Tokoni Ki ʼIhi Ke Natou Katakiʼi Te ʼu Temi Faigataʼa

1. ʼE feafeaʼi te tali ʼa Sehova ki te ʼu faikole ʼa ʼana kaugana?

ʼE KE iloʼi koa la ʼe feala ke fakaʼaogaʼi koe e Sehova moʼo tali ki te faikole fakamalotoloto ʼa he tahi? ʼE moʼoni te faʼahi ʼaia tatau aipe peʼe ke tagata ʼafea, faifekau fakaminisitelio, pionie, peʼe kauga fagona. ʼE toe feala pe hau tokoni, logo la kei ke tupulaga peʼe kua ke ʼulu matuʼa, peʼe ko koe ko he tehina peʼe ko he tuagaʼane. Ka ko he tahi ʼe ʼofa kia Sehova ʼe kole tokoni kia te ia, ʼe feala ke fakaʼaogaʼi e totatou ʼAtua te ʼu tagata ʼafea pea mo ʼihi atu kaugana agatonu ke “natou liliu ko he tokoni malohi” kia ia. (Kol. 4:11) ʼI tatatou fai feia, ʼe tou fiafia ai ʼi te tauhi kia Sehova pea mo tokoni ki ʼotatou tehina mo tuagaʼane. ʼE feala anai ke tou tokoni moka hoko he taʼi mahaki, he tuʼutamaki fakanatula, peʼe ko te fakataga.

TOKONI KI ʼIHI MOKA HOKO HE TAʼI MAHAKI

2. He koʼe ʼe faigataʼa te tokoni ki ʼihi moka hoko he taʼi mahaki?

² ʼE feala ke faigataʼa hatatou fetokoniʼaki moka hoko he taʼi mahaki. Ohage la, ʼe lagi tou fia olo ʼo ʼaʼahi ʼotatou kaumeʼa, kae ʼe mole feala he ʼe ʼi ai ʼona nunuʼa kovi. ʼE lagi tou fia fakaafe ni ʼihi ʼe tau mo ni fihifihia fakapaʼaga ke tou kakai fakatahi, kae ʼe mole toe feala. ʼE tou fia tokoni ki ʼihi, kae ʼe lagi faigataʼa mo kapau la ʼe mahahaki niʼihi ʼi totatou famili. Kae ʼe tou fia tokoni ki ʼotatou tehina, pea ʼe fiafia ia Sehova moka ʼe tou fai ia meʼa fuli ʼe tou fealagia moʼo tokoni kia natou. (Taag. 3:27; 19:17) Kotea ʼae ʼe feala ke tou fai?

3. Kotea ʼae ʼe tou ako mai te faʼifaʼitaki ʼo te ʼu tagata ʼafea ʼo te kokelekasio ʼa Desi? (Selemia 23:4)

³ Te meʼa ʼae ʼe feala ke fai e te ʼu tagata ʼafea. Ka ko koe ko he tagata ʼafea, faiga ke ke iloʼi lelei te ʼu ovi. (Lau ia Selemia 23:4.) Ko Desi, te tuagaʼane neʼe tou palalau ki ai ʼi te alatike ʼi muʼa atu, ʼe ina ui fenei: “Neʼe faifakamafola te ʼu tagata ʼafea ʼo taku kiʼi kutuga faifakamafola mo au pea mo ʼihi atu, pea neʼe matou toe fakatahi ʼi ʼihi atu aluʼaga.”b ʼUhi ko te ʼu faiga ʼa te ʼu tagata tauhi ovi ʼaia neʼe faigafua ai tanatou tokoni kia Desi hili te to ʼo te taʼi mahaki COVID-19 ʼae neʼe mamate ai ʼihi ʼo tona famili.

4. He koʼe neʼe lava tokoni te ʼu tagata ʼafea kia Desi, pea kotea te ako?

⁴ ʼE ui fenei e Desi: “ ʼUhi ʼae neʼe au felogoi lelei mo te ʼu tagata ʼafea, neʼe faigafua taku fakaha age te meʼa ʼae neʼe au logoʼi mo tuʼania ki ai.” Kotea te ako ki te ʼu tagata ʼafea? Kotou tokaga fakalelei ki te ʼu ovi ʼi muʼa ʼo te hoko mai ʼo he faigataʼaʼia. Ke kotou fakakaumeʼa mo natou. Kapau ʼe faigataʼa tau alu ʼo ʼaʼahi ia natou, vakaʼi ni ʼihi atu puleʼaki. ʼE hoko atu fenei e Desi: “ ʼI ʼihi temi, neʼe pauʼi peʼe faitohi mai ni tagata ʼafea ʼi te ʼaho pe ʼe tahi. Neʼe malave kia au te ʼu vaega ʼae neʼe natou vaevae mai, logo la neʼe au iloʼi lelei pe te ʼu vaega ʼaia.”

