Ke Ke Tui Papau Kua Fakamolemole Atu Ia Sehova

1-2. Kotea ʼe feala ke logoʼi e natou ʼae ʼe fakahemala moʼoni? (Vakaʼi mo te pāki.)

NEʼE iloʼi e te Hau ko Tavite pe kotea ʼe logoʼi e he tahi moka ina tukugakoviʼi pe ia ia ʼuhi ko he ʼu agahala neʼe ina fai ʼi muʼa atu. (Pes. 40:12; 51:​3, te ʼu kupu ʼae neʼe tohi ʼi te kamataʼaga) Neʼe ina fai he ʼu agahala mamafa ʼi tona maʼuli. Kae neʼe fakahemala moʼoni, pea neʼe fakamolemole ki ai ia Sehova. (2 Sam. 12:13) Koia ʼae neʼe toe mahino ai ia Tavite ki te fimalie lahi ʼe tou logoʼi moka fakamolemole mai ia Sehova.​—Pes. 32:1.

² Ohage pe ko Tavite, ʼe feala ke tou logoʼi he fimalie mai te lotofakamolemole ʼa Sehova. ʼE ko he meʼa fakalotofimalie tatatou iloʼi ʼe fia fakamolemole e totatou ʼAtua ʼatatou agahala, maʼia mo ʼatatou agahala mamafa. Pea ʼe fakamolemole mai anai mo kapau ʼe tou fakahemala moʼoni, mo vetevete kia te ia pea mo fai ia meʼa fuli ke ʼaua naʼa tou toe fai ʼatatou agahala ʼaia. (Taag. 28:13; Gaue 26:20; 1 Soa. 1:9) Pea ʼe toe fakalotofimalie tatatou iloʼi ʼae ʼe katoa tana lotofakamolemole, pea ʼe hage kia ia neʼe mole tou agahala ʼi he temi.​—Esk. 33:16.

3-4. Kotea ʼae neʼe logoʼi e Jennifer hili tona papitema? Pea kotea ka tou vakaʼi ʼi te alatike ʼaeni?

³ Kae ʼe faigataʼa ki ʼihi tanatou tali te manatu ʼae ʼe lotofakamolemole age ia Sehova kia natou. Ko te aluʼaga ʼaia neʼe hoko kia Jennifer, ʼae neʼe lahilahi ake ʼi te moʼoni. ʼI tana kei finemui, neʼe mole lelei tana aga pea neʼe ina fufu ki ʼana matuʼā. Hili ki ai ni taʼu, neʼe toe liliu mai kia Sehova, mo fai ni toe fetogi pea mo papitema leva. ʼE ina ui fenei: “ ʼI toku maʼuli ʼi muʼa atu, neʼe au fai he ʼu aga heʼe ʼaoga, mo konahia, mo ita tuʼumaʼu, pea mo manatu ʼe maʼuhiga ʼaupito age te falā. Kae neʼe au kole mamahi kia Sehova ke fakamolemole mai pea neʼe au fakahemala ai. Koia, neʼe au mahino lelei pe ki te fahaʼi ʼaia he ʼe ʼaki te sakilifisio ʼa Kilisito, ʼe fakamolemole e Sehova ʼatatou agahala. Kae neʼe kei faigataʼa aipe kia au taku tui ki te fahaʼi ʼaia.”

⁴ ʼE kei faigataʼa koa kia koe ʼi ʼihi temi tau tui papau ʼae kua fakamolemole e Sehova te ʼu agahala neʼe ke fai ʼi muʼa atu? Ke ke manatuʼi pe kotea ʼae neʼe logoʼi e Tavite ʼo ʼuhiga mo te manavaʼofa ʼo Sehova. Neʼe tui papau kua fakamolemole age ia Sehova koteʼuhi ʼe manavaʼofa ʼaupito. Pea ʼe loto e Sehova ke ke toe logoʼi mo koe te fahaʼi ʼaia. ʼI te alatike ʼaeni, ʼe tou vakaʼi anai pe koʼe ʼe tonu ke tou tui papau ʼe kua fakamolemole mai ia Sehova, pea kotea ʼe feala ke tokoni mai ki te fahaʼi ʼaia.

