Ko Te ʼu Hau ʼe Fetauʼaki ʼi Te Temi ʼo Te Fakaʼosi
Ko te ʼu lea fakapolofeta ʼaeni ʼe ha ʼi te pāki, ʼe hoko pe ʼi he temi ʼe tahi. Ko te ʼu lea fakapolofeta ʼaia ʼe fakamoʼoni ai ʼe tou maʼuʼuli nei ʼi te temi ʼo te fakaʼosi.—Tan. 12:4.
Vaega Fkha. 11:7; 12:13, 17; 13:1-8, 12
Lea Fakapolofeta Ko “te manu fekai” ʼe pule ki te hahaʼi ʼo te kele lolotoga ni lauʼi afe taʼu. ʼI te temi fakaʼosi, ko tona fitu ʼulu neʼe lavea. Ki muli age, neʼe kua lelei tona lavea pea ko te “kele katoa” ʼe ina muliʼi te manu ʼaia. Ko Satana ʼe ina fakaʼaogaʼi ia ia moʼo “tauʼi te toe” ʼo te kau fakanofo.
Fakahoko Hili te Tulivio, neʼe fakatuʼu leva te ʼu puleʼaga fakatagata, ʼo natou fakafeagai ai kia Sehova. Hili ki ai ni lauʼi afe taʼu, lolotoga te ʼUluaki Tau Fakamalamanei, neʼe vaivai ai te malohi ʼo te puleʼaga ʼo Pilitania. Kae neʼe toe malohi ʼi tana kau fakatahi mo te puleʼaga ʼo Amelika. Tafito ʼi te temi ʼo te fakaʼosi, ʼe fakaʼaogaʼi e Satana te ʼu puleʼaga fuli ʼo te kele moʼo tauʼi te ʼu kaugana ʼa te ʼAtua.
Vaega Tan. 11:25-45
Lea Fakapolofeta ʼI te temi fakaʼosi, ko te hau ʼo te noleto mo te hau ʼo te saute ʼe nā fetauʼaki pe ʼe ko ai ʼae ka pule.
Fakahoko Ko Siamani ʼe ina tauʼi te Malohi ʼo Pilitania mo Amelika. ʼI te taʼu 1945, ko te puleʼaga Lusia ʼAfea mo te ʼu fenua ʼae neʼe kau mo ia, neʼe natou liliu ko te hau ʼo te noleto. ʼI te taʼu 1991, ko te puleʼaga ʼo te Lusia ʼAfea neʼe to, pea ki muli age, ko te puleʼaga foʼou Lusia mo te ʼu fenua ʼae neʼe kau mo ia, neʼe natou liliu leva ko te hau ʼo te noleto.
Vaega Esa. 61:1; Mala. 3:1; Luka 4:18
Lea Fakapolofeta Ko Sehova ʼe ina fekauʼi tana “tagata avelogo” moʼo teuteuʼi te ala ia muʼa ʼo te fakatuʼu ʼo te Puleʼaga Fakamesia. Ko te kutuga ʼaia neʼe natou kamata “ave ni logo lelei” ki te kau agavaivai.
Fakahoko ʼI te kamata ʼo te taʼu 1870, ko Charles Russell mo ʼihi atu neʼe natou ako fakamalotoloto te Tohi-Tapu ke natou fakamahino te ʼu moʼoni ʼae ʼe tuʼu ai. ʼI te taʼu 1881, neʼe natou mahino ai ʼe maʼuhiga ki te ʼu kaugana ʼa te ʼAtua ke natou faifakamafola. Neʼe natou ta he ʼu alatike, ohage ko te ʼu alatike “ ʼE Matou Kumi He Toko 1 000 Kau Faifakamafola” pea “Neʼe Fakanofo Natou Ke Faifakamafola.”
Vaega Mat. 13:24-30, 36-43
Lea Fakapolofeta Ko he fili ʼe ina nunusi te vao kovi ʼi he gaueʼaga fulumeto. ʼE tuku ke homo ake te vao kovi ʼo taʼomia ai te fulumeto. ʼI te temi ʼo te taʼukai, ko te vao kovi ʼe toʼo kehe mai te fulumeto.
