ʼE Ko He Meʼa Lelei Kia Tatou Te Fakaovi Ki Te ʼu Tehina

1-2. Kotea ʼae ʼe maʼuhiga tafito kia Sehova? Pea kotea ʼae ʼe ina kole mai ke tou fai?

ʼE MAʼUHIGA kia Sehova te aga ʼae ʼe tou fai ki ʼihi. Neʼe akoʼi mai e Sesu ʼe tonu ke tou ʼofa ki totatou tatau ohage pe ko tatou totonu. (Mat. 22:37-39) Ko tona fakaʼuhiga, ʼe tonu ke tou toe agalelei kia natou ʼae ʼe mole tauhi fakatahi mo tatou kia Sehova. Ka tou fai feia, ʼe tou faʼifaʼitaki ai ia Sehova ʼAtua, ʼae “ʼe ina fakahopo fakatatau ake te laʼa ki te kau agakovi mo te kau agalelei pea ʼe ina fakato fakatatau ifo te ʼua ki te kau faitotonu mo te kau heʼe faitotonu.”—Mat. 5:45.

² ʼE ʼofa ia Sehova ki te hahaʼi fuli, kae tafito ʼe ʼofa kia natou ʼae ʼe faitotonu. (Soa. 14:21) Pea ʼe ina loto ke tou faʼifaʼitakiʼi ia ia. Koia ʼae ʼe ina kole mai ai ke tou “feʼofamamahiʼaki” mo ʼotatou tehina mo tuagaʼane, pea mo tou “feʼofaʼaki.” (1 Pet. 4:8; Loma 12:10) Ka tou fakaha he ʼofa feia ki he tahi, ʼe hage pe ko hotatou ʼofa ki he tahi ʼo totatou famili, peʼe ko hotatou kaumeʼa lelei.

3. Kotea ʼae ʼe tonu ke tou manatuʼi ʼo ʼuhiga mo te ʼofa?

³ ʼE hage te ʼofa ko he fuʼu ʼakau. ʼE ʼaoga ke tokaga lelei ki ai ke tuputupu lelei. Koia ʼae neʼe fakalotomalohiʼi fenei ai e te apositolo ko Paulo ia te kau Kilisitiano: “Ke kotou haga fakaha ia te ʼofa fakatautehina.” (Hep. 13:1) Koia, ʼe loto e Sehova ke tou haga fakamalohiʼi totatou ʼofa ʼae ki ʼihi. ʼI te alatike ʼaeni, ʼe tou vakaʼi anai pe koʼe ʼe tonu ke tou fakaovi ki ʼotatou tehina mo tuagaʼane, pea ʼe feafeaʼi hatatou haga fakahoko te faʼahi ʼaia.

HE KOʼE ʼE TONU KE TOU FAKAOVI KI TE ʼU TEHINA MO TUAGAʼANE?

4. Ka tou lau ia Pesalemo 133:1, ʼe feafeaʼi hatatou haga leleiʼia tatatou logo tahi mo ʼotatou tehina mo tuagaʼane? (Vakaʼi mo te ʼu pāki.)

⁴ Lau ia Pesalemo 133:1. ʼE mahino ia, ʼe tou manatu tahi mo te tagata faipesalemo ʼae neʼe ina tohi, “ʼe ko he meʼa lelei mo fakafimalie” te kaumeʼa mo natou ʼae ʼe ʼoʼofa ia Sehova. ʼE feala pe ke tou meʼa noaʼi ia te lahi mo te matalelei ʼo he fuʼu ʼakau moka tou fakalaka ai ʼi te ʼaho fuli. Pea ʼe toe feia pe, ʼe feala ke tou meʼa noaʼi ia te matalelei ʼo tatatou logo tahi mo ʼotatou tehina mo tuagaʼane. ʼE tou fesioʼaki tuʼumaʼu mo natou, pea lagi ʼe lahi tatatou fesioʼaki ʼi te vahaʼa. Kae ʼe feafeaʼi hatatou haga leleiʼia ʼatatou felogoi mo natou? ʼAki hatatou toʼo he temi ke tou fakakaukauʼi ia meʼa fuli ʼe natou fai takitokotahi maʼa te kokelekasio, ʼo feia pe kia tatou totonu. Ka tou fai feia, ʼe tuputupu pe anai totatou ʼofa ʼae kia natou.

5. ʼE malave feafeaʼi ki ʼihi te ʼofa ʼae ʼe tou fefakahaʼaki?

