotou ako, ʼe lelei ke kotou fakaafe ia ia, ʼi te ʼuluaki fai ʼo te ako, ke kau ki ʼatatou fono.
6. ʼE tou lava tokoni feafeaʼi ki te hahaʼi ke popoto lelei ʼi te lautohi?
6 ʼE vave anai te tuputupu ʼa te kau ako Tohi-Tapu ʼi te faʼahi fakalaumalie mo kapau ʼe natou ako ke natou popoto lelei ʼi te lautohi. (Pes. 1:1-3) Kapau ʼe lotovaivai he ako, pea ʼe feala ke tou fakalotomalohiʼi ia ia ʼo tou tokoni ki ai ʼaki tatatou fakaha age te ʼu meʼa ʼae ʼe ina lava ako. Tou fakaha age ʼe tapuakiʼi anai e Sehova ʼana faiga, pea mo tou fakalotomalohiʼi ia ia ke faikole. (Taag. 16:3; 1 Soa. 5:14, 15) ʼI Pilitania, ʼe fakalotomalohiʼi e ʼihi kau faifakamafola tanatou kau ako ke natou fai ni fakatuʼutuʼu ʼe natou lava fakahoko. Ohage la, ʼe lagi feala ke natou ʼuluaki akoʼi te ʼu mataʼ i tohi, pea ke natou popoto ʼi te kumi pea mo lau te ʼu vaega Tohi-Tapu, pea hoki natou vakaʼi leva he ʼu tohi Fakatohi-tapu ʼe faigafua tona lau. Ko te tokoni ki te hahaʼi ke natou popoto ʼi te lautohi, ko tona fakaʼuhiga ke tou tokoni kia natou ke natou fia fai ki te faʼahi ʼaia, kaʼe ʼe mole gata ʼaki pe anai te akoʼi age pe ʼe feafeaʼi te ako lautohi.
7. He ko ʼe ʼe mole tonu ke tou lotolotolua ʼi te fakaha ʼo te moʼoni kia natou ʼae ʼe mole faʼa popoto lelei ʼi te lautohi?
7 ʼE mole meʼa noaʼi e Sehova ia natou ʼae neʼe mole lelei tanatou ako ʼi te fale ako. (Sopo 34:19) Kaʼe ʼe tokagaʼi e Sehova ia te loto ʼo te hahaʼi. (1 Klk. 28:9) Koia, ʼaua naʼa tou lotolotolua ʼi te fakaha ʼo te moʼoni kia natou ʼae ʼe mole faʼa popoto lelei ʼi te lautohi. ʼE lahi te ʼu meʼa gaue lelei ʼe feala ke tou fakaʼaogaʼi moʼo kamata te ako. Pea ʼe feala leva ke hoko atu te ako ʼaki te tohi Te Ako Mai Te Tohi-Tapu ke feala ai hana mahino katoa ki te Tohi-Tapu.