Te Faikole ʼe Tokoni Feafeaʼi Anai Kia Koutou?

ʼI muʼa ʼo hakotou fai he faʼahi, ʼe lagi kotou feʼekeʼaki fenei: “ ʼE ʼi ai anai koa hona fua lelei kia au? Kapau ʼe au kole te faʼahi ʼaia ʼi te faikole, ʼe au manatu pe koa kia au totonu?” Kailoa ia. Koteʼuhi ʼe tou fia iloʼi pe ʼe ʼaoga anai ke tou fai te faʼahi ʼaia.

ʼI te ʼu ʼuluaki alatike, neʼe tou vakaʼi ai he ʼu fakamoʼoni ko te faikole ʼe mole ko he aga fakalotu feia pe peʼe ko he faʼahiga faitoʼo. Kaʼe ʼe fagono moʼoni te ʼAtua ki ʼatatou faikole. Kapau ʼe tou faikole ʼi hona aluʼaga ʼe lelei pea mo alu tahi mo tona finegalo, ʼe fagono mai anai. ʼI tona fakahagatonu, ʼe ina fakalotomalohiʼi tatou ke tou fakaovi age kia te ia. (Sakopo 4:8) Kaʼe kotea ʼae ka tou maʼu anai mo kapau ko te faikole ʼe ko he koga tafitō ʼo totatou maʼuli? Tou vakaʼi ʼihi fua lelei.

Te fakakaukau ʼe tokalelei.

ʼE kotou tuʼania koa mo kapau ʼe kotou tau mo he ʼu faigataʼaia pea mo he ʼu ʼahiʼahi ʼi tokotou maʼuli? ʼE fakalotomalohiʼi tatou ʼi te Tohi-Tapu ke tou ‘faikole tuʼumaʼu’ ʼi te ʼu lakaga ʼaia pea mo “fakaha ki te Atua te u mea ae e aoga kia [tatou] aki ni kole.” (1 Tesalonika 5:17; Filipe 4:6) ʼE ui ʼi te Tohi-Tapu kapau ʼe tou haga ki te ʼAtua ʼi te faikole, “ko te tokalelei o te Atua, ae e fakalaka age i te u atamai fuli, e ina taupau anai [ʼotatou] loto mo [ʼatatou] manatu.” (Filipe 4:7) ʼE tou logoʼi anai he fimalie mo kapau ʼe tou tuku ʼotatou tuʼania ki tatatou Tamai ʼae ʼe ʼi selo. ʼI tona fakahagatonu, ʼe ina fakalotomalohiʼi tatou ke tou fai te faʼahi ʼaia. Koia, ʼe ui fenei ai ia Pesalemo 55:22, MN: “Tuku tau kavega kia Sehova, pea ʼe lagolago anai kia koe.”

Tokolahi ʼi te malamanei kua hoko kia natou te faʼahi ʼaia. Ko Hee Ran mai Corée du Sud, ʼe ina ui fenei: “Logo la ʼe au tau mo he ʼu fihifihia lahi kaʼe kapau ʼe au faikoleʼi te ʼu faʼahi ʼaia, ʼe au logoʼi ai toku fimalie pea mo maʼu te malohi moʼo katakiʼi te ʼu aluʼaga ʼaia.” Ko Cecilia mai Philippines, ʼe ina ui fenei: “ ʼI toku ʼuhiga faʼe, ʼe au tuʼania ʼosi ʼo ʼuhiga mo ʼaku taʼahine pea mo taku faʼe ʼae ʼe mole kei ina iloʼi au ʼuhi ko tona mahaki. Kaʼe, neʼe au lava katakiʼi te aluʼaga ʼaia ʼi te ʼaho fuli ʼuhi pe ko te faikole. ʼI taku fai te faʼahi ʼaia, neʼe siʼisiʼi ai leva taku tuʼania. ʼE au iloʼi ko Sehova ʼe tokoni mai anai ke au tokaga lelei kia natou.”

Te fakalotofimalie mo te malohi moka tou tau mo he ʼu ʼahiʼahi.

ʼE kua kotou logoʼi koa he toe tuʼania lahi moka hoko he aluʼaga fakamataku? ʼE feala ke kotou logoʼi he fimalie mo kapau ʼe kotou faikole ki “te Atua o te fakafimalie fuli.” ʼE ui ʼi te Tohi-Tapu ‘’e ina fakalotofimalieʼi tatou ʼi ʼotatou mamahi fuli.’ (2 Kolinito 1:3, 4) Ohage la, ʼi te temi ʼae neʼe lotomamahi ai ia Sesu, “nee tuutuli ifo leva ia o faikole.” Kotea tona fua? “Nee ha mai leva kia ia he aselo mai lagi, o fakamalohii ia.” (Luka 22:41, 43) Ko te tahi tagata agatonu ko Neemia, neʼe lotomamahi ʼuhi ko tona fakamatakuʼi e te hahaʼi agakovi ʼae neʼe natou faiga ke tuku tana fai te gaue ʼa te ʼAtua. Neʼe faikole fenei: “I te lakaga nei, sioku Atua, ke ke fakamalohii au!” ʼE ha mai ʼi te ʼu aluʼaga ʼae neʼe hoko, ko te ʼAtua neʼe tokoni moʼoni kia ia ke ina tauʼi tona mataku pea ke fua lelei tana gaue. (Neemia 6:9-16) Ko Reginald mai Ghana, ʼe ina fakamatala fenei tona aluʼaga: “Moka au faikole, tafitō ʼi te ʼu temi ʼae ʼe au tau ai mo te ʼu faigataʼaia, ʼe au logoʼi ai ʼe au palalau ki he tahi ʼo ʼuhiga mo toku fihifihia. Pea ʼe feala ke tokoni mai mo ina fakafimalieʼi au ʼo ina ui mai ʼe mole ʼaoga ke au mataku.” ʼEi, ʼe feala ke fakafimalieʼi tatou e te ʼAtua moka tou faikole age kia te ia.