Fakahoko ʼI te kamata ʼo te taʼu 1870, kua ʼasili ha lelei te kehekehe ʼo te kau Kilisitiano moʼoni mo te kau Kilisitiano loi. ʼI te temi ʼo te fakaʼosi, neʼe fakatahiʼi te kau Kilisitiano moʼoni ʼi te ʼosi vaheʼi ʼo natou mai te kau Kilisitiano loi.
Vaega Tan. 2:31-33, 41-43
Lea Fakapolofeta Ko te ʼu vaʼe ukamea ʼae neʼe fio ʼaki te kele ʼa he fakatata neʼe faʼu ʼaki te ʼu faʼahiga ukamea kehekehe.
Fakahoko Ko te kele ʼe fakaʼuhiga ki te ʼu hahaʼi ʼae neʼe puleʼi e te Malohi Fakamalamanei ʼo Pilitania Mo Amelika, pea neʼe mole natou fiafia ʼi te ʼu puleʼaga ʼaia. ʼUhi ko te ʼu hahaʼi ʼaia, ʼe mole feala ai ke fakaʼaogaʼi fuli e te ʼu puleʼaga ʼaia tonā malohi.
Vaega Mat. 13:30; 24:14, 45; 28:19, 20
Lea Fakapolofeta ʼE tae te “fulumeto” pea mo tanaki ki tona “fale tanakiʼaga.” Ko “te tagata faifekau agatonu mo poto” neʼe fakanofo ke tokaga ki te ʼu “hahaʼi gaue.” Ko ‘te logo lelei ʼo te Puleʼaga’ ʼe kamata fakamafola ʼi “te kele katoa.”
Fakahoko ʼI te taʼu 1919, ko te tagata faifekau agatonu neʼe fakanofo ke tokaga ki te hahaʼi ʼa te ʼAtua. Talu mai te temi ʼaia, neʼe ʼasili lahi age te faifakamafola ʼa te kau Ako ʼo Te Tohi-Tapu. ʼI te temi nei, ko te Kau Fakamoʼoni ʼa Sehova kua natou faifakamafola ia fenua ʼe 200 tupu pea mo natou ta ni tohi Fakatohi-tapu ia lea ʼe 1 000 tupu.
Vaega Tan. 12:11; Fkha. 13:11, 14, 15
Lea Fakapolofeta Ko he manu fekai mo ʼona tala ʼe lua ʼe ina fakalotomalohiʼi te hahaʼi ke natou “faʼu he fakatata ʼo te manu fekai” pea ʼe ina “foaki te maʼuli ki te fakatata” ʼaia.
Fakahoko Ko te Malohi Fakamalamanei ʼo Pilitania mo Amelika neʼe ina kamata fakatuʼutuʼu te Sosiete ʼo Te ʼu Puleʼaga. Ko te Sosiete ʼaia ʼe tokoni ki ai te tahi ʼu puleʼaga. Ki muli age, ko te hau ʼo te noleto neʼe toe kau mo ia ki te Sosiete ʼaia, kae neʼe nofo ai pe mai te taʼu 1926 ʼo kaku ki te taʼu 1933. Pea neʼe fai he ʼu fakavikiviki ki te Sosiete ʼaia ʼo Te ʼu Puleʼaga, ʼae neʼe liliu ko te Kautahi ʼo Te ʼu Puleʼaga Fakatahi (ONU) kae ko te ʼu fakavikiviki ʼaia neʼe tonu pe ia ke fai ki te Puleʼaga ʼo Te ʼAtua.
Vaega Tan. 8:23, 24
Lea Fakapolofeta Ko he hau ʼe fakamatakutaku tona fofoga ʼe ina fai he ʼu maumau ʼe lahi ʼaupito.
Fakahoko Ko te Malohi ʼo Pilitania mo Amelika neʼe ina fai he ʼu maumau lahi. Ohage la, ʼi te Lua Tau Fakamalamanei, ko Amelika neʼe ina fakato he ʼu foʼi pulu hila ʼe lua ki he fenua neʼe fakafeagai ki Pilitania mo Amelika, pea neʼe hoko ai he toe maumau lahi.