⁵ Kapau ko te hoki kau e ʼa ʼihi ki hatatou fono, ʼe natou punamaʼuli ʼosi ʼi tanatou sisio ki te ʼofa ʼae ʼe tou fefakahaʼaki. Pea ʼi ʼihi temi ʼe natou ui kua natou maʼu te moʼoni ʼuhi pe ko te aluʼaga ʼaia neʼe natou sisio ki ai. Koia, neʼe ui fenei e Sesu: “ʼAki te faʼahi ʼaia, ʼe iloʼi anai e te hahaʼi fuli ko koutou ko ʼaku tisipulo, mo kapau ʼe kotou feʼofaʼaki.” (Soa. 13:35) Tou vakaʼi te faʼifaʼitaki ʼo Chaithra. Neʼe ako ʼi he fale ako maʼoluga, pea neʼe ina ako te Tohi-Tapu mo te ʼu Fakamoʼoni ʼa Sehova. Neʼe ina tali hona fakaafe ki he fakatahi fakafenua. ʼI te fakaʼosi ʼo te ʼaho ʼo te ʼuluaki fakatahi ʼaia, neʼe ina ui fenei kia ia ʼae neʼe ina fai tana ako Tohi-Tapu: “Neʼe mole he temi neʼe faʼufua mai ai ʼaku matuʼā. Kae ʼi taku kau ki takotou fakatahi lahi, neʼe au tokagaʼi ko te toko 52 hahaʼi, neʼe natou faʼufua mai kia au ʼi te kiʼi ʼaho pe ʼaia ʼe tahi. Neʼe fakaʼaogaʼi e Sehova tona famili fakalaumalie ke au logoʼi ai tona ʼofa. ʼE au fia kau ʼi te famili ʼaia.” Neʼe haga tuputupu ia Chaithra, pea neʼe papitema leva ʼi te 2024. Ka sisio ia natou ʼae ʼe foʼofoʼou mai ki te lelei ʼo tatatou aga, pea mo te ʼofa ʼae ʼe tou fefakahaʼaki, ʼe uga ai natou ke natou tauhi kia Sehova.—Mat. 5:16.

6. He koʼe ka tou fakaovi ki ʼotatou tehina mo tuagaʼane, ʼe ko he puipuiʼaga ʼaia kia tatou?

⁶ Ka tou fakaovi ki ʼotatou tehina mo tuagaʼane, ʼe ko he puipuiʼaga ʼaia kia tatou. Neʼe fai e Paulo ia te tokoni ʼaeni ki ʼona tehina: ‘Ke kotou haga fefakalotomalohiʼaki ʼi te ʼaho fuli, ke ʼaua naʼa liliu he tahi ʼo lotofefeka ʼuhi ko te malohi kaka ʼo te agahala.’ (Hep. 3:13) ʼE feala ʼi ʼihi temi ke tou lotovaivai ai, pea ke hehe ʼotatou vaʼe mai te ala ʼo te faitotonu. Kapau ʼe hoko te faʼahi ʼaia, ʼe uga anai e Sehova he tahi ʼi ʼotatou tehina peʼe tuagaʼane ke ina tokagaʼi pea mo tokoni mai. (Pes. 73:2, 17, 23) ʼEi, ʼe aoga kia tatou ke tou maʼu he ʼu fakalotomalohi feia.

7. Kotea te pikipikiga ʼo te ʼofa mo te logo tahi? (Kolose 3:13, 14)

⁷ ʼE tou kau ʼi he kautahi ʼe faiga fakamalotoloto ke natou fefakahaʼaki te ʼofa. Pea ʼe lahi te ʼu fua lelei ʼe tou maʼu mai ai. (1 Soa. 4:11) Ohage la ka tou fakaha te ʼofa, ʼe uga ai tatou ke tou “haga fekatakiʼaki,” pea ʼe tokoni ai ki tatatou logo tahi mo ʼotatou tehina mo tuagaʼane. (Lau ia Kolose 3:13, 14; Efe. 4:2-6) Koia, ʼe maʼu ʼi ʼatatou fono he fiafia mo he fimalie ʼe mole maʼu ʼi he tahi age kautahi ʼi te kele.

TOU FEFAKAMAʼUHIGAʼAKI

8. ʼE tokoni feafeaʼi mai ia Sehova ke tou logo tahi?