HE KOʼE ʼE TONU KE KE TUI PAPAU KUA FAKAMOLEMOLE ATU IA SEHOVA?

5. Kotea ʼae ʼe loto e Satana ke tou tui ki ai? Tuku mai he faʼifaʼitaki.

⁵ Ka tou tui papau kua fakamolemole mai e Sehova, ʼe tokoni mai ke mole tou to ki he hele ʼa Satana. Ke ke manatuʼi ʼe fai anai e Satana ia meʼa fuli ke ke liʼaki tau tauhi kia Sehova. Koia, ʼe faiga anai ke tou tui ʼe mole feala anai ke fakamolemole ʼatatou agahala. Tou vakaʼi te aluʼaga ʼo he tehina ʼi Kolonito, neʼe toʼo ʼi te kokelekasio ʼuhi ko tana fai he aga heʼe ʼaoga. (1 Ko. 5:​1, 5, 13) ʼI tana fakahemala, neʼe loto e Satana ke mole natou fakamolemole ki ai te kokelekasio, pea ke mole natou fakatalitali lelei ia ia ʼi tana toe liliu mai. Pea neʼe toe loto e Satana ke manatu ʼe mole feala ke fakamolemole ʼana agahala, mo “taʼomia ʼi te lahi fau ʼo tona lotomamahi,” pea ke ina liʼaki tana tauhi kia Sehova. ʼE heʼeki fetogi ia te ʼu faiga mo te ʼu kaka ʼaia ʼa Satana ia ʼaho nei. Kae ʼe “tou iloʼi ʼana fakatuʼutuʼu.”​—2 Ko. 2:​5-​11.

6. Kotea ʼe tokoni mai ke ʼaua naʼa tou tukugakoviʼi ia tatou?

⁶ Ka tou tui papau kua fakamolemole mai ia Sehova, ʼe mole tou tukugakoviʼi anai tatou. Ka tou fai he agahala, ʼe tou tukugakoviʼi pe ia tatou pea ko he aluʼaga ia ʼe tou logoʼi fuli. (Pes. 51:17) ʼE ko he meʼa lelei he ʼe uga e totatou leʼo ʼo loto ke tou fai he ʼu fetogi malohi. (2 Ko. 7:​10, 11) Kapau ʼe tou haga tukugakoviʼi pe ia tatou kae neʼe kua fualoa tatatou fakahemala, ʼe feala pe ke tou lotovaivai ʼo liʼaki tatatou tauhi kia Sehova. Ka tou tui papau kua fakamolemole mai ia Sehova, pea ʼe mole tou tukugakoviʼi anai ia tatou. ʼE tou haga tauhi anai kia Sehova ʼaki he leʼo ʼo loto ʼe maʼa pea mo he loto fiafia, he ʼe ko te meʼa ʼaia ʼe ina loto ke tou fai. (Kol. 1:​10, 11; 2 Tim. 1:3) Kae kotea ʼe feala ke tou fai ke tou tui papau kua fakamolemole mai ia Sehova?

ʼE FEAFEAʼI HAU TUI PAPAU KUA FAKAMOLEMOLE ATU IA SEHOVA?

7-8. Kotea ʼae neʼe ui e Sehova kia Moisese ʼo ʼuhiga mo ia totonu? Pea he koʼe ʼe fakalotofimalie kia tatou? (Ekesote 34:​6, 7)

⁷ Fakakaukauʼi te meʼa ʼae ʼe ui e Sehova ʼo ʼuhiga mo ia totonu. Ohage la, tou vakaʼi pe kotea ʼae neʼe ina ui kia Moisese ʼo ʼuhiga mo ia ʼi te Moʼuga ʼo Sinai.a (Lau ia Ekesote 34:​6, 7.) Neʼe feala pe ke talanoa ia Sehova ki ʼona ʼihi kalitate pea mo ʼana gaue, kae neʼe palalau age ia kia Moisese ko ia ʼe ko te “ ʼAtua manavaʼofa.” Koia, ʼe feala koa ki he ʼAtua feia ke mole fakamolemole ki hana kaugana kua fakahemala moʼoni? Kailoa ia. Kapau la ʼe aga feia ia Sehova, pea ʼe ko he tahi ʼe agakovi pea ʼe mole ʼofa. Kae ʼe tou iloʼi ʼe mole feia ia Sehova.

