ʼE Ko He Meʼa Lelei Kia Tatou Te “Fakaovi Ki Te ʼAtua”

1-2. (1) Kotea ʼe tonu ke tou fai ke tou maʼu mo haga taupau he ʼu felogoi lelei mo he tahi? (2) Kotea ka tou vakaʼi ʼi te alatike ʼaeni?

ʼE ʼI AI koa hou kaumeʼa lelei? Neʼe feafeaʼi takolua liliu ʼo kaumeʼa lelei? ʼE mahino ia, neʼe lahi te temi ʼae neʼe ke fakatahi ai mo ia. Neʼe feala ai hau iloʼi tona ʼu faigataʼaʼia, ʼo feia mo te ʼu meʼa ʼae ʼe ina leleiʼia mo ʼae ʼe mole ina leleiʼia. Koia, neʼe ke tokagaʼi ai ʼona kalitate ʼae ʼe ke fia faʼifaʼitakiʼi anai, ʼo tupu ai hau ʼofa ia ia.

² Kapau ʼe tou fia maʼu he ʼu felogoi lelei mo he tahi pea mo haga taupau maʼu, ʼe ʼaoga anai he temi ki ai pea mo he ʼu faiga. Pea ʼe toe feia pe mo ʼatatou felogoi lelei mo Sehova. ʼI te alatike ʼaeni, ʼe tou vakaʼi anai pe ʼe feafeaʼi hatatou fakaovi ki totatou ʼAtua, pea kotea te ʼu fua lelei ʼe tou maʼu mai ai. Kae ʼe tou vakaʼi muʼa pe koʼe ko he meʼa lelei kia tatou te fakaovi tuʼumaʼu ki totatou Kaumeʼa lelei ko Sehova.

3. He koʼe ʼe tonu ke tou fakakaukauʼi ia te ʼu fua lelei ʼe tou maʼu mai tatatou fakaovi kia Sehova? Tuku mai he faʼifaʼitaki.

³ ʼE mahino ia, ʼe ke manatu tahi anai mo te manatu ʼaeni, ka ke fakaovi ki te ʼAtua, ʼe ko he meʼa lelei ia kia koe. Kae kapau ʼe ke manatuʼi ʼe lelei kia koe te fakahoko ʼo te faʼahi ʼaia, ʼe uga anai koe ke ke haga fai tuʼumaʼu. (Pes. 63:6-8) Tou toʼo he faʼifaʼitaki. ʼE tou iloʼi kapau ʼe tou fakapotopoto ʼi te kai, mo faigaoʼi, mo feʼauga mo te malolo, pea mo inu te vai, pea ʼe lelei kia tatou. Kae, tokolahi ʼe mole natou tokagaʼi te faʼahi ʼaia, pea ʼe natou meʼa noaʼi tonatou maʼuli malolo fakasino. Koia, ka tou fakakaukauʼi ia te ʼu fua lelei ʼe tou maʼu mai ai, ʼe toe faigafua anai ia tatatou hoko atu. ʼO toe feia pe, kapau ʼe tou iloʼi ʼe ko he meʼa lelei kia tatou ia te fakaovi ki te ʼAtua pea mo fakakaukauʼi ia tona ʼu fua lelei, ʼe uga ai tatou ke tou haga hoko atu te faʼahi ʼaia.—Pes. 119:27-30.

4. Kotea te ʼu manatu ʼae neʼe fakaha e te tagata faipesalemo ia Pesalemo 73:28?

⁴ Lau ia Pesalemo 73:28. Ko te tagata ʼae neʼe ina tohi te Pesalemo 73, neʼe ko he Levite pea neʼe faimaholo ʼi te fale lotu ʼo Sehova. ʼI tana tohi te pesalemo ʼaia, ʼe mahino ia neʼe kua fualoa tana tauhi agatonu kia Sehova. Kae neʼe ina logoʼi te ʼaoga lahi ʼae kia ia ke ina manatuʼi tuʼumaʼu ʼo feia mo ʼihi, ia te ʼu fua lelei ʼe natou maʼu ʼi tanatou “fakaovi ki te ʼAtua.” Kotea ʼihi fua lelei ʼe tou maʼu mai tatatou fakaovi ki te ʼAtua?

