1925​—Kua Hili Nei Ki Ai Taʼu ʼe Teau

NEʼE TONU KE HAGA TALITALI TE HAHAʼI ʼA TE ʼATUA

ʼI te 1925, tokolahi te Kau Ako ʼo Te Tohi-Tapu neʼe natou fakaʼamu ke toe fakatuʼu te Palatiso. Kotea tona tupuʼaga? Neʼe ui fenei e te tehina ko Albert Schroeder, ʼae ki muli age neʼe kau ki te Kolesi Pule: “Neʼe matou manatu ʼe olo anai te toe ʼo te kau fakanofo ki selo ʼi te 1925. Pea ʼe fakatuʼuake anai te kau agatonu ohage la ko Apalahamo, mo Tavite pea mo ʼihi atu. ʼE natou liliu anai ko he ʼu tama ʼaliki ʼi te kele moka pule te Puleʼaga ʼo te ʼAtua.” ʼI tona mole hoko ʼi te taʼu ʼaia, neʼe lotomamahi ʼihi tehina mo tuagaʼane.​—Taag. 13:12.

Logo la tanatou lotomamahi ʼaia, kae tokolahi te Kau Ako ʼo Te Tohi-Tapu, neʼe hoko atu pe tanatou faifakamafola. Neʼe natou mahino ki te maʼuhiga ʼaupito ʼae ʼo tanatou faifakamafola, pea mo tanatou palalau ʼo ʼuhiga mo Sehova. Ohage la, tou vakaʼi te gaue ʼae neʼe natou fakahoko moʼo fakamafola ai te moʼoni ki te tokolahi.

NEʼE NATOU FAKATUʼU ʼIHI FALE LATIO

ʼI te 1924, tokolahi neʼe natou fakalogo te latio WBBR. Koia, ʼi te 1925, neʼe fakatuʼu leva e te Kau Ako ʼo Te Tohi-Tapu te tahi fale latio ʼe lelei age, ʼi te temi ʼaia neʼe ovi ki Chicago, ʼi Illinois. Ko te higoa ʼo te fale latio ʼaia neʼe ko WORD. Ko Ralph Leffler, ʼae neʼe tokaga mo gaue ki te fakatuʼu ʼo te fale latio. ʼE ina manatuʼi: “Tokolahi neʼe natou fakalogo ki te latio WORD mai mamaʼo, ʼi te ʼu po ʼo te temi momoko.” Ohage la, neʼe fakalogo e he kiʼi famili te ʼu ʼuluaki emisio ʼo te latio ʼaia. Neʼe natou maʼuʼuli ia kilometa ʼe 5 000 tupu mai ʼi ai, ʼi Pilot Station, ʼi Alaska. Hili tanatou fakalogo ki ai, neʼe natou faitohi kia natou ʼae neʼe gaue ʼi te fale latio ʼaia, ʼo fakamalo age ki tanatou fai he polokalama fakalaumalie ʼe fakalotomalohi.

Neʼe ui fenei ʼi Te Tule Leʼo ʼaho 1 ʼo Tesepeli 1925: “Neʼe kau te latio WORD ki te ʼu fale latio ʼo Amelika ʼae neʼe malohi ʼaupito, he neʼe kaku tona fakalogo ki te ʼu potu ʼae ʼe tuʼu mamaʼo. Neʼe feala ke logo ki ai te hahaʼi mai te ʼu potu Esite mo Uesite ʼo Amelika, mo Cuba mo te potu taupotu ʼo te noleto ʼo Alaska. Tokolahi neʼe heʼeki natou logo ki te moʼoni ʼi muʼa atu, kae neʼe natou fia iloʼi leva te moʼoni ʼi tanatou fakalogo te latio ʼaia.”

ʼI te temi ʼaia, neʼe toe faiga malohi te Kau Ako ʼo Te Tohi-Tapu ke natou fakaʼaogaʼi te latio ʼaia ke fakamafola te logo lelei ʼi Kanata. ʼI te 1924, neʼe toe fakatuʼu te fale latio CHUC ʼi Saskatoon, ʼi Saskatchewan. Neʼe kau te fale latio ʼaia ʼi te ʼu ʼuluaki fale latio lotu ʼo Kanata. ʼI te 1925, neʼe tonu ke natou kumi he tahi koga meʼa ʼe lahi maʼa te fale latio ʼaia. Koia, neʼe tonu ai ke hiki e te kautahi ʼanatou fale latio ki te fale lahi Regent Building, ʼi Saskatoon. Neʼe ko he fale ʼafea neʼe fai ai he ʼu gaoʼi mo he ʼu maholo, pea neʼe toʼo e te kautahi ʼo toe fakafoʼou.