5. ʼE lava iloʼi feafeaʼi e te ʼu tagata ʼafea te ʼu meʼa ʼae ʼe ʼaoga ki te ʼu tehina mo tuagaʼane pea mo tokoni kia natou?

⁵ Ko te tahi faʼahiga fai ke kotou iloʼi ai te ʼu faʼahi ʼae ʼe ʼaoga ki ʼokotou tehina mo tuagaʼane, ʼe ko te fai age ʼo ni fehuʼi fakaʼeteʼete. (Taag. 20:5) ʼE feʼauga koa tanatou meʼa kai, te ʼu faitoʼo, peʼe ko ʼihi atu aluʼaga ʼe ʼaoga kia natou? ʼE feala koa ke mole kei ʼi ai hanatou gaue peʼe mole feʼauga te falā moʼo huʼi ʼo tonatou ʼapi? ʼE ʼaoga koa kia natou he tokoni moʼo fakaui he tokoni mai te puleʼaga? Neʼe maʼu e Desi te ʼu meʼa ʼofa mai te ʼu tehina mo tuagaʼane. Kaʼe neʼe tokoni tafito age kia ia te ʼofa mo te ʼu fakalotomalohi fakatohi-tapu ʼa te ʼu tagata ʼafea. ʼE ina fakamatala fenei: “Neʼe faikole te ʼu tagata ʼafea mo au. Logo la ʼe mole kei au manatuʼi pe kotea ʼae neʼe natou ui, kae kei au manatuʼi pe kotea ʼae neʼe au logoʼi. Ko te faʼahiga ui mai ʼaia ʼa Sehova: ‘ ʼE au nofo mo koe.’ ”​—Esa. 41:10, 13.

6. Kotea ʼae ʼe feala ke fai e natou ʼo te kokelekasio moʼo tokoni ki ʼihi? (Vakaʼi te pāki.)

⁶ Te meʼa ʼae ʼe feala ke fai e ʼihi. ʼE moʼoni ko te ʼu tagata ʼafea tafito ʼae ʼe tonu ke tokaga ki te ʼu tehina mo tuagaʼane ʼi te kokelekasio. Kae ʼe fakaafe tatou fuli e Sehova ke tou fakalotomalohi mo tokoni ki ʼihi. (Kal. 6:10) Tatau aipe pe ʼe tou fai he tokoni ʼe mole faʼa lahi ki he tahi ʼe mahaki, kae ʼe feala ke malave ki ai. ʼE feala ki he kiʼi tamasiʼi ke ina momoli he kate peʼe ko he pāki moʼo fakalotomalohi ʼo he tehina. ʼE feala ki he tupulaga ke ina fai ni fakatau peʼe ko ʼihi atu faʼahi moʼo tokoni ki he tuagaʼane. ʼE feala ki ʼihi ke natou teuteuʼi he meʼa kai pea mo ʼave ki te ʼapi ʼo he tahi ʼe mahaki. ʼE moʼoni, ka hoko he taʼi mahaki, ʼe ʼaoga kia natou fuli ʼo te kokelekasio he fakalotomalohi. ʼE lagi feala ke tou nonofo fuafualoa ʼi te ʼosi ʼo te ʼu fono ke tou faipalalau mo ʼotatou tehina mo tuagaʼane ʼi te Fale Fono peʼe ʼi te zoom. ʼE toe ʼaoga foki ke fakalotomalohi te ʼu tagata ʼafea. Ko ʼihi Fakamoʼoni neʼe natou tohi mo momoli he ʼu fakamalo ki te ʼu tagata ʼafea, ʼi tanatou gaue kinakina lolotoga te taʼi mahaki. ʼI meʼa fakafiafia leva moka tou kau fakatahi ʼo “fefakalotomalohiʼaki pea mo fetokoniʼaki”!​—1 Tes. 5:11.

