2 | ‘ ʼE Foaki Mai e Te ʼu Tohi Taputapu He Fakafimalie’

ʼE UI ʼI TE TOHI-TAPU: “Ko te ʼu meʼa fuli ʼae neʼe tohi ʼi te temi muʼa neʼe tohi ia moʼo akoʼi ʼo tatou. ʼE tou maʼu ai he ʼamanaki koteʼuhi ʼe tokoni mai te ʼu Tohi Taputapu ke tou faʼa kataki pea mo foaki mai he fakafimalie.”—LOMA 15:4.

Fakamahino

ʼE tou maʼu ʼi te Tohi-Tapu he ʼu manatu fakalotofimalie. Pea ʼe tokoni mai ke tou maʼu te malohi mo te faʼa kataki moʼo tauʼi he ʼu manatu fakalotovaivai. ʼE toe fakaha mai ʼi te Tohi-Tapu ia he ʼamanaki taulekaleka, ʼe kua vave pulihi pe ia te lotomamahi.

Kotea ʼe Feala Ke Tou Fai?

ʼI ʼihi temi, ʼe mole tou fiafia. Kae ko natou ʼae ʼe tau mo ni manatu fakalotomamahi peʼe ko te lotohoha ʼe feala ke natou logoʼi ia te lotomamahi ʼi te temi fuli pe. ʼE tokoni feafeaʼi te Tohi-Tapu kia natou?

ʼE lahi te ʼu manatu fakalotomalohi ʼi te Tohi Tapu ʼe feala ke ina fetogi te ʼu manatu fakalotovaivai. (Filipe 4:8) ʼE tokoni mai ke tou haga maʼu he ʼu manatu fakalotofimalie pea mo lolomi te ʼu meʼa ʼae ʼe tou logoʼi.—Pesalemo 94:18, 19.
ʼE tokoni mai te Tohi-Tapu ke tou tauʼi te manatu ʼae ʼe mole hotatou ʼuhiga.—Luka 12:6, 7.
ʼE lahi te ʼu vaega Tohi-Tapu ʼe fakaha mai ai ʼe mole tou tokotahi pea ʼe mahino lelei te ʼAtua totatou Tupuʼaga ki te meʼa ʼae ʼe tou logoʼi.—Pesalemo 34:18; 1 Soane 3:19, 20.
ʼE fakapapauʼi mai ʼi te Tohi-Tapu kua vave fakagata e te ʼAtua te ʼu mamahi. ʼE mole tou toe manatuʼi anai te ʼu mamahi ʼae neʼe tou logoʼi. (Esaia 65:17; Apokalipesi 21:4) Ka tou lotomamahi ʼaupito pea ʼe tokoni mai te fakapapau ʼaia ke tou haga haʼele ki muʼa.

Neʼe Tokoni Te Tohi-Tapu Kia Jessica

Te ʼu Aluʼaga ʼe Hoko Moka Au Maʼu Ni Manatu Fakalotomamahi

“ ʼI toku taʼu 25, neʼe kovi ʼosi taku lotohoha pea neʼe fakaha mai leva e te toketa kua kovi ʼosi taku maʼu ni manatu fakalotomamahi. ʼE fokifa pe kua au manatuʼi he ʼu aluʼaga fakalotomamahi ʼo tauteaʼi ai au. Neʼe tokoni mai te ʼu toketa ke au mahino neʼe tupu taku maʼu te ʼu manatu fakalotomamahi ʼuhi ko he ʼu aluʼaga fakamataku neʼe hoko ʼi toku maʼuli. Neʼe mole gata pe ki te faitoʼo ʼae neʼe tonu ke au toʼo kae neʼe ʼaoga ke au fai he tahi faʼahiga faitoʼo ke au iloʼi pea mo liʼaki te ʼu manatu ʼaia ʼe mole lelei.”

ʼE Tokoni Mai Te Tohi-Tapu

“ ʼI te lahi fau ʼo taku maʼu ni manatu fakalotomamahi, neʼe au tau logoʼi hoku mataku pea neʼe mole kei au mamoe, neʼe kovi ʼosi ai taku lotohoha. ʼI ʼihi temi, ʼi te poʼuli, ʼe au maʼu he ʼu manatu fakatupu lotohoha ʼo mole feala ai ke au tataʼofi. Kae ohage ko tona ui ia Pesalemo 94:19, ka tou taʼomia ʼi te ʼu tuʼania, ʼe feala ki te ʼAtua ke ina fakapelepeleʼi mo fakafimalieʼi tatou. Koia neʼe au tuku ovi taku Tohi-Tapu ʼi toku palepale mo he kiʼi kaupepa neʼe au tohi ai he ʼu vaega fakalotofimalie. Pea ka mole au fia moe, pea ʼe au lau te Tohi-Tapu. ʼI taku fai te faʼahi ʼaia, ʼe au tuku te ʼu manatu ʼa te ʼAtua ke ina fakafimalieʼi au.

“ ʼE fakalotomalohiʼi tatou ʼi te Tohi-Tapu ke tou liʼaki te ʼu fakakaukau ʼe feagai ki te faʼahi ʼe tou iloʼi ʼo ʼuhiga mo te ʼAtua. ʼI muʼa atu, neʼe au manatu ʼe mole hoku ʼaoga pea ʼe mole tuha ke ʼofainaʼi au. Kae neʼe au ako ʼe feagai te ʼu faʼahiga fakakaukau ʼaia ki te Tohi-Tapu. ʼE fakaha mai ʼi te Tohi-Tapu ko te ʼAtua ʼe ko he Tamai ʼofa mo manavaʼofa pea ʼe tokaga kia tatou takitokotahi. ʼAki te temi neʼe au lava puleʼi ʼaku manatu. Neʼe au ako ke au maʼu te faʼahiga sio ʼa te ʼAtua ʼo ʼuhiga mo au. Neʼe maʼuhiga ke au fai te faʼahi ʼaia ke mole au maʼu he ʼu manatu ʼe mole lelei ʼo ʼuhiga mo au.

“Kua au fakaʼamu ki te ʼaho ʼae ʼe mole tou toe manatuʼi ai te ʼu manatu fakalotomamahi fuli ʼo feia mo te ʼu faʼahiga fakakaukau ʼae ʼe mole lelei. ʼE au iloʼi ʼi te ka haʼu ʼe mole toe mahaki ʼulu anai he tahi. Pea ʼe tokoni mai te faʼahi ʼaia ke au katakiʼi te ʼu mamahi ʼo te temi nei pea mo fakakaukauʼi te ka haʼu ʼae ʼe mole au toe maʼu ai ni manatu fakalotomamahi.”