Ke Lelei Age Tatatou Faifakamafola—Fakagata Te ʼu Ako ʼAe ʼe Mole Tuputupu

HE KOʼE ʼE MAʼUHIGA? Ke haofaki he tahi, ʼe maʼua ke fetapa ki te huafa ʼo Sehova. (Lom 10:13, 14) Kae ʼe mole ko natou fuli ʼae ʼe natou tali he ako Tohi-tapu ʼae ka natou fia maʼuliʼi te ʼu pelesepeto ʼa Sehova. ʼE tou fakaʼaogaʼi lelei totatou temi ʼi tatatou tokoni kia natou ʼae ʼe natou fia fai ni fetogi moʼo fakafiafiaʼi te loto ʼo Sehova. Kae kapau ʼe mole tuputupu he ako ʼi te kua hili ʼo he temi loaloaga, ʼe tonu leva ke fakagata pe muʼa tana ako, pea ke tou fakaʼaogaʼi totatou temi moʼo tokoni kia natou ʼae ʼe taki mai e Sehova ki tona kautahi. (Soa 6:44) Pea kapau leva ki muli age, kua ina fai ni fetogi ʼo ina fakaha ai te ‘lelei ʼo tona loto ke ina maʼu te maʼuli heʼe gata,’ pea ʼe tou toe toʼo leva tana ako.—Gau 13:48.

TE ʼU MEʼA ʼAE ʼE TONU KE KOTOU FAI:

• Fakamalo ki te ako ʼi tana fia iloʼi te malama totonu.—1Ti 2:4

• Fakatokagaʼi age te maʼuhiga ʼo te maʼuliʼi ʼo te ʼu meʼa ʼae ʼe ina ako.—Luk 6:46-49

• Faipalalau ki te lea fakata ʼa Sesu ʼo ʼuhiga mo te tagata nunusi pulapula, pea mo kotou ui age ke fakakaukau lelei pe kotea ʼae ʼe ina taʼofi ai ke tuputupu.—Mat 13:18-23

• ʼAki he aga fakaʼeteʼete, fakamahino age pe koʼe ʼe kotou fakagata tana ako

• Ui age ʼe kotou tau fakalaka age anai ʼo fakalotomalohiʼi ia ia pea ʼe feala ke ina toe toʼo tana ako mo kapau ʼe ina fai ni fetogi

VAKAʼI TE ʼATA VITEO FAKAGATA HE AKO ʼE MOLE TUPUTUPU, PEA MO TALI KI TE ʼU FEHUI ʼAENI:

• ʼE ha feafeaʼi ʼi te faipalalau ʼe mole tuputupu lelei te ako ʼi te faʼahi fakalaumalie?

• Neʼe tokoni feafeaʼi te tehina ke mahino te ako neʼe tonu ke ina fai ni fetogi ʼi tona maʼuli?

• Neʼe fakaha feafeaʼi e te tehina ki te ako, ʼe fiafia moka ʼe ina toe fia fai anai tana ako ʼi he ʼaho?