TOKONI KI ʼIHI ʼE TAU MO HE TUʼUTAMAKI FAKANATULA

7. Kotea he ʼu faigataʼaʼia ʼe feala ke hoko hili he tuʼutamaki fakanatula?

⁷ ʼE feala ke fetogi fakapunamaʼuli te maʼuli ʼo he tahi moka hoko he tuʼutamaki fakanatula. ʼE feala pe ki ʼihi ke puli ʼonatou koloa, tonatou ʼapi, peʼe mamate ʼihi ʼo tonatou famili. ʼE mole hao ʼotatou tehina mo tuagaʼane mai te ʼu aluʼaga fakalotomamahi ʼaia. Kotea ʼae ʼe feala ke tou fai moʼo tokoni kia natou?

8. Kotea ʼae ʼe feala ke fai e te ʼu tagata ʼafea pea mo te ʼu pule famili ʼi muʼa ʼo te hoko ʼo he tuʼutamaki fakanatula?

⁸ Te meʼa ʼae ʼe feala ke fai e te ʼu tagata ʼafea. ʼU tagata ʼafea, tokoni ki ʼokotou tehina ke natou teuteu ʼi muʼa ʼo te hoko mai ʼo he tuʼutamaki fakanatula. Kotou tokoni kia natou fuli ʼo te kokelekasio ke natou iloʼi pe ʼe feafeaʼi he puipui ʼo natou pea mo pauʼi te ʼu tagata ʼafea. ʼE fakamatala e Margaret, ʼae neʼe tou palalau ki ai ʼi te alatike ʼi muʼa atu: “ ʼI te akonaki ʼe ʼaoga ki te kokelekasio, neʼe fakatokaga mai e ʼamatou tagata ʼafea heʼeki ʼosi te manunu. Neʼe natou ui mai kapau ʼe fakatotonu mai e te puleʼaga ke matou mavae ʼi ʼomatou ʼapi peʼe feala ke tuʼutamakiʼia ʼomatou maʼuli, ʼe tonu ke matou mavae fakavilivili.” Neʼe to tonu te fakatokaga ʼaia, he neʼe hili pe ki ai vahaʼa ʼe nima, pea hoko he manunu ʼae neʼe feala ke tuʼutamaki ai te maʼuli ʼo te hahaʼi. Lolotoga te ako fakafamili, ʼe feala pe ke fakamanatuʼi e te ʼu pule famili pe kotea ʼae ʼe tonu ke fai e natou ʼo te kiʼi famili moka hoko he tuʼutamaki. Kapau neʼe kua ke nofo teuteu, ʼo feia mo ʼau tamaliki, ʼe mole ke hoha fau anai moka hoko he tuʼutamaki.

9. ʼE lava fakaalualu feafeaʼi e te ʼu tagata ʼafea tanatou gaue ʼi muʼa pea ʼi te ʼosi ʼo he tuʼutamaki fakanatula?

⁹ Kapau ʼe ke tokaga ki he kiʼi kutuga faifakamafola, vakaʼi ke ke maʼu te ʼu numelo telefoni mo te ʼu tuʼasila ʼo natou ʼo tau kiʼi kutuga, ʼi muʼa ʼo te hoko mai ʼo he tuʼutamaki fakanatula. Pea ke tohi tuʼumaʼu ki te lisi ʼaia te ʼu fetogi. Koia, ka hoko la he tuʼutamaki, ʼe faigafua anai hau telefoni kia natou takitokotahi ʼo vakaʼi pe kotea ʼae ʼe ʼaoga kia natou. Pea ke ʼave fakavilivili te lisi ʼaia ki te kootinatea ʼo te kolesi ʼo te ʼu tagata ʼafea, pea ʼa ia leva te fakaha ki te taupau ʼo te siliko. Ka gaue fakatahi te ʼu tagata ʼafea ʼaia, pea ʼe to lelei anai ia meʼa fuli moʼo fai he tokoni. ʼI te ʼosi ʼo te manunu, neʼe nofo ʼalaʼala te taupau ʼo te siliko ʼo Margaret ia hola ʼe 36, ʼuhi he neʼe ina fakaalualu te gaue ʼa te kau tagata ʼafea moʼo pauʼi pea mo tokaga ki te ʼu tehina mo tuagaʼane ʼe toko 450 ʼae neʼe mavae mai ʼonatou ʼapi. (2 Ko. 11:27) Koia, neʼe feala ai ke natou fakaʼapi ia natou fuli ʼae neʼe ʼaoga ki ai.

