ALATIKE AKO 43
KATIKO 41 Ke Ke Fagono Ki Siʼaku Kole
Ke Ke Manatuʼi ʼo Hufakiʼi ʼIhi
“Kotou fefaikoleʼaki . . . Ko te kole mamahi ʼa he tagata faitotonu ʼe malohi.”—SAKP. 5:16.
TE MANATU TAFITO
ʼE tou vakaʼi anai pe koʼe ʼe maʼuhiga ke tou hufakiʼi ʼihi, pea mo he ʼu manatu ʼe tokoni mai ke tou fakahoko te fahaʼi ʼaia.
1. ʼE tou iloʼi feafeaʼi ʼe maʼuhiga ʼatatou faikole kia Sehova?
KO TE faikole, ʼe ko he meʼa ʼofa taulekaleka. Fakakaukauʼi age muʼa te aluʼaga ʼaeni: Neʼe tuku e Sehova ʼihi gaue ke fai e te kau ʼaselo. (Pes. 91:11) Neʼe ina toe tuku ki tona ʼAlo he ʼu gaue ʼe maʼuhiga ʼaupito ke ina fakahoko. (Mat. 28:18) Kae, neʼe ina tuku koa ki he tahi ke fagono ki ʼatatou kole? Kailoa ia, ʼe ko he aluʼaga ia neʼe ina fia tuku pe maʼa ia tokotahi. ʼE fagono ki te ʼu kole ʼa tatou takitokotahi, he ʼe ‘ko ia ʼae ʼe fagono ki te faikole.’—Pes. 65:2.
2. Kotea te faʼifaʼitaki lelei neʼe ina tuku mai e Paulo ʼo ʼuhiga mo tana hufakiʼi ʼihi?
2 Logo la ʼe feala ke tou palalau faʼifaʼitaliha kia Sehova ʼo ʼuhiga mo ʼatatou tuʼania, kae ʼe tonu foki ke tou toe hufakiʼi mo ʼihi. Ko te aluʼaga ʼaia neʼe fai e te apositolo ko Paulo. Ohage la, neʼe faitohi fenei ki te kokelekasio ʼo Efeso: “ ʼE hoko atu pe taku hufakiʼi koutou.” (Efe. 1:16) Neʼe toe hufakiʼi e Paulo ʼihi. Ohage la, neʼe ina ui fenei kia Timoteo: “ ʼE au fakafetaʼi ki te ʼAtua, . . . pea mo au manatuʼi tuʼumaʼu pe ia koe ʼi ʼaku kolekole ʼi te ʼaho mo te po.” (2 Tim. 1:3) Neʼe ʼi ai pe la te ʼu fihifihia ʼo Paulo neʼe faikole ki ai. (2 Ko. 11:23; 12:7, 8) Kae, neʼe ina toʼo he temi ke ina hufakiʼi ai ʼihi.
3. He koʼe ʼe feala ke tou galoʼi te hufakiʼi ʼo ʼihi?
3 ʼI ʼihi temi, ʼe feala ke tou galoʼi te hufakiʼi ʼo ʼihi. Kotea tona tupuʼaga? ʼE fakaha e te tuagaʼane ko Sabrinaa he tupuʼaga ʼo tatatou galoʼi te faʼahi ʼaia. ʼE ina ui fenei: “Ko te maʼuli ʼi te malama ʼaeni ʼe mole faigafua, he ʼe tou maʼumaʼua ʼaupito. ʼE lahi ʼaupito te ʼu fihifihia kua tou haga tafito pe tatou ki ai, ʼo tou faikole pe maʼa tatou totonu.” ʼE tau hoko koa te aluʼaga ʼaia kia koe? Kapau koia, ʼe fakamahino anai ʼi te alatike ʼaeni pe koʼe ʼe maʼuhiga ke ke hufakiʼi ʼihi, pea ʼe ke maʼu ai he ʼu tokoni pe ʼe feafeaʼi hau fakahoko te faʼahi ʼaia.
HE KOʼE ʼE TOU HUFAKIʼI ʼIHI?
