Tou Fiafia ʼi Te Fakamafola ʼo Te Logo Lelei

ʼE faigataʼa koa kia koe te faifakamafola? Tokolahi ia tatou ʼe tou tali anai ʼei. Kotea tona tupuʼaga? He ʼe lagi tou felaveʼi mo ni hahaʼi ʼi totatou telituale ʼe fehihiʼa ia tatou peʼe agakovi mai. Peʼe tou matataku ʼi te palalau ki ni hahaʼi ʼe mole tou iloʼi. ʼE mahino ia, ʼe feala ki te ʼu aluʼaga ʼaia ke puli ai totatou fiafia. Kaʼe, ʼe tou tauhi ki te ʼAtua fiafia pea ʼe ina loto ke tou tauhi age kia te ia ʼaki te fiafia. (Pes 100:2; 1Ti 1:11) Kotea te ʼu tupuʼaga ʼe tolu ke tou fiafia ai ʼi te faifakamafola?

ʼUluaki, ʼe tou tala te logo ʼo ʼuhiga mo te ʼamanaki. Logo la ʼe kua tahitahiga te maʼu e te hahaʼi he ʼamanaki ia ʼaho nei, kaʼe ʼe feala ke tou fakafonu ʼonatou loto ʼaki “ni logo lelei.” (Esa 52:7) Pea ʼe feala ke tou toe fiafia ʼuhi ko te logo lelei ʼo te Puleʼaga ʼo te ʼAtua. ʼI muʼa ʼo hatatou olo ʼo faifakamafola, tou metitasio muʼa ki te ʼu tapuakina ʼae ka ʼaumai anai e te Puleʼaga ʼo te ʼAtua ki te kele.

Lua, ʼe feala ki te logo lelei ʼae ʼe tou fakamafola ke tokoni ki te hahaʼi ʼi te faʼahi fakasino mo te faʼahi fakalaumalie. Neʼe natou ako ke natou liakī te ʼu aga ʼae ʼe kovi pea ke natou maʼu te maʼuli heʼe gata. (Esa 48:​17, 18; Lom 1:16) ʼE hage pe te gaue ʼae ʼe tou fai ko te haofaki ʼo te hahaʼi ʼae ʼe tuʼutamakiʼia. Logo la ko ʼihi hahaʼi ʼe mole natou loto ke haofaki, kaʼe ʼe tou haga kumi pe ia natou ʼae ʼe loto ki ai.​—Mat 10:​11-14.

Tolu leva, ka tou faifakamafola ʼe tou fakamaʼuhigaʼi ai ia Sehova. ʼE maʼuhiga ʼaupito kia te ia tatatou gaue faifakamafola. (Esa 43:10; Hep 6:10) Pea ʼe lotolelei ke ina foaki mai tona laumalie maʼoniʼoni moʼo fakahoko te gaue ʼaia. Kole kia Sehova ke ke maʼu te fiafia, ʼae ʼe kau ki te fua ʼo te laumalie maʼoniʼoni. (Kal 5:22) ʼAki tana tokoni, ʼe feala ke tou tauʼi ʼotatou tuʼania pea mo faifakamafola mo he lototoʼa. (Gau 4:31) Koia, tatau aipe pe ʼe feafeaʼi te aga ʼa te hahaʼi ʼi totatou telituale, ʼe tou fiafia anai ʼi te faifakamafola.​—Esk 3:3.

VAKAʼI TE ʼATA VITEO KE KE TOE MAʼU TE FIAFIA ʼI TAU AKO PEA MO METITASIO PEA TALI KI TE ʼU FEHUʼI ʼAENI:

• He koʼe ʼe tonu ke tou fakamuʼamuʼa te ako ʼo te Tohi-Tapu, tatau aipe pe ʼe lahi tatatou faifakamafola ʼi te mahina fuli?

• ʼE feafeaʼi hatatou faʼifaʼitakiʼi ia Malia?

• Ko te temi fea ʼae ʼe feala ai ke ke metitasio ki te Folafola ʼa te ʼAtua?

• Kotea te ʼu fua lelei ʼe ke maʼu moka ke fakamafola te logo lelei?