He Koʼe ʼe Tonu Ke Tou Faikole Tuʼumaʼu?
“Koutou faikole tuumau, i te mea fuape koutou fakafetai.”—1 Tesalonika 5:17, 18.
1, 2. Neʼe fakahā feafeaʼi e Taniela neʼe maʼuhiga kia ia te faikole, pea neʼe malave feafeaʼi te faʼahi ʼaia ki tana felogoi mo te ʼAtua?
NEʼE ko te agamāhani ʼa te polofeta ko Taniela tana faikole ki te ʼAtua tuʼa tolu ʼi te ʼaho. Neʼe tuʼutuli ʼi te matapā faka mālama ʼo tona kogafale fata, ʼaē neʼe haga ki te kolo ʼo Selusalemi, pea neʼe faikole ai. (1 Hau 8:46-49; Taniela 6:10) Pea ʼi te temi ʼaē neʼe tapuʼi ai e te hau te faikole ki he tahi kehe, gata pe kia Taliusi, te hau ʼo Metia, neʼe mole lotolotolua ia Taniela. Tatau aipe peʼe mate anai peʼe kailoa ʼuhi ko te faʼahi ʼaia, kae ko te tagata ʼaia ʼaē neʼe māhani ʼi te faikole, neʼe faikole mamahi tuʼumaʼu kia Sehova.
2 Neʼe koteā te manatu ʼa Sehova ʼo ʼuhiga mo Taniela? ʼI te temi ʼaē neʼe haʼu ai te ʼaselo ko Kapeliele ʼo tali ki te tahi faikole neʼe fai e Taniela, neʼe ina ʼui ko te polofeta ʼaia ʼe ko he tahi “ ʼe ʼofainaʼi ʼaupito.” (Taniela 9:20-23) ʼI te lea faka polofeta ʼo Esekiele, neʼe ʼui e Sehova ko Taniela neʼe ko he tagata faitotonu. (Esekiele 14:14, 20) ʼE hā lelei mai, ʼi tona maʼuli katoa, neʼe tupu te felogoi lelei ʼa Taniela mo tona ʼAtua ʼuhi ko tana ʼu faikole, pea neʼe tokagaʼi e Taliusi te faʼahi ʼaia.—Taniela 6:16.
3. Ohage ko tona fakahā e te meʼa ʼaē neʼe hoko ki te misionea, ʼe tokoni feafeaʼi mai kia tatou te faikole ke tou nonofo agatonu?
3 Ko te faikole tuʼumaʼu ʼe feala ke tokoni mai ke tou tauʼi te ʼu fihifihia. Ohage la ko te misionea ʼi Siaina, ko Harold King, ʼaē neʼe fakatūʼa ke nofo tokotahi lolotoga taʼu e nima. ʼO ʼuhiga mo te meʼa ʼaē neʼe hoko kia ia, neʼe ʼui fēnei e te Tēhina ko King: “Neʼe feala ke nātou fakamavae ʼau mai te ʼu tēhina mo te ʼu tuagaʼane, kae neʼe mole feala ke nātou fakamavae ʼau mai te ʼAtua. . . . Koia, tuʼa tolu ʼi te ʼaho, neʼe ʼau tuʼutuli ʼi toku koga fale pilisoni ʼo faikole leʼolahi, ke logo mai te hahaʼi ʼaē neʼe fakalaka, ʼo ʼau manatuʼi ia Taniela, ʼaē ʼe talanoa ki ai te Tohi-Tapu. . . . ʼI te ʼu lakaga ʼaia neʼe hage neʼe takitaki e te laumālie ʼo te ʼAtua taku fakakaukau ke tokaga ki he ʼu meʼa ʼaoga pea mo ʼau tokalelei ʼi toku loto. ʼAki te faikole, neʼe ʼau maʼu ai te mālohi pea mo te fakaloto fīmālie fakalaumālie.”
