ʼE Ke Maʼu Te Malohi Moʼo Tauʼi ʼOu Fihifihia ʼi Tau Lau Te Tohi-Tapu

1. Kotea te ʼu faigataʼaʼia ʼe tauʼi e te ʼu kaugana ʼa Sehova?

ʼE LAGI ʼe ke tau nei mo he fihifihia. Lagi ko he tehina peʼe ko he tuagaʼane ʼi te kokelekasio neʼe ina fakamamahiʼi koe. (Sakp. 3:2) Peʼe ko he tahi ʼe ina vaʼi koe ʼi tau fale ako peʼe ʼi tau fale gaue. (1 Pet. 4:3, 4) Peʼe ko he tahi ʼo tau famili ʼe fakafeagai atu. (Mat. 10:35, 36) ʼUhi ko te ʼu aluʼaga ʼaia, ʼe feala ke ke ui pe ʼe ʼaoga koa ke ke hoko atu tau tauhi ʼae kia Sehova. Tatau aipe pe kotea te faigataʼaʼia ʼae ʼe ke tau mo ia, ke ke tui papau ʼe foaki atu e Sehova te poto pea mo te malohi ke ke lava tauʼi.

2. ʼE tokoni feafeaʼi mai ia te lau ʼo te Tohi-Tapu ʼo mulimuli kia Loma 15:4?

² ʼE tou maʼu ʼi te Tohi-tapu te ʼu fakamatala ʼo ni kaugana ʼo te ʼAtua neʼe natou tau mo he ʼu fihifihia, pea ʼe feala ke tou taʼofi ni ako mai ai. ʼE fakamoʼoni ki te faʼahi ʼaia ia te apositolo ko Paulo. (Lau ia Loma 15:4.) ʼI tatatou lau te ʼu fakamatala ʼaia, ʼe moʼoni ʼe feala ke tou maʼu ai he fakalotofimalie. Kae, ʼe mole gata pe ki tatatou lau te ʼu fakamatala ʼaia, ʼe tonu foki ke fetogi ai tatatou faʼahiga manatu, pea ke malave ki totatou loto. Ke hoko te faʼahi ʼaia, ʼe feala ke tou mulimuli ki te ʼu tokoni ʼe fa ʼaeni: (1) Faikole, (2) Moka ke lau, faiga ke ke sio ki te meʼa ʼae ʼe hoko, (3) Metitasio, pea (4) Maʼuliʼi. ʼI te alatike ʼaeni, ʼe tou vakaʼi anai te ʼu tokoni takitahi ʼaiab pea mo mulimuli ki ai moʼo taʼofi he ʼu ako mai te ʼu fakamatala ʼa Tavite pea mo Paulo.

3. Kotea ʼae ʼe tonu ke ke fai ia muʼa ʼo tau lau te Tohi-Tapu, pea kotea tona tupuʼaga?

³ (1) Faikole. Ia muʼa ʼo tau lau te Tohi-Tapu, kole kia Sehova ke tokoni atu ke ke mahino ki te ʼaoga ʼo te fakamatala ʼae ka ke lau. Ohage la, kole kia Sehova ke tokoni atu ke ke maʼu ai te ʼu pelesepeto moʼo fakatokatoka ʼou fihifihia.—Flp. 4:6, 7; Sakp. 1:5.

4. ʼE feafeaʼi hau leleiʼia lahi age anai he fakamatala?

⁴ (2) Moka ʼe ke lau te Tohi-Tapu, faiga ke ke sio ki te meʼa ʼae ʼe hoko. Neʼe fakatupu tatou e Sehova ʼaki te fealagia ʼaia. Faigaʼi ke ke hage ko ia ʼae ʼe palalau tafito ki ai ʼi te fakamatala. Pea mo faiga ke ke sio ki te ʼu meʼa ʼae ʼe sio ki ai, pea mo logoʼi te ʼu meʼa ʼae ʼi tona loto. ʼI tau fai feia, ʼe ke leleiʼia lahi age anai te fakamatala ʼaia.

