Neʼe Au Sio Ki Te Tui ʼa Te Hahaʼi ʼa Sehova

Neʼe au kata, he neʼe au manatu ʼe mole fia palalau lotu toku kaumeʼa. Neʼe au fehuʼi age: “He ʼe ke iloʼi koe te Tohi-Tapu?” Neʼe mole ina tali atu aipe ki taku fehuʼi. Neʼe ina ui mai leva ko tana faʼe ʼe ko he Fakamoʼoni ʼa Sehova. Neʼe ina iloʼi ʼihi faʼahi mai ia ia. ʼI taku fia iloʼi meʼa fuli, neʼe au kole age ke ina fakamatala mai te ʼu meʼa ʼae ʼe ina iloʼi.

Neʼe teitei po katoa tamā faipalalau ʼaia. Neʼe ui mai e toku kaumeʼa ʼe fakaha ʼi te Tohi-Tapu ʼe ko Satana te pule ʼo te malamanei. (Soa. 14:30) Lagi mole ko he manatu foʼou kia koutou, kae kia au, neʼe ko taku hoki logo ʼae ki ai pea neʼe au fia mahino. Neʼe au logo tuʼumaʼu pe ki te ui ʼae ʼe ko he ʼAtua agalelei mo faitotonu ʼae ʼe pule ki te malamanei. Kae neʼe mole alu tahi mo te ʼu faʼahi ʼae neʼe au sio ki ai ʼi toku maʼuli. Logo la neʼe kei au taʼu 26, kae neʼe lahi te ʼu meʼa fakamataku neʼe au sio ki ai.

Neʼe pailate taku tamai ʼi te ʼu vakalele tau ʼo Amelika. Koia, ʼi taku kei tupulaga neʼe au mahino lelei neʼe feala pe ke hoko he tau fakanukelea. Neʼe feala pe ki te solia tau ke ina fakapaʼulu he foʼi pulu hila. Neʼe hoko te tau ʼi Vietnam kae neʼe kei au ako ʼi te univelesite ʼi Californie. Neʼe au kau ʼi te ʼu laka ʼa te kau tamaliki ako. Neʼe tuli matou e te kau polisi mo ʼanatou koga ʼakau. Neʼe matou feholaki, pea ʼuhi ko te kohu ʼo te ʼu kasa, neʼe mole kei tau tamatou manava pea neʼe mole kei matou sisio lelei. Neʼe lahi ʼosi te maveuveu mo te agatuʼu ʼi te temi ʼaia. Neʼe fakapogi ni hahaʼi faipolitike, neʼe fai ni laka, mo ni fihi. Neʼe kehekehe te manatu ʼa te hahaʼi, neʼe mole kei ʼi ai he felogoi.

ʼI te 1970, neʼe au alu ʼo gaue ʼi te potu noleto ʼo Alaska pea neʼe au maʼu paʼaga ai. Hili ʼaia, neʼe au faifolau ki Lonitoni, ʼo au toʼo ai taku motopai, pea neʼe au alu ki te saute, kae mole au iloʼi hoku tauʼaga. Hili ki ai ni mahina, neʼe au kaku ki Afelika. ʼI taku faifagona ʼaia, neʼe au felaveʼi mo ni hahaʼi neʼe natou toe fia ʼateaina mo natou mai ʼonatou fihifihia.

Koia, ʼuhi ko te ʼu meʼa ʼae neʼe au sio mo logo ki ai, neʼe moʼoni pe kia au te fakaha ʼae ʼi te Tohi-Tapu ʼe ko he laumalie agakovi ʼae ʼe ina taki te malamanei. Kae neʼe au fia iloʼi ai pe kotea ʼae ʼe fai e te ʼAtua.

ʼI te ʼu mahina ʼae neʼe hoa mai ki ai, neʼe au maʼu leva tona tali. Pea ʼaki te temi neʼe au toe feiloʼiʼaki foki pea mo ʼofa ki he ʼu tagata mo fafine neʼe natou agatonu ki te ʼAtua moʼoni ʼi he ʼu aluʼaga kehekehe.