4. Koteā te ʼu fehuʼi ʼo ʼuhiga mo te faikole ka tou vakaʼi anai ʼi te alatike ʼaenī?
4 ʼE ʼui fēnei e te Tohi-Tapu: “Koutou faikole tuumau, i te mea fuape koutou fakafetai.” (1 Tesalonika 5:17, 18) ʼAki te tokoni ʼaia, tou vakaʼi te ʼu fehuʼi ʼaenī: He koʼe ʼe tonu ke tou tokakaga lelei ki tatatou ʼu faikole? Koteā te ʼu tupuʼaga ke tou fakaōvi tuʼumaʼu ai kia Sehova? Pea koteā ʼaē ʼe tonu ke tou fai mo kapau ʼe tou manatu ʼe mole tau mo tatou ke tou faikole ki te ʼAtua ʼuhi ko tatatou ʼu hala?
Ke Tuputupu Tatatou Fakakaumeʼa ʼAki Te Faikole
5. Koteā te fakakaumeʼa makehe ʼaē ʼe feala ke tou maʼu ʼaki te faikole?
5 ʼE koutou loto koa ke fakahigoaʼi koutou e Sehova ko tona kaumeʼa? Neʼe ina fakahigoaʼi feiā te pateliaka ko Apalahamo. (Isaia 41:8; Sakopo 2:23) ʼE loto ia Sehova ke tou maʼu he ʼu felogoi feiā mo ia. ʼI tona fakahagatonu, ʼe ina fakaafe tatou ke tou fakaōvi kia te ia. (Sakopo 4:8) ʼAki te fakaafe ʼaia, ʼe tonu ai ke tou fakakaukauʼi te fakatuʼutuʼu makehe ʼaē ko te faikole. ʼE ko he meʼa faigataʼa te maʼu ʼo he ʼaho ke tou palalau ai mo he tagata maʼuhiga ʼo te puleʼaga, pea ʼe toe faigataʼa age hatatou liliu ko tona kaumeʼa! Kae ko te Tupuʼaga ʼo te ʼatulaulau ʼe ina fakaloto mālohiʼi tatou ke tou fakaōvi faʼifaʼitaliha kia te ia ʼaki te faikole, ʼi te temi pe ʼaē ʼe tou loto kiai peʼe mokā ʼaoga. (Pesalemo 37:5) Kapau ʼe tou faikole tuʼumaʼu kia Sehova, pea ʼe tokoni mai ke tou fakakaumeʼa lelei mo ia.
6. Koteā ʼaē ʼe tou ako mai te faʼifaʼitaki ʼa Sesu ʼo ʼuhiga mo te maʼua ʼaē ke tou “faikole tuʼumaʼu”?
6 Kae ʼe faigafua kia tatou hatatou galoʼi te faikole! ʼAki te ʼu fihifihia ʼo te maʼuli ʼi te ʼaho fuli, ʼe lagi feala anai ke tou tokakaga tāfito ki te ʼu faʼahi ʼaia kae mole kei tou faiga ke tou palalau ki te ʼAtua. Neʼe fakaloto mālohiʼi e Sesu tana kau tisipulo ke nātou “faikole tuʼumaʼu,” pea neʼe ina fai e ia totonu te faʼahi ʼaia. (Mateo 26:41, MN ) Logola neʼe maʼumaʼua mai te uhu ki te pōʼuli, kae neʼe ina fakatuʼutuʼu he temi ke palalau ai ki tana Tāmai ʼaē ʼe ʼi selo. ʼI ʼihi temi, ko Sesu neʼe ala ake “i te hegihegi, kae kei fakapouli” ke ʼalu ʼo faikole. (Maleko 1:35) ʼI te tahi ʼu lakaga, ʼi te fakaʼosi ʼo te ʼaho, neʼe ʼalu tokotahi ki he koga meʼa ʼo faikole ai kia Sehova. (Mateo 14:23) Neʼe fakatuʼutuʼu tuʼumaʼu e Sesu he temi ke faikole, pea ʼe tonu mo tatou ke tou fai feiā.—1 Petelo 2:21.
