“ ʼE ʼa Sehova Te Tau”

Neʼe hoko te fihi ʼaia ʼi te ʼu taʼu 1990, ʼi te temi ʼae neʼe ui age ai e te puleʼaga Falani ke totogi e totatou Filiale ʼae ʼi Falani te ʼu tukuhau, ʼaki te ʼu meʼa ʼofa ʼae neʼe maʼu ʼi te taʼu 1993 ki te 1996. Neʼe matou kole tokoni ki te ʼu telepinale ʼo Falani, kae neʼe mole hona fua. Hili tamatou mole malo ʼaia, neʼe toʼo e te puleʼaga ʼi te foʼi numelo ʼo te filiale ia te foʼi fa miliona nimageau afe tupu ʼi te falā Falani. Kae neʼe kei toe pe te puleʼaki ʼe tahi ke matou fai. Neʼe tonu ke matou olo ʼo fai tamatou tagi ki te Telepinale Fakaeulopa ʼo Te ʼAlikiʼaga ʼo Te Tagata. Kae ʼi muʼa ʼo te fakahoko ʼo te fakamau ʼaia, neʼe ui mai e te telepinale ʼaia kia matou, ʼo feia mo te kau avoka ʼo te puleʼaga Falani pea mo ia ʼae ʼe ina fakafofoga te Telepinale Fakaeulopa, ke matou felogoi muʼa ʼo kumi he puleʼaki ki te fahaʼi ʼaia.

Neʼe kua matou iloʼi pe ʼe fakamaʼua mai anai e te pule fafine ʼaia ke matou tali ʼo totogi he koga ʼo te foʼi falā ʼae neʼe kole mai. Kae neʼe matou mahino lelei pe kapau ʼe foaki he kiʼi foʼi falā pe ʼe tahi, pea ʼe matou fakafehagai anai ki he ʼu pelesepeto Fakatohi-tapu. Neʼe foaki e te ʼu tehina mo tuagaʼane he ʼu meʼa ʼofa moʼo lagolago ki te ʼu gaue ʼo te Puleʼaga ʼo te ʼAtua. Koia, ʼe mole tonu ke foaki te foʼi falā ʼaia ki te puleʼaga. (Mat. 22:21) Logo la te ʼu fahaʼi ʼaia, kae neʼe matou olo pe ki te felogoi ʼaia ʼuhi pe ko tamatou fakaʼapaʼapa ki te lao.

Neʼe fai tamatou felogoi ʼaia ʼi he koga fale matalelei ʼi te Telepinale Lahi ʼo te ʼalikiʼaga ʼo te tagata. Neʼe hoko pe te meʼa ʼae neʼe matou ui. ʼI te kamata palalau ʼa te fafine fakafofoga ʼo te telepinale, neʼe ina fakamaʼua ki te kau Fakamoʼoni ʼa Sehova ke natou totogi he koga ʼo te tukuhau ʼae neʼe fakamaʼua age. Koia, neʼe uga ai matou e te laumalie ʼo Sehova ke matou fehuʼi age ki ai: “ ʼE ke iloʼi la neʼe kua toʼo e te puleʼaga te foʼi fa miliona nimageau afe tupu ʼi tomatou foʼi numelo ʼae ʼi te fale paʼaga?”

Neʼe punamaʼuli ʼosi te fafine pea neʼe ita. Neʼe fakamoʼoni te kau avoka ʼo te puleʼaga Falani ʼe moʼoni te fahaʼi ʼaia ʼo ʼuhiga mo te foʼi falā. Koia, neʼe fetogi ai tana manatu ki te aluʼaga ʼaia. Neʼe ina fakatonutonuʼi natou pea neʼe ina fakagata atu aipe ia te felogoi ʼaia. Koia, neʼe au mahino ai ko Sehova ʼae neʼe gaue ki te faifakamau ʼaia ke tupu ai hamatou malo, pea neʼe ko he aluʼaga ia neʼe mole pe la matou ʼamanaki ki ai. Neʼe mole matou tui ʼosi ki te aluʼaga ʼaia neʼe hoko. Neʼe matou fiafia ʼaupito ʼi tamatou mavae mai ai.

