4 | Te ʼu Tokoni ʼAoga Mai Te Tohi-Tapu

Fakamahino

Logo la ko te Tohi-Tapu ʼe mole ko he tohi fakatoketa, kae ʼe tou maʼu ai he ʼu tokoni ʼe ʼaoga ki he tahi ʼe tau mo te mahaki ʼulu. Koʼeni ʼihi tokoni.

Kotea ʼe Feala Ke Tou Fai?

“ ʼE mole ko te hahaʼi malolohi ʼae ʼe ʼaoga ki ai he toketa, kae ko natou ʼae ʼe mahahaki.”​—MATEO 9:12.

ʼE ui fakahagatonu mai ʼi te Tohi-Tapu, ʼi ʼihi temi ʼe ʼaoga ke tou kumi tokoni ki he toketa. Tokolahi neʼe natou maʼu honatou fimalie ʼi tanatou fai he ʼu fekumi ki te kau toketa ke natou mahino lelei ki tonatou mahaki.

“Ko te faigaoʼi ʼe ʼaoga.”​—1 TIMOTEO 4:8.

Kapau ʼe tou toʼo he temi ki te ʼu agamahani lelei ʼe feala ke lelei age totatou maʼuli malolo mo mahaki ʼulu. Ohage la ko te faigaoʼi, peʼe ke tou kai ki te ʼu meʼa kai ʼae ʼe ʼaoga ki te sino, pea ke feʼauga tatatou moe.

“ ʼE ko he faitoʼo lelei he loto ʼe fiafia, kae ʼe puli te lotomalohi ʼi te lotovaivai.”​—TAʼAGA LEA 17:22.

Ka tou lau ia he ʼu vaega Tohi-Tapu fakalotomalohi pea mo tou fai he ʼu fakatuʼutuʼu fakapotopoto, ʼe feala ke tou maʼu he faʼahiga manatu ʼe tou fiafia ai. Kapau ʼe taupau e ia ʼae ʼe mahaki ʼulu, he faʼahiga manatu ʼe lelei pea mo manatu tuʼumaʼu ki totatou ka haʼu taulekaleka, ʼe feala ke ina lava tauʼi ia tona lotomamahi.

“ ʼE maʼu te poto e natou ʼae ʼe fiamalalo.”​—TAʼAGA LEA 11:2

ʼE kotou tokagaʼi ʼe mole kotou lava fakahoko tokotahi ʼakotou fakatuʼutuʼu. Koia kotou kole tokoni ki ʼihi. ʼE lagi ʼi ai he tahi ʼi ʼokotou kaumeʼa peʼe ko ʼokotou famili ʼe natou fia tokoni atu, kae ʼe mole natou iloʼi pe kotea ke natou fai. Koia ʼe lelei ke tou fakaha age kia natou te meʼa ʼae ʼe kotou loto ki ai. ʼAua naʼa kotou iita moka ʼi ai he ʼu toto, kae ke kotou fiafia ʼi te ʼu meʼa ʼae ʼe natou fai maʼa koutou.

Neʼe Natou Maʼuliʼi Te ʼu Tokoni ʼAe ʼi Te Tohi-Tapu

“Neʼe au logo faikehe. Koia neʼe alu ai ki te toketa. Neʼe au mahino lelei ai ki toku mahaki. Pea neʼe au fakalavelave age ki te toketa pe kotea te ʼu faʼahiga faitoʼo ʼe feala ke au fakaʼaogaʼi ke lelei toku mahaki.”​—Nicole,a ʼe tau mo te mahaki ko te mohumohu ʼaho (trouble bipolaire).

“ ʼE au lau te Tohi-Tapu mo toku ʼohoana ʼi te ʼaho fuli, pea neʼe au tokagaʼi ʼe tokoni mai ke au maʼu he manatu ʼe lelei moʼo kamata ʼaki te ʼaho. Pea ʼi te ʼu ʼaho leva ʼae ʼe faigataʼa, ʼe au maʼu ʼi taku lau ia te Tohi-Tapu he vaega ʼe ina fakafimalieʼi toku loto.”​—Peter, ʼe tau mo te mahaki ko te lotomamahi.

“Neʼe au ufiufi ʼuhi ko toku mahaki, koia neʼe faigataʼa taku palalau ki ʼihi ʼo ʼuhiga mo te faʼahi ʼaia. Kae neʼe ʼi ai toku kaumeʼa lelei neʼe fagono lelei ki ʼaku palalau pea neʼe lotomahino moʼoni. Neʼe tokoni lahi mai kia au pea ke mole au tauʼi tokotahi toku mahaki.”​—Ji-yoo, ʼe tau mo te mahaki ʼo mole kei kai lelei (trouble de lʼalimentation).

“Neʼe tokoni mai te Tohi-Tapu ke au maʼu he sio fakapotopoto ʼo ʼuhiga mo te gaue pea mo te malolo. Neʼe tokoni mai te ʼu tokoni poto ʼae ʼi te Tohi-Tapu ke au lava katakiʼi toku mahaki.”​—Timothy, ʼe tau mo te mahaki ko te trouble obsessionnel compulsif.