7. Koteā te ʼu ʼaluʼaga ʼaē ʼe tonu ke nātou uga ai tatou ke tou palalau ki tatatou Tāmai ʼaē ʼe ʼi selo ʼi te ʼaho fuli?
7 ʼI te ʼaho fuli pe, ʼe lahi te ʼu faigamālie ke tou faikole tokotahi ai mokā tou felāveʼi mo te ʼu faigataʼaʼia, mokā fakahalaʼi tatou, pea mo kapau ʼe tonu ke tou fai he ʼu puleʼaki. (Efeso 6:18) Ka tou kumi te takitaki ʼa te ʼAtua ʼi te ʼu faʼahi fuli ʼo totatou maʼuli, pea ʼe tuputupu moʼoni ai totatou vāhaʼa fakakaumeʼa mo ia. Kapau ko he ʼu kaumeʼa e toko lua ʼe nā tauʼi fakatahi te ʼu fihifihia, ʼe mole liliu anai koa la tonā fakakaumeʼa ʼo mālohi age? (Tāʼaga Lea 17:17) ʼE toe feiā anai mokā tou falala kia Sehova pea mo tou logoʼi tana tokoni.—2 Fakamatala 14:11.
8. ʼAki te ʼu faʼifaʼitaki ʼo Nehemia, mo Sesu pea mo Ana, koteā ʼaē ʼe tou ako ʼo ʼuhiga mo te loaloaga ʼo tatatou ʼu faikole?
8 ʼE feala ke tou fiafia he neʼe mole faka tuʼakoi e te ʼAtua te temi peʼe ko te ʼu lakaga ʼaē ʼe feala ai ke tou faikole kia te ia! Neʼe foimo faikole fakalogologo ia Nehemia ʼi muʼa ʼo tana fai tana kole ki te hau ʼo Pelesia. (Nehemia 2:4, 5) Neʼe toe fai e Sesu te faikole nounou ʼi te temi ʼaē neʼe ina kole ai kia Sehova ke ina foaki kia ia te mālohi moʼo fakatuʼuake ia Lasalo. (Soane 11:41, 42) Ko Ana ia neʼe “faikole loaloaga ia muʼa ʼo Sehova” ʼi te temi ʼaē neʼe ina fakahā ai kia te ia te ʼu meʼa ʼi tona loto. (1 Samuele 1:12, 15, 16) Ko tatatou ʼu faikole ʼe feala ke nounou peʼe loaloaga ʼo mulimuli ki te ʼu meʼa ʼaē ʼe ʼaoga kia tatou pea mo te ʼu ʼaluʼaga.
9. He koʼe ʼe tonu ke kau ki tatatou ʼu faikole te fakavikiviki pea mo te loto fakafetaʼi ki te ʼu meʼa fuli ʼaē ʼe fai e Sehova maʼa tatou?
9 ʼE lahi te ʼu faikole ʼi te Tohi-Tapu ʼe fakahā ai te loto fakafetaʼi ki te tuʼulaga māʼoluga ʼo Sehova pea mo tana ʼu gāue fakatalakitupua. (Ekesote 15:1-19; 1 Fakamatala 16:7-36; Pesalemo 145) ʼI te meʼa ʼaē neʼe hā kia ia, neʼe sio ia te ʼapositolo ko Soane ki te toko 24 kau tagata ʼāfea—te kau Kilisitiano fakanofo fuli ʼi tonatou tuʼulaga ʼi selo—ʼe nātou fakavikiviki kia Sehova, ʼo nātou ʼui fēnei: “E ke taau, Aliki tomatou Atua, ke ke tali te kololia, mo te fakaapaapa pea mo te mafimafi, koteuhi nee ke fakatupu ia meafuape, pea nee ke finegalo ke natou mauli pea nee fakatupu ai natou.” (Apokalipesi 4:10, 11) Mo tatou ʼe tou maʼu he ʼu tupuʼaga ke tou fakavikiviki tuʼumaʼu ai ki te Tupuʼaga. ʼE fiafia moʼoni te ʼu mātuʼa mokā fakamālo age kia nāua tanā tamasiʼi ʼaki tona loto katoa ʼuhi ko he meʼa neʼe nā fai maʼa ia! Kapau ʼe tou fakakaukauʼi lelei te ʼu gāue manavaʼofa ʼa Sehova pea mo tou loto fakafetaʼi kiai, ʼe ko he faʼahi lelei ʼaia moʼo hikihiki tatatou ʼu faikole ke toe lelei age.