KO ILELANI NOLETO, “TE FENUA ʼO TE PULU MO TE TAVILI”

ʼI taku toe liliu ki Lonitoni, neʼe au pauʼi te faʼe ʼo toku kaumeʼa, pea neʼe ina foaki mai he Tohi-Tapu. Ki muli age neʼe au alu ki Amsterdam, ʼi Pays-Bas, pea neʼe sio mai te Fakamoʼoni ki taku lau te Tohi-Tapu ʼi te lalo foʼi pou hila. Neʼe tokoni mai ke au mahino ki te tahi ʼu manatu. Neʼe au alu leva ki Dublin, ʼi Ilelani pea neʼe au maʼu ai te Petele ʼa te kau Fakamoʼoni ʼa Sehova. Neʼe au tukituki te matapa. Pea neʼe au felaveʼi ai mo te tehina poto kua fotufotuʼa, ko Arthur Matthews. Neʼe au fakaui haku ako Tohi-Tapu, pea neʼe ina tali ke ina fai taku ako.

Neʼe au heka ʼi toku pilo, ʼo kamata lau te ʼu tohi mo te ʼu nusipepa ʼae neʼe ta e te kau Fakamoʼoni. Pea neʼe au toe lau mo te Tohi-Tapu katoa. Neʼe au fiafia ʼosi! Neʼe au tokagaʼi, ʼi te ʼu fono ʼa te kokelekasio, maʼia mo te ʼu fanau neʼe natou iloʼi te ʼu tali ki te ʼu fehuʼi ʼae neʼe fai talu mai fualoa e te kau popoto. “Kotea te tupuʼaga ʼo te agakovi? Ko ai te ʼAtua? Kotea ʼae ʼe hoko moka mate he tahi?” Ko ʼoku kaumeʼa fuli neʼe ko he ʼu Fakamoʼoni he neʼe mole au feiloʼiʼaki mo he tahi ʼi te fenua. Neʼe natou tokoni mai ke au ʼofa kia Sehova pea ke au fia fai tona finegalo.

Neʼe au papitema ʼi te 1972. Hili ki ai te taʼu, neʼe au pionie pea neʼe au kau leva ki te kiʼi kokelekasio ʼi Newry, ʼi Ilelani Noleto. Neʼe au nofo ʼi he ʼapi neʼe faʼu ʼaki te maka pea neʼe tuʼu tokotahi ʼi te moʼuga. Neʼe ʼi ai te ʼu pipi ʼi te malaʼe, pea neʼe au faʼifaʼitakiʼi taku ʼu akonaki ʼo haga kia natou. Neʼe hage neʼe natou fakalogo lelei mai mo lolotoga kai te luna. Neʼe mole feala ke natou fai mai he ʼu tokoni, kae neʼe ko he fealagia ke au poto ai ʼi te sioʼi ʼo te nofoʼaki moka au faiakonaki. ʼI te 1974, neʼe au pionie makehe pea neʼe au gaue fakatahi mo Nigel Pitt ʼae neʼe liliu ko hoku kaumeʼa lelei.

ʼI te temi ʼaia, neʼe lahi ʼosi te agamalohi ʼi Ilelani Noleto. Neʼe fakahigoaʼi pe la e ʼihi te Noleto ko “te fenua ʼo te pulu mo te tavili.” Neʼe ko he meʼa mahani te fuhu ʼa te hahaʼi ʼi te ala, te fanahi ʼo ʼihi, mo te fakapaʼulu ʼo te ʼu motoka. Neʼe lahi pe te ʼu fihifihia mai te politike mo te lotu. Kae neʼe mahino te kau Polotesita mo te kau Katolika ʼe mole kau te kau Fakamoʼoni ʼa Sehova ʼi te politike. Koia, neʼe feala ai ke hoko atu tamatou faifakamafola mo hao mai te ʼu fihifihia. Neʼe iloʼi e te hahaʼi te temi pea mo te koga meʼa ka hoko ai he ʼu agamalohi, pea neʼe natou fakatokaga mai ke matou fakamamaʼo mai ai.