5. Kotea te fakaʼuhiga ʼo te metitasio? Kotea te ʼu fehuʼi ʼe feala ke tokoni atu ke ke metitasio?

⁵ (3) Metitasio. Ko te metitasio ʼe fakaʼuhiga ke ke fakakaukauʼi loloto te ʼu meʼa ʼae ʼe ke lau, pea ke ke taʼofi mai ai he ʼu ako. ʼE toe tokoni atu ke ke fakaalu tahi te ʼu manatu pea ke ke mahino lelei age ki te fakamatala. Kapau ʼe mole ke metitasio, pea ʼe hage pe ko hau fakaʼaogaʼi he ʼu meʼa moʼo fai ʼaki hau meʼa kai. Kae kapau ʼe mole ke kuka fakatahi te ʼu meʼa fuli ʼaia, pea ʼe mole kano lelei anai tau meʼa kai. Koʼeni te ʼu fehuʼi ʼe feala ke ke fai ʼe tokoni atu ki tau metitasio: ‘Kotea ʼae neʼe fai e ia ʼae ʼe palalau tafito ki ai te fakamatala moʼo fakatokatoka tona fihifihia? Neʼe tokoni feafeaʼi ia Sehova kia ia? Kotea te ʼu ako ʼe au taʼofi mai te fakamatala ʼaeni, pea ʼe tokoni feafeaʼi mai ke au lava ʼutakiʼi?’

6. He koʼe ʼe tonu ke tou maʼuliʼi te ʼu meʼa ʼae ʼe tou ako?

⁶ (4) Maʼuliʼi. Neʼe ui e Sesu ko ia ʼae ʼe mole ina maʼuliʼi te ʼu meʼa ʼae ʼe ina ako, ʼe hage ko he tagata ʼe ina laga tona ʼapi ʼi te ʼone. ʼE gaue kinakina kae ʼe mole hona fua. Koteʼuhi moka hoko mai he afā peʼe ko he puvai, ʼe holo anai tona ʼapi. (Mat. 7:24-27) ʼO toe feia pe, kapau ʼe tou muliʼi te ʼu tokoni ʼaeni ʼe tolu ʼae neʼe tou vakaʼi, kae ʼe mole tou maʼuliʼi ʼe vaʼiganoa anai ʼatatou faiga. ʼI te temi ʼae ka hoko mai anai te ʼu ʼahiʼahi peʼe ko te ʼu fakataga, ʼe vaivai anai tatatou tui. Kae kapau ʼe tou maʼuliʼi te ʼu meʼa ʼae ʼe tou ako, ʼe tou fai anai he ʼu tonu ʼe lelei, pea ʼe tou maʼu anai te tokalelei. ʼE malohi age anai tatatou tui. (Esa. 48:17, 18) Koia tou fakaʼaogaʼi te faʼahiga ako ʼaeni ʼo te Tohi-Tapu moʼo taʼofi he ʼu ako mai he aluʼaga neʼe hoko kia Tavite.

NEʼE KAKAʼI IA TAVITE

7. Kotea te fakamatala Fakatohi-tapu ʼe tou vakaʼi anai?

⁷ Neʼe kakaʼi koa koe e hou kaumeʼa peʼe ko he tahi ʼo tou famili neʼe ke falala ki ai? Kapau ko ia, ʼe tokoni atu anai kia koe tau vakaʼi pe ʼe kotea neʼe fai e Tavite ʼi tona kakaʼi e tona foha ko Apesalone, ʼae neʼe faiga ke ina faʼao te tuʼulaga hau ʼo tana tamai.—2 Sam. 15:5-14, 31; 18:6-14.

8. Kotea ʼae ʼe feala ke ke fai ke tokoni atu ia Sehova?

⁸ (1) Faikole. ʼI tau manatuʼi te fakamatala ʼae neʼe ke lau, fakaha kia Sehova tou mamahi pea mo te ʼu meʼa fuli ʼae ʼe ke logoʼi, ʼuhi ko tou kakaʼi. (Pes. 6:7-10) Pea kole age ke tokoni atu ke ke maʼu te ʼu pelesepeto ʼae ka ʼaoga atu moʼo tauʼi tou faigataʼaʼia.

9. Fakamatala fakanounou te agakaka ʼa Apesalone kia Tavite?

⁹ (2) Faiga ke ke sio ki te ʼu meʼa ʼae ʼe hoko kia Tavite, pea mo logoʼi te ʼu meʼa ʼae ʼi tona loto. Lolotoga ni taʼu neʼe aga kaka ia tona foha ko Apesalone ki te hahaʼi ke natou ʼoʼofa kia ia. (2 Sam. 15:7) ʼI tana maʼu leva he temi faigamalie, neʼe ina fekauʼi te ʼu tagata ke natou olo ki te fenua katoa ʼo uga te hahaʼi ke natou fakanofo hau ia ia. Neʼe ina toe kakaʼi ia Asitofele, ʼae neʼe ko te tagata faitokoni mo kaumeʼa ʼo Tavite, ke toe kau mo ia ki tana fakatuʼutuʼu. Hili tona fakanofo hau, neʼe faiga ke ina puke mo matehi tana tamai ʼae neʼe lagi mahaki kovi. (Pes. 41:2-10) ʼI te iloʼi leva e Tavite tana fakatuʼutuʼu kaka ʼaia, neʼe hola ai leva mai Selusalemi. Ki mulli age, neʼe tauʼi e te ʼu tagata ʼa Apesalone ia te kau solia ʼa Tavite. Neʼe to leva ia te kau fakafeagai, pea mo mate ai ia Apesalone.