10. He koʼe ʼe maʼuhiga ki te ʼu tagata ʼafea te gaue fakatauhi ovi? (Soane 21:15)

¹⁰ Ko te gaue ʼa te ʼu tagata ʼafea ko te foaki ʼo he tokoni fakalaumalie pea mo tokaga kia natou ʼe tau mo te mamahi. (1 Pet. 5:2) Ka hoko he tuʼutamaki, ʼe tonu ke vakaʼi e te ʼu tagata ʼafea peʼe haohaoa pe te ʼu tehina mo tuagaʼane, mo natou maʼu hanatou meʼa kai, mo he ʼu mutuʼi meʼa, mo honatou nofoʼaga. Kae hili ki ai ni mahina, ʼe lagi ʼaoga anai kia natou ʼaia he tokoni ʼi te faʼahi fakalaumalie pea mo te ʼu meʼa ʼae ʼe natou logoʼi. (Lau ia Soane 21:15.) Ko te tehina ko Harold, ʼae ʼe kau ki te Komite ʼo He Filiale pea neʼe felaveʼi mo he ʼu tehina mo tuagaʼane neʼe tau mo he ʼu tuʼutamaki, ʼe ina ui fenei: “ ʼE maʼua ke ʼi ai he temi loaloaga ke puli ai tonatou lotomamahi. ʼE feala ke natou liliu ki tonatou maʼuli mahani, kae ʼe fakagalo gataʼa moka neʼe mate he tahi ʼo tonatou famili, neʼe puli he meʼa maʼuhiga neʼe foaki age, pe neʼe natou hao mai he tuʼutamaki neʼe feala ke mamate ai. Ko te manatuʼi ʼo te ʼu faʼahi ʼaia, ʼe toe fakatupu lotomamahi. ʼE mole leva ui ʼe mole natou tui, kae ʼe feia pe totatou ʼuhiga tagata.”

11. Kotea ʼae ʼe ʼaoga tuʼumaʼu ki te ʼu famili?

¹¹ ʼE maʼuliʼi e te ʼu tagata ʼafea te tokoni ʼae ke natou “fetagihi mo natou ʼae ʼe fetagihi.” (Loma 12:15) Ko natou ʼae neʼe hao mai he tuʼutamaki ʼe ʼaoga ke natou iloʼi ʼe kei ʼofa pe ia Sehova mo te ʼu tehina mo tuagaʼane kia natou. ʼE tokoni anai te ʼu tagata ʼafea ki te ʼu famili ke natou taupau ʼanatou agamahani fakalaumalie, ʼae ko te faikole, te ako ʼo te Tohi-Tapu, te kau ki te ʼu fono, pea mo te faifakamafola. ʼE toe fakalotomalohi e te ʼu tagata ʼafea te ʼu matuʼā ke natou tokoni ki ʼanatou fanau ke natou tokaga tafito ki te ʼu meʼa ʼae ʼe mole feala ke pulihi moka hoko he tuʼutamaki. ʼU matuʼā, kotou fakamanatuʼi age ki ʼakotou fanau ʼe kaumeʼa tuʼumaʼu pe anai ia Sehova mo natou pea ʼe nofo tuʼumaʼu pe anai mo natou. Pea manatuʼi ʼo fakamahino age ʼe natou kau tuʼumaʼu pe anai ʼi he famili fakamalamanei ʼe fia tokoni kia natou.​—1 Pet. 2:17.

12. Kotea ʼae ʼe feala ke fai e ʼihi moʼo tokoni ki te ʼu gaue haofaki maʼuli? (Vakaʼi te pāki.)

¹² Te meʼa ʼae ʼe feala ke fai e ʼihi. Ka hoko he tuʼutamaki ʼe ovi atu kio ʼou, fehuʼi ki te ʼu tagata ʼafea pe ʼe feafeaʼi hau tokoni. ʼE feala pe tau fakaʼapi fakatemi ia natou ʼae neʼe mavae mai ʼonatou ʼapi peʼe ko natou ʼae neʼe ʼomai ʼo kau ki te ʼu gaue haofaki maʼuli. ʼE lagi feala pe hau ʼave he meʼa kai peʼe ko he ʼu meʼa ʼe ʼaoga ki te ʼu tehina mo tuagaʼane. Kae kapau leva neʼe hoko te tuʼutamaki ʼo mamaʼo mai io ʼou, ʼe feala pe hau tokoni. ʼO feafeaʼi? ʼAki tau hufakiʼi ia natou ʼae neʼe tau mo te tuʼutamaki. (2 Ko. 1:8-11) ʼE feala pe hau lagolago fakapaʼaga ki te gaue haofaki maʼuli ʼaki tau foaki he meʼa ʼofa ki te gaue fakamalamanei. (2 Ko. 8:2-5) Ka ʼe feala hau alu ki te potu ʼae neʼe hoko ai te tuʼutamaki, fakalavelave ki te ʼu tagata ʼafea pe ʼe feala hau alu ʼo tokoni. Kapau ʼe fakagafua atu, ʼe lagi ke mulimuli anai ki he faʼahiga akoako ke feala ai he fakaʼaogaʼi ʼo koe ʼi te koga meʼa mo te temi ʼae ʼe ʼaoga ai he tokoni.