ʼI te ʼaho 30 ʼo Sunio 2011, neʼe tala e te Telepinale Fakaeulopa ʼo Te ʼAlikiʼaga ʼo Te Tagata ia tanatou tonu tahi ʼo ʼuhiga mo matou. Neʼe fakaha ʼe tapuʼi ʼi te lao te totogi ʼo te tukuhau ʼaia, pea neʼe fakamaʼua ai ki te puleʼaga Falani ke natou liufaki te falā ʼae neʼe natou toʼo pea mo toe foaki he tahi foʼi falā. Talu te fakatuʼu ʼo te lao ʼaia mo te puipui ai ʼo te tauhi maʼa ʼi Falani. ʼI tamatou fai te fehuʼi ʼaia ki te fafine, neʼe mole matou iloʼi pe la ko te fehuʼi ʼaia ʼe tonu ke fai. Koia, neʼe hage pe ko te foʼi maka ʼae neʼe ulu loloto ʼi te laʼe ʼo Koliate. Neʼe fetogi ai te aluʼaga. He koʼe neʼe matou malo? Ohage pe ko tona ui e Tavite kia Koliate, koteʼuhi “ ʼe ʼa Sehova te tau.”—1 Sam. 17:45-47.

ʼE mole ko te hoki hoko e he malo feia ʼi te telepinale. ʼI te temi nei, logo la te fakafehagai ʼo te ʼu puleʼaga mo te ʼu lotu, kae neʼe malo te kau Fakamoʼoni ʼa Sehova ia fakamauʼaga ʼe 1225 ʼi te ʼu telepinale lalahi, ia fenua ʼe 70 ʼo feia mo he ʼu telepinale ʼi te malamanei. ʼAki te ʼu malo ʼaia, neʼe puipui ai te ʼu aluʼaga ʼae ʼe tonu ke tou maʼu. Ohage la, ke ʼi ai hatatou lotu, mo faifakamafola, mo fakafisi ki te ʼu koga fakapolitike pea mo te toto.

He koʼe neʼe kole ke au alu ʼo tokoni ki he fakamauʼaga neʼe hoko ʼi Eulopa, kae neʼe au gaue ʼi te ʼu Pilo Lalahi ʼa Te Kau Fakamoʼoni ʼa Sehova ʼi Amelika?

NEʼE MISIONEA ʼAKU MATUʼĀ

ʼE higoa ʼaku matuʼā ko George mo Lucille. Pea neʼe nā kau ki te kalasi 12 ʼo te Ako ʼo Kileate. ʼI taku tupu ʼi te 1956, neʼe nā maʼuʼuli ʼi Éthiopie. Neʼe nā fakahigoaʼi ai au ko Filipo, te tagata faifakamafola evaselio faʼafai ʼi te ʼuluaki sekulo. (Gaue 21:8) ʼI te taʼu ʼae neʼe hoa mai ki ai, neʼe tapuʼi e te puleʼaga ʼatatou gaue. Logo la neʼe kei au veliveli, kae neʼe kei au manatuʼi lelei pe neʼe tauhi fakafufu toku famili kia Sehova. Neʼe kei au tamasiʼi koia neʼe au fiafia ʼosi. Meʼa fakaʼofaʼofa leva he ʼe ʼi te 1960, neʼe fakamaʼua mai leva e te puleʼaga ke matou mavae ʼi te fenua.

