Ko Sehova, ʼe Ko He ʼAtua ʼe “Fakamolemole Gafua”

“Ko koe, Ê Sehova, ʼe ke agalelei pea mo ke fakamolemole gafua.”​—Pesalemo 86:5.

1. Koteā te kavega mamafa ʼaē neʼe ʼamo e te Hau ko Tavite, pea neʼe fakaloto fīmālieʼi feafeaʼi tona lotohoha?

NEʼE ʼiloʼi lelei e te Hau ʼo te Iselaele ʼāfea ko Tavite, te hoha ʼaupito ʼo tokita leʼo ʼo loto mokā kita agahala. Neʼe ina tohi fēnei: “Kua fakalaka taku ʼu hala ʼi toku ʼulu; ʼe mamafa fau kia te ʼau, ohage ko he kavega mamafa. Kua ʼau mategūgū pea kua laliki ʼaupito ʼau; neʼe ʼau tologulu ʼuhi ko te mamahi ʼo toku loto.” (Pesalemo 38:​4, 8) Kae neʼe maʼu e Tavite te fakaloto fīmālie ki tona lotohoha. Neʼe mahino lelei kia ia, ʼe fehiʼa ia Sehova ki te agahala, kae ʼe mole fehiʼa ki te tagata agahala​—mo kapau foki ʼe fakahemala moʼoni pea mo ina līaki tona faʼahiga maʼuli agahala. (Pesalemo 32:5; 103:3) ʼI tana tui papau ki te loto fakamolemole ʼa Sehova kia nātou ʼaē ʼe fakahemala, neʼe ʼui fēnei e Tavite: “Ko koe, Ê Sehova, ʼe ke agalelei pea mo ke fakamolemole gafua.”​—Pesalemo 86:5.

2, 3. (a) Ka tou agahala, koteā te kavega ʼaē ʼe lagi tonu anai ke tou ʼamo, pea he koʼe ʼe feala ke fua lelei te faʼahi ʼaia kia tatou? (b) Koteā te tuʼutāmaki ʼaē ʼe feala ke hoko kia tatou mo kapau ʼe tou logo “taʼomia” ʼuhi ko te agahala? (c) Koteā te fakapapau ʼaē ʼe fai e te Tohi-Tapu ʼo ʼuhiga mo te loto fakamolemole ʼa Sehova?

² Tahi ʼaē meʼa ka tou agahala, ʼe tonu ke tou ʼamo te kavega ʼaē ko he leʼo ʼo loto ʼe lotomamahi. Ko te faʼahiga loto fakahemala ʼaia ʼaē ʼe tou logoʼi, ʼe ko he meʼa ʼe hoko kia tatou fuli, pea ʼe feala ke fua lelei kia tatou. ʼE feala ke ina uga tatou ke tou fai he ʼu fakatuʼutuʼu moʼo fakatokatoka ʼo te ʼu hala ʼaē neʼe tou fai. Kae ko ʼihi Kilisitiano, neʼe mamafa fau tanatou hala kia nātou. Neʼe tauteaʼi nātou e tonatou ʼu loto, ʼo nātou manatu ai ʼe mole feala ke katoa te fakamolemole ʼa te ʼAtua kia nātou, tatau aipe peʼe lahi tanatou fakahemala peʼe kailoa. Neʼe talanoa te tuagaʼane ʼo ʼuhiga mo te hala ʼaē neʼe ina fai, ʼo ina ʼui fēnei, “ ʼE fakatupu mamahi ʼaupito te manatu ʼaē, ʼe mole lagi toe ʼofa anai ia Sehova kia kita.” Logope la tana kua fakahemala pea mo tana tali te ʼu tokoni ʼa te ʼu tagata ʼāfea ʼo te kokelekasio, neʼe kei manatu pe ia ʼe mole tāu mo ia ke fakamolemole age te ʼAtua. ʼE ina fakamahino fēnei, “ ʼI te ʼaho fuli, ʼe ʼau kole age kia Sehova ke ina fakamolemole mai kia ʼau.” Kapau ʼe tou logo “taʼomia” ʼuhi ko tatatou agahala, pea ʼe lagi fakaneke anai tatou e Satana ke tou lotovaivai, ʼo tou manatu ai ʼe mole kei tau mo feʼauga ke tou tauhi kia Sehova.​—2 Kolonito 2:​5-7, 11.