10. Kotea ʼae neʼe lagi feala pe ke logoʼi e Tavite?

¹⁰ Pea faiga ke ke logoʼi pe kotea la neʼe lagi logoʼi e Tavite. Neʼe ʼofa ia Tavite kia Apesalone pea neʼe falala kia Asitofele. Kae neʼe nā kakaʼi ia ia. Pea neʼe faiga ia Apesalone ke ina matehi ia ia. Neʼe lagi lotomamahi ia Tavite. Pea neʼe feala pe ke mahalohalo ki ʼihi ʼi ʼona kaumeʼa, lagi neʼe natou toe lagolago mo natou kia Apesalone, ʼo mole kei falala ai kia natou. Neʼe feala pe ke manatu kia ia totonu pea mo hola tokotahi mai te fenua. Pe neʼe feala pe ke lotovaivai. Kae neʼe mole manatu feia ia Tavite. Neʼe ina tauʼi pe te ʼu fihifihia ʼaia. ʼO feafeaʼi?

11. Kotea ʼae neʼe fai e Tavite?

¹¹ (3) Metitasio. Kotea te ʼu ʼe feala ke ke maʼu mai te fakamatala ʼaia? Moʼo tali ki ai, ke ke fai te fehuʼi ʼaeni: “Kotea neʼe fai e Tavite moʼo tauʼi te aluʼaga ʼaia?” Neʼe mole ina foimo fai atu aipe he tonu, kae neʼe ina toʼo he temi moʼo fakakaukauʼi pe kotea ʼae ka ina fai anai. Pea neʼe ina foimo fakahoko tana tonu. Neʼe mole mataku ia. Neʼe kole tokoni kia Sehova pea ki ʼona kaumeʼa. Logo la tona lotomamahi, neʼe mole ita ia. Kae neʼe falala pe kia Sehova mo ʼona kaumeʼa.

12. Neʼe tokoni feafeaʼi ia Sehova kia Tavite?

¹² Neʼe tokoni feafeaʼi ia Sehova kia Tavite? Kapau ʼe ke fai he ʼu fekumi, ʼe ke iloʼi anai neʼe foaki age e Sehova tona malohi ke faʼa kataki. (Pes. 3:1-9) Neʼe ina tapuakiʼi te ʼu tonu ʼae neʼe ina fai. Neʼe toe tokoni ia Sehova ki te ʼu kaumeʼa ʼo Tavite, ʼi tanatou tau ʼae moʼo puipui ia ia.

13. ʼE feafeaʼi hau faʼifaʼitakiʼi ia Tavite mo kapau neʼe fakamamahiʼi koe e he tahi? (Mateo 18:15-17)

¹³ (4) Maʼuliʼi. Ke ke fai te fehuʼi ʼaeni: “ ʼE feafeaʼi haku faʼifaʼitakiʼi ia Tavite?” Ohage ko ia, fai vave he puleʼaki moʼo fakatokatoka te fihifihia. ʼO mulimuli ki te aluʼaga ʼae neʼe hoko, ʼe feala hau mulimuli ki te ʼu faʼahi fuli ʼo te tokoni ʼa Sesu ʼae ia Mateo kapite 18, peʼe ke alu pe ʼo fakatokatoka mo ia ʼae neʼe ina fakamamahiʼi koe. (Lau ia Mateo 18:15-17.) ʼAua naʼa ke fai he ʼu tonu kae kei ke ita. Kole kia Sehova ke ina fakamalū ifo tou ita, pea ke ina foaki atu te poto ke ke iloʼi ai te meʼa ʼae ʼe tonu ke ke fai. Falala ki ʼou kaumeʼa pea mo tali ʼanatou tokoni. (Taag. 17:17) Pea ko te meʼa ʼae ʼe maʼuhiga, ke ke mulimuli ki te ʼu tokoni ʼae ʼe foaki atu e Sehova ʼi tana Folafola.—Taag. 3:5, 6.

