3 | Te ʼu Faʼifaʼitaki ʼi Te Tohi-Tapu

ʼE TALANOA ʼI TE TOHI-TAPU . . . Ki te ʼu fakamatala ʼo ni tagata mo ni fafine neʼe agatonu ki te ʼAtua pea ‘neʼe tatau te ʼu meʼa ʼae neʼe natou logoʼi mo te ʼu meʼa ʼae ʼe tou logoʼi.ʼ—SAKOPO 5:17.

Fakamahino

ʼE lahi te ʼu fakamatala ʼi te Tohi-Tapu ʼo ni tagata mo ni fafine neʼe natou tau mo ni aluʼaga faigataʼa. Ka tou lau te ʼu fakamatala ʼaia ʼe feala pe ke tou tokagaʼi te ʼu aluʼaga ʼe tatau mo te aluʼaga ʼae ʼe tou tau mo ia.

Kotea ʼe Feala Ke Tou Fai?

ʼE tou loto fuli ke mahino he tahi ki te ʼu meʼa ʼae ʼe tou logoʼi. Tafito la moka tou tau mo he mahaki ʼulu. Ka tou lau ia te ʼu fakamatala ʼi te Tohi-Tapu, ʼe tou tokagaʼi neʼe maʼu e ʼihi he ʼu manatu ohage pe ko tatou. Koia ʼe tou tokagaʼi ai neʼe kua ʼi ai ʼihi neʼe kua natou tau mo te faʼahi ʼaia pea ʼe mole ko tatou pe ʼe felaveʼi mo te lotohoha peʼe ko he ʼu manatu ʼe mole lelei.

ʼE fakaha ʼi te Tohi-Tapu he ʼu palalau neʼe fai e he ʼu hahaʼi neʼe lotohoha mo lotomamahi. Neʼe kua kotou fai koa te ʼu palalau ʼaeni: ‘Kua feʼauga!ʼ? ʼE ko te meʼa ʼaia neʼe logoʼi ʼe Moisese, mo Elia pea mo Tavite.—Numelo 11:14; 1 Hau 19:4; Pesalemo 55:4.
ʼE talanoa te Tohi-Tapu kia Ana, ko he fafine neʼe “lotomamahi ʼaupito” mole ʼuhi pe ko tana mole lava maʼu hana tamasiʼi kae neʼe toe manukiʼi ia ia e tona fili.—1 Samuele 1:6, 10.
ʼE talanoa te Tohi-Tapu kia Sopo, ko he tagata neʼe ina maʼu he ʼu manatu ohage pe ko tatou. Logo la neʼe malohi tana tui ki te ʼAtua, kae neʼe ina logoʼi he toe lotomamahi ʼo tupu ai tana fai te ʼu palalau ʼaeni ʼi te tahi ʼaho: “Kua au fakalialia ki toku maʼuli. ʼE mole kei au fia maʼuli.”—Sopo 7:16.

Tou vakaʼi pe neʼe lava tauʼi feafeaʼi e natou ʼaia he ʼu aluʼaga fakamamahi, pea ʼe tou toe maʼu ai te malohi ʼae moʼo tauʼi totatou lotomamahi.

Neʼe Tokoni Te Tohi-Tapu Kia Kevin

Te Mahaki ʼAe Ko Te Mohumohu ʼAho (trouble bipolaire)

“ ʼI taku fakaoviovi atu ki toku taʼu 50, neʼe fakaha mai e te toketa ʼe au kau ʼi te mahaki ʼae ko te mohumohu ʼaho. ʼI ʼihi temi, ʼe au hage ia ʼe feala ke au tauʼi he fihifihia pe ʼi toku maʼuli. Kae ʼi ʼihi temi leva, ʼe au logoʼi ʼe mole kei he ʼuhiga ʼo te maʼuli.”

ʼE Tokoni Mai Te Tohi-Tapu

“ ʼE au tau fakatatau ia au ki te apositolo ko Petelo. Neʼe ina fai tana ʼu lakahala koia neʼe ina ui ai ʼe mole hona ʼuhiga. Kae neʼe mole haga nofo mo te taʼi manatu ʼaia, neʼe faiga ia ke fakatahi mo hona ʼu kaumeʼa ʼe tokaga lelei ki ai. Ka laga leva siʼoku mahaki, kua au tokaga tafito pe leva au ki te ʼu toto ʼe au fai ʼo au logoʼi ai ʼe mole hoku ʼuhiga. Kae ʼe au faiga ke au hage ko Petelo ʼo fakatahi mo hoku ʼu kaumeʼa lelei ʼe fia tokoni mai ke au lotomalohi tuʼumaʼu.

“ ʼE au maʼu he fakalotofimalie moka au lau te hisitolia ʼo te Hau ko Tavite. ʼI ʼihi temi neʼe lotomamahi ʼuhi ko tona aluʼaga pea neʼe fakahemala ki ʼana lakahala ʼi muʼa atu. ʼE au hage ʼosi ko ia he ʼe ʼi ʼihi temi ʼe au fai he ʼu palalau peʼe ko he ʼu meʼa ʼe au fakahemala leva ki ʼamuli. ʼE au tokagaʼi ʼe fakalotofimalie te ʼu palalau neʼe ina fai ia Pesalemo 51. ʼI te vahe 3, ʼe ui fenei e Tavite: “ ʼE au mahino lelei ki ʼaku talagataʼa, ʼe au manatuʼi tuʼumaʼu taku agahala.” Ka au logo kovi, ʼe ko te meʼa ʼosi pe ʼaia ʼe au logoʼi pea ʼe faigataʼa ʼosi kia au taku maʼu he manatu ʼe lelei ʼo ʼuhiga mo au. Kae neʼe toe ui fenei e Tavite ʼi te vahe 10: “ ʼAtua e, foaki mai he loto ʼe maʼa, pea mo he ʼatamai foʼou ke au tuʼu malohi.” ʼE au toe faikole feia ki te ʼAtua ke au fetogi taku faʼahiga manatu ʼo ʼuhiga mo au. Pea ʼe fakalotofimalie ʼosi kia au te vahe 17, ʼae ʼe ui ai: “ ʼE ko he loto ʼe mamahi, ʼAtua e, ʼe mole ke siʼaki anai he tahi ʼe taʼomia mo mafasia.” ʼE tokoni mai te vaega ʼaia ke au tui papau ʼe ʼofa te ʼAtua ia au.

“Ka au fakakaukauʼi tuʼumaʼu te faʼifaʼitaki ʼo natou ʼi te Tohi-Tapu mo te aluʼaga ʼe fai e te ʼAtua maʼaku ia ʼaho nei, ʼe au fakamalohiʼi ai taku tui ʼe ʼi ai he ʼamanaki ʼi te ka haʼu. Pea kia au ʼe hoko moʼoni te ʼu fakapapau ʼae ʼi te Tohi-Tapu. Koia, ʼe tokoni mai te ʼu faʼahi ʼaia ke au lotomalohi tuʼumaʼu.