³ Kae ʼe mole manatu feiā ia Sehova! ʼE fakapapau mai e tana Folafola, kapau ʼe tou fakahemala fakamalotoloto, pea ʼe tali lelei e Sehova ke fakamolemole mai kia tatou, pea ʼe fakamolemole gafua ia. (Tāʼaga Lea 28:13) Koia, kapau neʼe koutou manatu ʼe mole feala ke fakamolemole atu te ʼAtua kia koutou, pea ʼe lagi ʼaoga anai ke koutou vakaʼi fakalelei, pe koʼe ʼe fakamolemole mai te ʼAtua kia tatou pea ʼo feafeaʼi.

He Koʼe ʼe “Fakamolemole Gafua” Ia Sehova?

4. Koteā te meʼa ʼaē ʼe manatuʼi e Sehova ʼo ʼuhiga mo tatou, pea ʼi tana mahino ki te faʼahi ʼaia, ʼe ina gaohi feafeaʼi tatou?

⁴ ʼE tou lau fēnei ʼi te Tohi-Tapu: “Ohage ko te mamaʼo ʼo te potu hahake ʼi te potu hihifo, neʼe toe feiā mo tana fakamamaʼo ia tatou tatatou ʼu agahala. Ohage pe ko te manavaʼofa ʼa he tāmai ki tona ʼu foha, ʼe manavaʼofa ia Sehova kia nātou ʼaē ʼe manavasiʼi kia te ia.” He koʼe ʼe loto fakamolemole ia Sehova? ʼE tali fēnei e te vaega ki muli mai: “Heʼe ina ʼiloʼi lelei neʼe faʼu tatou ʼaki teā, ʼo ina manatuʼi ʼe tou efu.” (Pesalemo 103:12-14) ʼE hā lelei mai ai, ʼe mole galo kia Sehova, ko tatou ko te ʼu efu ʼo te kele, pea ʼe ʼi ai totatou ʼu vaivaiʼaga, ʼuhi ko totatou ʼuhiga agahala. Ko te kupuʼi palalau “neʼe faʼu tatou ʼaki teā,” ʼe ina fakamanatuʼi mai kia tatou, ko te Tohi-Tapu ʼe ina fakatatau ia Sehova ki te tagata faʼu ipu kele, pea ko tatou ko te ʼu ipu kele ʼaē ʼe ina faʼu.a (Selemia 18:​2-6) Ko te tagata faʼu ipu, ʼe ina puke mālohi te ʼu ipu kele ʼo ina fai fakaʼeteʼete, heʼe ina manatuʼi tuʼumaʼu ʼe maumau gafua. ʼE toe feiā pe mo Sehova, te Tagata faʼu ipu Lahi, ʼe ina fakafuafua lelei te faʼahiga gaohi ʼo tatou, ʼo mulimuli pe ki totatou ʼuhiga vaivai ʼuhi ko te agahala.​—Vakaʼi ia 2 Kolonito 4:7.

5. ʼE fakamatala feafeaʼi e te tohi ʼo Loma te mālohi ʼo te agahala ki totatou kakano heʼe haohaoa?

⁵ ʼE ʼiloʼi lelei e Sehova te mālohi ʼo te agahala. Ko te Tohi-Tapu ʼe ina fakatatau te agahala ki he mālohi lahi ʼe ina puleʼi te tagata. ʼE lahi feafeaʼi te mālohi ʼo te agahala? ʼI te koga tohi ʼo Loma, ʼe fakamahino mai e te ʼapositolo ko Paulo ia te faʼahi ʼaia ʼaki te laumālie maʼoniʼoni, ʼo ina ʼui fēnei: ʼE “puleʼi [tatou] e te agahala,” ohage ko te kau solia ʼaē ʼe puleʼi e tonatou kamutoa (Loma 3:9); ko te agahala, ʼe ina “puleʼi” te malamanei ohage ko he hau (Loma 5:​21); ʼe “nofo” ia tatou (Loma 7:​17, 20); ʼe gāue tuʼumaʼu tana “lao” ia tatou, ʼo ina faigaʼi ke ina puleʼi totatou maʼuli. (Loma 7:​23, 25) ʼE faigataʼa ʼaupito hatatou tauʼi te mālohi ʼo te agahala ʼaki totatou kakano heʼe haohaoa!​—Loma 7:​21, 24.