ʼE TOU FIAFIA

5. (1) He koʼe ʼe tou fiafia moka tou fakaovi kia Sehova? (2) Kotea te ʼu aluʼaga neʼe fua lelei ai kia koe tau maʼu te poto ʼo Sehova? Pea neʼe ina puipui feafeaʼi koe? (Taʼaga Lea 2:6-16)

⁵ Ka tou fakaovi kia Sehova, pea ʼe toe lahi age mo totatou fiafia. (Pes. 65:4) ʼE lahi ʼona tupuʼaga. Ohage la, ka tou fakalogo ki te ʼu tokoni fakapotopoto ʼae ʼi tana Folafola, pea ʼe fua lelei kia tatou. Pea ʼe puipui ai tatou mai te ʼu fakaneke mo aga kovi fuli pe. (Lau ia Taʼaga Lea 2:6-16.) Koia ʼae, ʼe ui fenei ai ʼi te Tohi-Tapu: “Manuʼia te tagata ʼae ʼe ina maʼu te poto, mo te tagata ʼae ʼe liliu ʼo fakasiosio tonu.”—Taag. 3:13.

6. He koʼe neʼe mole kei fiafia te tagata faitohi ʼo te Pesalemo 73?

⁶ ʼE mahino ia, ʼi ʼihi temi ʼe feala ke lotomamahi ia te ʼu kaumeʼa ʼo Sehova. Neʼe mole kei fiafia ia te tagata faitohi ʼo te Pesalemo 73, ʼuhi ko tana nofo ʼae mo he ʼu manatu ʼe mole lelei. Kia ia, neʼe maʼuli fimalie age te kau agakovi, pea neʼe mole natou fakaʼapaʼapa ki te ʼAtua mo ʼAna lekula. Neʼe lotomamahi ai mo maheka kia natou. Neʼe manatu ia ʼe tuputupu tuʼumaʼu pe te ʼu koloa ʼo te hahaʼi agamalohi ʼaia mo agatuʼu. ʼE maʼuʼuli malolo lelei pe natou pea ʼe mole iloʼi natou pe kotea te mamahi. (Pes. 73:3-7, 12) ʼI te lahi fau ʼo tona lotomamahi, neʼe ina feʼekeʼaki pe ke ʼi ai koa he ʼuhiga ʼo tana ʼu faiga ʼae ke tauhi kia Sehova. Koia ʼae neʼe ina ui fenei ai: “ʼE mole he ʼuhiga ʼo taku taupau ke maʼa toku loto, pea mo taku ui ʼae ʼe mole haku hala.”—Pes. 73:13.

7. Kotea ʼae ʼe feala ke tou fai moka tou lotomamahi pea moka mole tou fiafia? (Vakaʼi mo te pāki ʼo te takafi.)

⁷ Neʼe mole tuku e te tagata faipesalemo ke taʼomia ʼi te lotomamahi. Neʼe ina fai he puleʼaki moʼo fetogi ia tana faʼahiga manatu. Neʼe “ulu ki te sagatualio taulekaleka ʼo te ʼAtua” pea neʼe ina tali tona fakatonutonuʼi e Sehova. (Pes. 73:17-19) Ka tou lotomamahi, ʼe iloʼi lelei e totatou Kaumeʼa lelei ko Sehova. Tou kole ia tana takitaki pea mo tou tali ia tana tokoni, ʼae ʼe ina foaki mai ʼaki tana Folafola pea mo te kokelekasio. Ka tou fai feia, ʼe tou maʼu anai te malohi ʼae ʼe ʼaoga mai ke tou katakiʼi te aluʼaga ʼaia. ʼE feala pe ke toe fakapelepeleʼi mo fakafimalieʼi tatou e Sehova moka tou taʼomia ʼi te tuʼania.—Pes. 94:19.a

ʼE ʼI AI TE ʼUHIGA ʼO TOTATOU MAʼULI PEA MO MAʼU HE ʼAMANAKI

8. Kotea te tahi ʼu tupuʼaga ʼe ha ai ʼe ko he meʼa ʼe lelei ki tatou te “fakaovi ki te ʼAtua”?

⁸ Koʼeni te tahi ʼu tupuʼaga ʼe lua ʼe ha ai, ʼe ko he meʼa ʼe lelei kia tatou te “fakaovi ki te ʼAtua.” ʼE ʼi ai anai he ʼuhiga moʼoni ʼo totatou maʼuli, pea ʼe tou maʼu ai he ʼamanaki. (Sel. 29:11) Tou vakaʼi te ʼu fua lelei ʼaia.