NEʼE LIAKINA IA PAULO

14. Ko te ʼu aluʼaga fea ʼe fakalotomalohiʼi ai koe e 2 Timoteo 1:12-16 pea mo te 4:6-11, 17-22?

¹⁴ ʼE fakafeagai atu koa he tahi ʼo tou famili? Peʼe ke maʼuli ʼi he fenua ʼe tapuʼi ai te gaue ʼa te kau Fakamoʼoni ʼa Sehova? Kapau ko ia, toʼo he temi moʼo lau ia 2 Timoteo 1:12-16 pea mo te 4:6-11, 17-22.c ʼE feala ke fakalotomalohiʼi koe e te manatu ʼaia neʼe tohi e Paulo ʼi tana pilisoni.

15. Kotea ʼae ʼe feala ke ke kole kia Sehova?

¹⁵ (1) Faikole. ʼI muʼa ʼo tau lau te ʼu vaega ʼaia, fakaha kia Sehova tou fihifihia pea mo te ʼu meʼa ʼae ʼe ke logoʼi. Kole kia Sehova ke tokoni atu, ke ke maʼu ʼi te ʼu vaega ʼaia te ʼu manatu ʼae ka tokoni atu ke ke iloʼi ai te meʼa ʼae ʼe tonu ke ke fai.

16. Fakamatala fakanounou te aluʼaga ʼae neʼe hoko kia Paulo.

¹⁶ (2) Faiga ke ke sio ki te meʼa ʼae ʼe hoko. ʼI tau lau te ʼu vaega ʼaia, fai ohage pe ko koe ko Paulo ʼae ʼe pilisoni ʼi Loma, pea ʼe haʼi ʼaki he seini. Neʼe kua pilisoni ʼi muʼa atu, kae ʼi te lakaga leva ʼaeni, ʼe ina iloʼi ʼe matehi anai ia ia. Ko ʼihi tehina ʼae neʼe natou iloʼi lelei ia Paulo, neʼe natou liʼaki ia ia. Pea kua gaʼegaʼe.—2 Tim. 1:15.

17. Kotea ʼae neʼe lagi feala pe ke fai e Paulo?

¹⁷ Neʼe feala pe kia Paulo ke fakahemala ʼi te ʼu tonu ʼae neʼe ina fai. Pea mo ui kapau la neʼe mole faʼafai ʼi tana faifakamafola neʼe mole puke ia ia. Neʼe feala pe ke ita ia Paulo ki te ʼu tagata ʼo te potu fenua ʼo Asia ʼae neʼe natou liʼaki ia ia, pea ke mole kei falala ki ʼona tahi kaumeʼa. Kae neʼe mole ina fai te faʼahi ʼaia. He koʼe neʼe mole mahalohalo ia Paulo ki ʼona kaumeʼa, pea mo tui papau ʼe fakapale anai ia ia e Sehova?

18. Kotea ʼae neʼe fai e Paulo?

¹⁸ (3) Metitasio. Ke ke fai te fehuʼi ʼaeni: “Kotea ʼae neʼe fai e Paulo moʼo katakiʼi tona fihifihia?” Logo la tana iloʼi ʼae ʼe mate anai, kae neʼe lahi kia ia tana fakakololiaʼi ia Sehova. Neʼe hoko atu pe tana fakalotomalohiʼi ʼihi, pea neʼe faikole kia Sehova ke tokoni age. (2 Tim. 1:3) Neʼe mole ina tokagaʼi tona liʼakinaʼi e ʼihi, kae neʼe fakamalo ia ki ʼona kaumeʼa ʼae neʼe tokoni ki ai. Pea neʼe hoko atu pe tana ako te Folafola ʼa te ʼAtua. (2 Tim. 3:16, 17; 4:13) Pea ko te faʼahi ʼae ʼe maʼuhiga, neʼe tui papau ia Paulo ʼe ʼofainaʼi ia ia e Sehova pea mo Sesu. Pea neʼe mole nā liʼakinaʼi ia ia. Kae ʼe nā fakapale anai ia ia ʼi tana nofo agatonu.

19. Neʼe tokoni feafeaʼi ia Sehova kia Paulo?

¹⁹ Neʼe kua fakaha fakatomuʼa e Sehova kia Paulo ʼe fakatagaʼi anai. (Gaue 21:11-13) Kae neʼe tokoni feafeaʼi ki ai? Neʼe tali e Sehova ki ʼana faikole, pea lolotoga tona maʼuli, neʼe ina foaki age te malohi. (2 Tim. 4:17) Neʼe toe fakapapau age e Sehova kia Paulo, ʼe ina foaki anai kia ia te fakapale ʼae neʼe fakaʼamu lahi ki ai. Pea neʼe ina uga te ʼu kaumeʼa agatonu ʼo Paulo ke natou tokoni kia ia.