6. Koteā anai te meʼa ʼaē ka fai e Sehova kia nātou ʼaē ʼe nātou kumi tana manavaʼofa ʼaki he loto fakahemala?

⁶ Koia, ʼe ʼiloʼi e totatou ʼAtua manavaʼofa, ʼi ʼihi temi ʼe tōtō ai tatatou fakalogo kia te ia, logope la te lotomālohi ʼaē ʼo totatou loto ke tou fakalogo kia te ia. (1 Hau 8:​46) ʼI tona ʼofa, ʼe ina fakapapau mai ʼe fakamolemole anai kia tatou mo kapau ʼe tou kumi tona manavaʼofa ʼaki he loto fakahemala. Neʼe ʼui fēnei e te tagata fai pesalemo ko Tavite: “Ko te ʼu sakilifisio ʼaē ʼe fai ki te ʼAtua, ʼe ko he ʼatamai lavea; ko he loto lavea mo taʼomia, Ê ʼAtua, ʼe mole ke fehiʼa anai kiai.” (Pesalemo 51:17) ʼE mole līaki anai e Sehova he loto lavea pea mo taʼomia ʼuhi ko te kavega ʼo te agahala. ʼE ko he fakahā lelei ʼaia ʼo te fai fakamolemole gafua ʼa Sehova!

7. He koʼe ʼe mole matatonu ke tou ʼamanaki tuʼumaʼu ki te manavaʼofa ʼa Sehova?

⁷ Kae ko tona faka ʼuhiga koa, ʼe feala hatatou ʼamanaki tuʼumaʼu ki te manavaʼofa ʼa te ʼAtua, ʼo tou ʼui ko totatou ʼuhiga agahala ʼe ko he faka fealagia ʼaia ke tou agahala tuʼumaʼu? Kailoa ia! ʼE mole fakamolemole feiā pe e Sehova. ʼE ʼi ai te ʼu tuʼakoi ʼo tona manavaʼofa. ʼE mole ina fakamolemole anai kia nātou ʼaē ʼe nātou fai te ʼu agahala fakalialia ʼi tonatou loto faʼifaʼitaliha, ʼo mole nātou fakahemala. (Hepeleo 10:26-​31) ʼI te tahi faʼahi, kapau ʼe sio ia Sehova ki he loto “ ʼe lavea pea mo taʼomia,” pea ʼe “fakamolemole gafua.” (Tāʼaga Lea 17⁠:⁠3) Tou vakaʼi te ʼu kupuʼi palalau ʼaē ʼe fakaʼaogaʼi e te Tohi-Tapu, moʼo fakahā te katoa ʼo te fakamolemole fakaʼatua.

E Feafeaʼi Te Fakamolemole Katoa ʼa Te ʼAtua?

8. ʼI tona fakahagatonu, koteā te meʼa ʼaē ʼe fai e Sehova mokā ina fakamolemole tatatou ʼu agahala, pea ʼe tonu ke lave feafeaʼi te faʼahi ʼaia kia tatou?

⁸ Neʼe ʼui fēnei e te Hau ko Tavite ʼaē neʼe fakahemala: “Ko taku agahala, neʼe ʼau kofesioʼi atu, pea neʼe mole ʼau ʼuʼufi taku hala. Neʼe ʼau ʼui: ‘ ʼE ʼau kofesioʼi anai taku ʼu talagataʼa kia Sehova.’ Pea ko koe neʼe ke fakamolemole te hala ʼo taku ʼu agahala.” (Pesalemo 32:5) Ko te kupuʼi palalau “fakamolemole” ʼe ko he fakaliliu ʼaia ʼo te kupu faka Hepeleo ʼaē ʼe faka ʼuhiga tāfito ki te kupu “lagaʼi,” peʼe “fua, mo ʼamo.” Ko tona fakaʼaogaʼi ʼi henī ʼe faka ʼuhiga ki te ‘toʼo kehe ʼo te hala, pe ko te meʼa kovi, pe ko te agahala.’ Koia, ʼi hona ʼaluʼaga fakatātā, neʼe lagaʼi e Sehova te ʼu agahala ʼa Tavite pea neʼe ina toʼo mai ia ia. (Vakaʼi ia Levitike 16:20-​22.) ʼE mahino papau ia, ko te faʼahi ʼaia neʼe ko he meʼa fakaloto fīmālie kia Tavite ʼaē neʼe lotohoha ʼuhi ko te ʼu agahala ʼaē neʼe ina fai. (Vakaʼi ia Pesalemo 32:3.) ʼE toe feiā mo tatou, ʼe feala hatatou falala katoa ki te ʼAtua ʼaē ʼe ina fakamolemole te ʼu agahala ʼo nātou ʼaē ʼe nātou loto ke fakamolemole age kia nātou, ʼo fakatafito ki tanatou tui ki te sakilifisio faitotogi ʼo Sesu Kilisito. (Mateo 20:28; vakaʼi ia Isaia 53:12.) Ko nātou ʼaē ʼe fakamolemole e Sehova tanatou ʼu agahala, ʼe mole tonu ke nātou haga ʼamo te kavega ʼaē ʼo te lotohoha ʼuhi ko te ʼu agahala ʼaē neʼe nātou fai ʼi muʼa atu.

