1921—Kua Hili Taʼu ʼe Teau

HE KAU FAIFAKAMAFOLA LOTOTOʼA

Neʼe tonu ke lototoʼa te kau Ako ʼo Te Tohi-Tapu mo kapau neʼe natou fia fakahoko te gaue ʼaia. Koia, neʼe tonu ke natou fakaha te “logo lelei” ki te kau agavaivai pea mo te “ ʼaho lagavaka” ki te kau agakovi.

Neʼe maʼuli te tehina ko J. H. Hoskin ʼi Kanata. Pea neʼe faifakamafola ʼaki he lototoʼa logo la te fakafeagai. ʼI te 1921, neʼe felaveʼi mo he patele. Neʼe ui fenei age e te tehina ko Hoskin: “ ʼE tonu ke ta fiafia ʼi te faipalalau fakatahi ki te Tohi-Tapu. Kapau ʼe mole ta manatu tahi ki ʼihi manatu kae ʼe feala pe ka felogoi lelei ʼo mole ta fihi.” Kae neʼe mole ko te aluʼaga ʼaia neʼe hoko. ʼE fakamatala fenei e te tehina ko Hoskin: “Neʼe heʼeki fualoa tamā faipalalau kae neʼe fakapa to e te patele tona matapa ʼo au ui ʼe foa anai te sioʼata ʼo tona matapa.”

Neʼe kalaga fenei age te patele: “He koʼe ʼe mole kotou olo ʼo palalau ki te hahaʼi pagani?” Neʼe mole tali age e te tehina ko Hoskin, pea neʼe alu ia. Kae neʼe ina ui ‘kia au ia neʼe au lolotoga palalau mo he pagani.’

ʼI te ʼala ʼuhu ake, neʼe fai e te patele he misa pea neʼe ina tala ni loi ʼo ʼuhiga mo te tehina ko Hoskin. ʼE ui fenei e te tehina ko Hoskin: “Neʼe ina ui ki te hahaʼi ʼi te ʼekelesia ke natou tokakaga kia au. Neʼe ina ui ko au te tagata ʼae ʼe gutuloi ʼi te kolo pea ʼe tonu ke matehi ia au.” Kae neʼe mole lotovaivai te tehina ko Hoskin. Neʼe hoko atu pe tana faifakamafola ki te tokolahi. Neʼe ina ui fenei: “Neʼe au fiafia ʼosi ʼi te faifakamafola ʼi te koga meʼa ʼaia. Neʼe ui mai e ʼihi hahaʼi ‘ko koe ko te tagata mai te ʼAtua,’ pea neʼe natou fia foaki mai te ʼu meʼa ʼae neʼe ʼaoga kia au.”

TE AKO TOKOTAHI MO FAKAFAMILI

Neʼe fia tokoni te kau Ako ʼo Te Tohi-Tapu ki te hahaʼi ke natou mahino lelei ki te Tohi-Tapu. Koia, neʼe natou tohi ai ki te ʼu nusipepa LʼÂge dʼOra ni fehuʼi mo ʼonatou tali. Neʼe vakaʼi e te ʼu matuʼā te ʼu fehuʼi ʼaia mo ʼanatou fanau. Neʼe natou “fai te ʼu fehuʼi ʼaia ki ʼanatou fanau pea mo tokoni kia natou ke natou maʼu ʼona tali ʼi te Tohi-Tapu.” Neʼe mole faigataʼa te ʼu fehuʼi ʼaia. Ohage la, “Ko tohi ʼe fia ʼi te Tohi-Tapu?” “ ʼE tonu koa ke manatu he Kilisitiano moʼoni ʼe mole fakatagaʼi anai?” Neʼe ko he ʼu fehuʼi moʼo tokoni ki te kau tupulaga ke natou liliu ko he kau faifakamafola lototoʼa.