9. He koʼe ʼe tou ui ka tou fakaovi kia Sehova, ʼe ʼi ai he ʼuhiga moʼoni ʼo totatou maʼuli?

⁹ Ka tou fakaovi kia Sehova, pea ʼe ʼi ai he ʼuhiga moʼoni ʼo totatou maʼuli. Tokolahi ʼe natou ui ʼe mole maʼuli moʼoni ia te ʼAtua. Koia, ʼe mole natou iloʼi ai te ʼuhiga ʼo te maʼuli. Pea ʼe natou manatu ʼe pulihi anai te tagata ʼo talu ai. Kae, ʼi tatatou ako te Tohi-Tapu, neʼe tou tui papau ai ‘ʼe maʼuli ia ʼAtua pea ʼe ina fakapale ia natou ʼae ʼe natou kumi fakamalotoloto ia ia.’ (Hep. 11:6) Pea tahi, ʼe tou maʼuli fiafia ʼi te temi nei, koteʼuhi ʼe tou tauhi ki tatatou Tamai ʼae ʼe ʼi selo ko Sehova. Pea ko te tupuʼaga la ʼaia ʼo tana haga ʼae ʼo fakatupu tatou.—Tet. 10:12, 13.

10. Kotea ʼe fakaha ia Pesalemo 37:29 ʼo ʼuhiga mo te ka haʼu ʼo natou ʼae ʼe falala kia Sehova?

¹⁰ Tokolahi ʼe mole ʼi ai honatou ʼamanaki ki te ka haʼu. ʼE gaue pe natou, mo faiʼohoana, mo maʼu fanau pea mo tanaki hanatou foʼi falā ki tanatou letelete. ʼE mole natou iloʼi pe kotea ʼae ʼe fakapapauʼi e te ʼAtua ki te ka haʼu. Kae ʼe iloʼi e te ʼu kaugana ʼa Sehova, ʼe ʼi ai tanatou ʼamanaki. (Pes. 25:3-5; 1 Tim. 6:17) ʼE tou falala katoa ki totatou ʼAtua mo Kaumeʼa pea ʼe tou tui ki ʼana fakapapau. ʼEi, ʼe tou tauhi anai kia te ia ʼi te Palatiso ʼo talu ai.—Lau ia Pesalemo 37:29.

11. Ka tou fakaovi kia Sehova, kotea te ʼu fua lelei ʼe tou maʼu mai ai? Pea kotea ʼe ina logoʼi?

¹¹ ʼE toe lahi te tahi ʼu tupuʼaga ʼe ha ai, ʼe ko he meʼa lelei kia tatou te fakaovi kia Sehova. Ohage la, ʼe ina fakapapau ke ina fakamolemole ʼatatou agahala moka tou fakahemala. (Esa. 1:18) Koia, kapau neʼe tou fai he ʼu agahala ʼi muʼa atu, ʼaua naʼa tou lotomamahi mo tauteaʼi pe ia tatou totonu. (Pes. 32:1-5) Pea tahi, ʼe tou fiafia ʼi te fakafiafiaʼi ʼo te loto ʼo Sehova. (Taag. 23:15) ʼE mahino ia, ʼe ke manatu ki he tahi ʼu fua lelei ʼe tou maʼu mai ʼatatou felogoi lelei mo te ʼAtua. Kae ʼe feafeaʼi hau hoko atu tau fakaovi kia te ia?

ʼE FEAFEAʼI HATATOU HOKO ATU HATATOU “FAKAOVI KI TE ʼATUA”?

12. Kotea te ʼu aluʼaga neʼe ke fai ke ke fakaovi ai ki te ʼAtua?

¹² Kapau kua ke papitema, ko tona fakaʼuhiga, neʼe kua lahi te ʼu aluʼaga neʼe ke fai ke ke fakaovi ai kia Sehova. Ohage la, neʼe lahi te ʼu moʼoni neʼe ke ako ʼo ʼuhiga mo ia pea mo Sesu. Neʼe ke fakahemala ki te ʼu agahala ʼae neʼe ke fai ʼi muʼa atu. Neʼe malohi tau tui ʼae kia te ia, pea neʼe ke faiga ke ke mulimuli ki tona finegalo. Kae kapau ʼe ke fia fakaovi lahi age ki te ʼAtua, ʼe tonu ke ke haga hoko atu tau fai te ʼu faʼahi ʼaia.—Kol. 2:6.