4-5. He koʼe “ ʼe malohi” ʼatatou faikole moka tou hufakiʼi ʼihi? (Sakopo 5:16)
4 “ ʼE malohi” ʼatatou faikole moka tou hufakiʼi ʼihi. (Lau ia Sakopo 5:16.) Ka tou hufakiʼi ʼihi, ʼe feala koa ke tokoni moʼoni ki te fetogi ʼo tonatou aluʼaga? ʼEi. Neʼe iloʼi e Sesu ʼe fakafisi anai ia te apositolo ko Petelo ki ai, koia neʼe ina ui fenei: “Neʼe au hufakiʼi koe, ke ʼaua naʼa vaivai tau tui.” (Luka 22:32) Neʼe toe iloʼi e Paulo ko te faikole, ʼe feala ke tokoni ki te fetogi ʼo he aluʼaga ʼo he tahi. ʼI tona pilisoniʼi ʼi Loma, neʼe ina tohi fenei kia Filemone: “ ʼE au fakaʼamu ʼe fakaʼateainaʼi anai au ʼuhi ko ʼakotou faikole pea ʼe feala ai leva ke au alu atu.” (Flm. 22) Pea ko te aluʼaga ʼaia neʼe hoko. Neʼe fakaʼateainaʼi atu aipe ia Paulo, pea mo toe toʼo tana faifakamafola.
5 Kae, ʼe mole fakaʼuhiga leva ke tou fakakinauʼi ia Sehova ke ina fakahoko tuʼumaʼu te meʼa ʼae ʼe tou kole age. ʼE mahino ia, ʼe tokagaʼi moʼoni e Sehova pe koʼe ʼe tuʼania feia ʼana kaugana, pea ʼi ʼihi temi, ʼe feala pe ke ina fakahoko ʼanatou kole. ʼI tatatou iloʼi te faʼahi ʼaia, ʼe tokoni mai ai ke tou faikole malohi ki he aluʼaga ʼe tau mo he tahi, pea ke tou tuku mo he lotofalala kia nima ʼo Sehova.—Pes. 37:5; 2 Kolonito 1:11.
6. Ka tou hufakiʼi ʼihi, kotea ʼe feala ke tou logoʼi ʼo ʼuhiga mo natou? (1 Petelo 3:8)
6 Ka tou hufakiʼi ʼihi, ʼe tokoni mai ke tou “manavaʼofa.” (Lau ia 1 Petelo 3:8.) Ko he tahi ʼe manavaʼofa, ʼe ina tokagaʼi te mamahi ʼo he tahi age, pea ʼe fia tokoni ki ai. (Mko. 1:40, 41) ʼE ui fenei e te tagata ʼafeā ʼaeni ko Michael: “Ka au hufakiʼi ʼihi ʼo ʼuhiga mo te ʼu meʼa ʼae ʼe ʼaoga kia natou, neʼe au mahino lelei age ki ʼonatou faigataʼaʼia, pea mo toe malohi age toku ʼofa ia natou. Pea ʼe au logoʼi ʼe au iloʼi lelei age natou.” ʼE toe talanoa te tagata ʼafeā ʼaeni ko Richard ki he tahi fua lelei. ʼE ina ui fenei: “Ka tou hufakiʼi he tahi, ʼe ina uga ai tatou ke tou fai he meʼa moʼo tokoni ki ai.” ʼE ina hoko atu fenei: “Ka tou foaki he tokoni ʼaoga ki he tahi neʼe tou hufakiʼi, ʼe hage pe ʼe tou fakahoko te faikole ʼae neʼe tou fai maʼa ia.”
7. Ka tou hufakiʼi ʼihi, kotea te manatu ʼe feala ke tou maʼu ʼo ʼuhiga mo ʼotatou fihifihia? (Filipe 2:3, 4) (Vakaʼi mo te ʼu pāki.)
7 Ka tou hufakiʼi ʼihi, ʼe tokoni mai ke mole tou manatu ʼe kovi age ʼotatou fihifihia ia natou. (Lau ia Filipe 2:3, 4.) ʼE tou maʼuʼuli ʼi he malama e puleʼi e te Tevolo, koia ʼe tou tahi tau fuli pe mo tona ʼu fihifihia. (1 Soa. 5:19; Fkha. 12:12) Kapau ʼe ko hatatou agamahani te hufakiʼi ʼo ʼihi, ʼe tou manatuʼi ai ‘ ʼe mamahi ʼotatou tehina fuli ʼi te malamanei ohage pe ko te ʼu mamahi ʼae ʼe tau mo tatou.’ (1 Pet. 5:9) ʼE ui fenei e Katherine, ko he pionie: “Ka au hufakiʼi ʼihi, ʼe au manatuʼi ai ʼe mole ko au pe ʼe tau mo ni fihifihia. Pea ʼe tokoni mai ke mole au tokaga tafito pe ki ʼoku fihifihia.”