“Koutou Faikole Tuʼumaʼu”—Koteā Tona Tupuʼaga?
10. Koteā te ʼaoga ʼo te faikole ʼi te fakaloto mālohiʼi ʼo tatatou tui?
10 Ko te faikole tuʼumaʼu ʼe maʼuhiga ki tatatou tui. ʼI tana ʼosi foaki he fakatātā ki te ʼaoga ʼaē ke tou “faikole tuʼumaʼu pea mo ʼaua naʼa [tou] fiu” neʼe fehuʼi fēnei e Sesu : “Ka haʼu anai te Foha ʼo te tagata, ʼe ina maʼu moʼoni anai koa te tui ʼi te kele?” (Luka 18:1-8, MN ) ʼE mahino ia, ʼaki te faikole fakamalotoloto ʼe mālohi ai tatatou tui. ʼI te kua matuʼa ʼo te pateliaka ko Apalahamo kae neʼe mole heʼeki ina maʼu hana fānau, neʼe palalau ki te ʼAtua ʼo ʼuhiga mo te faʼahi ʼaia. Moʼo tali ki ai, neʼe ʼuluaki kole e Sehova kia ia ke sio ake ki te lagi pea ke ina lau te ʼu fetuʼu, mo kapau ʼe ina lavaʼi. Pea neʼe fakaloto fīmālieʼi e te ʼAtua ia Apalahamo, ʼo ʼui maʼana: “ ʼE feiā anai tou hāko.” Neʼe koteā tona fua? Ko Apalahamo “neʼe tui kia Sehova; pea neʼe lau te faʼahi ʼaia kia ia ko he faitotonu.” (Senesi 15:5, 6) Kapau ʼe tou avahi totatou loto kia Sehova ʼi te faikole, mo tali tana takitaki mai te Tohi-Tapu, pea mo tou fakalogo kia te ia, ʼe ina fakaloto mālohiʼi anai tatatou tui.
11. ʼE lava tokoni feafeaʼi te faikole ke tou tauʼi te ʼu faigataʼaʼia?
11 Ko te faikole ʼe feala ke toe tokoni mai moʼo fakatokatoka te ʼu fihifihia. ʼE mamafa koa kia koutou te maʼuli pea mo faigataʼa ʼaupito te ʼu ʼaluʼaga ʼaē ʼe koutou tauʼi? ʼE ʼui fēnei mai e te Tohi-Tapu: “Tuku tau kavega kia Sehova totonu, pea ko ia totonu ʼe lagolago anai kia te koe. ʼE mole ina fakagafua anai ke tūkia ia ia ʼaē ʼe faitotonu.” (Pesalemo 55:22) ʼI te temi ʼaē ʼe tonu ai ke tou fai he ʼu puleʼaki faigataʼa, ʼe feala ke tou mulimuli ki te faʼifaʼitaki ʼa Sesu. Neʼe faikole po katoa ʼi muʼa ʼo tana filifili tana toko 12 kau ʼapositolo. (Luka 6:12-16) Pea ʼi te po ʼi muʼa ʼo tona mate, ʼuhi ko tana faikole fakamalotoloto “neʼe liliu tona kakava ohage ko he ʼu toʼi toto ʼe hali ki te kele.” (Luka 22:44, MN ) Koteā ʼaē neʼe hoko ai? “Neʼe tali leleiʼi ia ia ʼuhi ko tana manavasiʼi ki te ʼAtua.” (Hepeleo 5:7, MN ) Kapau ʼe tou faikole fakamalotoloto pea mo fai tuʼumaʼu, pea ʼe tokoni anai te ʼAtua kia tatou ke tou tauʼi te ʼaluʼaga fakatupu hoha pea mo te ʼu ʼahiʼahi faigataʼa.