9. Koteā te faka ʼuhiga ʼo te ʼu palalau ʼaenī ʼa Sesu: “Pea ke fakamolemole ʼomātou ʼu maʼua”?

⁹ Neʼe fakaʼaogaʼi e Sesu te ʼu felogoi ʼa te tagata tae maʼua pea mo te hahaʼi ʼaē ʼe ʼi ai honatou maʼua, moʼo fakahā peʼe feafeaʼi te faʼahiga fakamolemole ʼa Sehova. Ohage la, neʼe fakaloto mālohiʼi tatou e Sesu ke tou faikole fēnei: “Pea ke fakamolemole ʼomātou maʼua.” (Mateo 6:​12) Koia, ʼe fakatatau e Sesu tatatou ʼu “agahala” ki he ʼu “maʼua.” (Luka 11:4) Ka tou agahala, pea ʼe tou liliu ko “he ʼu hahaʼi tuʼu maʼua” kia Sehova. Ko te kupu faka Keleka ʼaē ʼe fakaliliu ʼaki te kupu “fakamolemole,” ʼe feala ke faka ʼuhiga ki te “molehi ʼo he maʼua, ke mole toe fakamaʼua ke huʼi te maʼua ʼaia.” Ko tona faka ʼuhiga, ka fakamolemole e Sehova, pea ʼe ina molehi te maʼua ʼaē ʼe tonu ke tou huʼi ki ai. Koia, ʼe ko he meʼa fakaloto fīmālie moʼoni ʼaia ki te kau agahala ʼaē kua nātou fakahemala. ʼE mole kole anai e Sehova ʼi he temi ke nātou huʼi maʼua age ki ai, koteʼuhi kua ina molehi te maʼua ʼaia!​—Pesalemo 32:​1, 2; vakaʼi ia Mateo 18:23-​35.

10, 11. (a) Koteā te fakatātā ʼaē ʼe hā ʼi te kupu “molehi” ʼaē ʼe tou maʼu ia Gāue 3:​19? (b) ʼE hā feafeaʼi mai ai, ʼe katoa te fakamolemole ʼa Sehova?

¹⁰ Ia Gāue 3:​19, ʼe fakaʼaogaʼi e te Tohi-Tapu te tahi faʼahiga palalau moʼo fakahā peʼe feafeaʼi te fakamolemole ʼa te ʼAtua: “Koutou fakahemala foki pea mo koutou mafuli mai, ke molehi ʼakotou ʼu agahala.” Ko te kupu “molehi” ʼe ko te fakaliliu ʼaia ʼo te kupu faka Keleka ʼaē ʼe faka ʼuhiga ʼi hona ʼaluʼaga fakatātā ki te kupu “holoholoʼi, pulihi peʼe maumauʼi.” ʼO mulimuli ki te meʼa ʼaē ʼe ʼui e ʼihi hahaʼi sivi Tohi-Tapu, ko te ʼu palalau ʼaia ʼe faka ʼuhiga ki te molehi ʼo he meʼa neʼe tohi. ʼO feafeaʼi? Ko te vai tohi ʼaē neʼe fakaʼaogaʼi ʼi te ʼu temi ʼāfea neʼe fai ʼaki te mamala, mo te pulu, pea mo he moʼi vai. ʼI takita ʼosi tohi ʼaki te vai tohi ʼaia, neʼe feala ke kita toʼo he moʼi kie palapala ʼo molehi te meʼa ʼaē neʼe kita tohi.