ʼAki te fale latio ʼaia, neʼe feala ai ki te tokolahi neʼe maʼuʼuli ʼi te ʼu kiʼi kolo mo te ʼu koga meʼa ʼae neʼe tuʼu mamaʼo ke natou iloʼi te logo lelei. Pea neʼe ko tanatou hoki logo ʼaia ki te logo lelei. Ohage la, neʼe faitohi te fafine ʼaeni ko Graham ʼo kole hana ʼu tohi hili pe tana ʼosi fakalogo he emisio ʼi te latio ʼaia. Neʼe nofo te fafine ʼaia ʼi he kolo ʼe tuʼu mamaʼo. Neʼe ui e te tehina ko George Naish “neʼe hage pe neʼe ina kole mamahi mai ke foimo ʼavage hana ʼu tohi. Koia neʼe matou momoli te ʼu koga fuli ʼo te tohi Études des Écritures.” Neʼe fakamafola atu aipe e te fafine ʼaia ko Graham te logo ʼo te Puleʼaga ke kaku ki te ʼu potu taupotu.

HE ʼU FAKAMAHINO FOʼOU

ʼI Te Tule Leʼo ʼo te ʼaho 1 ʼo Malesio 1925, neʼe maʼu ai te alatike maʼuhiga ʼaeni “La naissance de la nation.” He koʼe neʼe maʼuhiga te alatike ʼaia? Neʼe iloʼi e te Kau Ako ʼo Te Tohi-Tapu ʼe puleʼi e Satana te kau temonio ʼo feia mo te ʼu lotu hala, mo te ʼu puleʼaga fakatagata, mo te aluʼaga fakaekonomika mo fakakoloa ʼae ʼi te kele. ʼEi, ʼe puleʼi natou e Satana. Kae ʼaki te alatike ʼaia, neʼe tokoni “te tagata kaugana agatonu mo poto” ki te ʼu tehina mo tuagaʼane ke natou mahino ʼe logo tahi te ʼu kaugana ʼa Sehova ʼi te kele mo te lagi. ʼE natou fakamamaʼo mai te malama ʼa Satana, pea ʼe natou gaue fakatahi ʼo lagolago kia Sehova pea mo fakafeagai kia Satana mo natou ʼae ʼe muli ia ia. (Mat. 24:45) Pea tahi, neʼe fakamahino e te tagata kaugana neʼe fakatuʼu te Puleʼaga ʼo te ʼAtua ʼi te taʼu 1914. Pea ʼi te taʼu ʼaia, hili ‘te tau ʼae neʼe hoko ʼi selo’, neʼe kapu ifo ia Satana mo ʼana temonio mai te lagi, pea neʼe natou nonofo ai ʼi te kele.​—Fkha. 12:​7-9.

Neʼe faigataʼa ki ʼihi tanatou tali te fakamahino foʼou ʼaia. Koia neʼe ui fenei ai ʼi te alatike: “ ʼE matou fakalotomalohiʼi ia natou ʼae ʼe natou lau Te Tule Leʼo, kapau ʼe mole natou manatu tahi mo te fakamahino foʼou ʼaia, ʼe tonu ke natou faʼa kataki mo falala kia Sehova, ʼo hoko atu pe tanatou tauhi agatonu kia te ia.”

Ko Tom Eyre neʼe faifakamafola temi katoa, (ʼi te temi nei kua ui pionie) pea neʼe maʼuli ʼi Pilitania. Neʼe ina fakamatala fenei te manatu ʼa te tokolahi ʼa te Kau Ako ʼo Te Tohi-Tapu ʼo ʼuhiga mo te alatike ʼaia: “Neʼe fiafia ʼaupito te ʼu tehina ʼi tanatou logo ki te fakamahino ʼaia ʼo Fakaha 12. ʼI tamatou mahino ʼae kua fakatuʼu te Puleʼaga ʼi selo, neʼe matou fiafia ʼi te vaevae mo ʼihi te logo lelei ʼaia. Neʼe tokoni lahi mai ai ke lahi age tamatou faifakamafola, pea mo sisio ki te fakahoko anai e Sehova he ʼu gaue taulekaleka ʼi te ka haʼu.”