12. ʼE hā feafeaʼi te tokaga ʼa Sehova kia tatou takitokotahi ʼi tana fakatuʼutuʼu te faikole?
12 Ko te tahi tupuʼaga ʼaē ke tou fakaōvi kia Sehova ʼaki te faikole heʼe fakaōvi anai ia Sehova kia tatou. (Sakopo 4:8) Ka tou avahi totatou loto kia Sehova ʼi te faikole, pea ʼe mole tou logoʼi koa la ʼe ina ʼiloʼi te ʼu meʼa ʼaē ʼe ʼaoga kia tatou pea mo tokaga kia tatou ʼaki te ʼofa? ʼE tou logoʼi ko te ʼAtua ʼe ʼofa kia tatou takitokotahi. Neʼe mole ina foaki age ki he tahi kehe te maʼua ʼaē ke fakalogo ki te ʼu faikole fuli ʼaē ʼe fai e tana ʼu kaugana kia te ia, tanatou Tāmai ʼaē ʼi selo. (Pesalemo 66:19, 20; Luka 11:2) Pea ʼe ina fakaafe tatou ke tou ‘vevete kia te ia tatatou ʼu tuʼania fuli, heʼe tokaga ia kia tatou.’—1 Petelo 5:6, 7.
13, 14. Koteā te ʼu tupuʼaga ʼaē ʼe tonu ai ke tou faikole tuʼumaʼu?
13 Ko te faikole ʼe feala ke ina foaki kia tatou te faʼafai lahi ʼi te fai faka mafola, pea mo fakaloto mālohiʼi tatou mokā tou fia tuku tatatou gāue ʼuhi ko te mole fia logo ʼa te hahaʼi peʼe ko te fakafeagai. (Gaue 4:23-31) Ko te faikole ʼe feala ke ina hāofaki tatou mai “te ʼu kākā ʼa te Tevolo.” (Efeso 6:11, 17, 18, MN ) Ka tou faiga ke tou tauʼi te ʼu ʼahiʼahi, ʼe feala ke tou kole tuʼumaʼu ki te ʼAtua ke ina foaki mai te mālohi. ʼI te faikole ʼaē neʼe akoʼi mai e Sesu, ʼe tou kole ai kia Sehova ke ina “haofaki [tatou] mai te kovi,” ia Satana te Tevolo.—Mateo 6:13.
14 Kapau ʼe tou haga kole ke tokoni mai ke tou puleʼi totatou ʼu holi kovi, pea ʼe tou logoʼi anai te tokoni mai ʼa Sehova. ʼE tou maʼu te fakapapau ʼaenī: “Ko te ʼAtua ʼe agatonu, ʼe mole ina tuku anai ke fakahalaʼi koutou ʼo laka age ʼi te meʼa ʼaē ʼe koutou lava tali, kae ʼaki te fakahala ʼe ina toe foaki atu anai mo he faigamālie ke tou hāo ai.” (1 Kolonito 10:13, MN ) Neʼe logoʼi e te ʼapositolo ko Paulo te tokaga ʼa Sehova ʼaē neʼe ina fakaloto mālohiʼi ia ia ʼi te ʼu ʼaluʼaga kehekehe. Neʼe ina ʼui fēnei: “ ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.”—Filipe 4:13, MN; 2 Kolonito 11:23-29.