¹¹ ʼE hā mai ai te fakatā lelei ʼaupito ʼo te fakamolemole katoa ʼa Sehova. Ka ina fakamolemole tatatou ʼu agahala, pea ʼe hage ʼe ina toʼo he moʼi kie ʼo holo ke puli. ʼE mole tonu ke tou tuʼania naʼa toe manatuʼi ki ʼamuli e Sehova tatatou ʼu agahala, heʼe fakahā mai e te Tohi-Tapu te tahi meʼa fakaofoofo ʼo ʼuhiga mo te manavaʼofa ʼa Sehova: Ka ina fakamolemole, pea ʼe ina galoʼi te agahala!

“ ʼE Mole ʼAu Toe Manatuʼi Anai Tanatou Agahala”

12. Ka ʼui e te Tohi-Tapu ʼe galoʼi e Sehova tatatou ʼu agahala, ʼe ko tona faka ʼuhiga koa, ʼe mole feala tana manatuʼi te ʼu agahala ʼaia? Koutou fakamahino takotou tali.

¹² ʼAki tana polofeta ko Selemia, neʼe fakapapau fēnei e Sehova kia nātou ʼaē ʼe nātou kau ʼi te fuakava foʼou: “ ʼE ʼau fakamolemole anai tanatou hala, pea ʼe mole ʼau toe manatuʼi anai tanatou agahala.” (Selemia 31:34) Ko tona faka ʼuhiga koa, ʼe mole feala ke manatuʼi e Sehova te ʼu agahala ʼaē kua ina fakamolemole? Kailoa ia. Ohage la, ʼe fakahā mai e te Tohi-Tapu te ʼu agahala ʼo te ʼu hahaʼi kehekehe ʼaē neʼe fakamolemole ki ai e Sehova, ʼo kau ai mo Tavite. (2 Samuele 11:​1-​17; 12:​1-​13) ʼE hā lelei ai, ʼe mālama lelei ia Sehova ki te ʼu agahala ʼaē neʼe nātou fai, pea ʼe tonu ke feiā mo tatou. Ko te fakamatala ʼo tanatou ʼu agahala mo tonatou fakahemala pea mo te fakamolemole age ʼa te ʼAtua, neʼe taupau lelei ʼi te Tohi-Tapu ke ʼaoga kia tatou. (Loma 15:4) Kae koteā te faka ʼuhiga ʼo te ʼui ʼa te Tohi-Tapu, ʼe mole toe “manatuʼi” e Sehova te ʼu agahala ʼa nātou ʼaē ʼe fakamolemole ki ai?

13. (a) Koteā te meʼa ʼaē ʼe pipiki ki te faka ʼuhiga ʼo te kupu faka Hepeleo ʼaē ʼe fakaliliu ʼaki te kupuʼi palalau “ ʼe ʼau toe manatuʼi anai”? (b) Koteā te meʼa ʼaē ʼe fakapapau mai e Sehova ʼi tana ʼui fēnei, “ ʼe mole ʼau toe manatuʼi anai tanatou agahala”?

¹³ Ko te faka ʼuhiga ʼo te kupu faka Hepeleo ʼaē ʼe fakaliliu ʼaki te kupuʼi palalau “ ʼe ʼau toe manatuʼi anai,” ʼe mole gata ʼaki pe te manatuʼi ʼo he ʼu meʼa neʼe hoko ʼi muʼa atu. Ohage ko tona ʼui e te tohi Theological Wordbook of the Old Testament, ʼe toe faka ʼuhiga te kupuʼi palalau ʼaia ki “te fai ʼo he meʼa moʼo liufaki ʼaki te aga ʼaē neʼe fai.” Koia, ʼaki te fakamahino ʼaenī, ko te kupu “toe manatuʼi” ʼo he agahala ʼe toe faka ʼuhiga foki ki te fai ʼo he meʼa moʼo fakafeagai kia nātou ʼaē ʼe agahala. ʼI te temi ʼaē neʼe ʼui ai e te polofeta ko Osea ʼo ʼuhiga mo te kau Iselaelite talagataʼa, “ ʼe toe manatuʼi anai [e Sehova] tanatou hala,” neʼe fia ʼui e te polofeta, ʼe fai anai e Sehova he meʼa moʼo fakafeagai kia nātou ʼuhi ko tanatou mole fakahemala. Koia ʼe ʼui fēnei ʼi te fakaʼosi ʼo te vaega: “ ʼE ina fakatokagaʼi anai tanatou ʼu agahala.” (Osea 9:9) ʼI te tahi faʼahi, ka ʼui e Sehova, “ ʼe mole ʼau toe manatuʼi anai tanatou agahala,” ʼe ina fakapapau mai kia tatou, kapau kua fakamolemole ki he tahi neʼe agahala pea kua fakahemala, pea ʼe mole fakafeagai anai kia ia ʼi he temi ki ʼamuli. (Esekiele 18:21, 22) Koia, ʼe ina galoʼi, ʼi tona faka ʼuhiga ʼaē ʼe mole ina fakamanatuʼi tuʼumaʼu mai tatatou ʼu agahala moʼo fakakoviʼi peʼe moʼo tauteaʼi ʼo tatou. ʼI tana fai te faʼahi ʼaia, ʼe tuku mai e Sehova te faʼifaʼitaki lelei ke tou muliʼi ʼi tatatou ʼu felogoi mo ʼihi. Ka hoko he ʼu tokakovi, pea ʼe mole tonu ke tou fakamanatuʼi te ʼu hala ʼaē neʼe hoko ʼi muʼa atu, pea neʼe kita tali lelei ke kita fakamolemole.