⁸ ʼE tou tui papau ka ui e Sehova ʼe ko he tahi ʼe manavaʼofa, ʼe ina tala te moʼoni. ʼE mole loi ia. (Pes. 31:5) Koia, ʼe feala ke tou tui papau ki ʼana palalau. Kapau ʼe faigataʼa kia koe hau tuku tau tukugakoviʼi koe, ke ke fai te ʼu fehuʼi ʼaeni: ‘ ʼE au tui papau koa ko Sehova ʼe manavaʼofa moʼoni, pea ʼe fakamolemole anai ki te kau agahala fuli ʼae ʼe fakahemala moʼoni? Koia, ʼe mole tonu koa la ke au tui papau kua toe fakamolemole mai kia au?’

9. Kotea ʼae neʼe ui e Tavite ʼo ʼuhiga mo te fakamolemole ʼa Sehova? Pea kotea te fakaʼuhiga ʼo te kupu ʼae neʼe ina fakaʼaogaʼi? (Pesalemo 32:5)

⁹ Fakakaukauʼi te ʼu meʼa ʼae neʼe tohi e te ʼu tagata faitohi ʼo te Tohi-Tapu, ʼaki te takitaki ʼa Sehova, ʼo ʼuhiga mo tana fakamolemole. Ohage la, tou vakaʼi pe kotea ʼae neʼe ui e Tavite ʼi te Tohi-Tapu ʼo ʼuhiga mo te fakamolemole ʼa Sehova. (Lau ia Pesalemo 32:5.) Neʼe ui fenei e Tavite: ‘Neʼe ke fakamolemole ʼaku agahala.’ Ko te kupu Fakahepeleo ʼae neʼe fakaliliu ʼaki te kupu “fakamolemole” ʼe feala ke fakaʼuhiga “hiki ake,” “toʼo,” peʼe “ ʼave.” ʼI te fakamolemole ʼa Sehova kia Tavite, ʼe hage pe neʼe ina hiki ake ʼana agahala ʼo ʼave ki mamaʼo. Koia, neʼe fimalie ai ia Tavite he neʼe mole kei ina logoʼi te mamafa ʼo ʼana agahala. (Pes. 32:​2-4) ʼE feala pe mo tatou ke tou toe logoʼi te fimalie ʼaia. Kapau ʼe tou fakahemala moʼoni ki ʼatatou agahala, pea ʼe mole kei he ʼuhiga ʼo hatatou ʼamo te mamafa ʼo ʼatatou agahala ʼaia. Kotea tona tupuʼaga? Koteʼuhi kua hiki ake e Sehova ʼo ʼave ki mamaʼo.

10-11. Kotea ʼae ʼe ha ʼi te kupuʼi palalau ʼaeni “lotofakamolemole” ʼo ʼuhiga mo Sehova? (Pesalemo 86:5)

