ʼE Feafeaʼi Hatatou Fakaʼaogaʼi Ia Te ʼu FaʼifaʼitakiKi Te ʼu Faipalalau?

Ko te ʼu faʼifaʼitaki ʼo te ʼu faipalalau ʼae ʼe tou maʼu ʼi te kaupepa, neʼe ko he ʼu manatu neʼe fakakaukauʼi pea tokolahi te kau faifakamafola neʼe natou tokagaʼi ia te lelei ʼo te ʼu faʼifaʼitaki ʼaia ʼi te faifakamafola. Kae ʼe mole tatau ia te ʼu aluʼaga ʼo te ʼu fenua ʼi te malamanei katoa. Koia ʼe feala pe ki te kau faifakamafola ke natou palalau ki he tahi age manatu ʼo mulimuli pe ki te ʼu meʼa ʼae ʼe fia logo ki ai te hahaʼi ʼo te telituale. Kae kapau leva ʼe tou kau ki he tufa makehe, ʼe tonu anai ke tou muliʼi ia te ʼu fakatuʼutuʼu ʼae ka foaki mai. Ko te maʼuhiga ke tou fakahoko ia te gaue ʼae neʼe tuku mai e Sesu ko te fakamafola ia te logo lelei ʼo te Puleʼaga.​—Mat 24:14.

Ka tuku mai he faʼifaʼitaki ke tou fakahoko ʼi te Ako Fakateokalatike, ʼe tou faiga muʼa ke tou fakaʼaogaʼi ia te faʼifaʼitaki ʼae ʼe tuʼu ʼi te Kaupepa Ako Te Maʼuli Fakakilisitiano Mo Te Faifakamafola. Kae ʼe feala pe ke tou filifili he tahi age fehuʼi peʼe ko he vaega Tohi-Tapu peʼe ko he manatu ʼe alu tahi pea mo te hahaʼi ʼo totatou telituale peʼe ko he tahi age aluʼaga. Gata pe mo kapau ʼe fakamaʼua mai ʼi te kaupepa ke tou muliʼi ia te faʼifaʼitaki ʼae kua tohi. Ko te fakatuʼutuʼu ʼaeni, ʼe ina fetogi ia te fakatuʼutuʼu ʼae neʼe kua tohi ʼi te pasina 8 ʼo te kaupepa ako ʼo te mahina ʼo Sunio 2020.