E Feafeaʼi ʼo ʼUhiga Mo Te ʼu Fua Kovi ʼo Tatatou Agahala?

14. Tatau aipe pe kua fakamolemole tana agahala, he koʼe ʼe mole feala ki te tagata agahala ʼaē kua fakahemala ke hāo mai te ʼu fua kovi ʼo tana hala?

¹⁴ Ko te fakamolemole gafua ʼa Sehova, ʼe ina faka ʼuhiga koa, ʼe mole hoko anai ki te tagata ʼaē ʼe fakahemala te ʼu fua kovi ʼo tana agahala? Kailoa ia. ʼE mole feala hatatou agahala ka mole hoko kia tatou tona ʼu fua kovi. Neʼe tohi fēnei e Paulo: “Ko te meʼa ʼaē ʼe to e te tagata, ʼe ko te meʼa pe ʼaia ʼaē ka ina utu anai.” (Kalate 6:7) ʼE lagi hoko anai kia tatou he ʼu fua kovi ʼo te meʼa ʼaē neʼe tou fai peʼe ko te tahi fihifihia, kae ʼi tana ʼosi fakamolemole mai kia tatou, ʼe mole ʼahiʼahiʼi tatou e Sehova. Ka hoko he ʼu fihifihia ki he Kilisitiano, pea ʼe mole tonu ke manatu fēnei, ‘ ʼE lagi tauteaʼi ʼau e Sehova ʼuhi ko te ʼu agahala ʼaē neʼe ʼau fai ʼi te temi muʼa.’ (Vakaʼi ia Sake 1:​13.) ʼI te tahi faʼahi, ʼe mole fakahāo tatou e Sehova mai te ʼu meʼa ʼaē ʼe feala ke hoko kia tatou ʼuhi ko tatatou ʼu agahala. Ko te ʼu mavete ʼohoana, mo te fānau taka, mo te ʼu mahaki ʼuhi ko te ʼu felāveʼi fakasino, pea mo te mole kei falala pea mo fakaʼapaʼapa ʼa te hahaʼi kia tatou​—ko te ʼu meʼa fuli ʼaia ʼe ko te ʼu fua kovi ʼo te agahala, pea ʼe mole puipui anai tatou e Sehova mai te ʼu meʼa ʼaia. Koutou manatuʼi, logope la neʼe fakamolemole e Sehova kia Tavite ʼi tana agahala kia Pati-Sepa pea mo Ulia, kae neʼe mole ina puipui ia ia ʼi te ʼu meʼa fakaʼofaʼofa ʼaē neʼe hoko ki ai ki muli age.​—2 Samuele 12:​9-​14.

15, 16. Ko te lao ʼaē ʼe tuʼu ia Levitike 6:​1-7, neʼe ʼaoga feafeaʼi ki te tagata ʼaē neʼe kaihaʼa tana ʼu meʼa, pea mo te tagata kaihaʼa?