Te poto mai te ʼAtua.

ʼE feala ki ʼihi tonu ʼe tou toʼo ke malave kia tatou pea mo natou ʼae ʼe tou ʼoʼofa ai. ʼE feafeaʼi hatatou toʼo he ʼu tonu fakapotopoto? ʼE ui ʼi te Tohi-Tapu: “Kapau e masiva he tahi ia koutou i te poto, ke ina kole ia ki te Atua, ae e foaki lahi ki te u tagata fuli, hala valoki, pea e foaki anai ia kia ia.” (Sakopo 1:5) Kapau ʼe tou kole ke tou maʼu te poto, ʼe fakaʼaogaʼi anai e te ʼAtua tona laumalie maʼoniʼoni moʼo takitaki tatou. Pea ʼaki te faʼahi ʼaia, ʼe feala ai ke tou toʼo he ʼu tonu fakapotopoto. ʼI tona fakahagatonu, ʼe feala ke tou kole tafitō ke tou maʼu ia te laumalie maʼoniʼoni. Koteʼuhi ʼe ui mai e Sesu ʼe “foaki [anai] e te Tamai ʼae ʼi selo te laumalie maʼoniʼoni kia natou ʼae ʼe natou kole kia te ia.”—Luka 11:13, MN.

Maʼia mo Sesu neʼe ʼaoga kia ia ke ina kole te tokoni ʼo tana Tamai moka ina toʼo he ʼu tonu maʼuhiga. ʼE ui mai ʼi te Tohi-Tapu ʼi tana fia filifili he ʼu tagata ʼe toko 12 ke liliu ko ʼana apositolo, “nee nofo leva ia ia i te po katoa o faikole ki te Atua.”—Luka 6:12.

Ohage ko Sesu, tokolahi ia ʼaho nei ʼe natou fiafia ʼi te tali e te ʼAtua ʼanatou kole ʼae ke natou toʼo he ʼu tonu fakapotopoto. Ko Regina mai Philippines, ʼe ina fakamatala te ʼu faʼahiga faigataʼaia neʼe tau mo ia. Ohage la, neʼe tonu ke tokaga ki te ʼu meʼa ʼae ʼe ʼaoga ki tona kiʼi famili hili te mate ʼo tona ʼohoana, mo tana mavae ʼi tana gaue pea mo te ʼu faigataʼaia ʼo tana taupau ʼana taʼahine. Kotea ʼae neʼe tokoni ki ai ke ina toʼo he ʼu tonu ʼe fakapotopoto? ʼE ina ui fenei: “ ʼAki te faikole, neʼe au tuku ai taku falala kia Sehova.” Ko Kwabena mai Ghana, ʼe ina ui fenei pe koʼe neʼe kole tokoni ki te ʼAtua: “Neʼe au mavae ʼi haku gaue ʼe totogi lelei ʼi te laga fale.” Hili taku vakavakaʼi te ʼu faʼahi ʼae ʼe feala ke au fili ke au fai, ʼe ina ui fenei: “Neʼe au haga kole kia Sehova tana takitaki ke feala haku toʼo he tonu ʼe lelei.” ʼE ina hoko atu fenei: “Neʼe au lotomalohi koteʼuhi neʼe tokoni mai te ʼAtua ke au filifili he gaue. Pea ʼaki te gaue ʼaia, neʼe feala ai haku tokaga kia au ʼi te faʼahi fakalaumalie pea mo te faʼahi fakasino.” ʼE toe feala pe mo koutou ke kotou maʼu te takitaki ʼa te ʼAtua. Koia, kotou faikole ki te ʼu faʼahi ʼae ʼe feala ke fakatupu kovi ki ʼakotou felogoʼi mo te ʼAtua.

Neʼe tou talanoa ʼo ʼuhiga mo te ʼu faʼifaʼitaki ʼe ha ai pe koʼe ʼe ʼaoga te faikole. (Ke kotou maʼu he tahi ʼu faʼifaʼitaki, vakaʼi te fakamatala ʼae ʼi te ʼa takai “Te ʼu Lelei ʼo Te Faikole.”) Kaʼe ke kotou maʼu te ʼu lelei ʼaia, ʼe tonu muʼa ke kotou iloʼi te ʼAtua mo tona finegalo. Kapau ʼe kotou loto ki te faʼahi ʼaia, ʼe fakalotomalohiʼi koutou ke kotou kole ki he Fakamoʼoni ʼa Sehova ke ina fai hakotou ako Tohi-Tapu.a ʼE ko he ʼuluaki faʼahi maʼuhiga ʼaia, ke kotou fakaovi ai kia Ia ʼae ʼe “fakalogo ki te kole.” —Pesalemo 65:3.