Neʼe matou maʼuʼuli ʼi Wichita, ʼi Kansas, ʼi Amelika. Neʼe faʼafai pe ʼaku matuʼā ʼi te minisitelio ohage pe ko te temi ʼae neʼe nā misionea ai. Neʼe nā maʼuliʼi te moʼoni. Pea neʼe nā akoʼi mai kia au, mo toku tokolua lahi ko Judy, mo toku kiʼi tehina veliveli ko Leslie, ʼae neʼe nā tutupu ʼi Éthiopie, ke matou ʼoʼofa ia Sehova pea mo tauhi kia te ia mo tomatou loto katoa. Neʼe au papitema ʼi toku taʼu 13. Hili ki ai taʼu ʼe tolu, neʼe au alu mo toku famili ʼo maʼuʼuli ʼi Arequipa, ʼi Pérou, ʼae neʼe ʼaoga lahi ai he kau faifakamafola.

ʼI te 1974 kae neʼe kei au taʼu 18, neʼe hinoʼi au e te Petele ʼo Pérou ke au pionie makehe ʼo feia mo he ʼu tehina ʼe toko fa. Neʼe matou faifakamafola ʼi he koga meʼa ʼi te ʼu Andes centrales, ʼae neʼe heʼeki faifakamafola ai ʼo kaku mai ki te temi ʼaia. Neʼe ko te hahaʼi tafito ʼae ʼe palalau ʼi te lea Quechua mo Aymara ʼae neʼe matou tala ki ai te logo lelei. ʼI tamatou feoloʼaki ʼi te koga meʼa moʼugaʼia ʼaia, neʼe matou fakaʼaogaʼi he motoka lahi ʼe feala tona nofoʼi. Pea neʼe matou fakahigoaʼi ko he Aleka koteʼuhi neʼe hage tona agaaga ko he foʼi kesi. ʼE au nofo pe ʼo manatuʼi te temi ʼaia neʼe au fakaha ai ʼi te Tohi-Tapu ki te hahaʼi ʼo te fenua ʼaia ʼe kua vave pulihi pe e Sehova te masiva, mo te mahaki, pea mo te mate. (Fkha. 21:3, 4) Tokolahi neʼe natou tali te logo ʼo te Puleʼaga.

NEʼE HINOʼI AU KE AU GAUE ʼI TE ʼU PILO LALAHI

ʼI te 1977, neʼe ʼaʼahi matou e Albert Schroeder, ʼae neʼe kau ki te Kolesi Pule ʼa te kau Fakamoʼoni ʼa Sehova. ʼI tana ʼaʼahi ʼaia matou ʼi Pérou, neʼe ina fakalotomalohiʼi ai au ke au fai haku kole ke au alu ʼo gaue ʼi te Petele ʼo Amelika. Pea ko te fahaʼi ʼaia neʼe au fai. Mole fualoa ki ai, ʼi te ʼaho 17 ʼo Sunio ʼo te taʼu pe ʼaia, neʼe au kamata fakahoko ai taku gaue ʼi te Petele ʼo Brooklyn. Lolotoga taʼu ʼe fa, neʼe au gaue ʼi te selevisi Gaue Fakamaʼa mo Taupau Lelei ʼo te Petele ʼaia.

ʼI Sunio 1978, neʼe au felaveʼi mo Elizabeth Avallone ʼi he fakatahi fakamalamanei ʼi La Nouvelle-Orléans, ʼi Louisiane. Neʼe hage pe ko au, neʼe lahilahi ake ʼe tauhi ʼana matuʼā kia Sehova. Neʼe kua taʼu fa ia tana pionie katoa. Neʼe maʼuhiga kia ia tana selevisi temi katoa, pea neʼe ina fia fakahoko te gaue ʼaia ʼi tona maʼuli katoa. Neʼe ma fefaitohiʼaki tuʼumaʼu pe, pea neʼe mole fualoa ki ai neʼe ma femanakoʼaki leva. Neʼe ma ʼohoana leva ʼi te ʼaho 20 ʼo Oketopeli 1979, pea neʼe ma gaue fakatahi leva ʼi te Petele.