Ka tou hufakiʼi ʼihi, ʼe tokoni mai ke mole tou manatu ʼe kovi age ʼotatou fihifihia ia natou (Vakaʼi te palakalafe 7)d
ʼE ʼAOGA KE TOU HUFAKIʼI NATOU
8. Ko ai ʼae ʼe feala ke tou hufakiʼi?
8 Ko ai ʼae ʼe feala ke tou hufakiʼi? ʼE feala ke tou hufakiʼi ia natou ʼae ʼe tau mo ni mahaki, mo te kau tupulaga ʼae ʼe vaʼi, peʼe fakaneke e ʼonatou kauga ako, pea mo natou ʼae ʼe mamahi ʼuhi ko te vaivai matuʼa. Tokolahi ʼotatou tehina ʼe tau mo te fakafeagai mai ʼonatou famili, peʼe ko te ʼu puleʼaga fakatagata. (Mat. 10:18, 36; Gaue 12:5) Neʼe tonu ke mavae peʼe feholaki ʼihi ʼo ʼotatou tehina mai ʼonatou ʼapi, ʼuhi ko te ʼu maveuveu ʼe hoko ʼi tonatou fenua. ʼE mamahi ʼihi ʼuhi ko te ʼu tuʼutamaki fakanatula. ʼE feala ke mole tou iloʼi te ʼu tehina mo tuagaʼane ʼaia. Kae ka tou hufakiʼi natou, ʼe tou fakalogo ai ki te fakatotonu ʼa Sesu ke tou “feʼofaʼaki.”—Soa. 13:34.
9. He koʼe ʼe tonu ke tou manatuʼi ʼi ʼatatou faikole ia natou ʼae ʼe natou takitaki te kautahi ʼa Sehova ʼo feia mo ʼonatou hoa?
9 ʼE feala ke tou toe manatuʼi ʼi ʼatatou faikole ia natou ʼae ʼe natou takitaki te kautahi ʼa Sehova. Ohage la, ko te Kolesi Pule mo te ʼu tehina ʼae ʼe tokoni gaue kia natou, mo te ʼu komite ʼo te filiale, mo te ʼu taupau ʼo te ʼu selevisi ʼo te filiale, mo te ʼu taupau ʼo te siliko, mo te kau tagata ʼafeā pea mo te kau tagata faifekau fakaminisitelio. Tokolahi te ʼu tehina ʼaia ʼe natou tau pe la mo ʼonatou fihifihia, kae ʼe natou gaue kinakina moʼo tokoni kia tatou. (2 Ko. 12:15) Ohage la, ʼe ui fenei e te taupau siliko ʼaeni ko Mark: “ ʼE faigataʼa ʼaupito kia au taku nofo mamaʼo mai ʼaku matuʼa ʼae kua vaivavai. ʼE kua nā mahamahaki toko lua. Logo la ʼe tokaga lelei toku kiʼi tokolua mo tona ʼohoana kia naua, kae ʼe au mamahi ʼaupito, he ʼe mole feala haku nofo tonu ai ʼo tokoni ki siʼi naua.” ʼE mole tou iloʼi ia te ʼu tuʼania ʼae ʼe tau mo te ʼu tehina ʼaia ʼe gaue kinakina. Kae ʼe tonu ke tou manatuʼi tuʼumaʼu natou ʼi ʼatatou faikole. (1 Tes. 5:12, 13) ʼE feala ke tou toe hufakiʼi te ʼu ʼohoana ʼo te ʼu tehina ʼaia, koteʼuhi ʼe natou lagolago agatonu ki ʼonatou hoa ke hoko atu pe tanatou fakahoko lelei ʼanatou gaue.