TOKONI KI TE ʼU TEHINA KE NATOU KATAKIʼI TE FAKATAGA

13. Kotea te ʼu fihifihia ʼe tau mo te ʼu tehina ʼi te ʼu fenua ʼae ʼe tapuʼi ai tatatou gaue?

¹³ ʼI te ʼu fenua ʼae ʼe tapuʼi ai tatatou gaue, ʼe faigataʼa age te maʼuli ʼuhi ko te fakataga. ʼE tau tuʼumaʼu pe te ʼu tehina ʼo te ʼu fenua ʼaia mo te ʼu fihifihia fakapaʼaga, mo te mahaki, peʼe ko te mate ʼo he tahi neʼe natou ʼoʼofa mamahi ai. Kae ʼuhi ko te tapu, ʼe feala ke faigataʼa ki te ʼu tagata ʼafea tanatou olo peʼe felogoi faʼifaʼitaliha mo natou ʼae ʼe ʼaoga ki ai he fakalotomalohi. Neʼe ko te aluʼaga ʼaia neʼe hoko kia Andrei, ʼae neʼe tou palalau ki ai ʼi te alatike ki muʼa atu. ʼI tana kiʼi kutuga faifakamafola, neʼe tau he tuagaʼane mo ni fihifihia fakapaʼaga. Hili ia, neʼe faifakaʼi te tuagaʼane. Neʼe maʼua ai ke tafa tuʼa lahi pea mole kei feala hana gaue. Logo la te tapu mo te taʼi mahaki, kae neʼe fai pe e te ʼu tehina te ʼu meʼa ʼae neʼe natou lavaʼi moʼo tokoni ki ai, pea neʼe tokaga pe ia Sehova ki te ʼu meʼa fuli ʼae neʼe fai.

14. ʼE foaki feafeaʼi e te ʼu tagata ʼafea he faʼifaʼitaki ʼi tanatou falala kia Sehova?

¹⁴ Te meʼa ʼae ʼe feala ke fai e te ʼu tagata ʼafea: Neʼe faikole ia Andrei pea mo ina fai pe te meʼa ʼae neʼe ina lavaʼi. Neʼe tali feafeaʼi ia Sehova ki tana faikole? Neʼe ina uga ʼihi ʼi te kokelekasio, ʼae neʼe feala pe ke feoloʼaki ke natou tokoni ki te tuagaʼane. Ko ʼihi neʼe natou feʼaveʼaki te tuagaʼane ki tana ʼu vakaʼi mahaki. Ko ʼihi neʼe natou ʼavage he foʼi falā moʼo tokoni ki ai. Neʼe uga natou e Sehova ke natou fai te meʼa ʼae neʼe natou fealagia, pea neʼe ina tapuakina natou ʼi tanatou gaue kinakina ʼi te logo tahi mo te lototoʼa. (Hep. 13:16) ʼU tagata ʼafea, ka tapuʼi tatatou gaue, kole age ki ʼihi ke natou olo ʼo tokoni. (Sel. 36:5, 6) Kae ko te faʼahi ʼae ʼe maʼuhiga tafito, ke kotou falala kia Sehova. ʼE feala hana tokoni atu ke kotou tokakaga ki te ʼu meʼa ʼae ʼe ʼaoga ki te ʼu tehina mo tuagaʼane.

15. ʼE tou taupau feafeaʼi te logo tahi mo ʼotatou tehina mo tuagaʼane moka fakatagaʼi tatou?