⁸ ʼE logo tahi ʼotatou tehina mo tuagaʼane ʼuhi pe ko Sehova. ʼE fakafealagia e Sehova te faʼahi ʼaia logo la totatou ʼuhiga agahala. (1 Ko. 12:25) ʼE ui ʼi te Tohi-Tapu ‘ʼe akoʼi totonu tatou e te ʼAtua ke tou feʼofaʼaki.’ (1 Tes. 4:9) Ko tona fakaʼuhiga, ʼe fakaʼaogaʼi e Sehova ia tana Folafola moʼo fakaha mai pe kotea ʼe tonu ke tou fai ke tou fakatahi mo ʼotatou tehina mo tuagaʼane. Koia, ʼe tou tuku anai ke ‘akoʼi tatou e te ʼAtua’ ʼo vakavakaʼi lelei ʼana akonaki pea mo maʼuliʼi. (Hep. 4:12; Sakp. 1:25) Pea ko te aluʼaga ʼaia ʼe faiga e te kau Fakamoʼoni ʼa Sehova ke natou fai.

9. Ka tou lau ia Loma 12:9-13, kotea ʼe tonu ke tou fai mo kapau ʼe tou loto ke tou fefakamaʼuhigaʼaki?

⁹ ʼE akoʼi feafeaʼi tatou e te Folafola ʼa te ʼAtua ke tou fakatahi mo ʼotatou tehina mo tuagaʼane? Tou vakaʼi te meʼa ʼae neʼe ui e Paulo ʼo ʼuhiga mo te faʼahi ʼaia. Koia, tou vakaʼi ia Loma 12:9-13. (Lau.) Ke ke tokagaʼi neʼe ui fenei e Paulo: “Kotou lotolelei ʼo fakamaʼuhigaʼi ʼihi.” Kotea tona fakaʼuhiga? ʼE tonu ko tatou ʼae ʼe tou ʼuluaki fakaha te “ʼofa” ki ʼihi. ʼO feafeaʼi? ʼO tou fakamolemole kia natou, mo tali kaiga, pea mo lotofoaki. (Efe. 4:32) ʼAua naʼa ke atali ke fakaovi atu ʼou tehina mo tuagaʼane kia koe. ʼE feala ke ke ʼuluaki fakahoko te faʼahi ʼaia. Koia, ʼe ke tokagaʼi ai anai te moʼoni ʼo te ʼu palalau ʼaeni ʼa Sesu: “ʼE lahi age te fiafia moka kita foaki, ʼi takita tali.”—Gaue 20:35.

10. ʼE feafeaʼi hatatou gaue ke tou ‘fefakamaʼuhigaʼaki’? (Vakaʼi mo te pāki.)

¹⁰ Neʼe fakatotonu mai e Paulo ke tou ʼuluaki fefakamaʼuhigaʼaki. Hili ia, neʼe ina toe ui fenei: “Kotou faʼa gaue kae ʼaua naʼa kotou pipiko.” Ko he tahi ʼe faʼa gaue ʼe faʼafai pea mo lototoʼa. Ka tuku age he gaue ki ai, ʼe ina fai fakamalotoloto. ʼE fakalotomalohiʼi fenei tatou ia Taʼaga Lea 3:27, 28: “ʼAua naʼa ke fakafisi te fai ʼo te meʼa ʼae ʼe lelei kia natou ʼae ʼe ʼaoga ki ai, kapau ʼe feala ke ke tokoni kia natou.” Koia, ka tou sio ki he tahi ʼe ʼaoga ki ai he tokoni, tou fai ia meʼa fuli ke tou tokoni ki ai. ʼAua naʼa tou tuku ke tou fai ʼi he tahi age ʼaho, pea mo manatu ʼe hoki fai anai ia e he tahi age.—1 Soa. 3:17, 18.