Kae neʼe ʼi ai pe te ʼu aluʼaga fakatupu tuʼutamaki. Ko au mo te tahi pionie ko Denis Carrigan, neʼe ma faifakamafola ʼi te kolo neʼe ovi mai. Neʼe mole he Fakamoʼoni ʼa Sehova ʼi ai pea neʼe tuʼa tahi pe tamā olo ki ai ʼi muʼa atu. Neʼe tukugakoviʼi maua e te fafine, takua ko maua ko he ʼu tagata solia Pilitania neʼe ʼomai fakafufu. Neʼe lagi manatu feia he neʼe mole ma puʼaki fakalelei te lea Fakailelani. Neʼe ma matataku ai. Neʼe feala ke matehi koe moka neʼe ke kaumeʼa mo he kau solia peʼe fanahi tou foʼi tuli. ʼI tamā tutuʼu ʼo atali ki te ka ʼi te momoko, neʼe ma sisio ki te tau age ʼa he motoka ki te muʼa fale kafe ʼae neʼe tukugakoviʼi ai maua e te fafine. Neʼe haʼu te fafine ʼo palalau ki te ʼu tagata ʼe toko lua ʼi te motoka, ʼo tau hinohino kia maua. Neʼe ʼomai leva te ʼu tagata ʼo fehuʼi mai te hola ʼo te ka. ʼI te tau mai ʼo te ka, neʼe olo ʼo palalau ki te sofea. Neʼe mole ma logo ki tanatou faipalalau. Neʼe ko maua pe ʼi te ka, koia neʼe ma iloʼi ai ʼe gaohi koviʼi anai maua ʼi te tuʼa kolo. Kae neʼe mole hoko te faʼahi ʼaia. ʼI taku hifo ʼi te ka, neʼe au fehuʼi fenei ki te sofea: “Ko te ʼu tagata ʼae neʼe ke palalau mo ia, neʼe nā faifehuʼi atu ʼo ʼuhiga mo maua?” Neʼe ina tali mai: “ ʼE au iloʼi pe ko ai ia koulua, pea neʼe au fakaha age ki te ʼu tagata ʼaia. ʼAua naʼa kolua tuʼania, ʼe mole hoko anai he meʼa kia koulua.”

ʼI te 1976, ʼi te fakatahi fakatisitilikea ʼi Dublin, neʼe au felaveʼi mo Pauline Lomax, ko he tuagaʼane mai Pilitania, neʼe pionie makehe. Pea ko he tuagaʼane agatonu, agavaivai pea mo finemui. Ko ia mo tona kiʼi tokolua ko Ray neʼe nā iloʼi te moʼoni talu mai tanā liliki. Hili te taʼu, neʼe au ʼohoana mo Pauline pea neʼe hoko atu tamā pionie makehe ʼi Ilelani Noleto, ʼi te kolo ko Ballymena.

Neʼe ma gaue ʼi te siliko lolotoga ni taʼu, ʼo tokoni ki te ʼu tehina ʼi Belfast, mo Londonderry pea mo te tahi ʼu koga meʼa neʼe lahi ai te agamalohi. Neʼe malave kia maua te tui ʼa te ʼu tehina mo tuagaʼane he neʼe natou liʼaki te ʼu akonaki fakalotu hala, mo te ʼu manatu fakapalatahi pea mo te ʼu fehiʼa ʼae neʼe kua tauaka ʼi ʼonatou loto, moʼo tauhi kia Sehova. Neʼe lahi ʼosi tonatou tapuakinaʼi mo puipui e Sehova.

Neʼe au maʼuli ʼi Ilelani ia taʼu ʼe 10. ʼI te 1981, neʼe fakaafe maua ke ma kau ki te 72 kalasi ʼo te Ako ʼo Kalaate. Pea ʼi tamā ʼosi maʼu pepa, neʼe hinoʼi leva maua ki Sierra Leone, ʼi Afelika Uesite.

KO SIERRA LEONE, TE TUI LOGO LA TE MASIVA

Neʼe ma nonofo ʼi te ʼapi maʼa te kau misionea, mo te toko 11 ʼu tehina mo tuagaʼane misionea. Neʼe matou fakaʼaogaʼi te fale kuka ʼe tahi, te ʼu fale mamaʼo ʼe tolu, te ʼu fale maʼanu ʼe lua, te telefoni ʼe tahi, te masini faifo ʼe tahi, pea mo te masini fakamoamoa fo ʼe tahi. Neʼe tau motu fakafokifa te hila. Neʼe mafola te ʼu kuma ʼi te fuga ʼato mo te ʼu gata ʼi te lalo fale.

Logo la neʼe mole faigafua te maʼuli, kae neʼe ma fiafia ʼaupito ʼi te faifakamafola. Neʼe fakaʼapaʼapa te hahaʼi ki te Tohi-Tapu pea mo fia logo. Tokolahi neʼe natou ako te Tohi-Tapu pea neʼe natou liliu ko he ʼu Fakamoʼoni. Neʼe fakahigoaʼi au e te hahaʼi ko “Monsieur Robert” pea ko Pauline neʼe ko “Matamu Robert.” Kae ki muli age, neʼe lahi age leva taku gaue maʼa te Petele. Neʼe mole kei lahi taku faifakamafola, pea neʼe kamata fakahigoaʼi e te hahaʼi ia Pauline ko “Matamu Pauline” pea natou fakahigoaʼi au ko “Monsieur Pauline.” Neʼe leleiʼia e Pauline te faʼahi ʼaia.