¹⁰ Lau ia Pesalemo 86:5. ʼE ui ʼi heni e Tavite ko Sehova ʼe “lotofakamolemole.” ʼE ui fenei ʼi he tohi ʼo ʼuhiga mo te kupu ʼaia: “[Ko te ʼAtua] ʼe ko ‘he tahi ʼe lotofakamolemole,’ pea ʼe ko tona ‘pe ia ʼuhiga.’ ” He koʼe ʼe ko te ʼuhiga pe ia ʼo Sehova ko te lotofakamolemole? ʼE ui fenei ʼi te hoko atu ʼo te vaega: “ ʼE ke mahu ʼi te ʼofa agatonu kia natou fuli ʼae ʼe pauʼi atu kia te koe.” Neʼe tou vakaʼi ʼi te alatike kua ʼosi, ʼaki te ʼofa agatonu ʼo Sehova, ʼe uga ai ia ia ke ʼofa mamahi tuʼumaʼu ki ʼana kaugana agatonu. Pea ʼe ina toe uga ai ia ia ke ‘fakamolemole mo he lotolelei’ kia natou fuli ʼae ʼe fakahemala. (Esa. 55:​7, nota.) Kapau ʼe faigataʼa kia koe tau tui papau kua fakamolemole atu ia Sehova, ke ke fai te ʼu fehuʼi ʼaeni: ‘ ʼE au tui papau koa ʼe ko te ʼuhiga pe ia ʼo Sehova ko te lotofakamolemole, pea ʼe fakamolemole mo he lotolelei ki te kau agahala fuli kua fakahemala ʼae ʼe pauʼi kia te ia ke manavaʼofa age kia natou? Koia, ʼe mole tonu koa ke au tui papau kua toe fakamolemole mai kia au ʼi taku pauʼi kia te ia ke manavaʼofa mai kia au?’

¹¹ ʼE toe fakaha lelei ʼi te tahi Pesalemo ʼa Tavite, ʼe mahino lelei ia Sehova ki totatou ʼuhiga agahala. (Pes. 139:​1, 2) Koia, ʼaki te Pesalemo ʼaia ʼe ina fakalotofimalieʼi tatou, pea mo fakamalohiʼi tatatou tui ʼae kua fakamolemole mai ia Sehova.

ʼAUA NAʼA GALO KIA KOE TE MEʼA ʼAE ʼE MANATUʼI E SEHOVA

12-13. Ka tou lau ia Pesalemo 103:​14, kotea ʼae ʼe manatuʼi e Sehova ʼo ʼuhiga mo tatou? Pea kotea ʼae ʼe ina uga ia ia ke ina fai?

¹² Lau ia Pesalemo 103:14. ʼE ui ʼi heni e Tavite ko Sehova “ ʼe ina manatuʼi ʼe tou efu.” ʼE ha ʼi te ʼu palalau ʼaia pe koʼe ʼe lotofakamolemole ia Sehova ki ʼana kaugana ʼae kua fakahemala moʼoni: ʼE ina iloʼi ia totatou ʼuhiga agahala. Kapau ʼe tou fia mahino lelei ki te manatu ʼaia, tou vakaʼi ia te ʼu palalau ʼaia ʼa Tavite.

¹³ ʼE fakamahino e Tavite ʼe ‘iloʼi lelei pe e Sehova totatou faʼahiga faʼu.’ Neʼe fakatupu e totatou Tupuʼaga ia Atama “ ʼaki te efu ʼo te kele,” koia ʼe ina iloʼi lelei te ʼu tuʼakoi ʼo te tagata haohaoa. Ohage la kapau ʼe fia maʼuli, ʼe ʼaoga ke kai, mo malolo pea mo manava. (Sen. 2:7) Kae ʼi te agahala ʼa Atama mo Eva, neʼe ʼi ai te tahi fakaʼuhiga ʼo tana liliu ʼae ʼo efu. ʼE tou hifo mai ia naua, koia ʼe tou maʼu ai tonā ʼuhiga agahala, ʼo tupu ai tatatou fai te meʼa ʼae ʼe kovi. ʼE mole gata pe ki tana iloʼi totatou ʼuhiga agahala, kae “ ʼe ina manatuʼi,” ohage pe ko tona ui e Tavite. Ko te kupu Fakahepeleo ʼae neʼe fakaʼaogaʼi ʼi heni, ʼe feala ke fakaʼuhiga ki te manavaʼofa tuʼumaʼu ʼo Sehova kia tatou. ʼE hage pe neʼe fia ui e Tavite ʼe iloʼi e Sehova ʼe tou fai ʼi ʼihi temi ni hala. Kae ka tou agahala pea mo fakahemala moʼoni, ʼe manavaʼofa kia tatou pea mo lotofakamolemole mai.​—Pes. 78:​38, 39.