Tou Kātaki ʼo Faikole Logola Tatatou ʼu Hala
15. Koteā ʼaē ʼe feala ke hoko mokā mole mulimuli tatatou aga ki te ʼu lekula ʼa te ʼAtua?
15 Ke feala ke logoʼi e te ʼAtua tatatou ʼu faikole, ʼe tonu ke tou tali te ʼu tokoni ʼo Tona Folafola. Neʼe tohi fēnei e te ʼapositolo ko Soane: “Ko he mea pe e tou kole, e tou mau maia te ia, koteuhi e tou taupau tana u fekau pea e tou fai ia mea e lelei kia te ia.” (1 Soane 3:22) Kae koteā ʼaē ʼe feala ke hoko mokā mole mulimuli tatatou aga ki te ʼu lekula ʼa te ʼAtua? Ko Atama mo Eva neʼe nā fenonoʼi ʼi tanā ʼosi agahala ʼi te ʼōloto ʼo Eteni. Mo tatou ʼe lagi tou fia fenonoʼi “mai te fofoga ʼo Sehova” pea mole kei tou faikole. (Senesi 3:8) ʼE ʼui fēnei e te tēhina ko Klauss, ko te tagata taupau feʼaluʼaki kua māhani: “Neʼe ʼau tokagaʼi, ko te ʼuluaki hala ʼaē ʼe fai tuʼumaʼu e nātou ʼaē neʼe nātou līaki ia Sehova pea mo tana kautahi, ko tanatou mole kei faikole.” (Hepeleo 2:1) Neʼe ko te meʼa ʼaia neʼe hoko kia José Ángel. ʼE ina ʼui fēnei: “Lolotoga teitei taʼu e valu, neʼe tahitahiga taku faikole kia Sehova. Maʼa ʼaku, neʼe mole tau mo ʼau ke ʼau palalau kia te ia, logola kia ʼau neʼe ko taku Tāmai ʼaē ʼe ʼi selo.”
16, 17. Koutou tuku mai he ʼu faʼifaʼitaki ʼe fakahā ai peʼe lava tokoni feafeaʼi mai tatatou faikole tuʼumaʼu ke tou tauʼi totatou ʼu vaivaiʼaga fakalaumālie.
16 Ko ʼihi ia tatou ʼe lagi tou manatu ʼe mole tau mo tatou ke tou faikole, ʼuhi ko totatou ʼu vaivaiʼaga fakalaumālie peʼe ʼuhi he neʼe tou agahala. Kae ʼe ko te temi totonu ʼaia ʼaē ʼe ʼaoga ʼaupito ai ke tou faikole. Ko Sonasi neʼe hola he neʼe mole ina fia fakahoko te gāue ʼaē neʼe fakatotonu age. Kae ‘ ʼi tana tuʼutāmaki, neʼe pāui ia Sonasi kia Sehova, pea neʼe ina tali age. ʼI te loto fatu ʼo te Seole, neʼe pāui ia Sonasi ke hāofaki ia ia, pea neʼe logo ia Sehova ki tona leʼo.’ (Sonasi 2:2) Neʼe faikole Sonasi, pea neʼe tali e Sehova, pea neʼe toe mālohi ai ia Sonasi ʼi te faʼahi fakalaumālie.