¹⁵ ʼE feala ke ʼi ai te tahi ʼu fua kovi ʼo tatatou agahala. Ohage la, koutou vakaʼi te fakamatala ʼaē ia Levitike kapite 6. ʼE talanoa ʼi henī te Lao Faka Moisese ki he tahi neʼe agahala mamafa ʼi tana kaihaʼa te ʼu meʼa ʼa te tahi tagata Iselaelite peʼe ʼi tana fai ʼo he tahi aga fakakākā. Ko te tagata agahala ʼaia ʼe fakafisi ki tana hala, ʼo mole mataku ʼi te fai ʼo he fuakava loi. ʼE fefihiʼaki te ʼu tagata ʼaia ʼo ʼuhiga mo te faʼahi ʼaia, ka mole ʼi ai he ʼu fakamoʼoni ʼo te ʼu meʼa ʼaē ʼe nā lau. Kae ki muli age, ko te tagata agahala ʼe lotohoha ʼaupito pea ʼalu ʼo kofesioʼi tana agahala. Kapau ʼe loto ke fakamolemole age te ʼAtua kia ia, pea ʼe tonu ke ina fai te tahi ʼu meʼa e tolu: ʼe tonu ke ina liufaki te ʼu meʼa ʼaē neʼe ina kaihaʼa, mo totogi ki te tagata ʼaē ʼaʼana te ʼu meʼa ʼaia, te vahe e tahi ʼi te ʼu vahe e nima ʼo te ʼu meʼa ʼaē neʼe ina kaihaʼa, pea mo ina mōlagaʼi he matuʼaʼi akeno, ko he mōlaga ʼo ʼuhiga mo tana agahala. ʼOsi ʼaia pea ʼui fēnei e te lao: “Pea ʼe tonu ke faifakalelei te pelepitelo maʼa [te tagata ʼaia] ia muʼa ʼo Sehova, pea ʼe tonu anai ke fakamolemole age kia ia.”​—Levitike 6:​1-7; vakaʼi ia Mateo 5:​23, 24.

¹⁶ Ko te lao ʼaia neʼe ko he fakatuʼutuʼu manavaʼofa mai te ʼAtua. Neʼe ʼaoga lelei kia ia ʼaē neʼe kaihaʼa tana ʼu koloā, koteʼuhi neʼe liufaki age tana ʼu meʼa pea neʼe fīmālie moʼoni ʼi tana ʼiloʼi ʼaē kua fakahā e te tagata kaihaʼa tana agahala. Tahi ʼaē meʼa, neʼe ʼaoga te lao ʼaia kia ia ʼaē neʼe ina fakahā tana agahala pea mo fakatokatoka te kovi ʼaē neʼe ina fai ʼi te hoha ʼo tona leʼo ʼo loto. ʼE mahino ia, kapau neʼe mole ina fai te faʼahi ʼaia, pea neʼe mole feala ke fakamolemole age te ʼAtua kia ia.

17. Kapau neʼe mamahi ʼihi ʼuhi ko tatatou ʼu agahala, koteā te meʼa ʼaē ʼe fakamaʼua mai e te ʼAtua ke tou fai?

¹⁷ Logope la ʼe mole fakamaʼua mai ke tou maʼuliʼi te Lao Faka Moisese, kae ʼe ina fakahā lelei mai te faʼahiga manatu ʼa Sehova, ʼo kau ai mo tana manatu ʼo ʼuhiga mo te fakamolemole ʼo te ʼu agahala. (Kolose 2:​13, 14) Kapau neʼe mamahi ʼihi ʼuhi ko tatatou ʼu agahala, pea ʼe fiafia ia Sehova mokā tou faiga ke tou ‘fakatokatoka te kovi ʼaia.’ (2 Kolonito 7:​11) Ko tona faka ʼuhiga ke tou ʼiloʼi tatatou agahala, mo fakamoʼoni kiai, pea mo faifakalelei kia ia ʼaē neʼe tou fakatupu mamahi ki ai. ʼOsi ʼaia, pea ʼe feala leva ke tou fakaōvi kia Sehova ʼaki te sakilifisio ʼa Sesu ke fakamaʼa ai totatou leʼo ʼo loto, pea mo tou ʼiloʼi papau, kua fakamolemole mai te ʼAtua kia tatou.​—Hepeleo 10:21, 22.

