’E TOU LAVA FAKAGATA FEAFEA’I TE FEHI’A?

4 | Tauʼi Te Fehiʼa ʼAki Te Tokoni ʼA Te ʼAtua

Te Ako Mai Te Tohi-Tapu:

“Ko te fua ʼo te laumalie ʼe ko te ʼofa, mo te fiafia, mo te tokalelei, mo te kataki fualoa, mo te agaʼofa, mo te agalelei, mo te tui, mo te agamalū pea mo te lotololomi.”—KALATE 5:22, 23.

Ko Tona Fakaʼuhiga:

ʼAki te tokoni ʼa te ʼAtua, ʼe feala ke tou pulihi ia te fehiʼa. ʼE feala ke fakatupu e tona laumalie maʼoniʼoni ia tatou he ʼu kalitate ʼe mole tou hoʼi maʼu feia pe. Koia ʼe mole tou faiga anai ke tou tauʼi te fehiʼa ʼaki tatatou fai puleʼaki, kae ke tou falala ki te tokoni ʼa te ʼAtua. Kapau ʼe tou fai feia, ʼe feala ke hoko kia tatou te aluʼaga ʼae neʼe hoko ki te apositolo ko Paulo, ʼae neʼe ina tohi fenei: “ ʼE au maʼu te malohi kia meʼa fuli ʼuhi ko ia ʼae ʼe ina foaki mai te malohi.” (Filipe 4:13) Koia, ʼe feala ai ke tou fai ia te ʼu palalau ʼaeni: “ ʼE haʼu toku haofaki mai ia Sehova.”—Pesalemo 121:2.

Kotea ʼAe ʼe Feala Ke Kotou Fai?

“Neʼe fetogi au e Sehova ke au liʼaki toku ʼuhiga tagata agakovi kae ke au liliu ko he tagata agalelei.”—WALDO

Kotou faikole kia Sehova, ʼo kotou kole fakamalotoloto kia te ia tona laumalie maʼoniʼoni. (Luka 11:13) Kotou kole kia te ia ke kotou maʼu he ʼu kalitate ʼe ha ai takotou tauhi agatonu. Kotou ako te Tohi-Tapu ke kotou iloʼi ko te ʼu kalitate ʼe ina haga ʼo tauʼi te fehiʼa, ohage ko te ʼofa, te tokalelei, te kataki fualoa pea mo te lotololomi. Kotou kumi he ʼu aluʼaga ke kotou gaueʼi ai te ʼu kalitate ʼaia ʼi tokotou maʼuli. Pea mo kotou fakatahi mo natou ʼe feala ke natou tokoni atu ke kotou fakatuputupu ia te ʼu kalitate ʼaia. ʼE feala ke tokoni atu ia natou ʼaia ke kotou “feʼekenakiʼaki ki te ʼofa pea mo te ʼu gaue lelei.”—Hepeleo 10:24; nota.

Te Aluʼaga Neʼe Hoko—WALDO

Tauʼi Te Fehiʼa

Ko Waldo neʼe mole lelei tona akoʼi ʼo tupu ai tana logoʼi he toe fehiʼa. ʼE ina fakamatala fenei: “Neʼe au kau tuʼumaʼu ki te ʼu fakahaoga fuhu mo te kau fakatau toloke . . . ʼI te tahi faiʼaga, neʼe totogi e te kiʼi kutuga feagai ia te tagata agakovi ke ina matehi au, kae neʼe au hao mai ai ʼaki taku hukiʼi ia te tagata ʼaia ʼaki te hele.”

Neʼe mole fiafia ia Waldo ʼi te kamata ako e tona ʼohoana ia te Tohi-Tapu mo te kau Fakamoʼoni ʼa Sehova. ʼE ina fakamatala fenei: “Neʼe au fehiʼa ʼi te kau Fakamoʼoni, pea ʼi te agamahani, ʼe au leakoviʼi natou. Kae neʼe natou agalelei tuʼumaʼu pe.”

Ki muli age, neʼe kamata ako e Waldo ia te Tohi-Tapu. ʼE ina fakamatala fenei: “Neʼe mole faigafua ia taku maʼuliʼi te ʼu meʼa ʼae neʼe au ako. Ki taku manatu, ʼe mole feala anai ʼi he temi ke au lolomi toku loto moka au ita.” Kae neʼe ʼi ai te aluʼaga neʼe ina ako ʼi te Tohi-Tapu neʼe fetogi ai tana manatu.

ʼE fakamahino fenei e Waldo: “ ʼI te tahi ʼaho, neʼe kole mai e taku faiako ko Alejandro ke au lau ia Kalate 5:22, 23. Neʼe fakamahino mai e Alejandro ko te maʼuliʼi ʼo te ʼu kalitate ʼaia ʼe mole fakalogo ki toku malohi fakatagata kae ʼe fakalogo ia ki te laumalie maʼoniʼoni ʼa te ʼAtua. Neʼe fetogi e te moʼoni ʼaia ia taku faʼahiga manatu.”

ʼAki tana falala ki te tokoni ʼa te ʼAtua, neʼe lava pulihi e Waldo ia te fehiʼa ʼi tona maʼuli. ʼE ina ui fenei: “ ʼE faigataʼa ʼosi ki ʼoku famili pea mo ʼoku kaumeʼa ʼafeā tanatou tui kua au fetogi. Neʼe fetogi au e Sehova ke au liʼaki toku ʼuhiga tagata agakovi kae ke au liliu ko he tagata agalelei.”