¹⁵ Te meʼa ʼae ʼe feala ke fai e ʼihi. Lolotoga te temi ʼae ʼe tapuʼi ai tatatou gaue, ʼe lagi tonu anai ke tou fakatahi mo ʼotatou tehina mo tuagaʼane ʼi he ʼu kiʼi kutuga. Koia, ʼe maʼuhiga ʼaupito ke tou haga taupau te tokalelei. Kotou tauʼi ia Satana, kae mole kotou fefakafeagaiʼaki. Fakalaka ʼi te ʼu hala ʼo ʼokotou tehina mo tuagaʼane, peʼe kotou faiga ke fakatokatoka fakavilivili ʼokotou fihifihia. (Taag. 19:11; Efe. 4:26) Kotou lotolelei ʼo fetokoniʼaki. (Tito 3:14) Ko te tokoni ʼae neʼe fai ki te tuagaʼane, neʼe fua lelei ki te kiʼi kutuga faifakamafola. Neʼe natou faifaitahi lelei ohage he famili.​—Pes. 133:1.

16. ʼO mulimuli kia Kolose 4:3, 18, ʼe tou lava tokoni feafeaʼi ki ʼotatou tehina mo tuagaʼane ʼae ʼe fakatagaʼi?

¹⁶ Ko te toko lauʼi afe tehina mo tuagaʼane ʼe natou tauhi kia Sehova logo la te ʼu tapu mai te puleʼaga. Ko ʼihi ia natou ʼe pilisoniʼi ʼuhi ko tanatou tui. ʼE feala ke tou hufaki natou mo ʼonatou famili. ʼE feala ke tou toe faikole maʼa natou ʼae ʼe lototoʼa ʼi tanatou lagolago ki te ʼu tehina mo tuagaʼane ʼae ʼe pilisoni, kae feala pe la ke puke mo natou. ʼE natou fakalotomalohi te ʼu tehina mo tuagaʼane ʼaia ke natou haga falala kia Sehova, mo foaki te ʼu meʼa ʼae ʼe ʼaoga kia natou, pea mo faiga ʼo haofaki natou ʼi muʼa ʼo te telepinale.c (Lau ia Kolose 4:3, 18.) ʼAua naʼa galo kia koutou te malohi ʼo ʼakotou faikole.​—2 Tes. 3:1, 2; 1 Tim. 2:1, 2.

17. ʼE feafeaʼi hau teuteu nei ki te fakataga?

¹⁷ ʼE feala ke ke teuteu nei mo tou kiʼi famili ki te hoko mai ʼo te fakataga. (Gaue 14:22) ʼAua naʼa ke fakakaukau ki te ʼu meʼa fuli ʼe kovi ʼe feala ke hoko. Kae ke ke fakamalohi tau felogoi mo Sehova, pea ke tokoni ki ʼau fanau ke natou fai feia. Kapau ʼi ʼihi temi ʼe ke lotohoha, fakaha te faʼahi ʼaia kia Sehova. (Pes. 62:8, 9) Palalau mo tou kiʼi famili ki te ʼu tupuʼaga fuli ʼae ʼe tonu ai ke kotou falala kia Sehova.d Pea, ohage pe moka hoko he tuʼutamaki, ʼe natou lototoʼa anai pea ʼe mole natou hoha he neʼe kua ke akoʼi age ke natou falala kia Sehova.

18. ʼE feafeaʼi anai tatatou ka haʼu?

¹⁸ ʼE foaki mai e te tokalelei ʼo te ʼAtua he fakalotofimalie. (Flp. 4:6, 7) ʼAki te tokalelei ʼaia, ʼe fakafimalieʼi tatou e Sehova logo la te ʼu mahaki, te ʼu tuʼutamaki fakanatula, pea mo te fakataga ʼae ʼe feala ke tou tau mo ia ʼi te temi nei. ʼE ina fakaʼaogaʼi te ʼu tagata ʼafea ʼae ʼe gaue kinakina ke natou tokaga kia tatou. Pea ʼe ina foaki mai kia tatou fuli te fealagia ʼae ke tou fetokoniʼaki. Lolotoga te temi tokalelei ʼaeni, ʼe feala ke tou teuteu ki te ʼu ʼahiʼahi lalahi ka hoko mai, ʼo foe feia pe la ki te “toe mamahi lahi.” (Mat. 24:21) ʼI te temi ʼaia, ʼe tonu ke tou taupau totatou tokalelei pea mo tokoni ki ʼihi ke natou fai feia. Kae ka hili te mamahi lahi, ʼe mole kei tou tau leva mo te ʼu faigataʼaʼia fakatupu lotohoha ʼaia. ʼE tou maʼu anai te meʼa ʼae neʼe loto ki ai ia Sehova talu mai fualoa maʼa tatou, ia te tokalelei moʼoni ʼo talu ai.​—Esa. 26:3, 4.