Fakaʼaogaʼi Te ʼu Vaega ʼi Te Lotomalie ʼo Te ʼu Pasina

ʼE tou maʼu ʼi te Tohi-Tapu Fakaliliu ʼo Te Malama Foʼou he ʼu vaega ʼi te lotomalie ʼo te ʼu pasina. ʼE ha ai te alu tahi ʼo te ʼu koga kehekehe ʼo te Tohi-Tapu pea mo ʼihi atu vaega ʼe maʼu ai he tahi ʼu manatu. Kapau ʼe ke fia maʼu he ʼu vaega ʼi te lotomalie ʼo te ʼu pasina, ke ke kumi muʼa he kiʼi mataʼi tohi ʼe tuʼu ovi ki he kupu. ʼI te ʼu Tohi-Tapu ʼae neʼe ta, ke ke kumi te mataʼi tohi ʼaia ʼi te lotomalie ʼo te ʼu pasina, peʼe ʼi te ʼu tafaʼaki ke ke maʼu ai te ʼu vaega ʼae ʼe alu tahi mo te vaega. Ka ke alu ki te Tohi-Tapu ʼi te jw.org peʼe ko te JW Library®, lomiʼi ki te kiʼi mataʼi tohi ke fakaʼasi atu ai te ʼu vaega ʼae ʼe pipiki ki ai.

ʼE feala ki te ʼu vaega ʼi te lotomalie ʼo te ʼu pasina ke ke maʼu ai te ʼu aluʼaga ʼaeni:

Hisitolia ʼe tatau: ʼE feala ki te vaega ʼaia ke ina ʼave koe ki he tahi vaega ʼe tuʼu ʼi he tahi age tohi ʼo te Tohi-Tapu. Kae ʼe talanoa pe ki te hisitolia ʼaia. Ohage la, vakaʼi ia 2 Samuele 24:1 mo 1 Koloniko 21:1.

Te ʼu palalau ʼi he vaega : ʼE fakaha ai te vaega ʼae neʼe ʼuluaki tuʼu ai he falasisi peʼe ko he ʼu kupuʼi palalau. Ohage la, vakaʼi ia Mateo 4:4 mo Tetelonome 8:3.

He lea fakapolofeta neʼe hoko moʼoni: ʼE fakaha e te vaega te lea fakapolofeta mo tona fakahoko ʼi te tahi vaega. Ohage la, vakaʼi ia Mateo 21:5 mo Sakalia 9:9.