Ke Lelei Age Tatatou Minisitelio: Te Faifakamafola ʼi Te Interphone

He Koʼe ʼe Maʼuhiga? ʼE feala ke mata faigataʼa takita faipalalau ʼi te interphone. Kaʼe ʼe mole tonu ke taʼofi tatou e te faʼahi ʼaia, ke ʼaua naʼa tou faʼafai ʼi te ʼu gaue lelei. Kotou manatuʼi ʼe lagi ko te faigamalie pe ʼaia ʼe tahi ke feala hatatou fakaha ki he tahi ia te logo lelei. (Loma 10:14) Neʼe kua ʼi ai te ʼu aluʼaga neʼe hoko neʼe ha ai neʼe lava lelei te faʼahiga faifakamafola ʼaia. (Vakaʼi te Annuaire 2011, ʼi te ʼu pp. 65-66, pea mo te Annuaire 2000, p. 54, pal. 3.) Tou vakaʼi ʼihi tokoni.

Te ʼu Meʼa ʼAe ʼe Tonu Ke Ke Fai:

Teuteuʼi he ʼu ʼuluaki palalau ʼe nounou pea mo tohi ki he moʼi pepa, ke feala hakotou lau age kia ia ʼae ʼe kotou faipalalau mo ia ʼi te interphone. ʼE feala ai ke siʼisiʼi takotou mataku. Kotou ʼuluaki fakamahino age ia te tupuʼaga ʼo takotou ʼaʼahi ia ia. Kotou toʼo tona higoa mo kapau ʼe tohi tona higoa ʼi te lisi ʼo te telefoni. Moʼo fakaʼosi, kotou ui age pe ʼe feala ke kotou tuku age he tohi peʼe ko he pepa lotu ʼe feala anai ke ina maʼu ai he tahi ʼu logo. ʼE feala ke kotou tuku ʼi tona muʼa matapa.
Kotou taupau he faʼahiga manatu ʼe lelei. Kotou malimali pea mo palalau ʼo hage pe ko te mahani.
Faigaʼi ke ʼaua naʼa kotou hoha fau, ke feala ai hakotou palalau faʼifaʼitaliha. Fai ke mahino gafua ʼakotou palalau pea ke logo lelei ki ai. ʼAua naʼa loaloaga fau ia te temi ʼae ʼe tuʼu ai ʼakotou palalau. Kotou palalau fakatokatoka.
Kotou maʼu ia te fakasiosio poto. ʼI te ʼu fale fata lalahi, ʼe lahi ai ia te ʼu interphone. ʼE feala pe ke kotou fili he ʼu koga fale pe ʼe 3, ʼo kotou fakatagi te ʼu interphone. Ka ʼosi pea kotou tohi ia te numelo ʼo te koga fale ʼae neʼe kotou gata ai pea mo kotou mavae mai ai. Heʼe feala ke iita te hahaʼi ʼi takotou nonofo fualoa ʼi tonatou muʼa fale fata ʼo fakatagi te ʼu interphone fuli.

ʼAhiʼahi Fai Te Faʼahi ʼAeni Lolotoga Te Mahina:

Kotou fai he ʼu faʼifaʼitaki lolotoga takotou ako fakafamili. Kotou fevahaʼaki ʼi takotou faipalalau.