14. (1) Kotea te ʼu kupu neʼe fakaʼaogaʼi e Tavite ʼi tana palalau ki te lotofakamolemole ʼa Sehova? (Pesalemo 103:12) (2) ʼE ha feafeaʼi ʼi te faʼifaʼitaki ʼa Tavite ʼe katoa te lotofakamolemole ʼa Sehova? (Vakaʼi te ʼa takai “ ʼE Fakamolemole Mo Galoʼi e Sehova.”)

¹⁴ ʼE lahi feafeaʼi te lotofakamolemole ʼa Sehova? (Lau ia Pesalemo 103:12.) ʼE ui e Tavite ka fakamolemole mai ia Sehova, ʼe Ina tuku ʼatatou agahala “ohage pe ko te mamaʼo ʼo te hopoʼaga [te potu esite] ʼo te laʼa mai tona toʼaga [te potu uesite].” ʼE tou iloʼi ʼe mamaʼo ʼosi te potu esite mai te potu uesite, pea ʼe mole feala ke nā felaveʼi. Kotea ʼe tou ako ai mai te lotofakamolemole ʼa Sehova? ʼE tou maʼu tona tali ʼi he tohi kae ʼe fakaʼaogaʼi ai he ʼu palalau fakata. ʼE ui fenei ai: “Kapau ʼe ʼave mamaʼo ʼatatou agahala, pea ʼe hage pe ʼe mole tou toe mamanuʼia he ʼaele ʼo he meʼa, ʼe mole kei tou sisio ki ai pea mo manatuʼi.” ʼE moʼoni, ʼi ʼihi temi ka tou mamanuʼia he meʼa pea ʼe feala ai ke tou manatuʼi he meʼa. Kae ka fakamolemole ia Sehova, ʼe mole ina toe mamanuʼia he meʼa ke tupu ai hana manatuʼi ʼatatou agahala pea mo tukugakoviʼi tatou.​—Esk. 18:​21, 22; Gaue 3:​19.

15. Kapau ʼi te temi nei kei tou tukugakoviʼi tatou ʼuhi ko ni agahala neʼe tou fai ʼi muʼa atu, kotea ʼae ʼe feala ke tou fai?

¹⁵ ʼE tokoni feafeaʼi mai te ʼu palalau ʼa Tavite ʼi te Pesalemo 103 ke tou tui papau kua fakamolemole mai ia Sehova? Kapau ʼi te temi nei kei tou tukugakoviʼi tatou ʼuhi ko ni agahala neʼe tou fai ʼi muʼa atu, tou fai te ʼu fehuʼi ʼaeni: ‘ ʼE au galoʼi koa te meʼa ʼae ʼe manatuʼi e Sehova? Ko tona fakaʼuhiga, ʼe au galoʼi koa ʼe ina iloʼi toku ʼuhiga agahala pea kua ina fakamolemole mai he neʼe au fakahemala? Kae ʼe au manatuʼi koa te meʼa ʼae ʼe ina galoʼi? Ko tona fakaʼuhiga, ʼe au manatuʼi koa ʼaku agahala, ʼae kua ina fakamolemole pea mole kei ina tokagaʼi?’ ʼE mole manatuʼi ia e Sehova ʼatatou agahala neʼe tou fai ʼi muʼa atu. Pea ʼe tonu ke tou toe fai feia mo tatou. (Pes. 130:3) Ka tou tui papau kua fakamolemole mai ia Sehova, ʼe tokoni mai ke tou fakamolemole kia tatou totonu pea mo haga haʼele ki muʼa.

16. Tuku mai he faʼifaʼitaki ʼe ha ai ʼe fakatupu tuʼutamaki tatatou haga tukugakoviʼi pe ia tatou ʼuhi ko he ʼu agahala neʼe tou fai ʼi muʼa atu. (Vakaʼi mo te pāki.)