Tokolahi te ʼu tehina mo tuagaʼane neʼe masisiva, kae neʼe tokaga tuʼumaʼu ia Sehova ke natou maʼu te ʼu meʼa ʼae neʼe ʼaoga kia natou, ʼi hona aluʼaga fakaofoofo. (Mat. 6:33) ʼE au manatuʼi te tuagaʼane neʼe feʼauga pe tana foʼi falā moʼo totogi he meʼa kai maʼa ia mo tana ʼu tamaliki. Kae neʼe ina foaki fuli tana foʼi falā ki he tehina neʼe mahaki he neʼe mole ina lava totogi ʼona faitoʼo. Pea fokifa pe ʼi te ʼaho ʼaia, neʼe alu age te fafine ki te tuagaʼane ʼo totogi age tana faʼu tona ʼulu. Neʼe lahi te ʼu aluʼaga feia neʼe hoko.

ʼI NIGÉRIA, ʼE MA AKO HE AGAʼI FENUA FOʼOU

Neʼe ma nofo ʼi Sierra Leona ia taʼu ʼe 9. Pea neʼe hinoʼi leva maua ki te Petele ʼo Nigéria. Neʼe ko he Petele lahi. Neʼe au fai pe taku gaue mahani, ʼae neʼe au fai ʼi Sierra Leone, kae kia Pauline neʼe ko he toe fetogi pea neʼe faigataʼa. ʼI muʼa atu, ʼi te mahina fuli, neʼe faifakamafola ia hola ʼe 130 pea neʼe tuputupu tana ʼu ako Tohi-Tapu. Neʼe hinoʼi leva ki te fale tui, pea neʼe gaue ai ʼaho katoa ʼo tui te ʼu mutuʼi meʼa ʼae kua mahae. Koia, neʼe ʼaoga ai he temi kia Pauline ke fakamamahani mo te aluʼaga ʼaia. Kae neʼe mahino leva ki te lotofakafetaʼi ʼo te ʼu tehina mo tuagaʼane ʼi tana gaue ʼaia, pea neʼe ina fakaʼaogaʼi te ʼu faigamalie moʼo fakalotomalohiʼi te tahi kau Petelite.

Neʼe foʼou kia maua te agaʼi fenua ʼo Nigéria, pea neʼe lahi te ʼu faʼahi neʼe tonu ke ma ako. ʼI te tahi ʼaho, neʼe haʼu te tehina ki toku pilo mo he tuagaʼane neʼe hoki hu age pe ki te Petele. Neʼe au fia ʼalofa age ki te tuagaʼane, kae neʼe tuʼutuli ifo ia ki ʼoku vaʼe. Neʼe au punamaʼuli ʼosi. Neʼe au manatuʼi atu aipe te ʼu vaega Tohi-Tapu ʼe lua, ia Gaue 10:25, 26 pea mo Fakaha 19:10. Neʼe au feʼekeʼaki fenei: “ ʼE tonu koa ke au ui age ke tuku tana fai te faʼahi ʼaia?” Kae neʼe au toe manatuʼi foki kapau neʼe tali ke gaue ʼi te Petele, pea kua ina iloʼi te meʼa ʼae ʼe ui ʼi te Tohi-Tapu.

Neʼe mata faikehe kia au, kae neʼe hoko atu tamatou faipalalau. Hili ia, neʼe au fai leva ni fekumi. Neʼe au iloʼi ai neʼe mulimuli te tuagaʼane ki he agaʼi fenua, ʼae neʼe kei fai ʼi te temi ʼaia ʼi ʼihi potu fenua. Neʼe toe fai pe e te hahaʼi tagata te agaʼi fenua ʼaia. Ko te faʼahiga fakaha ʼaia ʼo tonatou fakaʼapaʼapa. Kae neʼe mole ko he atolasio ia, pea ʼe maʼu pe la ʼi te Tohi-Tapu te faʼahiga fakaʼapaʼapa ʼaia. (1 Sam. 24:8) Neʼe au fiafia he neʼe mole au ui he meʼa ke ufiufi ai toku tuagaʼane.

Neʼe ma feiloʼiʼaki mo he ʼu tehina mo tuagaʼane ʼo Nigéria neʼe nonofo agatonu kia Sehova. Ohage la ko te tehina ko Isaiah Adagbona.b Neʼe ina iloʼi te moʼoni ʼi tana kei tupulaga, kae neʼe ina maʼu leva te mahaki ʼae ko te kilia. Neʼe ʼave ki te fale kilia pea neʼe ko ia tokotahi pe ʼae neʼe ko he Fakamoʼoni ʼa Sehova. Logo la te fakafeagai, kae neʼe tokoni ki te toko 30 tupu hahaʼi kilia ke natou tali ia te moʼoni pea neʼe fakatuʼu he kokelekasio ʼi te nofoʼaga ʼaia.