Neʼe toe maʼu ai ni fehuʼi mo ʼonatou tali kia natou ʼae neʼe kua lahi age tanatou mahino ki te Tohi-Tapu. Neʼe feala ke maʼu te ʼu tali ʼi te ʼuluaki tohi ʼaeni Études des Écritures. Neʼe maʼu e te toko lauʼi afe hahaʼi te ʼu alatike ʼaia. Kae neʼe fakaha ʼi te nusipepa LʼÂge dʼOr ʼo te ʼaho 21 ʼo Tesepeli 1921, ʼe mole toe maʼu ai anai te ʼu alatike ʼaia. Kotea tona tupuʼaga?

HE TOHI FOʼOU

Neʼe mahino te ʼu tehina ʼae ʼe natou takitaki te kautahi neʼe ʼaoga ki te hahaʼi ke natou ako te ʼu moʼoni Fakatohi-tapu. Kae neʼe tonu ke fakatuʼutuʼu lelei te aluʼaga ʼaia. Koia ʼae neʼe natou ta ai te tohi La Harpe de Dieu ʼi Novepeli 1921. Ko te hahaʼi ʼae neʼe natou tali te tohi ʼaia, neʼe natou tohi ʼonatou higoa ke natou kau ki he ako Tohi-Tapu. Pea neʼe feala pe tanatou fai e natou totonu tanatou ako ʼi te tohi La Harpe de Dieu. Neʼe feala ki te ako ʼaia ke mahino te hahaʼi ki te “fakatuʼutuʼu ʼa te ʼAtua ke maʼuli te tagata ʼo heʼe gata.” Pea neʼe kotea ʼona fua?

Ka tali e he tahi te tohi ʼaia, ʼe ina maʼu he kiʼi kate ʼe tohi ai te meʼa ʼae ʼe tonu ke ina lau. ʼI te vahaʼa ʼae ʼe hoa mai, ʼe ina maʼu he kiʼi kate ʼe tuʼu ai ni fehuʼi ʼo ʼuhiga mo te meʼa ʼae neʼe ina lau. Pea ʼi te fakaʼosi ʼo te kiʼi kate ʼaia, neʼe tohi ai te meʼa ʼae ʼe tonu ke ina lau ki te vahaʼa ka haʼu.

Lolotoga vahaʼa ʼe 12, ʼe maʼu e ia ʼae ʼe ako ʼi te vahaʼa fuli he kiʼi kate mai te fale tohi neʼe momoli age e te kokelekasio. ʼI ʼihi temi, ʼe tau momoli te ʼu kiʼi kate ʼaia e ni tehina mo tuagaʼane matuʼa peʼe mole feala hanatou feoloʼaki. ʼE maʼuli te tuagaʼane ko Anna K. Gardner ʼi Millvale, ʼi Pennsylvania, ʼi Amelika. ʼE ina ui fenei: “ ʼI te ha ʼo te tohi La Harpe de Dieu, neʼe feala ai ki toku taʼokete ko Thayle, ʼae neʼe maʼimoa, ke ina momoli he ʼu kiʼi kate ʼi te vahaʼa fuli pea mo lahi age tana faifakamafola.” Ka ʼosi te ako, ʼe na olo ki te ʼapi ʼo ia ʼae ʼe ako ʼo ʼaʼahi pea mo fakalotomalohiʼi ia ia ke hoko atu tana ako.

TE GAUE KA FAKAHOKO

ʼI te fakaʼosi taʼu, neʼe momoli e te tehina ko J. F. Rutherford he tohi ki te ʼu fale ako fuli. Neʼe ina ui ʼi te tohi “neʼe matou tokagaʼi neʼe lahi tatatou tokoni ki te tokolahi ʼi te taʼu ʼaeni ʼi te ʼu taʼu ki muʼa atu.” Pea neʼe ina ui fenei ʼo ʼuhiga mo te ka haʼu: “ ʼE kei lahi te ʼu gaue ke fakahoko. Kotou fakalotomalohiʼi ʼihi ke natou kau mo natou ki te gaue maʼuhiga ʼaia.” Neʼe fakalogo te kau Ako ʼo Te Tohi-Tapu ki te tokoni ʼaia. ʼI te 1922, neʼe natou tala ʼaki he lototoʼa te logo ʼo te Puleʼaga.