¹⁶ Tou toʼo he faʼifaʼitaki. Ka tou haga tukugakoviʼi pe ia tatou ʼuhi ko te ʼu agahala neʼe tou fai ʼi muʼa atu, ʼe hage pe ʼe tou taki he motoka kae tou sioʼi tuʼumaʼu te kiʼi sioʼata ʼae ki muli. ʼE lelei ʼi ʼihi temi ke tou tau sioʼi ke mole hoko ai he tuʼutamaki. Kae kapau ʼe mole tou loto ke hoko he tuʼutamaki kia tatou, ʼe tonu ke tou sisio ki muʼa. ʼO toe feia pe, ʼe ʼaoga ʼi ʼihi temi ke tou toe manatuʼi te ʼu agahala neʼe tou fai ʼi muʼa atu, he ʼe tokoni mai ke tou toʼo ai he ʼu ako pea mo fakatotonu ke mole tou toe fai. Kae kapau ʼe tou manatuʼi tuʼumaʼu, ʼe feala ke puli ai totatou fiafia ʼo mole tou fia gaue lahi ai maʼa Sehova. Tou haga sio tatou ki muʼa. ʼE haʼele tatou ʼi te ala ʼae ʼe ina taki ki te maʼuli ʼo te malama foʼou ʼae ʼe fakapapauʼi mai e te ʼAtua. ‘ ʼE mole tou toe manatuʼi ai anai,’ te ʼu meʼa ʼae ʼe mole lelei.​—Esa. 65:17; Taag. 4:​25.

HOKO ATU TAU TUI PAPAU KUA FAKAMOLEMOLE ATU IA SEHOVA

17. He koʼe ʼe tonu ke hoko atu tatatou tui papau ʼae ʼe ʼofa ia Sehova ia tatou, pea kua fakamolemole mai?

¹⁷ ʼE tonu ke hoko atu tatatou tui papau ʼae ʼe ʼofa ia Sehova ia tatou, pea kua fakamolemole mai. (1 Soa. 3:​19) Kotea tona tupuʼaga? Koteʼuhi ʼe faiga ia Satana ke tou tui ʼe mole tou tuha ke ʼofainaʼi tatou, pea ke mole fakamolemole ʼatatou agahala. ʼI tana fakaʼaogaʼi te ʼu manatu ʼaia, ʼe heʼeki fetogi tana fakatuʼutuʼu: ʼE ina loto ke tou liʼaki tatatou tauhi kia Sehova. ʼE tou iloʼi ʼe ʼasili malohi age anai ʼana faiga ʼaia he ʼe ina iloʼi kua nounou tona temi. (Fkha. 12:12) Koia, ʼaua naʼa tou tuku ke malo ia tatou.

18. Kotea ʼe feala ke ke fai ke ke tui papau ʼe ʼofa Sehova ia koe pea kua fakamolemole atu?

¹⁸ Kapau ʼe ke fia fakamalohiʼi tau tui papau ʼae ʼe ʼofa Sehova ia koe, ke ke mulimuli ki te ʼu tokoni ʼae neʼe talanoa ki ai te alatike kua ʼosi. Ke ke fakakaukauʼi te faʼahiga palalau ʼa Sehova ʼo ʼuhiga mo ia totonu ke ke tui papau ai kua fakamolemole atu ia Sehova. Ke ke metitasio ki te ʼu meʼa ʼae neʼe tohi e te kau tagata faitohi ʼo te Tohi-Tapu ʼaki tana takitaki, ʼo ʼuhiga mo tana fakamolemole. Ke ke manatuʼi ʼe ina iloʼi lelei tou ʼuhiga agahala, pea ʼe manavaʼofa anai kia koe. Pea ʼaua naʼa galo kia koe ʼe katoa tana lotofakamolemole. Koia, ʼe feala ke ke hage ko Tavite, ʼae neʼe falala ki te manavaʼofa ʼo Sehova, ʼo ke ui fenei: “Malo Sehova ki tau fakamolemole ‘ ʼaku agahala’!”​—Pes. 32:5.