13. Kotea te ʼu aluʼaga ʼe tolu ʼe tokoni mai ke hoko atu tatatou fakaovi kia Sehova?

¹³ Kotea ʼae ka tokoni mai ke hoko atu tatatou fakaovi kia Sehova? (1) ʼE tonu ke hoko atu tatatou lau mo ako ia te Tohi-Tapu. Ka tou lau mo ako te Tohi-Tapu, ʼe mole tonu ke tou faiga pe ke tou mahino ki te ʼu moʼoni tafito ʼo ʼuhiga mo te ʼAtua. ʼE tonu ke tou toe kumi ke tou mahino pe kotea te finegalo ʼo tatatou Tamai ʼo ʼuhiga mo tatou. Pea tou tuku ke takitaki tatou e ʼana pelesepeto. (Efe. 5:15-17) (2) ʼE tonu ke tou fakamalohiʼi tatatou tui, ʼo tou metitasio ki te ʼu fakamoʼoni ʼae ʼe ha ai ʼe ʼofa ia tatou. (3) ʼE tonu ke tou haga fehiʼa ki te ʼu aga ʼae ʼe fehiʼa ki ai, pea ʼaua naʼa tou fakatahi mo natou ʼae ʼe natou fai te ʼu aga ʼaia.—Pes. 1:1; 101:3.

14. Ka tou lau te pelesepeto ʼae ia 1 Kolonito 10:31, ʼe feafeaʼi hatatou fakafiafiaʼi ia Sehova ʼi te ʼu aluʼaga fuli ʼo totatou maʼuli? (Vakaʼi mo te ʼu pāki.)

¹⁴ Lau ia 1 Kolonito 10:31. ʼE maʼuhiga ke tou fakatotonu ke tou fakafiafiaʼi ia Sehova. Koia, ʼe mole gata pe ki tatatou olo ʼo faifakamafola pea mo kau ki te ʼu fono. Kae ʼe tonu ke tou toe fakaha ʼi te ʼu aluʼaga fuli ʼo totatou maʼuli. Ohage la, ʼe tonu ke tou aga fakahagatonu ia meʼa fuli pea mo maʼuli vaevae. ʼE ina loto ke tou toe fakaʼapaʼapa lahi ki te meʼa ʼofa ʼae ko te maʼuli. (2 Ko. 8:21; 9:7) ʼE tou fakaha anai ʼe tou fia fakaovi kia Ia ʼae neʼe ina foaki mai te maʼuli, ʼo tou kai fakapotopoto, ʼo mole tou inu fakavale pea mo tou fai ʼihi aluʼaga ʼe tokoni mai ke tou maʼu ai he maʼuli malolo ʼe lelei. Ka tou fai ni faiga maʼia ʼi te ʼu aluʼaga ʼae ʼe mole faʼa maʼuhiga kia tatou, ʼe tou toe maʼuhiga lahi age anai kia te ia.—Luka 16:10.

15. ʼE loto e Sehova ke feafeaʼi tatatou aga ki ʼihi?

¹⁵ ʼE agalelei ia Sehova mo te kau faitotonu, ʼo feia mo te kau heʼe faitotonu. (Mat. 5:45) Pea ʼe ina loto ke tou toe fai feia ki te hahaʼi fuli. Ohage la, ʼe ina kole mai “ke ʼaua naʼa tou laukovi ki he tahi, mo fakatupu kē, . . . kae ke tou agamalū ki te hahaʼi fuli.” (Tito 3:2) ʼI tatatou mahino ki te faʼahi ʼaia, ʼaua naʼa tou fehihiʼa kia natou ʼae ʼe mole tauhi fakatahi mo tatou kia Sehova. (2 Tim. 2:23-25) Koia, ʼe tou fakaovi anai kia Sehova, ʼo tou agalelei tuʼumaʼu ki te hahaʼi fuli, pea mo fakaʼapaʼapa lahi kia natou.