Vaega Tan. 11:31, (MN); Fkha. 17:3, 7-11
Lea Fakapolofeta Ko te manu fekai “lanu kula” mo ʼona tala ʼe hogofulu ʼe hake ake mai te vanu pea ʼe ko ia ko te valu hau. ʼI te tohi ʼo Taniela, ʼe fakaha mai ai ko te hau ʼaia ʼe ko ia te “meʼa fakalialia ʼae ʼe ina fakatupu te maumau.”
Fakahoko Ko te Sosiete ʼo Te ʼu Puleʼaga neʼe puli lolotoga te Lua Tau Fakamalamanei. ʼI te hili ʼo te tau, neʼe “fakatuʼu” ai leva te Kautahi ʼo Te ʼu Puleʼaga Fakatahi (ONU). Ohage pe ko te Sosiete ʼo Te ʼu Puleʼaga, neʼe fai ki ai he ʼu fakavikiviki, kae ko te ʼu fakavikiviki ʼaia neʼe tonu ke fai ki te Puleʼaga ʼo Te ʼAtua. Pea ko te Kautahi ʼo Te ʼu Puleʼaga Fakatahi ʼe natou ʼohofi anai te ʼu lotu.
Vaega 1 Tes. 5:3; Fkha. 17:16
Lea Fakapolofeta Ko te ʼu puleʼaga ʼe natou ui anai “Tokalelei pea mo fimalie!” Pea ko te ʼu “tala ʼe hogofulu” mo te “manu fekai” ʼe natou ʼohofi anai te “fafine paomutu” pea mo maumauʼi ia ia. Hili te faʼahi ʼaia, ko te ʼu puleʼaga ʼe maumauʼi anai.
Fakahoko Ko te ʼu puleʼaga ʼe natou ui kua natou ʼosi fakatuʼu te tokalelei mo te fimalie ʼi te malamanei. Hili ia, ko te ʼu puleʼaga ʼae ʼe natou faʼufaʼu te ONU ʼe natou maumauʼi anai te ʼu lotu hala. Koʼena te kamataʼaga ʼo te mamahi lahi. Ko te mamahi ʼaia ʼe fakaʼosi anai ʼi Alamaketone, moka pulihi fuli anai te malama ʼa Satana.
Vaega Esk. 38:11, 14-17; Mat. 24:31
Lea Fakapolofeta Ko Koke ʼe ina ulufi anai te fenua ʼa te hahaʼi ʼo te ʼAtua. Pea ʼe fakatahitahiʼi anai e te kau ʼaselo ia natou ʼae kua “filifili.”
Fakahoko Ko te hau ʼo te noleto mo te tahi ʼu puleʼaga ʼe natou ʼohofi anai te hahaʼi ʼa te ʼAtua. ʼI te kua ʼosi kamata ʼo te ʼohofi ʼaia, ʼe fakatahitahiʼi anai te toe ʼo te kau fakanofo ki te lagi.
Vaega Esk. 38:18-23; Tan. 2:34, 35, 44, 45; Fkha. 6:2; 16:14, 16; 17:14; 19:20
Lea Fakapolofeta Ko te tagata ʼae ʼe heka ʼi “he hosi hina” ʼe ina fakaʼosi tana “malo” ʼaki tana maumauʼi ia Koke mo tana kautau. Ko “te manu fekai” ʼe li ki “te vai ʼae ʼe vela ai te afi kakaha” pea ko te fakatata lahi ʼe maumauʼi.
Fakahoko Ko Sesu, te Hau ʼo te Puleʼaga ʼo te ʼAtua, ʼe haʼu anai ʼo haofaki te hahaʼi ʼa te ʼAtua. Pea ko Sesu, mo te toko 144 000 pea mo te ʼu ʼaselo ʼe natou maumauʼi anai te ʼu puleʼaga fuli ʼae ʼe natou ʼohofi te hahaʼi ʼa te ʼAtua. ʼE ko te fakaʼosiʼaga pe ʼaia ʼo te malama ʼa Satana.