Ko ʼAfea ʼAe Ka Hoko Anai Te Fakaʼosi?

KOTOU TOKAGAʼI PE KOTEA ʼAE NEʼE UI E SESU:

“Koia, kotou nonofo tokaga, koteʼuhi ʼe mole kotou iloʼi te ʼaho peʼe ko te hola.”—MATEO 25:13.

“Kotou tokakaga, kotou ʼalaʼala, he ʼe mole kotou iloʼi te temi ʼae kua fakatuʼutuʼu.”—MALEKO 13:33.

Koia ʼe mole he tahi ʼe ina iloʼi pe ʼe hoko anai ʼafea ia te fakaʼosi ʼo te malama ʼaeni. ʼE ui pe ʼi te Tohi-Tapu, neʼe “kua fakatuʼutuʼu” e te ʼAtua ia “te ʼaho pea mo te hola.” (Mateo 24:36) Ko tona fakaʼuhiga koa ʼe mole feala ke tou iloʼi pe ʼe kua vave ovi mai ia te fakaʼosi? Kailoa. Neʼe ui e Sesu ki ʼana tisipulo ke natou lamalama te ʼu aluʼaga ʼae ka hoko anai, he ʼe tou iloʼi ai kua vave hoko mai te fakaʼosi.

TE FAKAILOGA

ʼE ʼi ai anai he ʼu aluʼaga ka hoko, ʼe ko te fakailoga ʼaia kua tou kaku ki te ʼu ʼaho fakaʼosi. Neʼe ui e Sesu: “ ʼE fakafeagai anai he fenua ki he tahi age fenua, pea mo he puleʼaga hau ki he tahi age puleʼaga hau, pea ʼe hoko anai ni hoge pea mo ni mafuike mai he potu ki he tahi age potu.” (Mateo 24:3, 7) Pea neʼe ina ui ʼe ʼi ai anai he ʼu “mahaki.” (Luka 21:11) Neʼe kua kotou tokagaʼi la te kua hoko ʼo te ʼu fakakikite ʼa Sesu?

Ia ʼaho nei, kua fihifihia te malamanei katoa ʼi te ʼu tau, te pakupaku, te ʼu mafuike, pea mo ni mahaki fakamataku. Ohage la, ʼi te 2004, neʼe hoko ia te mafuike lahi ʼi te Océan Indien, ʼo tupu ai ia te toe peau lahi. Neʼe ko te toko 225 000 hahaʼi neʼe mamate ai. ʼI te ʼu taʼu ʼaeni ʼe tolu kua hili, ko te toko 6,9 miliona hahaʼi neʼe mamate ʼuhi ko te taʼi mahaki Covid-19. Neʼe ui e Sesu, ka hoko anai te ʼu aluʼaga ʼaia, kua tou iloʼi kua vave hoko mai te fakaʼosi.

“TE ʼU ʼAHO FAKAMULI”

Ka palalau ʼi te Tohi-Tapu ki te ʼu “ ʼaho fakamuli,” ʼe fakaʼuhiga ia ki te ʼu ʼaho ʼae ʼi muʼa ʼo te fakaʼosi ʼo te malama ʼaeni. (2 Petelo 3:3, 4) Ka tou lau ia 2 Timoteo 3:1-5, ʼe fakamatalatala ai te fakaalualu ʼo kovi ʼosi te aga ʼa te hahaʼi. (Vakaʼi te fakamatala ʼae ʼi te ʼa takai “ ʼI Muʼa ʼo Te Hoko ʼo Te Fakaʼosi ʼo Te Malama ʼAeni.”) Neʼe kua kotou tokagaʼi pe te fetogi ʼo te aga ʼa te hahaʼi. Kua natou tahi manatu pe kia natou totonu, mo manumanu, mo agakovi, ʼo mole kei manavaʼofa. Ko te tahi fakamoʼoni la ʼaia kua vave hoko mai te fakaʼosi.

ʼE loaloaga koa te ʼu ʼaho fakaʼosi? ʼE ui ʼi te Tohi-Tapu, “kua nounou tona temi.” ʼOsi ʼaia pea maumauʼi anai e te ʼAtua “ia natou ʼae ʼe natou maumauʼi te kele.”—Fakaha 11:15-18; 12:12.

KUA OVI MAI TE PALATISO!

Neʼe kua taʼofi e te ʼAtua ia te ʼaho pea mo te hola ʼae ka ina fakaʼauha anai ia te malama agakovi ʼaeni. (Mateo 24:36) Kae ʼe mole loto e te ʼAtua “ke fakaʼauha he tahi.” (2 Petelo 3:9) Koia, ʼe ina tuku ai ki te hahaʼi fuli ia te faigamalie mo te fealagia ʼae ke natou fakaʼapaʼapa ki ʼana lao. ʼE loto ia ke hao te hahaʼi fuli ʼi te fakaʼosi ʼo te malama ʼaeni, pea ke natou maʼuʼuli ʼi te palatiso ʼi te malama foʼou.

Koia, ʼe ina akoʼi ai te hahaʼi ke natou mahino ki te meʼa ʼae ʼe tonu ke natou fai ke feala hanatou kau ia natou ʼae ka maʼuʼuli anai ʼi te malama foʼou, ʼae ka takitaki anai tona Puleʼaga. Neʼe ui e Sesu ʼe fakamafola anai ia te logo lelei ʼo te Puleʼaga “ ʼi te kele katoa.” (Mateo 24:14) Neʼe faifakamafola te kau Fakamoʼoni ʼa Sehova ʼi ni hola ʼe lauʼi miliale, ʼo natou akoʼi ai ki te hahaʼi ia te logo lelei ʼae ʼe maʼu ʼi te Tohi-Tapu. Pea neʼe ui e Sesu ʼe fakahoko anai ia te gaue ʼaia ʼi te kele katoa pea hoki hoko mai leva ia te fakaʼosi.

Kua vave pulihi leva ia te ʼu puleʼaga fakatagata. Meʼa lelei, he ʼe feala pe ke kotou hao ʼi te fakaʼosi ʼo te malama ʼaeni pea mo maʼuʼuli ʼi te Palatiso ʼi te kele.