11. Kotea ka tokoni mai ke tou fakaovi ki ʼihi?

¹¹ Kapau ʼe tou loto ke tou toe fakamaʼuhigaʼi ʼihi, ʼe tonu ke tou fakamolemole kia natou moka natou fakamamahiʼi tatou. ʼE ui fenei ia Efeso 4:26: “ʼAua naʼa kotou iita ʼo kaku ki te to ʼo te laʼa.” He koʼe ʼe mole tonu ke tou nonofo mo hotatou ita? ʼE tali fenei ʼi te vaega 27 ke mole “tou tuku he faigamalie ki te Tevolo.” ʼE kole tuʼumaʼu mai e Sehova ʼi tana Folafola ke tou fefakamolemoleʼaki. Ohage la, ʼe fakalotomalohiʼi tatou ia Kolose 3:13 ke tou ‘haga fefakamolemoleʼaki ʼaki he lotolelei.’ Ka tou fakamolemole ki te ʼu lakahala ʼa ʼihi, ʼe ko he aluʼaga ʼaia ʼe lelei ke tou fakaovi ai kia natou. Ka tou fai feia, ʼe tou tokoni ai ke tou ‘taupau tatatou logo tahi ʼae ʼe tou maʼu mai te laumalie maʼoniʼoni.’ (Efe. 4:3) Koia, ka tou lotofakamolemole, ʼe tou tokoni ai ki te maʼu ʼo te logo tahi mo te tokalelei.

12. ʼE tokoni feafeaʼi mai ia Sehova ke tou lotofakamolemole?

¹² ʼE moʼoni, ʼi ʼihi temi ʼe faigataʼa te fakamolemole kia natou ʼae neʼe natou fakamamahiʼi tatou. Kae ʼe feala ke tou fakahoko te faʼahi ʼaia ʼaki te tokoni ʼo te laumalie ʼo te ʼAtua. Neʼe fakalotomalohiʼi tatou e Paulo ke tou “feʼofaʼaki” pea mo “faʼa gaue.” Hili ia, neʼe ina toe ui fenei mai: “Kotou faʼafai ʼuhi ko te laumalie ʼo te ʼAtua.” Ko he tahi ʼe “faʼafai” ʼe ha ai ʼe ‘fiafia he ʼe uga ia ia e te laumalie maʼoniʼoni. (Loma 12:11) Koia, ʼe tokoni mai te laumalie ʼo te ʼAtua ke tou ʼoʼofa ki ʼihi pea mo fakamolemole kia natou ʼaki he lotolelei. ʼEi, tou kole mamahi kia Sehova ke tokoni mai.—Luka 11:13.

“KE MOLE HOKO HE MAVEUVEU IA KOUTOU”

13. Kotea ʼae ʼe feala ke hoko ai he maveuveu ia tatou?

¹³ ʼE faʼufaʼu te kokelekasio e “te faʼahiga tagata fuli pe.” Ko tona fakaʼuhiga, ko ni hahaʼi ʼe omai mai ni fenua mo ni agaʼi fenua kehekehe. (1 Tim. 2:3, 4) Koia ʼae, ʼe mole tatau ai te ʼu tonu ʼe tou fai fuli ʼo ʼuhiga mo te faʼahiga teu, mo te faʼahiga faʼu ʼo totatou ʼulu, mo te faʼahiga faitoʼo ʼe tou filifili, peʼe ko te ʼu fakafiafia. (Loma 14:4; 1 Ko. 1:10) Kapau ʼe mole tou tokakaga, ʼe feala pe ki te ʼu aluʼaga ʼaia ke hoko ai he maveuveu ia tatou. Kae neʼe ‘akoʼi totonu tatou e te ʼAtua’ ke tou feʼofaʼaki. Koia, ʼaua natou ui ʼe lelei age te ʼu tonu ʼae ʼe tou fai ʼi ʼae ʼe fai e ʼihi.—Flp. 2:3.

14. Kotea te aga ʼae ʼe tonu ke tou fai tuʼumaʼu ki ʼihi? Pea kotea tona tupuʼaga?

¹⁴ ʼE tou faiga anai ke tou fakalotomalohiʼi tuʼumaʼu te ʼu tehina mo tuagaʼane, he ʼe toe tokoni ai ke ʼaua naʼa hoko he maveuveu ʼi te kokelekasio. (1 Tes. 5:11) ʼE heʼeki faʼa fualoa ki ai, tokolahi ia natou neʼe fakamamaʼo mai te kokelekasio ʼe natou toe kau ki ʼatatou fono. Pea tokolahi neʼe toʼo natou mai te kokelekasio kua natou toe liliu mai kia Sehova. ʼE tou fia fakatalitali ia natou ʼaki he fiafia. (2 Ko. 2:8) Tou vakaʼi te aluʼaga neʼe hoko ki he tuagaʼane neʼe toe liliu ki te Fale Fono kua hili ki ai taʼu ʼe 10 tana fakamamaʼo mai te kokelekasio. Neʼe ina ui fenei: “Neʼe omai te ʼu tehina mo tuagaʼane ʼo fakamalo mo malimali mai. Pea neʼe natou kukumi malohi toku nima ʼi tanatou alofa mai.” (Gaue 3:19) ʼI te fakaha e te ʼu tehina mo tuʼagane ia te aga ʼaia, kotea ʼae neʼe ina logoʼi? ʼE ina ui fenei: “ʼE hage pe neʼe haga ia Sehova ʼo faoʼi mai tona nima ke au toe maʼu ia te fiafia.” Koia, kapau ʼe tou faiga ke tou fai he ʼu fakalotomalohi, ʼe fakaʼaogaʼi anai tatou e Kilisito, ke tou fakalotofimalieʼi ia natou ʼae “ʼe kinakina mo mafasia.”—Mat. 11:28, 29.