ʼE TONU KE NATOU FAIFAKAMAFOLA

Ia ʼaho nei, ʼe iloʼi lelei e te kau Fakamoʼoni ʼa Sehova te ʼu palalau ʼaeni ia Esaia 43:10: “ ʼE ui e Sehova: ‘Ko koutou ko ʼaku fakamoʼoni, ʼei, taku kaugana ʼae neʼe au filifili.’ ” Kae, ʼi muʼa ʼo te taʼu 1925, neʼe tahitahiga te tuʼu ʼo te vaega ʼaia ʼi ʼatatou tohi. Kae neʼe fetogi leva. ʼI te taʼu 1925, neʼe talanoa leva ʼi Te Tule Leʼo ki te manatu ʼaia ʼo ʼuhiga mo Esaia 43:10 mo te 12 ia alatike ʼe 11.

ʼI te fakaʼosi ʼo ʼAukusito 1925, neʼe fakatahitahi te Kau Ako ʼo Te Tohi-Tapu ʼi he fakatahi lahi ʼi Indianapolis, ʼi Indiana. Neʼe tohi e te tehina ko Joseph F. Rutherford he ʼu palalau moʼo fakatalitali ia natou ʼae ʼe ʼomai ki te fakatahi lahi. Neʼe tohi te ʼu palalau ʼaia ʼi te polokalama ʼo te fakatahi. Neʼe ina ui fenei ai: “Neʼe tou ʼomai ki te fakatahi lahi ʼaeni ke tou maʼu . . . te malohi mai te ʼAliki, ke toe malohi age tatatou faʼafai moka tou toe olo ʼo faifakamafola, he ʼe ko tatou ko ʼana fakamoʼoni.” ʼI te fakatahi lahi ʼaho valu ʼaia, neʼe fakalotomalohiʼi ai te nofoʼaki ke natou toʼo ia faigamalie fuli ke natou palalau ai kia Sehova.

ʼI te Moeaki ʼaho 29 ʼo ʼAukusito, neʼe talanoa ai te tehina ko Rutherford ki te kupu tafito ʼaeni: “Un appel à l’action.” ʼI tana akonaki ʼaia, neʼe ina fakamaʼuhigaʼi ai te gaue faifakamafola. Neʼe ina ui fenei: “ ʼE ui e Sehova ki tana hahaʼi . . . : ‘Ko koutou ko ʼaku fakamoʼoni . . . pea ko au ko te ʼAtua.’ Pea neʼe ina fai age te fakatotonu malohi ʼaeni: ‘Kotou fakatuʼu he fakailoga ki te hahaʼi.’ ʼE mole he tahi ʼi te kele ʼe feala ke palalau ʼo ʼuhiga mo Sehova gata tahi pe ki [tana hahaʼi], ʼae ʼe tokoni ki ai ʼaki tona laumalie, he ʼe ko natou ko ʼana fakamoʼoni.”​—Esa. 43:12; 62:10.

Hili te akonaki ʼa te tehina ko Rutherford, neʼe ina lau he tohi ko tona kupu tafito “Message of Hope.” Neʼe manatu tahi te nofoʼaki fuli mo te logo ʼaia, ʼae neʼe ui ai ko te Puleʼaga pe ʼo te ʼAtua ʼe feala ke ina foaki “te ʼu tapuakina ʼo te tokalelei, mo te maʼuli fimalie, mo te maʼuli malolo, mo te maʼuli, mo te ʼateaina pea mo te fiafia heʼe gata.” Pea neʼe fakaliliu mo ta te tohi ʼaia ia lea kehekehe ke fakaʼaogaʼi ki te minisitelio. Neʼe tufa teitei tohi ʼe 40 miliona.

Neʼe mole fetogi e te Kau Ako ʼo Te Tohi-Tapu tonatou higoa ʼaki te higoa Fakamoʼoni ʼa Sehova lolotoga ni taʼu. Kae neʼe natou mahino ki te maʼuhiga ʼae ke natou palalau ʼo ʼuhiga mo Sehova pea mo fakafofoga ia ia.