17 ʼO feiā mo José Ángel, neʼe faikole fakamalotoloto ki te ʼAtua ke tokoni age kia ia. ʼE ina ʼui fēnei: “Neʼe ʼau avahi toku loto ki te ʼAtua pea neʼe ʼau kole mamahi ke fakamolemole mai kia ʼau. Pea neʼe tokoni moʼoni mai kia ʼau. ʼI taku manatu, kanaʼauala te tokoni mai ʼa te faikole, neʼe mole feala haku toe liliu ki te moʼoni. ʼI te temi nei, ʼe ʼau faikole tuʼumaʼu ʼi te ʼaho fuli, pea ʼe ʼau loto ke hoko vave mai te ʼu temi ʼaia.” ʼE tonu ke tou logoʼi tuʼumaʼu ʼe feala ke tou faikole faʼifaʼitaliha ki te ʼAtua ʼo ʼuhiga mo tatatou ʼu hala, pea ke tou kole ʼaki he agavaivai ke ina fakamolemole mai. ʼI te temi ʼaē neʼe fakahā ai e te Hau ko Tavite tana ʼu agahala, neʼe fakamolemole age e Sehova. (Pesalemo 32:3-5) ʼE fia tokoni mai ia Sehova kia tatou, kae mole ina fia tauteaʼi tatou. (1 Soane 3:19, 20) Pea ko te faikole ʼa te ʼu tagata ʼāfea ʼo te kokelekasio ʼe feala ke tokoni mai kia tatou ʼi te faʼahi fakalaumālie, heʼe ko te ʼu faikole ʼaia ʼe “mālohi ʼaupito ia.”—Sakopo 5:13-16, MN.
18. Koteā te falala ʼe feala ke maʼu e te ʼu kaugana ʼa te ʼAtua, tatau aipe peʼe koteā te agahala ʼaē neʼe nātou fai?
18 Ko ai te tāmai ʼaē ka fakafisi anai ki tona foha ʼaē ʼe ina kole age, ʼaki he agavaivai, ke tokoni age kia ia he neʼe ina fai hana hala? Ko te lea fakatātā ʼo te foha maumau koloā ʼe ina fakahā mai, tatau aipe peʼe koteā te agahala ʼaē neʼe tou fai, kae ko tatatou Tāmai ʼaē ʼe ʼi selo ʼe fiafia mokā tou toe liliu age kia te ia. (Luka 15:21, 22, 32) ʼE uga e Sehova ia te hahaʼi fuli ʼaē neʼe agahala ke nātou pāui kia te ia, “heʼe ina fakamolemole lahi anai.” (Isaia 55:6, 7) Logola neʼe fai e Tavite te ʼu agahala mamafa, kae neʼe pāui kia Sehova, ʼo ina ʼui fēnei: “Fakalogo, Ê ʼAtua ki taku faikole; pea ʼaua naʼa ke nono mamaʼo mai taku kole ʼaē ke ke ʼofa mai.” Neʼe ina toe ʼui fēnei: “ ʼI te afiafi, mo te uhu pea mo te fetapā ʼe mole feala haku fakagata taku hoha, pea ʼe ʼau tagi pea ʼe logo [ia Sehova] ki toku leʼo.” (Pesalemo 55:1, 17) ʼI meʼa fakaloto fīmālie leva!
19. He koʼe ʼe mole tonu ke tou foimo manatu atu aipe ko te mole hage ʼaē neʼe tali e te ʼAtua ki te ʼu faikole ʼe ko he fakamoʼoni ʼaia ʼe mole ina leleiʼia?
19 E feafeaʼi mo kapau ʼe mole tou maʼu atu aipe he tali ki tatatou faikole? ʼE tonu ke tou vakaʼi ke ʼalutahi tatatou ʼu faikole mo te finegalo ʼo Sehova pea ke tou fai ʼaki te huafa ʼo Sesu. (Soane 16:23; 1 Soane 5:14) Neʼe talanoa te tisipulo ko Sakopo ki ʼihi kau Kilisitiano neʼe mole tali ki tanatou ʼu faikole he neʼe nātou ‘kole ʼaki he fakatuʼutuʼu kovi.’ (Sakopo 4:3) ʼI te tahi age faʼahi, ʼe mole tonu ke tou manatu atu aipe kapau ʼe mole tali mai e te ʼAtua ki tatatou ʼu faikole, ʼe ko he fakamoʼoni ʼaia ʼe mole ina leleiʼia. ʼI ʼihi temi, ʼi muʼa ʼo tana tali kiai, ʼe lagi tuku e Sehova te kau atolasio agatonu ke nātou haga faikole ʼo ʼuhiga mo he faʼahi lolotoga he temi. Neʼe ʼui fēnei e Sesu: “Ke koutou haga kole, pea ʼe foaki atu anai kia koutou.” (Mateo 7:7, MN ) Koia ʼe tonu ai ke tou “kataki . . . aipe i te faikole.”—Loma 12:12.