15. Kotea te tahi aluʼaga ʼe feala ke tou fai ke tou taupau te logo tahi? (Vakaʼi mo te pāki.)

¹⁵ Kotea te tahi aluʼaga ʼe feala ke tou fai ke tou taupau ai te logo tahi? Tou fakaha ʼi ʼatatou ʼu palalau. ʼE ui fenei ia Sopo 12:11: “ʼE mole sivi koa la e te taliga te ʼu palalau, ohage ko te ʼahiʼahiʼi e te gutu te meʼa kai?” ʼE ʼahiʼahi tuʼumaʼu e he tagata faikuka tana meʼa kai ke ina iloʼi pe ʼe kano lelei ʼi muʼa ʼo tana ʼave ke kai e te hahaʼi. Koia, ʼe tonu ke tou fakakaukauʼi lelei ki te ʼu palalau ka tou fai ʼi muʼa ʼo tatatou palalau. (Pes. 141:3) Koia, tou faiga ke fakalotomalohi tuʼumaʼu te ʼu palalau ka tou fai, pea ke “fua lelei ai kia natou ʼae ʼe logo.”—Efe. 4:29.

16. Ko ai tafito ʼae ʼe tonu ke ina fai he ʼu palalau fakalotomalohi?

¹⁶ ʼE tonu tafito ki te ʼu tagata ʼohoana mo te ʼu matuʼā ke natou mahino ki te maʼuhiga ʼae ke natou fai he ʼu palalau fakalotomalohi. (Kol. 3:19, 21; Tito 2:4) Pea ʼe tonu foki mo te ʼu tagata ʼafeā ke natou toe fai ni palalau fakalotofimalie ki te faga ovi ʼa Sehova, he ʼe ko natou ko he ʼu tagata tauhi ovi. (Esa. 32:1, 2; Kal. 6:1) ʼE ui fenei ia Taʼaga Lea 15:23: “ʼE fiafia he tagata ʼi tana fai he tali ʼe tonu. ʼI meʼa fakafiafia leva te fai ʼo he palalau lelei ʼi tona temi tonu!”

TOU FAKAHA TE ʼOFA “ʼAKI HE ʼU GAUE PEA MO TE MOʼONI”

17. ʼE feafeaʼi hatatou faiga ke moʼoni te ʼofa ʼae ʼe tou fakaha ki ʼotatou tehina mo tuagaʼane?

¹⁷ ʼE fakalotomalohiʼi fenei tatou e te apositolo ko Soane: “ʼE mole tonu ke tou fakaha totatou ʼofa ʼaki pe he ʼu palalau, kae ʼaki he ʼu gaue pea mo te moʼoni.” (1 Soa. 3:18) ʼE tou loto ke moʼoni totatou ʼofa ki ʼotatou tehina mo tuagaʼane. ʼO feafeaʼi? Ka lahi age te temi ʼae ʼe tou fakatahi ai mo natou, ʼe toe lahi age anai tatatou fia fakatahi mo natou pea mo toe malohi age anai tatatou feʼofaʼaki. Koia, tou kumi he ʼu faigamalie ke tou fakatahi ai mo natou, ohage la ʼi te ʼu fono mo te faifakamafola. Tou toe toʼo he temi ke tou olo ai ʼo ʼaʼahi natou. Ka tou fai feia, ʼe tou fakaha ai ‘ʼe akoʼi totonu tatou e te ʼAtua ke tou feʼofaʼaki.’ (1 Tes. 4:9) Pea ʼe tou haga sisio ai anai “ʼe ko he meʼa lelei mo fakafimalie te nonofo fakatahi ʼa ni tehina ʼi te logo tahi.”—Pes. 133:1.