Teuteuʼi Tou Loto

Ka tou ako te Tohi-Tapu, ʼe tou loto ke malave te ʼu manatu ʼa Sehova ki ʼotatou loto, mo ʼatatou manatu, mo te ʼu meʼa ʼae ʼe tou logoʼi pea mo holi ki ai. Neʼe tuku mai e Esetalasi he faʼifaʼitaki lelei ʼo ʼuhiga mo te fahaʼi ʼaia. Kotea tona tupuʼaga? Koteʼuhi ‘neʼe ina teuteuʼi tona loto ke ina vakavakaʼi te Lao ʼa Sehova.’ (Eset. 7:10) ʼE feafeaʼi hatatou toe teuteuʼi ʼotatou loto?

Ke ke faikole. Faikole ʼi muʼa ʼo tau fai tau ako tokotahi. Kole kia Sehova ke tokoni atu ke ke mahino pea mo maʼuliʼi te ʼu meʼa ʼae ʼe ke ako.—Pes. 119:​18, 34.

Ke ke agavaivai. ʼE fufu e Sehova te moʼoni ki te kau fiameʼalahi, ʼae ʼe natou falala pe ki ʼonatou poto fakatagata. (Luka 10:21) ʼE mole ke fai anai he ʼu fekumi ke ke fakaha ai ʼe ke iloʼi he ʼu tuʼuga meʼa. ʼAki he agavaivai, fetogi tau faʼahiga manatu moka ʼe mole alu tahi mo te manatu ʼa Sehova.

Ke ke fakalogo he katiko. ʼE feala ke malave ki totatou loto ia te musika pea ke teuteuʼi ai tatou ki tatatou tauhi ki te ʼAtua. Koia, ka ke fakalogo he katiko ʼi muʼa ʼo te fai ʼo tau ako tokotahi, ʼe tokoni atu anai ke ke teuteuʼi ia tou loto.