Kua Kotou Tokalelei Koa Mokā Hoko Mai Ia He Tuʼutāmaki Ki Te Kele?
1. He koʼē ʼe tou aga fakapotopoto anai mo kapau kua tou tokalelei mokā hoko mai ia he ʼu tuʼutāmaki?
1 ʼI te taʼu fuli, ko te ʼu toko lauʼi miliona hahaʼi ʼi te mālamanei, ʼo fēia mo te ʼu tehina mo tuagaʼane e tokolahi, ʼe hoko kiā nātou te ʼu mafuike, mo te hake ʼo te tai, mo te ʼu ʼua lalahi, mo te ʼu ʼafā, mo te ʼu ʼāhiohio, pea mo te ʼu lōmaki. Mai tona ʼaluʼaga, ʼe lava hoko fakafokifā he ʼu tuʼutāmaki kiā tātou fuli pē, koia ʼe tou aga fakapotopoto anai mo kapau kua tou tokalelei ki te faʼahi ʼaia.—Taag. 21:5.
2. He koʼē ʼe tonu ke tou fakahā totatou tuʼasila pea mo totatou nūmelo telefoni ki te kau tagata ʼāfea?
2 Tou Teuteu Fakatomuʼa: ʼI ʼihi temi, ʼe feala ki te ʼu puleʼaga ke natou fakahā fakatomuʼa ki te hahaʼi he tuʼutāmaki kā ʼamanaki hoko. Pea ʼe maʼuhiga ki te hahaʼi ke natou tokagaʼi te ʼu fakatokaga ʼaia. (Taag. 22:3) ʼI te ʼu temi ʼaia, ʼe felōgoi anai te kau tagata ʼāfea mo nātou fuli ʼo te kōkelekāsio moʼo fakahāhā kiā nātou ia te ʼu fakatuʼutuʼu ʼaē ke natou fai moʼo teuteu ki te faʼahi ʼaia. ʼI te ʼosi ʼo he tuʼutāmaki, ʼe toe faiga anai te kau tagata ʼāfea ke natou felōgoi mo nātou fuli ʼaē ʼe kau ki te kōkelekāsio moʼo vakaʼi peʼe natou hao pea mo vakaʼi te tokoni ʼaē ʼe lagi ʼaoga ke foaki kiā nātou. Kapau ʼe mole maʼu e te kau tagata ʼāfea he lisi ʼe tuʼu ai te ʼu fakaʼiloʼilo ʼo ʼuhiga mo nātou ʼo te kōkelekāsio, pea ʼe pulinoa ai anai te toe temi maʼuhiga. Koia, ʼe lelei ki te kau fai faka mafola ke natou fakahā tonatou tuʼasila pea mo tonatou nūmelo telefoni ki te sīkalaipe pea mo te tehina taupau ʼo tanatou ako tohi.
3. ʼE feafeaʼi hatatou lava lagolago ki te kau tagata ʼāfea mo kapau ʼe tou nonofo ʼi he faʼahi ʼe tuʼutāmakiʼia?
3 Kapau ʼe tuʼu te kōkelekāsio ʼi he faʼahi ʼe tuʼutāmakiʼia, pea ʼe lagi fakalavelave anai e te kau tagata ʼāfea ki te kau faka mafola te higoa pea mo te nūmelo telefoni ʼo honatou kāiga peʼe ko honatou kaumeʼa ʼe nofo mamaʼo atu, kā natou pāuiʼi anai mokā hoko he tuʼutāmaki. ʼE feala ai anai ki te kau tagata ʼāfea ke natou ʼiloʼi te ʼu faʼahi ʼaē ʼe nonofo ai he ʼu tehina mo tuagaʼane ke ʼave kehe. ʼE lagi loto anai e te kau tagata ʼāfea ke natou fai he ʼu puleʼaki moʼo fai he tokoni fakavilivili ki te kōkelekāsio, ohagē lā ko he lisi ʼo te ʼu meʼa ʼaē ke foaki fakavilivili, mo te ʼu fakatuʼutuʼu ʼaē moʼo fetuku ʼo nātou, pea mo nātou ʼaē ʼe ʼaoga tāfito kiai he tokoni makehe. ʼE maʼuhiga ia te lagolago ki te ʼu fakatuʼutuʼu ʼofa ʼaia.—Hep. 13:17.
4. Koteā anai kā tou fai mokā hoko he tuʼutāmaki ʼi te koga meʼa ʼe kotou nonofo ai?
4 ʼI Te ʼOsi ʼo He Tuʼutāmaki: Koteā ʼaē ʼe tonu ke kotou fai mo kapau ʼe hoko he tuʼutāmaki ʼi te koga meʼa ʼe kotou nonofo ai? Kotou vakaʼi ke foimo foaki ki tokotou fāmili ia te ʼu meʼa ʼaē ʼe ʼaoga tāfito kiā nātou. Kapau ʼe kotou lavaʼi, kotou foaki te tokoni ʼaē ʼe ʼaoga kiā nātou ʼaē ʼe tuʼutāmakiʼia. Kotou faigaʼi ke kotou felāveʼi mo te tehina ʼo tokotou ako tohi peʼe ko he tahi age tagata ʼāfea mokā ʼe kotou fealagia. ʼE tonu ke kotou fai ia te faʼahi ʼaia, tatau aipē pe kotou hao pea mole ʼaoga atu kiā koutou he tokoni. Kapau ʼe ʼaoga ke tokoni atu, kotou falala ʼe fai moʼoni e tokotou ʼu tehina ia meʼa fuli ʼe natou lavaʼi moʼo tokoni atu. (1 Ko. 13:4, 7) Kotou manatuʼi ʼe sio ifo ia Sehova ki te ʼu meʼa ʼaē ʼe hoko kiā koutou; ko takotou falala ʼaē kiā te ia ʼe lava tokoni atu kiā koutou. (Pes. 37:39; 62:8) Kotou vakaʼi te ʼu faigamālie ʼaē ʼe feala ai hakotou tokoni ki ʼihi ʼi te faʼahi fakalaumālie pea mo fakafīmālieʼi ʼo ʼonatou loto. (2 Ko. 1:3, 4) Kotou toe hoko atu takotou ʼu gāue faka teokalatike mokā ʼe fealagia.—Mat. 6:33.
5. ʼE feafeaʼi kiā tātou kau Kilisitiano te ʼamanaki hoko mai ʼo he tuʼutāmaki?
5 Logolā ko te ʼamanaki hoko mai te ʼo he tuʼutāmaki ʼe fakatupu ai te hoha ʼaupitō ʼa te mālamanei, kae kiā tātou ʼe tou lava sio mo he loto falala ki te kā haʼu. Kua vave pē, pea liliu leva te ʼu tuʼutāmaki fuli ko he meʼa kua ʼāfea. (Apk. 21:4) Kae ʼi te temi nei, ʼe tou lava fai he ʼu fakatuʼutuʼu fakapotopoto ke tou tokalelei ai ki te ʼu temi mamahi pea mo he ʼu fihifihia kā haʼu, ʼo tou faʼafai ʼi te tala ʼo te logo lelei ki te hahaʼi.