Tou Faikole Tuʼumaʼu
20, 21. (a) He koʼe ʼe tonu ke tou faikole tuʼumaʼu ʼi te ʼu “aho fakamuli” ʼaenī? (b) Koteā anai ka tou maʼu mokā tou fakaōvi ʼi te ʼaho fuli ki te ʼafioʼaga ʼo te ʼofa makehe ʼo Sehova?
20 Ko te ʼu faigataʼaʼia pea mo te ʼu fihifihia, ʼe ʼāsili tuputupu ʼi te ʼu “aho fakamuli” ʼaenī, pea ʼe fakaʼiloga ʼaki “he u temi faigataa.” (2 Timoteo 3:1) Pea ʼe faigafua tatatou tuʼania fau ki totatou ʼu fihifihia. Kae kapau ʼe tou faikole tuʼumaʼu, pea ʼe tokoni mai anai ke tou tokagaʼi tāfito te ʼu meʼa fakalaumālie logola te ʼu fihifihia, mo te ʼu ʼahiʼahi, pea mo te lotovaivai. Ko te ʼu faikole ʼaē ʼe tou fai ʼi te ʼaho fuli kia Sehova, ʼe feala ke nātou foaki mai te tokoni maʼuhiga ʼaē ʼe ʼaoga kia tatou.
21 Ko Sehova, ia ia ʼaē ʼe “fakalogo ki te ʼu faikole,” ʼe ina maʼu tuʼumaʼu pe he temi moʼo fakalogo kia tatou. (Pesalemo 65:2) ʼAua naʼa tou maʼumaʼua fau ke mole tou palalau kia te ia. Ko tatatou fakakaumeʼa mo te ʼAtua ʼe ko te meʼa ʼaē ʼe maʼuhiga tokotahi ʼi te ʼu meʼa ʼaē ʼe tou maʼu. ʼAua naʼa tou meʼa noaʼi te faʼahi ʼaia. “Tou fakaōvi ʼaki te fakahagatonu ki te ʼafioʼaga ʼo te ʼofa makehe, ke tou maʼu ai te manavaʼofa pea mo maʼu te ʼofa makehe moʼo tokoni mai ʼi tona temi totonu.”—Hepeleo 4:16, MN.
ʼE Koutou Tali Feafeaʼi Anai?
• Koteā ʼaē neʼe tou ako mai te polofeta ko Taniela ʼo ʼuhiga mo te maʼuhiga ʼo te faikole?
• ʼE tou lava fakamālohi feafeaʼi tatatou fakakaumeʼa mo Sehova?
• He koʼe ʼe tonu ke tou faikole tuʼumaʼu?
• Logola tatatou manatu ʼaē ʼe mole tau mo tatou ke tou faikole, kae he koʼe ʼe mole tonu ke ina tāʼofi tatou ke tou faikole kia Sehova?
[Paki ʼo te pasina 16]
Ko Nehemia neʼe ina fai he kole nounou pea mo fakalogologo ʼi muʼa ʼo tana palalau ki te hau
[Paki ʼo te pasina 17]
Ko Ana “neʼe faikole loaloaga ia muʼa ʼo Sehova”
[Paki ʼo te pasina 18]
Ko Sesu neʼe faikole ʼi te po katoa ʼi muʼa ʼo tana fili tana toko 12 kau ʼapositolo
[Paki ʼo te pasina 20]
ʼI te ʼaho katoa ʼe tou maʼu te ʼu faigamālie ke tou faikole ai