10-11. ʼE leleiʼia koa e Sehova tatatou hufakiʼi fuli pe ʼotatou tehina mo tuagaʼane maʼia pe ʼe mole tou toʼo higoa?
10 Neʼe tou vakaʼi ʼe tou hufakiʼi tuʼumaʼu he ʼu tehina mo tuagaʼane ʼe kaugamalie. Logo la, ʼe mole tou hufakiʼi tafito he tahi, kae ʼe tou kole kia Sehova ke tokoni kia natou ʼae ʼe pilisoniʼi, peʼe ke ina fakalotofimalieʼi ia natou ʼae neʼe mate he tahi ʼe natou ʼofa mamahi ai. ʼE ui fenei e te tagata ʼafeā ko Donald: “ ʼE kaugamalie te ʼu tehina mo tuagaʼane ʼe tau mo ni fihifihia, ʼo feala ai ʼi ʼihi temi ke tou faikole pe maʼa natou fuli ʼae ʼe mamahi, ʼo mole tou toʼo higoa.”
11 ʼE leleiʼia koa e Sehova ia te ʼu taʼi faikole ʼaia? ʼEi. Pea tahi, ʼe mole tou iloʼi te ʼu fihifihia takitahi ʼe tau mo ʼotatou tehina. Koia, ʼe lelei ke tou hufakiʼi fuli pe ʼotatou tehina mo tuagaʼane. (Soa. 17:20; Efe. 6:18) Ka tou fai he ʼu faikole feia, ʼe fakamoʼoni ai ʼe tou “ ʼoʼofa ki te fale tau tehina katoa.”—1 Pet. 2:17.
TOU HUFAKIʼI IA NATOU TAKITOKOTAHI
12. Kotea ʼe feala ke tou fai moka tou mata siosio?
12 Ke ke mata siosio. ʼE mole gata pe ki tatatou hufakiʼi he ʼu tehina mo tuagaʼane kaugamalie, kae ʼe tonu foki ke tou toe hufakiʼi ʼihi ʼo toʼo ʼonatou higoa. ʼE tau koa he tahi ʼo tou kokelekasio mo hona mahaki tau sino? ʼE lotovaivai koa he tupulaga ʼo tou kokelekasio ʼuhi he ʼe fakaneke ia ia ʼi te fale ako? ʼE faigataʼa koa ki he tamai peʼe ko he faʼe ʼe ina taupau tokotahi hana fanau tana ‘akonakiʼi pea mo akoʼi ia ia ʼo mulimuli ki te ʼu fakatokaga ʼa Sehova’? (Efe. 6:4) Koia, ka ke mata siosio, ʼe malohi age anai tou ʼofa pea mo tau lotomahino ki ʼihi. Pea ʼe uga ai anai koe ke ke hufakiʼi natou.b—Loma 12:15.
13. ʼE feala koa ke tou hufakiʼi he tahi neʼe heʼeki tou felaveʼi mo ia? Fakamahino.
13 Ke ke hufakiʼi ʼihi ʼo toʼo ʼonatou higoa. ʼE feala ke tou fai te faʼahi ʼaia mo natou ʼae neʼe heʼeki tou felaveʼi mo ia. Ohage la, ke ke manatuʼi ʼotatou tehina mo tuagaʼane ʼi Crimée, mo Érythrée, mo Lusia pea mo Singapour. ʼE feala ke ke maʼu ʼi tatatou tuʼasila ʼi te neti jw.org te ʼu higoa ʼo natou ʼae ʼe pilisoniʼi.c ʼE ui fenei e te taupau ʼo te siliko ko Brian: “Ka au tohi he higoa ʼo he tehina peʼe ko he tuagaʼane ʼe pilisoniʼi, pea mo toʼo leʼo lahi tona higoa, ʼe faigafua ai kia au taku manatuʼi ia ia ʼaia moka ʼe au faikole tokotahi.”
14-15. ʼE feafeaʼi hatatou fai he ʼu kole ʼe tou palalau ai ki te ʼu aluʼaga ʼo ʼihi?
