ʼE Tokoni Feafeaʼi Atu Te Faikole?

Neʼe kosea ia Pamela pea neʼe kole tokoni ki te ʼu toketa. Kae neʼe toe faikole ki te ʼAtua ke ina foaki age te malohi ke ina katakiʼi tona aluʼaga faigataʼa ʼaia. Neʼe tokoni age koa ki ai te faikole?

Neʼe fakamatala fenei e Pamela: “ ʼI ʼihi temi, ʼe au mataku moka ʼe fai he faitoʼo ki toku mahaki. Kae neʼe au faikole kia Sehova ʼo au logoʼi ai he toe fimalie lahi mo lava katakiʼi toku aluʼaga ʼo mole au mataku. ʼE kei au mamahi pe kae ʼe tokoni mai te faikole ke au haga taupau maʼu he ʼu manatu ʼe lelei. Ka fehuʼi mai pe ʼe au lelei pe: ‘ ʼE au ui age, ʼe au mamahi kae ʼe au fiafia pe.’ ”

ʼE mahino ia, ʼe mole tou talitali ke tou tau mo he aluʼaga faigataʼa ʼaupito pea hoki tou faikole leva. ʼE tou tau fuli mo ni faigataʼaʼia pe lahi peʼe veliveli. Pea ʼe ʼaoga tuʼumaʼu kia tatou he tokoni moʼo tauʼi te ʼu aluʼaga ʼaia. ʼE feala koa ke tokoni mai ia te faikole?

ʼE ui fenei ʼi te Tohi-Tapu: “Tuku tau kavega kia Sehova, pea ’e lagolago anai kia koe. ʼE mole ina fakagafua anai ke tukia ia ia ʼae ʼe faitotonu.” (Pesalemo 55:22, MN) ʼI manatu fakalotofimalie leva! Koia, ʼe tokoni feafeaʼi atu te faikole? Kapau ʼe alu tahi ʼau faikole mo te finegalo ʼo te ʼAtua, pea ʼe ina foaki atu anai te meʼa ʼae ʼe ʼaoga ke ke lava tauʼi ai ʼou faigataʼaʼia.—Vakaʼi te fakamatala ʼae ʼi te ʼa takai “Kotea ʼe Feala Ke Ke Maʼu Moka ʼe Ke Faikole?”

Kotea ʼe Feala Ke Ke Maʼu Moka ʼe Ke Faikole?

Te tokalelei ʼo te loto

“Kotou fakaha ki te ʼAtua ʼakotou kole, pea ko te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli, ʼe ina taupau anai ʼokotou loto pea mo ʼokotou fealagia fakakaukau ʼaki ia Kilisito Sesu.” (Filipe 4:6, 7) Koia ka ke fakaha ʼou tuʼania ki te ʼAtua pea ʼe tokoni atu anai ke mole ke hoha fau ʼi te ʼu aluʼaga faigataʼa. Pea ke ke toe maʼu ia te poto.

Te poto ʼae ʼe haʼu mai te ʼAtua

“Kapau ʼe ʼi ai he tahi ia koutou ʼe ʼaoga ki ai te poto, ke ina haga kole ki te ʼAtua, pea ʼe foaki age anai ki ai, koteʼuhi ʼe foaki lahi e te ʼAtua ki te hahaʼi fuli ʼaki tona loto katoa pea ʼe mole ina fai he valoki.” (Sakopo 1:5) Ka fakaneke tatou, ʼe feala ʼi ʼihi temi ke tou toʼo he ʼu tonu ʼe mole lelei. Kapau ʼe ke kole ki te ʼAtua te poto, pea ʼe ina fakamanatuʼi atu anai te ʼu tokoni ʼaoga mo te ʼu pelesepeto ʼae ʼe tuʼu ʼi tana Folafola, te Tohi-Tapu.

Te malohi mo te fakalotofimalie

“ ʼE au maʼu te malohi kia meʼa fuli ʼuhi ko ia ʼae ʼe ina foaki mai te malohi.” (Filipe 4:13) Ko Sehova ʼe ko te ʼAtua mafimafi. ʼE ina lava foaki atu te malohi ke ke katakiʼi ʼou faigataʼaʼia. Pea ʼe toe tokoni atu ʼi ʼou ʼahiʼahi. (Esaia 40:29) Pea ʼe toe ui ʼi te Tohi-Tapu, ko Sehova ʼe ko “te ʼAtua ʼae ʼe ina fakafimalieʼi te hahaʼi.” Koia, ʼe feala ke ina fakafimalieʼi tatou “ ʼi ʼotatou ʼahiʼahi fuli.”—2 Kolonito 1:3, 4.

ʼE KE FAIKOLE ANAI KOA?

ʼE moʼoni, ʼe mole fakakinauʼi koe e Sehova ke ke faikole age kia te ia. Kae ʼe ina fakaafe koe ke ke fai ia te fahaʼi ʼaia. (Selemia 29:11, 12) Kae ʼe feafeaʼi mo kapau ʼe ke manatu ko ʼau faikole ʼae neʼe ke fai ʼi muʼa atu heʼeki tali mai? ʼAua naʼa ke lotovaivai kae ke ke haga faikole. Ko he ʼu matuʼā ʼofa, ʼe mole tokoni tuʼumaʼu anai ki ʼana fanau, ohage pe ko te meʼa ʼae ʼe natou loto ki ai peʼe ko te temi fea. ʼE lagi kua maʼu naua he puleʼaki lelei ki ai. Kae ko te fahaʼi ʼae ʼe tou iloʼi papau, ʼe tokoni anai he ʼu matuʼā ʼofa ki ʼana fanau.

Ko Sehova ʼAtua ʼe ko te tamai ʼae ʼe manavaʼofa lahi age. Pea ʼe toe fia tokoni atu kia koe. Koia, ke ke vakaʼi fakalelei te ʼu tokoni ʼae neʼe tou talanoa ki ai mo ke faiga ʼo maʼuliʼi. Kapau ʼe ke fai te fahaʼi ʼaia, pea ʼe tali anai e te ʼAtua ʼau faikole.—Pesalemo 34:16; Mateo 7:7-11.