NEʼE NATOU TOE LILIU ʼO ʼAʼAHI IA NATOU ʼAE ʼE FIA LOGO

Neʼe tuputupu te kaugamalie ʼo te Kau Ako ʼo Te Tohi-Tapu ʼi te malamanei. Koia neʼe fakalotomalohiʼi ai e te kautahi ke mole natou tufa pe te ʼu tohi, kae ke natou toe liliu ʼo ʼaʼahi ia natou ʼae neʼe fia logo ki te logo lelei. Hili te tufa ʼo te pepa lotu Message of Hope, neʼe ui fenei ʼi te Bulletina: “Kotou toe liliu ʼo ʼaʼahi ia te ʼu hahaʼi ʼae neʼe kotou tuku age te pepa lotu Message of Hope.”

ʼI te Bulletin ʼo Sanualio 1925, neʼe fakamatala ai he aluʼaga ʼo he tehina ʼe kau ʼi te Kau Ako ʼo Te Tohi-Tapu ʼi Plano, ʼi Texas. Neʼe ui ai: “ ʼE matou punamaʼuli he neʼe matou tokagaʼi, ka matou toe liliu ki he ʼu koga meʼa neʼe kua tuʼa lahi tona gaueʼi, ʼe lahi te ʼu fua lelei ʼe matou maʼu ʼi hamatou faifakamafola ʼi he ʼu telituale neʼe heʼeki gaueʼi. Neʼe tuʼa nima tamatou faifakamafola ʼi he kiʼi kolo ʼo tamatou telituale ʼi te ʼu taʼu ʼe hogofulu ʼaeni kua ʼosi. . . . Mole faʼa fualoa ki ai, neʼe toe faifakamafola ai ia te tuagaʼane ko Hendrix mo taku faʼe, pea neʼe lahi te ʼu tohi neʼe nā tufa kae neʼe mole feia ʼi muʼa atu.”

Pea ʼi te tahi fenua ko Panama, neʼe tohi fenei e he tehina neʼe faifakamafola temi katoa: “Neʼe tokolahi natou neʼe natou kapu au ʼi ʼonatou ʼapi, kae neʼe natou fetogi tanatou aga, moka ʼe au toe liliu kia natou, ko tona tuʼa lua peʼe tuʼa tolu ʼaia. ʼI te taʼu ʼaeni kua hili, neʼe lahi pe toku temi ʼae neʼe au toe liliu ai kia natou ʼae neʼe au ʼaʼahi ʼi muʼa atu. Pea neʼe lahi te ʼu fua lelei neʼe au maʼu mai ʼi ʼihi ia natou ʼaia.”

NEʼE NATOU SISIO FAKAMAMAʼU KI TE KA HAʼU

ʼI te ʼosi ʼo te taʼu 1925, neʼe faitohi te tehina ko Rutherford kia natou fuli ʼae neʼe faifakamafola temi katoa. Neʼe ina fakaha ai te ʼu gaue neʼe fai ʼi te taʼu ʼaia pea mo ʼae ʼi te ka haʼu. Neʼe ina ui fenei: “ ʼI te taʼu ʼaeni, neʼe kotou maʼu te pilivilesio ʼae ke kotou fakalotofimalieʼi te tokolahi neʼe lotomamahi. Pea neʼe kotou fiafia lahi ai. . . . ʼI te taʼu ʼaeni ka haʼu, ʼe lahi anai te ʼu faigamalie ʼe kotou maʼu ke kotou palalau ai ki te ʼAtua mo tona Puleʼaga, pea mo fakamoʼoni ko koutou ko tana hahaʼi. . . . Koia, tou hoko atu tatatou fakaʼaogaʼi ʼotatou leʼo moʼo vikiʼi totatou ʼAtua pea mo Hau.”

ʼI te fakaʼosi ʼo te taʼu 1925, neʼe fakatuʼutuʼu e te ʼu tehina ke fakalahi te Petele ʼo Brooklyn. ʼI te 1926, neʼe ko he taʼu maʼuhiga he neʼe natou kamata ai he toe gaue laga fale neʼe heʼeki fai e te kautahi.