Neʼe fakatalitali lelei maua e te ʼu tehina mo tuagaʼane ʼo tama ʼuluaki kokelekasio, te kokelekasio Fakasepania ʼo Brooklyn. ʼAki te temi, neʼe toe fakatalitali lelei maua e te tahi ʼu kokelekasio manavaʼofa ʼe tolu pea mo natou lagolago mai ki tama gaue ʼi te Petele. ʼE mole ma galoʼi te ʼu meʼa fuli ʼae neʼe natou fai maʼa maua. Neʼe ma toe lotofakafetaʼi ki ʼoma kaumeʼa mo natou ʼo toma famili ʼi tanatou tokoni mai ki tama tokakaga ki ʼama matuʼā ʼae kua vaivavai.

ʼE AU KAU KI TE TAU

ʼI Sanualio 1982, neʼe au punamaʼuli he neʼe hinoʼi leva au ke au gaue ʼi te Selevisi ʼo Te Lao ʼi te Petele. Hili ki ai taʼu ʼe tolu, neʼe kole mai ke au alu ʼo toʼo he ʼu ako ʼo ʼuhiga mo te lao ʼi te univelesite ke au maʼu hoku pepa ki te gaue avoka. Neʼe au ako ai ʼe feala ki te hahaʼi ʼo Amelika pea mo ʼihi atu fenua ke natou ʼateaina, ʼo feala ke lahi te ʼu meʼa ʼe natou fai ʼuhi ko te ʼu malo ʼa te kau Fakamoʼoni ʼa Sehova ʼi te ʼu telepinale. Koia, neʼe au punamaʼuli ʼosi ki te fahaʼi ʼaia. ʼI te fale ako, neʼe matou fakaloloto te ʼu fakamau ʼaia neʼe hoko.

ʼI te 1986 kae neʼe kei au taʼu 30, neʼe fakanofo au ke au tokaga ki te Selevisi ʼo Te Lao. Neʼe au fiafia he neʼe falala mai te Petele kia au logo la neʼe kei au tupulaga. Kae neʼe au toe taʼomia ʼi te gaue, he neʼe lahi te ʼu fahaʼi neʼe mole au iloʼi. Pea neʼe au mahino ai ko te gaue ʼae neʼe tuku mai e mole faigafua anai.

Neʼe au maʼu pepa ki te gaue avoka ʼi te 1988. Kae ʼi toku ʼu taʼu ako ʼaia, neʼe au meʼa noaʼi ai toku maʼuli fakalaumalie. Pea neʼe mole au tokagaʼi pe la ʼe mole kei au maʼu he ʼu felogoi lelei mo Sehova. Ka tou fai ni ako maʼoluga, ʼe feala ke tou fakamaʼuhigaʼi ai ia tatou totonu, pea mo manatu ʼe tou maʼoluga age ia natou ʼae neʼe mole ako ke feafeaʼi. Kae neʼe tokoni mai ia Elizabeth kia au. Neʼe tokoni mai ke au toe toʼo ʼaku agamahani fakalaumalie ʼae neʼe au fai ʼi muʼa ʼo taku alu ki te univelesite. Neʼe toe ʼaoga mai he temi, kae neʼe au toe maʼu pe he ʼu felogoi lelei mo Sehova. ʼE feala ke au fakamoʼoni ʼe mole ko te lahi ʼo te ʼu meʼa ʼae ʼe kita iloʼi ʼae ʼe maʼuhiga age. Kae ʼe ko takita maʼu he ʼu felogoi lelei mo Sehova, pea mo ʼofa kia te ia mo ʼana kaugana, ʼae ʼe feala ke ʼi ai he ʼuhiga moʼoni ʼo totatou maʼuli.

