Tou Akoʼi Ia Nātou ʼAē ʼe Mole Faʼa Popoto Lelei ʼi Te Lautohi
1. Koteā te faigataʼaʼia ʼe feala ke tou felāveʼi mo ia ʼi tatatou minisitelio?
1 ʼI tatatou minisitelio, ʼe tou tau felāveʼi mo te faigataʼaʼia ʼaē ko te akoʼi ʼo te moʼoni ki he hahaʼi ʼe mole faʼa popoto lelei ʼi te lautohi. Koteā ʼaē ʼe tou lava fai?
2. ʼE feafeaʼi hatatou fakaʼapaʼapa kiā nātou ʼaē ʼe mole faʼa popoto lelei ʼi te lautohi, pea koteā tona tupuʼaga?
2 Tou Fakaʼapaʼapa Kiā Nātou: Ko te faʼahi ʼaē ʼe maʼuhiga kiā Sehova, ʼe ko te ʼulugaaga ʼaē ʼe maʼu e he tahi kae mole ko te ʼu meʼa ʼaē neʼe ina ako ʼi te faleako. (1 Sam. 16:7; Taag. 21:2) Koia, ʼe mole tonu ke tou fakatō laloʼi ia nātou ʼaē ʼe mole faʼa popoto lelei ʼi te lautohi. Ko nātou ʼaia ʼe lagi natou tali lelei age anai tatatou tokoni, mokā tou fakaʼapaʼapa kiā nātou pea mo tou faʼa kātaki. (1 Pet. 3:15) ʼE lagi mole tonu anai ke tou fakakinauʼi ia ia ke ina lau he vaega peʼe ko he palakalafe. ʼAki tana tuputupu ʼi tana ako ia te ʼu moʼoni maʼuhiga ʼo te Tohi-Tapu, ʼe lagi lahi age anai tana holi ʼaē ke hikihiki age tona poto lautohi, heʼe ina logoʼi ia tana fiafia ʼi te lau ʼo te Folafola ʼa te ʼAtua “leʼo veliveli ʼi te ʼaho mo te pō.”—Pes. 1:2, 3.
3. ʼE feafeaʼi hakotou faʼahiga fai ʼo te ako ʼe feala ai ke akoʼi ia nātou ʼaē ʼe mole faʼa popoto lelei ʼi te lautohi?
3 Te ʼu Faʼahiga Fai ʼo Te ʼu Ako Tohi-Tapu: Ko te fakaʼaogaʼi ʼo te ʼu pāki, ʼe ko he faʼahiga faiako ʼe lelei ʼaupitō pea mo ʼaoga moʼo tāʼofi ʼo he ʼu manatu. ʼE feala ke kotou fehuʼi kiā ia ʼaē ʼe ako, peʼe koteā ʼaē ʼe sio kiai ʼi te pāki ʼo te tohi ʼaē ʼe kotou fakaʼaogaʼi. Pea kotou fai he ʼu fehuʼi ʼe ʼalutahi mo te faʼahi ʼaia moʼo tokoni ki ai ke mahino ki te puani ʼaē ʼe ina ako mai te pāki. Kotou fakaʼaogaʼi ia he ʼu vaega Tohi-Tapu ʼe ina ako ai he ʼu manatu maʼuhiga ʼe tuʼu ʼi te pāki. ʼE feala ke toe fakaʼaogaʼi ia te ʼu pāki moʼo fai he fakamanatu. ʼAua naʼa lahi fau ia te ʼu manatu ʼaē ʼe kotou vakaʼi. Kotou fakamaʼuhigaʼi ia te kupu tāfito pea mo te ʼu manatu tāfito ʼo te ako, pea ʼaua naʼa kotou vakaʼi he ʼu manatu ʼe mole talanoa kiai te ako. Kotou lau ia te ʼu vaega Fakatohi-tapu, pea kotou fai he ʼu fehuʼi ke kotou ʼiloʼi papau peʼe kua mahino ki te vaega ʼaē neʼe lau. ʼE lava fakatuputupu ai tana fia hikihiki ia tona poto lautohi, ke tupu ʼaki hana kumi totonu he tahi ʼu moʼoni Fakatohi-tapu.
4. ʼE tou lava tokoni feafeaʼi ki he tahi ʼe ako ke ina hikihiki ia tana poto lautohi?
4 Te ʼu Tokoni Moʼo Hikihiki Ia Te Lautohi: Ko te hahaʼi ʼaē ʼe mole faʼa popoto lelei ʼi te lautohi, pe neʼe mole natou maʼu he ʼu fealagia ke natou lautohi lelei, ʼe feala hanatou mahino lelei age pea mo taupau lelei age ia te ʼu manatu ʼaē ʼe natou ako. ʼE kotou lava fakalotomālohiʼi ia nātou ʼaia ke natou fakalogo ki te ʼu foʼi fime ʼaē neʼe puke kiai tatatou ʼu tohi Fakatohi-tapu. ʼI tana fakalogo fakalelei ki te tagata ʼaē ʼe lautohi pea mo mulimuli kiai ʼi tana tohi, ʼo ina lau liuliuga ʼo leʼo veliveli ia te ʼu kupu, ʼe tokoni anai ki ai ke ina hikihiki ia tana poto lautohi. ʼE lagi toe tokoni anai kiā ia ia te kaupepa lahi Appliquez-vous à la lecture et à l’écriture (Ako ia te lautohi pea mo te faitohi). ʼI ʼihi koga meʼa, ʼe toe feala pē ki te kau tagata ʼāfea ke natou fakatuʼutuʼu ia he ʼu kalasi ako lautohi ʼi te kōkelekāsio. Ko te ʼu tokoni ʼaoga ʼaia ʼe lava tokoni mai ki tatatou tokoni ʼaē kiā nātou ʼe mole faʼa popoto lelei ʼi te lautohi, ke natou mahino ki “te ʼu tohi taputapu,” ʼaē kā ina fakaliliu nātou ʼo popoto ki te maʼuli.—2 Tim. 3:15.