14 Ke ke fai he ʼu kole ʼe ke palalau ai ki ʼonatou aluʼaga. ʼE ui fenei e Michael ʼae neʼe tou palalau ki ai ʼi ʼoluga: “Ka au lau te hisitolia ʼo te ʼu tehina ʼae ʼe pilisoniʼi ʼi te jw.org, ʼe au faiga ke au fakakaukauʼi pe kotea ʼe au logoʼi anai mo kapau ʼe hoko kia au tonatou aluʼaga. ʼE au iloʼi ʼe au tuʼania anai ki siʼoku ʼohoana, pea ʼe au loto anai ke tokakaga lelei ʼihi ki ai. Koia, ʼe tokoni mai ai kia au, ke au palalau ki he aluʼaga feia ʼi ʼaku faikole ʼo ʼuhiga mo ʼotatou tehina ʼe pilisoniʼi, kae kua ʼohoana.”—Hep. 13:3, nota.
15 Tou faiga ke tou fakakaukauʼi pe ʼe feafeaʼi te maʼuli ʼo te ʼaho fuli ʼo ʼotatou tehina ʼae ʼe pilisoni. Ka tou fai feia, pea ʼe tokoni mai ke tou manatu ki ʼihi atu aluʼaga ʼe feala ke tou ui ʼi ʼatatou faikole. Ohage la, ʼe feala ke tou hufakiʼi te kau leʼo ʼo te pilisoni ke natou agalelei mo natou, pea ke fakafealagia e te kau taki ʼo te puleʼaga ke fakahoko faʼitaliha e ʼotatou tehina tanatou tauhi. (1 Tim. 2:1, 2) ʼE feala ke tou hufakiʼi te kokelekasio ʼo te fenua, ke natou maʼu he ʼu fakalotomalohi mai te faʼifaʼitaki ʼo honatou tehina ʼe pilisoni. Peʼe ke tokagaʼi e natou ʼae ʼe mole tauhi kia Sehova te lelei ʼo te aga ʼo te tehina peʼe ko te tuagaʼane ʼae ʼe pilisoni, pea ke natou fia logo ai ki te moʼoni. (1 Pet. 2:12) ʼE feala pe ke tou toe fai te faʼahi ʼaia moka tou hufakiʼi ʼotatou tehina mo tuagaʼane ʼae ʼe natou ʼutakiʼi ʼihi atu fihifihia. Koia, ka tou mata siosio, mo hufakiʼi ʼihi ʼo toʼo ʼonatou higoa, mo fai he ʼu kole ʼe tou palalau ki ʼonatou aluʼaga, ʼe tou fakaha ai ʼe ‘lahi ʼaupito tatatou feʼofaʼaki.’—1 Tes. 3:12.
TOU MAʼU HE FAʼAHIGA SIO ʼE LELEI KI ʼATATOU FAIKOLE
16. ʼE feafeaʼi hatatou maʼu he faʼahiga sio ʼe lelei ki ʼatatou faikole? (Mateo 6:8)
16 Neʼe tou vakaʼi ka tou hufakiʼi he tahi, ʼe feala ke tokoni ki te fetogi ʼo tona aluʼaga. Kae, ʼe tonu ke tou maʼu he faʼahiga sio ʼe lelei ki ʼatatou faikole. Ka tou faikole, ʼaua naʼa tou manatu ʼe heʼeki iloʼi e Sehova te aluʼaga ʼo he tahi. Pea ʼe tonu ke tou manatuʼi, ʼe mole ʼaoga ke tou fai tokoni ki ai ki tana faʼahiga fakatokatoka ʼo he aluʼaga. ʼE iloʼi pe e Sehova te meʼa ʼae ʼe ʼaoga ki ʼana kaugana ʼi muʼa ʼo hanatou iloʼi, peʼe ʼi muʼa ʼo hatatou kole age. (Lau ia Mateo 6:8.) Koia, he koʼe ʼe tonu ke tou hufakiʼi ʼihi? Koteʼuhi ʼe mole gata pe ki te ʼu tupuʼaga ʼae neʼe tou vakaʼi ʼi te alatike ʼaeni. Kae ʼe tou toe fai te faʼahi ʼaia, he ʼe tou fakaha ai tatatou fetokagaʼaki. ʼE uga tatou e te ʼofa ke tou fehufakiʼaki. Pea ʼe fiafia ia Sehova ʼi tana sio ʼae ʼe faʼifaʼitakiