ʼE Feala Hau Tauʼi ʼOu Holi ʼAe ʼe Kovi

1. Kotea ʼae ʼe tou tatau fuli ai?

NEʼE kua ke holi malohi koa ke ke fai he meʼa ʼe mole leleiʼia e Sehova? Kapau koia, ʼaua naʼa ke manatu ʼe faigataʼa age tou ia ʼahiʼahi ʼi ʼae ʼo ʼihi. ʼE ui fenei ʼi te Tohi-Tapu: “Ko te ʼu fakahala ʼae ʼe hoko kia koutou ʼe toe hoko foki ki te hahaʼi fuli.” (1 Ko. 10:13) Ko tona fakaʼuhiga kotea pe te holi kovi ʼae ʼe ke tauʼi, kae ʼe toe tauʼi pe la e ʼihi te holi ʼaia ʼe kovi. ʼE mole ko koe pe ʼae ʼe tau mo te aluʼaga ʼaia, kae ʼaki te tokoni ʼa Sehova ʼe feala pe hau malo ʼi ai.

2. Kotea te ʼu fakahala ʼe tauʼi e ʼihi Kilisitiano peʼe ko te kau ako ʼo te Tohi-Tapu? (Vakaʼi mo te ʼu pāki.)

² ʼE toe ui fenei ʼi te Tohi-Tapu: “ ʼE ʼahiʼahiʼi te tagata takitokotahi moka ina tuku tona holi totonu ke ina taki pea mo fakahalaʼi ia ia.” (Sakp. 1:​14) Koia, ʼe tahi alu pe te tagata takitokotahi mo te fakahala ʼe tau mo ia. Ohage la, ʼe feala ki ʼihi Kilisitiano ke natou fia faifafine peʼe faitagata, kae ko ʼihi ʼe natou manako ʼi he tagata peʼe ko he fafine. ʼE feala kia natou ʼae neʼe natou sioʼi tuʼumaʼu he ʼu ʼata ʼe kovi ke natou toe fia sioʼi te ʼu ʼata ʼaia. Pea tokolahi natou neʼe natou inu kava fakavale peʼe toloke ʼe tonu ke natou toe tauʼi te fahaʼi ʼaia. Koʼena la ʼihi holi ʼe kovi ʼe tauʼi e te ʼu tehina mo tuagaʼane pea mo te kau ako ʼo te Tohi-Tapu. ʼE ʼi ai te temi ʼe tou fai fuli ai te ʼu palalau ʼaeni ʼa te apositolo ko Paulo: “Moka ʼe au fia fai te meʼa ʼae ʼe lelei, ʼe ko te meʼa ʼae ʼe kovi ʼe nofo ia au.”​—Loma 7:​21.

3. Kapau ʼe tonu ke tauʼi tuʼumaʼu e he tahi he holi ʼe kovi, kotea ʼae ʼe feala ke ina logoʼi?

³ Kapau ʼe ke tauʼi tuʼumaʼu he holi ʼe kovi, ʼe lagi ke manatu anai ʼe mole ke lavaʼi, pea ʼe mole feala hau tekeʼi te fakahala. ʼE lagi ke toe manatu anai ʼe mole kei he puleʼaki ki tou aluʼaga, kua tauteaʼi koe e Sehova he ʼe ke holi ki he ʼu meʼa ʼe kovi. Kae ʼe hala ʼosi te ʼu manatu ʼaia ʼe lua. ʼE fakamahino anai ʼi te alatike ʼaeni pe kotea tona tupuʼaga, ʼaki te tali ki te ʼu fehuʼi ʼaeni ʼe lua: (1) Ko ai ʼe ina loto ke ke maʼu te ʼu manatu ʼaia? (2) ʼE feafeaʼi hau lava tauʼi tou ʼu holi kovi ʼaia?

KOTEA ʼAE ʼE LOTO E “TE AGAKOVI” KE TOU LOGOʼI?

4. (1) He koʼe ʼe loto e Satana ke tou manatu ʼe mole tou lava tauʼi anai te fakahala? (2) ʼE mole feala moʼoni koa ke tou tauʼi ʼotatou holi ʼae ʼe kovi?

⁴ ʼE loto e Satana ke tou manatu ʼe mole tou lava tauʼi anai te fakahala. ʼE tou iloʼi te fahaʼi ʼaia he neʼe fakalotomalohiʼi fenei e Sesu ʼana tisipulo ke natou faikole fenei: “ ʼAua naʼa ke tuku matou ki te fakahala, kae ke ke haofaki matou mai te Agakovi.” (Mat. 6:​13) ʼE ui e Satana ʼe mole fakalogo anai te tagata kia Sehova moka ʼe ʼi ai hona ʼu holi ʼe kovi. (Sopo 2:​4, 5) ʼE ko hana ia ʼu palalau kaka. ʼE ko ia pe ʼae neʼe ina tuku tona holi ke ina taki mo fakahalaʼi ia ia, pea neʼe mole fia nofo agatonu kia Sehova. Koia, ʼe manatu ai ʼe tou hage ko ia, ʼe tou liʼaki atu aipe anai ia Sehova moka fakahalaʼi tatou. Neʼe toe manatu pe la ʼe to anai te ʼAlo ʼo te ʼAtua ki te fakahala. (Mat. 4:​8, 9) Kae ʼe mole feala moʼoni koa ke tou tauʼi ʼotatou holi ʼae ʼe kovi? Kailoa ia. ʼE tou manatu tahi mo te apositolo ko Paulo, ʼae neʼe ina tohi fenei: “ ʼE au maʼu te malohi kia meʼa fuli ʼuhi ko ia ʼae ʼe ina foaki mai te malohi.”​—Flp. 4:​13.

5. E tou iloʼi feafeaʼi ʼe tui papau ia Sehova ʼe tou lava tauʼi ʼotatou holi ʼae ʼe kovi?

⁵ ʼE mole hage ia Sehova ko Satana. ʼE tui papau ia ʼe tou lava tauʼi ʼotatou holi ʼae ʼe kovi. ʼE tou iloʼi feafeaʼi te fahaʼi ʼaia? Neʼe fakakikite e Sehova ʼe nofo agatonu anai he toe hahaʼi kaugamalie pea mo hao anai ʼi te toe mamahi lahi. ʼE tou iloʼi ʼe mole feala ke loi ia Sehova. Neʼe ina fakaha ko te tokolahi anai ʼae ka hu ki tona malama foʼou kae mole ko he tokosiʼi pe. Pea neʼe ina toe fakaha ʼe natou maʼuhiga anai kia te ia koteʼuhi neʼe natou “fo ʼonatou teu loloa pea mo fakahihina ʼi te taʼataʼa ʼo te Akeno.” (Fkha. 7:​9, 13, 14) Koia, ʼe ha mai ai kia Sehova ʼe tou lava tauʼi ʼotatou holi ʼae ʼe kovi.

6-7. He koʼe ʼe loto e Satana ke tou manatu ʼe mole he puleʼaki ki totatou aluʼaga?

⁶ ʼE loto e Satana ke tou manatu ʼe mole tou lavaʼi he meʼa, pea ʼe mole he puleʼaki ki totatou aluʼaga. ʼE ina loto ke tou manatu ʼe tauteaʼi tatou e Sehova ʼuhi ʼae ʼe ʼi ai ʼotatou ʼu holi ʼe kovi. ʼE ko he tahi ʼu palalau kaka ʼaia ʼe ina fai. ʼE ko ia ʼae ʼe mole ʼi ai he puleʼaki ki tona aluʼaga, pea neʼe fakamauʼi e Sehova ʼe mole tuha ke ina maʼu te maʼuli heʼe gata. (Sen. 3:​15; Fkha. 20:10) Koia, ʼe ha mai ai ʼe ina loto ke tou manatu ʼe mole he ʼamanaki maʼa tatou koteʼuhi ʼe maheka kia tatou. ʼE ina iloʼi ʼe feala ke tou maʼu te maʼuli heʼe gata, ʼae neʼe fakafisi ki ai. ʼE mole hage tatou ko ia, ʼae ʼe mole hona ʼamanaki. ʼE fakapapau mai ʼi te Tohi-Tapu ʼe fia tokoni mai ia Sehova kae ʼe mole ina fia tauteaʼi tatou. ʼE ui fenei ai: “ ʼE mole loto ia ke fakaʼauha he tahi, kae ʼe loto ia ke kaku te hahaʼi fuli ki te fakahemala.”​—2 Pet. 3:9.

⁷ Kapau ʼe tou manatu ʼe mole tou lava tauʼi anai ʼotatou holi ʼae ʼe kovi peʼe mole he puleʼaki ki totatou aluʼaga, ʼe hage pe ʼe tou manatu tahi mo Satana. Kae kapau ʼe tou mahino lelei ki te fahaʼi ʼaia, pea ʼe tou fakatotonu anai ke tou fakafeagai malohi ki ai.​—1 Pet. 5:​8, 9.

KOTEA ʼE FEALA KE TOU LOGOʼI ʼUHI KO TOTATOU ʼUHIGA AGAHALA?

8. Kotea te tahi aluʼaga ʼe ina uga ai tatou ke tou maʼu he ʼu manatu ʼe mole lelei? (Pesalemo 51:5) (Vakaʼi mo “He Fakamahino.”)

⁸ ʼE mole ko Satana pe ʼae ʼe ina uga tatou ke tou maʼu he ʼu manatu ʼe mole lelei. ʼE toe kau ki ai totatou ʼuhiga agahala,a ʼae neʼe tou maʼu mai ʼatatou ʼuluaki matuʼā. Koia ʼe feala ke ina uga tatou ke tou manatu ʼe mole tou lava tauʼi ʼotatou holi ʼae ʼe kovi, pea ʼe mole he puleʼaki ki totatou aluʼaga.​—Sopo 14:4; lau ia Pesalemo 51:5.

9-10. (1) Kotea ʼae neʼe hoko kia Atama mo Eva ʼi tanā liliu ʼo agahala? (Vakaʼi mo te pāki.) (2) Kotea ʼe feala ke tou logoʼi ʼuhi ko totatou ʼuhiga agahala?

⁹ Fakakaukauʼi age muʼa te aluʼaga ʼo Atama mo Eva ʼi tanā liliu ʼo agahala. Hili tanā talagataʼa kia Sehova, neʼe nā fenonoʼi mo faiga ke nā ʼuʼufi tonā sino. ʼE ui fenei ʼi te tohi Étude perspicace des Écritures: “Neʼe nā tukugakoviʼi ia naua, mo hoha, pea mole kei nā maʼuli fimalie pea mo nā ufiufi ʼuhi ko te agahala.” Neʼe mole kei feala kia Atama mo Eva ke nā maʼu he ʼu felogoi lelei mo Sehova. Kotea pe te aluʼaga neʼe nā fai, kae ʼe nā tukugakoviʼi tuʼumaʼu pe anai ia naua, mo ufiufi pea mo hoha ʼuhi ko tonā ʼuhiga agahala.

¹⁰ ʼE moʼoni, ʼe mole tatau totatou aluʼaga mo ʼae ʼo Atama mo Eva. Neʼe mole feala ke nā maʼu te ʼu fua lelei ʼo te totogi. Kae ʼaki te totogi, ʼe fakamolemole ai ʼatatou agahala pea mo tou maʼu ai he ʼu felogoi lelei mo te ʼAtua. (1 Ko. 6:​11) Neʼe nā tuku holo mai kia tatou te agahala. Koia, ʼe mole tou punamaʼuli ai ki tatatou tukugakoviʼi pe ia tatou ʼi ʼihi temi, mo hoha, mo ufiufi pea mole tou maʼuli fimalie. ʼE ui ʼi te Tohi-Tapu ʼe hoko atu pe te puleʼi e te agahala ia te tagata, “ ʼo feia pe foki kia natou ʼae neʼe mole agahala ohage ko Atama.” (Loma 5:​14) ʼE feala pe ke tou lotovaivai ʼi tatatou mahino ki te fahaʼi ʼaia. Kae ʼe mole tonu ke tou manatu ʼe mole tou lava tauʼi anai ʼotatou holi ʼae ʼe kovi, peʼe mole he puleʼaki ki totatou aluʼaga. ʼE tonu ke tou liʼaki te ʼu manatu ʼaia ʼe mole lelei. ʼO feafeaʼi?

11. Kotea ʼe tonu ke tou fai mo kapau ʼe tou manatu ʼe mole tou lava tauʼi ʼotatou holi ʼae ʼe kovi? Pea kotea tona tupuʼaga? (Loma 6:​12)

¹¹ ʼE feala ke tou manatu ʼe mole feala ke tou tauʼi ʼotatou holi ʼae ʼe kovi. Ka hoko te fahaʼi ʼaia, pea ʼe tou ui ʼe tupu pe ko totatou ʼuhiga agahala pea ʼe mole tou fia fakalogo ki ai. Kotea tona tupuʼaga? Koteʼuhi ʼe akoʼi mai ʼi te Tohi-Tapu ke ʼaua naʼa tou tuku ke haga ‘pule te agahala ia tatou ohage ko he hau.’ (Lau ia Loma 6:​12.) Ko tona fakaʼuhiga ʼe feala ke tou filifili ke mole tou fakahoko ʼotatou holi ʼae ʼe kovi. (Kal. 5:​16) ʼE tui papau ia Sehova ʼe tou lava tekeʼi anai te fakahala, ko tona fakaʼuhiga ʼe mole ina kole mai anai ke tou fakahoko te fahaʼi ʼaia. (Tet. 30:​11-​14; Loma 6:6; 1 Tes. 4:3) Koia, ʼe feala ke tou tauʼi ʼotatou holi ʼae ʼe kovi.

12. Kotea ʼe tonu ke tou fai mo kapau ʼe tou manatu ʼe mole kei he puleʼaki ki totatou aluʼaga? Pea kotea tona tupuʼaga?

¹² ʼO toe feia pe, ʼe tou manatu ʼe mole kei he puleʼaki ki totatou aluʼaga, ʼe hage pe ʼe tauteaʼi tatou e Sehova he ʼe tou maʼu he ʼu holi ʼe kovi. Kapau ʼe tou manatu feia, pea ʼe lelei ke tou ui ʼe ko totatou ʼuhiga agahala ʼae ʼe tou feia ai, pea ʼaua naʼa tou fakalogo ki ai. Kotea tona tupuʼaga? Koteʼuhi ʼe akoʼi mai ʼi te Tohi-Tapu ʼe iloʼi lelei e Sehova neʼe tou tutupu agahala. (Pes. 103:​13, 14) Koia, ʼe ina “iloʼi ia meʼa fuli” ʼo ʼuhiga mo tatou, kae ʼe ina iloʼi tafito ʼe tupu la tatatou fai he ʼu aga ʼe kovi ʼuhi pe ko totatou ʼuhiga agahala. (1 Soa. 3:​19, 20) Kapau ʼe tou tauʼi ʼotatou holi ʼae ʼe kovi ʼo mole tou fakahoko, ʼe tou maʼa anai kia mata ʼo Sehova. He koʼe ʼe feala ke tou tui papau ki te fahaʼi ʼaia?

13-14. Ka tou maʼu he ʼu holi ʼe kovi, ko tona fakaʼuhiga koa ʼe mole kei tou maʼu te ʼofa ʼo Sehova? Fakamahino.

¹³ ʼI te Tohi-Tapu, ʼe fakakehekeheʼi ai te fai ʼo te meʼa ʼae ʼe kovi, (ʼae ʼe feala ke tou lolomi peʼe puleʼi) mo te holi ki te meʼa ʼae ʼe kovi, (ʼae ʼe feala ke hoʼi tupu feia pe). Ohage la, ʼi te ʼuluaki sekulo, neʼe ʼi ai ʼihi ʼi te kokelekasio ʼo Kolonito neʼe faitagata peʼe faifafine. Neʼe faitohi fenei ia Paulo ki te kokelekasio ʼaia: “Neʼe feia ʼihi ia koutou.” Ko tona fakaʼuhiga koa ʼi tanatou kua iloʼi te moʼoni, neʼe mole kei fia faitagata peʼe faifafine ia te kau Kilisitiano ʼaia? Kailoa ia, he ʼe faigataʼa te taʼaki ʼo he ʼu holi kovi feia. Kae neʼe natou lotololomi ʼo mole natou fakahoko ʼonatou holi ʼaia. Koia, neʼe natou maʼu ai te ʼofa ʼo Sehova. Neʼe hage kia Sehova ‘neʼe fakamaʼa natou.’ (1 Ko. 6:​9-​11) Pea ʼe toe feia pe tana manatu ʼo ʼuhiga mo koe.

¹⁴ Tatau aipe pe kotea te ʼu holi kovi ʼe ke tauʼi, kae ʼe feala pe hau haga ʼo tauʼi. Logo la ʼe mole feala hau pulihi ʼosi, kae ʼe feala hau lolomi pea ʼaua naʼa ke “fai te ʼu meʼa ʼae ʼe holi ki ai te kakano pea mo [ʼau] manatu.” (Efe. 2:3) ʼE feafeaʼi hau fakahoko te fahaʼi ʼaia ʼo ke lava tauʼi ʼou holi ʼae ʼe kovi?

KOTEA ʼE TONU KE KE FAI KE KE LAVA TEKEʼI TE FAKAHALA?

15. Kapau ʼe tou fia lava tauʼi ʼotatou holi ʼae ʼe kovi, he koʼe ʼe tonu ke tou iloʼi ʼe ʼi ai ʼotatou vaivaiʼaga?

¹⁵ Kapau ʼe ke fia lava tauʼi ʼou holi ʼae ʼe kovi, pea ʼe tonu ke ke iloʼi ʼe ʼi ai ʼou vaivaiʼaga. Tokaga naʼa ke kakai pe ia koe totonu ʼaki “ni manatu hala.” (Sakp. 1:​22) Ohage la, ʼe feala pe ke ke ui fenei: ‘ ʼE kovi age te inu kava ia ʼa ʼihi ia au?’ Peʼe ke tuku leva te hala ki he tahi ʼo ke ui fenei: ‘Ka na neʼe fakaha lahi mai la e toku ʼohoana ia tona ʼofa kia au, neʼe mole au sioʼi au he ʼu ʼata kovi?’ Kapau ʼe ke meʼa noaʼi feia tou ʼu vaivaiʼaga, pea ʼe ke to gafua anai ki te fakahala. ʼAua naʼa ke faiga ke ke maʼu takuʼaki ki te fai ʼo tau aga ʼae ʼe kovi. ʼE tonu ke ke utu te meʼa ʼae neʼe ke to.​—Kal. 6:7.

16. Kotea ʼe feala ke ke fai ke malohi age tau fakatotonu ʼae ke mole ke to ki te fakahala?

¹⁶ ʼE lelei tau iloʼi ʼae ʼe ʼi ai tou ʼu vaivaiʼaga. Kae ʼe tonu foki ke toe malohi age tau fakatotonu ʼae ke ʼaua naʼa ke to ki te fakahala. (1 Ko. 9:​26, 27; 1 Tes. 4:4; 1 Pet. 1:​15, 16) Ke ke fai te fehuʼi ʼaeni: He koʼe ʼe au to gafua ki te vaivaiʼaga ʼaia pea ko te temi fea ʼae ʼe hoko ai? ʼE lagi faigataʼa kia koe hau tekeʼi he fakahala, pea mo he fakahalaʼi ʼo koe ʼi he temi ʼo te ʼaho katoa. Ohage la, ʼe ke to gafua koa ki te fakahala ʼaia moka ke gaʼegaʼe peʼe kua maʼupo? Fakakaukauʼi fakatomuʼa te aluʼaga ka hoko pea mo kumi he puleʼaki ki te meʼa ʼae ʼe ke fai anai moka fakahalaʼi koe. Koia, ʼe lelei te fai ʼo te fahaʼi ʼaia ʼi muʼa ʼo te hoko mai ʼo te aluʼaga ʼaia.​—Taag. 22:3.

17. Kotea ʼe tou ako mai te faʼifaʼitaki ʼo Sosefo? (Senesi 39:​7-9) (Vakaʼi mo te ʼu pāki.)

¹⁷ Ke ke manatuʼi pe kotea ʼae neʼe fai e Sosefo ʼi tona fakahalaʼi e te ʼohoana ʼo Potifale. Neʼe fakafisi malohi atu aipe ki ʼana fakahala. (Lau ia Senesi 39:​7-9.) Kotea ʼe tou ako mai ai? Neʼe mahino kia Sosefo neʼe kovi te toʼo ʼo te ʼohoana ʼo he tahi tagata. Pea neʼe ina fakakaukauʼi te fahaʼi ʼaia ʼi muʼa ʼo tona fakahalaʼi e te ʼohoana ʼo Potifale. ʼE feala mo koe ke toe malohi age tau fakatotonu ʼae ke ke fai te meʼa ʼae ʼe lelei ʼi muʼa ʼo hou fakahalaʼi. Koia, ka fakahalaʼi koe, ʼe faigafua anai kia koe tau iloʼi te meʼa ʼae ʼe tonu ke ke fai, he neʼe kua ke fakakaukau fakatomuʼa ki ai.

“HAGA VAKAVAKAʼI” IA KOE TOTONU

18. Kotea ʼe feala ke ke fai moʼo tauʼi ʼou holi ʼae ʼe kovi? (2 Kolonito 13:5)

¹⁸ Kapau ʼe ke fia lava tauʼi ʼou holi ʼae ʼe kovi, ke ke “haga vakavakaʼi” ia koe totonu. Ko tona fakaʼuhiga ke ke feuiʼaki tuʼumaʼu pe ʼe lelei koa te aga ʼae ʼe kita fai. (Lau ia 2 Kolonito 13:5.) ʼI ʼihi temi, ʼe tonu ke ke vakavakaʼi ʼau manatu mo ʼau aga, pea mo ke fai he ʼu fetogi. Ohage la, ke ke fai kia koe te fehuʼi ʼaeni, tatau aipe pe neʼe ke lava tauʼi he fakahala: ‘Neʼe au foimo fakafisi atu aipe koa peʼe kailoa?’ Kapau ʼe ke tokagaʼi neʼe tuai tau fakafisi, ʼaua naʼa ke tukugakoviʼi koe peʼe ke ita. Kae ke ke fakakaukauʼi pe kotea ʼe feala ke ke fai moʼo puipui koe mai ai. Ohage la, ke ke fai te ʼu fehuʼi ʼaeni: ‘ ʼE feala koa haku foimo liʼaki he ʼu manatu ʼe kovi moka hake ia kita? ʼE faigataʼa koa kia au haku tekeʼi he fakahala ʼuhi ko ʼaku fakafiafia? ʼE au foimo sio kehe koa moka ʼasi mai ia he pāki heʼe ʼaoga? ʼE au mahino koa ʼe fua lelei tuʼumaʼu pe kia au te ʼu lekula ʼa Sehova, tatau aipe pe ʼe tonu ke au lotololomi?’​—Pes. 101:3.

19. He koʼe faigataʼa anai hatatou tauʼi ʼotatou holi ʼae ʼe kovi?

¹⁹ Ke ke tokaga naʼa ke toe kumi takuʼaki. ʼE ui fenei ʼi te Tohi-Tapu: “ ʼE kaka te loto ʼo laka age ia meʼa fuli.” (Sel. 17:9) Pea neʼe fakaha lelei e Sesu pe ko ai ʼae ʼe ina fakatupu “te ʼu fakakaukau kovi.” (Mat. 15:19) Ohage la, neʼe sioʼi e he tahi he ʼu ʼata kovi pea kua ina tuku leva. Pea ʼaki leva te temi, ʼe feala pe ke manatu ʼe mole kei ʼi ai he meʼa ʼe kovi ʼi tana sioʼi he ʼu pāki ʼe ʼasi ai ni hahaʼi ʼe mole telefua kae ʼe feala pe ke hake ai he ʼu fakakaukau ʼe kovi. Peʼe feala pe ke ina ui fenei: ‘ ʼE mole he meʼa ia ʼe kovi moka kita fakakaukauʼi he ʼu aga heʼe ʼaoga, kehe pe ke mole au fakahoko te ʼu aga ʼaia.’ ʼE ha mai ʼi heni ʼe kaka tona loto, pea ʼe ina lolotoga “fai he ʼu fakatuʼutuʼu ʼo ʼuhiga mo te ʼu holi ʼo te kakano.” (Loma 13:14) Kotea ʼae ʼe feala ke ke fai ke mole hoko te fahaʼi ʼaia? ʼAua naʼa ke meʼa noaʼi te aluʼaga ʼo ke kumi takuʼaki. Kapau ʼe ke meʼa noaʼi, pea ʼe ke toʼo ai he ʼu tonu ʼe mole fakapotopoto ʼo ke to ai ki te fakahala.b Koia ke ke liʼaki “te ʼu fakakaukau kovi” fuli pe, ʼe tupu ai hau fai he aga ʼe kovi.

20. Kotea ʼae ʼe tou fakaʼamu lahi ki ai? Pea ʼi tatatou fakatalitali ki te temi ʼaia, kotea ʼae ʼe tou tui papau ki ai?

²⁰ Neʼe tou vakaʼi ʼe feala ke tou tekeʼi te fakahala ʼaki te tokoni ʼa Sehova. Pea tahi, ʼe manavaʼofa ia Sehova, koia ʼe tou maʼu te ʼamanaki ʼae ke tou maʼuʼuli ʼo heʼe gata ʼi tona malama foʼou. ʼE ko he meʼa fakalotofimalie he ʼe tou tauhi anai kia te ia ʼaki he loto mo he fakakaukau ʼe maʼa. ʼE tou fakatalitali fuli ki te temi ʼaia, koia ʼe tou tui papau ʼe tou lava tauʼi anai ʼotatou holi ʼae ʼe kovi, pea ʼe ʼi ai pe te puleʼaki ki totatou aluʼaga. ʼE tapuakiʼi e Sehova ʼatatou faiga, pea ʼe tou lava tauʼi anai ʼotatou holi ʼae ʼe kovi.