20. Kotea ʼae neʼe tui papau ki ai ia Paulo? Pea ʼe feafeaʼi hatatou faʼifaʼitakiʼi ia ia?

²⁰ (4) Maʼuliʼi. Ke ke fai te fehuʼi ʼaeni: “ ʼE feafeaʼi haku faʼifaʼitakiʼi ia Paulo?” Ohage ko ia, ʼe tou tau pe anai mo ni fakataga. (Mko. 10:29, 30) Ke tou nonofo agatonu, ʼe tonu ke tou faikole kia Sehova, mo falala kia te ia, pea mo ako tuʼumaʼu tana Folafola. Pea ke maʼuhiga age kia tatou te fakakololiaʼi ʼo Sehova. Ke tou tui papau ʼe mole liʼakina anai tatou e Sehova, pea ʼe mole he meʼa peʼe ko he tahi ʼe ina fakagata anai tona ʼofa ʼae kia tatou.—Lau ia Loma 8:38, 39; Hep. 13:5, 6.

HE ʼU FAʼIFAʼITAKI FAKATOHI-TAPU ʼE FEALA KE TOKONI ATU

21. Kotea ʼae neʼe tokoni kia Aya mo Hector ke nā tauʼi ʼona fihifihia?

²¹ ʼE feala ke tou maʼu te malohi moka tou lau he ʼu fakamatala ʼi te Tohi-Tapu moʼo tauʼi ʼaki hotatou fihifihia. Ohage la, neʼe tokoni te fakamatala ʼo Sonasi kia Aya ʼae ʼe pionie ʼi Saponia ke ina tauʼi tana mataku ʼi te faifakamafola ʼaki te laupapa. Pea neʼe fakalotomalohiʼi te hisitolia ʼo Lute ia te kiʼi tupulaga Savane ko Hector, ʼae ʼe mole tauhi ʼana matuʼā kia Sehova. Pea ko te faʼifaʼitaki ʼo Lute neʼe ina uga ia ia ke ina fia iloʼi ia Sehova pea mo tauhi ki ai.

22. ʼE ʼaoga lahi feafeaʼi kia koe te ʼu ʼata viteo, mo he ʼu alatike ʼe palalau ki he ʼu faʼifaʼitaki Fakatohi-tapu?

²² ʼO toe feia pe mo koe, ʼe feala ke ke maʼu ʼi te Tohi-tapu he ʼu fakamatala ʼo ʼihi neʼe tatau ʼonatou fihifihia mo ʼae ʼo koe. Moʼo tokoni kia koe, neʼe teuteuʼi e te kautahi ʼa Sehova ni ʼata viteo, mo ni fakamatala Fakatohi-tapu neʼe puke, pea mo ni alatiked ʼe palalau ki te ʼu faʼifaʼitaki ʼaia. ʼI muʼa ʼo tau vakaʼi te ʼu fakamatala ʼaia, kole kia Sehova ke tokoni atu ke ke taʼofi mai ai ni ako ʼe alu tahi mo tou fihifihia. Ke ke fai ohage pe ko koe ʼae ʼi te fakamatala. Metitasio ki te ʼu meʼa ʼae neʼe natou fai, pea neʼe tokoni feafeaʼi ia Sehova kia natou. Taʼofi mai ai ni ako pea ke maʼuliʼi. Fakafetaʼi kia Sehova ʼi tana tokoni atu, pea faiga ke ke fakalotomalohiʼi ʼihi.

23. ʼO mulimuli kia Esaia 41:10, 13, kotea ʼae ʼe fakapapauʼi mai e Sehova kia tatou?

²³ ʼE feala ke faigataʼa hatatou maʼuʼuli ʼi te malama ʼaeni ʼe puleʼi e Satana. (2 Tim. 3:1) Kae ʼaua tatatou tuʼania mo matataku, he ʼe iloʼi pe e Sehova te ʼu faigataʼaʼia ʼae ʼe tou tau mo ia. Pea ʼe ina fakapapauʼi mai ʼe tokoni mai anai ʼaki tona nima mataʼu malohi. (Lau ia Esaia 41:10, 13.) Tou tui papau ʼe tokoni mai anai ia Sehova kia tatou ʼi te ʼu ʼahiʼahi fuli pe, mo kapau foki ʼe tou ako te ʼu faʼifaʼitaki Fakatohi-tapu ke tou maʼu mai ai te malohi.