ʼE AU TOKONI KE AU HAOFAKI TE LOGO LELEI PEA MO FAIGA KE FAKAMOʼONI KI AI IA TE LAO

ʼI taku maʼu pepa leva, neʼe lahi leva toku temi ke au fakatuʼutuʼu te gaue neʼe tonu ke fai e te Selevisi ʼo Te Lao ʼi te Petele, pea ke au tauʼi te ʼu gaue ʼo te Puleʼaga ʼo te ʼAtua ʼi te telepinale. Neʼe au leleiʼia ʼosi taku gaue, kae neʼe toe faigataʼa foki he neʼe lahi te ʼu koga ʼi tatatou kautahi ʼe fetogi fakavilivili. Ohage la, ʼi muʼa atu neʼe totogi ʼatatou ʼu tohi. Kae ʼi te 1990, neʼe kole ki te Selevisi ʼo Te Lao ke fetogi leva te faʼahiga fai ʼaia. ʼAki te fetogi ʼaia, neʼe fakafaigafua ai te ʼu gaue ʼa te Petele mo tatatou minisitelio, pea neʼe tokoni mai ai ke ʼaua naʼa tou tau mo he ʼu fihifihia ʼo ʼuhiga mo te totogi ʼo te ʼu tukuhau. Neʼe manatu ʼihi ʼe feala ai anai ke veliveli te falā ʼae ʼe tou maʼu, pea ʼe fakatupu kovi anai ki tatatou gaue faifakamafola. Kae neʼe mole ko te aluʼaga ʼaia neʼe hoko. Talu mai te 1990 mo te tuputupu ʼo te kaugamalie ʼa te ʼu kaugana ʼa Sehova. Pea ia ʼaho nei, kua maʼu noa e te hahaʼi ia te meʼa kai fakalaumalie, ʼae ʼe ina haofaki te maʼuli ʼo te tokolahi. Neʼe au sio mata neʼe lava te ʼu toe fetogi ʼaia ʼi tatatou kautahi ʼuhi pe ko te tokoni ʼa Sehova pea mo te takitaki ʼa te Kolesi Pule.—Eke. 15:2; Mat. 24:45.

ʼE mole tou malo ʼi te ʼu telepinale ʼuhi pe he ʼe tou maʼu he ʼu avoka lelei. ʼI ʼihi temi, ʼe lagolago te ʼu tuʼi fakamau mo ʼihi puleʼaga kia tatou ʼuhi pe ko te lelei ʼo te aga ʼa te ʼu kaugana ʼa Sehova. Neʼe au tokagaʼi tafito te fahaʼi ʼaia ʼi te 1998, ʼi te temi ʼae neʼe kau ai he ʼu tehina ʼe toko tolu ʼo te Kolesi Pule mo ʼonatou ʼohoana ki he ʼu fakatahi lahi makehe ʼi Cuba. Neʼe natou agalelei mo fakaʼapaʼapa. Pea neʼe malave ʼaupito ki te kau taki ia tatatou mole kau ki te ʼu fihi fakapolitike. ʼEi, neʼe malave age kia natou tatatou aga ʼi ʼatatou palalau.

Kae ʼe feala ke hoko he aluʼaga heʼe faitotonu, ʼo mole feala ke fakatokatoka he neʼe mole fai ai he ʼu felogoi lelei. Ka hoko he aluʼaga feia, ‘ ʼe tou haofaki pe anai te logo lelei pea mo faiga ke fakamoʼoni ki ai ia te lao.’ (Flp. 1:7) Ohage la, lolotoga ni taʼu, neʼe tonu ke tou fai he tahi age gaue maʼa te puleʼaga mo kapau ʼe mole tou fia hu solia. Kae neʼe lahi te ʼu fenua ʼo Eulopa mo Corée du Sud, neʼe mole mulimuli ki te lao ʼaia. Kotea ʼona fua? Neʼe pilisoniʼi ʼihi tehina ʼe toko 18 000 ʼo Eulopa pea mo te toko 19 000 tupu ʼo Corée du Sud, he neʼe mole natou fia hu solia.