18. Koteā te fai fakatonutonu ʼaē ʼe feala ke fai ʼaki te fakamolemole ʼa Sehova?

¹⁸ Ohage pe ko he tāmai ʼe ʼofa ki tana ʼu fānau, ʼe fakamolemole mai ia Sehova kia tatou ʼaki he faʼahiga fai fakatonutonu. (Tāʼaga Lea 3:​11, 12) Kapau kua fakahemala he Kilisitiano pea ʼe lagi tonu anai ke ina tuku tana ʼu pilivilesio ʼi tona ʼuhiga tagata ʼāfea, peʼe tagata faifekau faka minisitelio, peʼe ko tona ʼuhiga pionie. ʼE lagi faigataʼa anai kia ia te toʼo faka temi ʼo te ʼu pilivilesio ʼaia ʼaē neʼe ina leleiʼia. Kae ko te fai fakatonutonu ʼaia, ʼe mole faka ʼuhiga leva ʼe mole leleiʼia ia ia e Sehova, pe neʼe mole fakamolemole katoa e Sehova ki ai. Tahi ʼaē meʼa, ʼe tonu ke tou manatuʼi tuʼumaʼu, ko te fakatonutonuʼi ʼo tatou e Sehova ʼe ko he fakahā ʼaia ʼo tona ʼofa kia tatou. Kapau ʼe tou tali te fai fakatonutonu ʼaia pea mo mulimuli kiai, pea ʼe fua lelei anai kia tatou pea ʼe ina taki anai tatou ki te maʼuli heʼegata.​—Hepeleo 12:​5-​11.

19, 20. (a) Kapau neʼe koutou fai he ʼu aga ʼe kovi, he koʼe ʼe mole tonu ke koutou manatu ʼe mole tāu mo koutou te manavaʼofa ʼa Sehova? (b) Koteā te meʼa ʼaē ka tou vakaʼi anai ʼi te alatike ʼaē ka hoa mai?

¹⁹ ʼE ko he meʼa fakafiafia hatatou ʼiloʼi, ʼe tou tauhi ki he ʼAtua ʼe “fakamolemole gafua”! ʼE mole sio pe ia Sehova ki tatatou ʼu agahala pea mo tatatou ʼu hala. (Pesalemo 130:​3, 4) Kae ʼe ina ʼiloʼi te ʼu meʼa ʼaē ʼe ʼi totatou loto. Kapau ʼe koutou logoʼi ʼe lavea pea mo taʼomia tokotou loto ʼuhi ko he ʼu hala neʼe koutou fai ʼi te temi muʼa, ʼaua naʼa koutou manatu ʼe mole tāu mo koutou te manavaʼofa ʼa Sehova. Logope la te ʼu hala ʼaē neʼe koutou fai, kapau neʼe koutou fakahemala moʼoni, mo fai he ʼu fakatuʼutuʼu moʼo fakatokatoka ʼo te kovi ʼaē neʼe koutou fai, pea mo faikole fakamalotoloto ke fakamolemole atu kia koutou ʼaki te sakilifisio ʼa Sesu, pea koutou tui papau ʼe hoko moʼoni anai kia koutou te ʼu palalau ʼaē ʼe tou maʼu ia 1 Soane 1:9: “Kapau ʼe tou kofesioʼi tatatou ʼu agahala, pea ʼe agatonu ia pea mo faitotonu ke ina fakamolemole tatatou ʼu agahala pea mo fakamaʼa tatou mai te heʼe faitotonu fuli pe.”

²⁰ ʼE fakaloto mālohiʼi tatou e te Tohi-Tapu ke tou faʼifaʼitakiʼi te loto fakamolemole ʼa Sehova ʼi tatatou ʼu felogoi mo ʼihi. Kae ʼe tonu ke lahi feafeaʼi tatatou fakamolemole pea mo tatatou galoʼi ʼo te ʼu agahala ʼaē ʼe fai mai e ʼihi kia tatou? ʼE tou vakaʼi anai te faʼahi ʼaia ʼi te alatike ʼaē ka hoa mai.

[Nota ʼi te lalo pasina]

ʼE Koutou Tali Feafeaʼi Anai Koa?

◻ He koʼe ʼe “fakamolemole gafua” ia Sehova?

◻ ʼE talanoa feafeaʼi te Tohi-Tapu ki te fakamolemole katoa ʼa Sehova?

◻ Ka fakamolemole e Sehova tatatou agahala, koteā te faka ʼuhiga ʼo tana ʼui ʼaē ʼe ina galoʼi?

◻ Koteā te meʼa ʼaē ʼe fakamaʼua mai e te ʼAtua ke tou fai mo kapau neʼe mamahi ʼihi ʼuhi ko tatatou ʼu agahala?

[Paki ʼo te pasina 12]

Kapau neʼe mamahi ʼihi ʼuhi ko tatatou ʼu agahala, ʼe fakamaʼua mai e te ʼAtua ke tou fakatokatoka te kovi ʼaē neʼe tou fai