ʼI KENYA, NEʼE KATAKI FUALOA TE ʼU TEHINA MO AU

ʼI te 1996, neʼe hinoʼi leva maua ki te Petele ʼo Kenya. Neʼe ko taku hoki toe liliu ʼaia ki te fenua talu mai taku alu ki ai, ohage ko taku fakamatala ʼi te kamata. Neʼe ma nonofo ʼi te Petele. Pea neʼe lahi te ʼu geli ʼi te koga meʼa, neʼe natou kaihaʼa te ʼu fuaʼi ʼakau ʼae neʼe fata e te ʼu tuagaʼane. ʼI te tahi ʼaho, neʼe tuku ava e he tuagaʼane te matapa fakamalama ʼo tona koga fale. ʼI tana toe liliu mai, neʼe ina maʼu he ʼu faga geli neʼe natou lolotoga kai tana meʼa kai. Neʼe kalaga pea mo hu ki tuʼa ʼi te matapa. Neʼe toe kalaga mo te ʼu geli pea natou feholaki ʼi te matapa fakamalama.

Neʼe ma kau mo Pauline ʼi he kokelekasio lea Swahili. Mole fualoa, neʼe hinoʼi au ke au taki te Ako Tohi ʼo Te Kokelekasio (ʼi te temi nei ʼe ko te Ako Tohi-Tapu ʼo Te Kokelekasio). Kae neʼe heʼeki faʼa lelei taku palalau ʼi te lea. Neʼe au teuteu lelei fakatomuʼa, ʼo feala ai ke au lau te ʼu fehuʼi. Kae kapau neʼe mole mulimuli te ʼu tali ʼo te nofoʼaki ki te faʼahi ʼae ʼe tuʼu ʼi te tohi, pea neʼe mole au mahino ki ʼanatou tali. Neʼe au lotomamahi ai, pea neʼe au ʼofa ki ʼoku tehina mo tuagaʼane. Neʼe malave ʼosi kia au tanatou tali te aluʼaga ʼaia mo he faʼa kataki fualoa pea mo he agavaivai.

ʼI AMELIKA, TE TUI LOGO LA TE MAʼU KOLA

Neʼe heʼeki taʼu katoa tamā ʼi Kenya, pea neʼe fakaafe leva maua ʼi te 1997 ke ma olo ki te Petele ʼo Brooklyn, ʼi New York. Neʼe ma nonofo leva ʼi he fenua maʼu koloa, mo ʼona fihifihia. (Taag. 30:8, 9) Logo la te maʼu koloa ʼo te fenua, kae ʼe malohi te tui ʼo te ʼu tehina mo tuagaʼane. ʼE mole natou fakaʼaogaʼi tonatou temi mo ʼonatou fealagia ke natou maʼu koloa, kae ke natou lagolago ki te ʼu gaue ʼae ʼe fai ʼi te kautahi ʼa Sehova.

ʼAki te temi, neʼe ma sisio ki te tui ʼa te ʼu tehina mo tuagaʼane ʼi te ʼu aluʼaga kehekehe. ʼI Ilelani, tanatou tui logo la te agamalohi. ʼI Afelika, tanatou tui logo la te masiva mo tanatou nonofo tau mamaʼo. ʼI Amelika, tanatou tui logo la ko he fenua maʼu koloa. ʼE mahino ia ʼe fiafia ia Sehova moka sio ifo ki te fakaha e tana hahaʼi tonatou ʼoʼofa ia te ia ʼi te ʼu aluʼaga fuli pe.

Neʼe fakalaka vave te ʼu taʼu, ʼo “vave age . . . ʼi te gaue ʼa te tagata lalaga.” (Sopo 7:6) ʼI te temi nei, ʼe ma gaue ʼi te ʼu pilo fakamalamanei ʼo Warwick, fakatahi mo te ʼu kaugana ʼa Sehova. Pea ʼe ma fiafia ʼi tamā tauhi mo ni hahaʼi ʼe feʼofaʼofani moʼoni ʼaki. ʼE ma toe fiafia ʼi te fai ʼo te meʼa ʼae ʼe ma lavaʼi moʼo lagolago ki totatou Hau, ia Kilisito Sesu, ʼae kua vave pe tana fakapale natou ʼae ʼe agatonu kia te ia.—Mat. 25:34.