ʼI te ʼaho 7 ʼo Sulio 2011, neʼe toʼo leva e te Telepinale Fakaeulopa ʼo Te ʼAlikiʼaga ʼo Te Tagata te tonu ʼae ke fai ʼi te ʼu fenua fuli ʼo Eulopa ia he tahi age gaue maʼa te puleʼaga mo kapau ʼe mole fia hu solia ʼihi. Pea neʼe hoko te aluʼaga ʼi te Bayatyan c. Arménie. Pea ʼi te ʼaho 28 ʼo Sunio 2018, neʼe toe mulimuli pe ki ai te Telepinale ʼo Corée du Sud ki te tonu ʼaia. ʼE tou iloʼi kapau la neʼe kau he ʼu tehina tupulaga ki te ʼu fihi fakapolitike ʼe mole lagi hoko anai te ʼu malo ʼaia.

ʼE gaue kinakina te Selevisi ʼo Te Lao ʼo ʼotatou pilo lalahi pea mo te ʼu filiale kehekehe ki te haofaki ʼo te ʼu gaue ʼo te Puleʼaga ʼo te ʼAtua. ʼE ko he pilivilesio kia matou te fakafofoga ʼotatou tehina mo tuagaʼane ʼi te telepinale ʼae ʼe tau mo he fakafehagai fakapuleʼaga. Tatau aipe pe ʼe mole tou malo ʼi te telepinale, kae ʼe tou foaki he fakamoʼoni ia muʼa ʼo te ʼu kovana, mo te ʼu hau pea mo te ʼu puleʼaga. (Mat. 10:18) ʼE maʼua ia ke logo peʼe lau e te kau tuʼi fakamau, mo te kau fakafofoga ʼo te puleʼaga, mo te kau fai talalogo pea mo te hahaʼi ia te ʼu vaega ʼae ʼe tuʼu ʼi te ʼu pepa ʼae ʼe tuku kia muʼa ʼo te telepinale peʼe ki te ʼu avoka. ʼE iloʼi anai e te hahaʼi fakamalotoloto pe ko ai te kau Fakamoʼoni ʼa Sehova pea mo ʼanatou akonaki, ʼae ʼe fakatafito ki te Tohi-Tapu. Neʼe liliu ʼihi ia natou ko ʼotatou tehina.

MALO SEHOVA!

Hili ki ai taʼu ʼe 40, neʼe au maʼu te pilivilesio ʼae ke au gaue fakatahi mo ni filiale kehekehe ʼo ʼuhiga mo te ʼu koga ʼi te lao, pea mo palalau ia muʼa ʼo te ʼu telepinale lalahi pea mo he kau tuʼi fakamau. ʼE au ʼofa ʼi ʼoku tehina ʼae ʼe gaue ʼi te ʼu Selevisi ʼo te Lao ʼi ʼotatou pilo lalahi pea mo te ʼu filiale kehekehe, pea ʼe fakalotomalohi kia au. Neʼe au maʼuli fiafia ʼosi pea mo lahi te ʼu tapuakina neʼe au maʼu.

Kua taʼu 45 leva te lagolago tuʼumaʼu mai ʼa Elizabeth, pea mo tona ʼofa mo agatonu kia au ʼi te temi fuli pe ʼo toma maʼuli. ʼE fakalotomalohi tuʼumaʼu kia au, he ʼe ina fai te fahaʼi ʼaia logo la ʼe tau mo he mahaki ʼe fakatupu gaʼegaʼe ʼaupito.

Neʼe ma tokagaʼi ʼe mole matou maʼu te malohi pea mo te ʼu malo ʼi te ʼu telepinale ʼuhi ko te ʼu fealagia ʼe matou maʼu. Kae ohage ko tona ui e Tavite: “Ko Sehova ʼe ko te malohiʼaga ʼo tana hahaʼi.” (Pes. 28:8) ʼEi, “ ʼe ʼa Sehova te tau.”