NEʼE TOU ʼOSI FAI HE LAKAHALA

16. Kotea ʼae neʼe logoʼi e te tagata faitohi ʼo te Pesalemo 73 ʼi tana ʼosi fai he lakahala?

¹⁶ Kotea ʼe ke fai mo kapau ʼe ke logoʼi mole kei ke tuha mo te ʼofa ʼo Sehova moka ke ʼosi fai he lakahala? Kei ke manatuʼi neʼe toe fai pe la mo te tagata faitohi ʼo te Pesalemo 73 ia he aga ʼe kovi. Neʼe ina ui fenei: “Neʼe meʼa pe ke au hehe ʼi taku haʼele. Neʼe meʼa pe ke heke ʼoku vaʼe.” (Pes. 73:2) ʼEi, neʼe “ita” mo “agavale,” pea ‘neʼe agavale ia muʼa ʼo Sehova ohage ko he manu.’ (Pes. 73:21, 22) Neʼe manatu koa neʼe mole kei he puleʼaki ki ai? Peʼe mole kei tuha mo te ʼofa ʼo Sehova ʼuhi ko ʼona vaivaiʼaga?

17. (1) Kotea ʼae neʼe fai e te tagata faipesalemo ʼi tana kua lotovaivai ʼaupito? (2) ʼE feafeaʼi hatatou faʼifaʼitakiʼi te tagata faipesalemo? (Vakaʼi mo te ʼu pāki.)

¹⁷ Kapau neʼe logoʼi e te tagata faitohi pesalemo hona liʼakina e Sehova, pea neʼe fakatemi pe te meʼa ʼaia neʼe ina logoʼi. Logo la neʼe lotovaivai ʼaupito, kae neʼe ina iloʼi neʼe tonu ke fakaovi ki tona ʼAtua. ʼE ha te faʼahi ʼaia ʼi te ʼu palalau ʼaeni neʼe ina fai kia Sehova: “Kae ʼi te temi nei ʼe au nofo tuʼumaʼu mo koe. Neʼe ke puke toku nima mataʼu. ʼE ke takitaki au ʼaki ʼau tokoni, pea ʼe ke ʼave anai au ki te kololia.” (Pes. 73:23, 24) ʼO toe feia pe, ʼe tonu ke tou kole kia Sehova ke ina foaki mai te malohi moka ʼe tou logoʼi kua vaivai tatatou tui, peʼe tou lotovaivai ʼuhi ko ʼatatou lakahala. (Pes. 73:26; 94:18) Tatau aipe pe ʼe heke fakatemi ʼotatou vaʼe, tou toe liliu mai kia Sehova ʼo tou tui papau ʼe “lotofakamolemole.” (Pes. 86:5) ʼEi, ka tou lotovaivai ʼaupito, ʼe tonu ke tou fakaovi ki totatou ʼAtua.—Pes. 103:13, 14.

ʼE FEALA ANAI KE TOU “FAKAOVI KI TE ʼATUA” ʼO TALU AI

18. He koʼe ʼe feala ke tou fakamalohiʼi ʼatatou ʼu felogoi mo Sehova ʼo talu ai?

¹⁸ ʼE feala ke tou fakamalohiʼi ʼatatou ʼu felogoi mo Sehova ʼo talu ai. Kotea tona tupuʼaga? Koteʼuhi ʼe lahi tuʼumaʼu pe anai te ʼu meʼa ʼe tou ako ʼuhiga mo ia. ʼE ui ʼi te Tohi-Tapu “ʼe mole feala ki he tahi ke mahino” ki tona ʼu ala, mo tona poto, pea mo tona ʼatamai malama.—Loma 11:33.

19. Kotea ʼae ʼe feala ke ke tui papau ki ai?

¹⁹ ʼE ui fenei ia Pesalemo 79:13: “Pea ko matou, ia tau hahaʼi mo tau faga ovi ʼae ʼe ke fafaga, ʼe matou fakafetaʼi anai kia te koe ki te heʼe gata, pea ʼe matou fakavikiviki anai kia te koe mai he taʼiake ki he tahi taʼiake.” Kapau ʼe ke fakaovi tuʼumaʼu kia Sehova, ʼe ke maʼu anai he ʼu tapuakina heʼe gata, pea ʼe ke ui fenei anai mo he lotofalala: “Ko te ʼAtua ʼe ko te ʼutu ʼo toku loto pea mo toku vahe ʼo talu ai.”—Pes. 73:26.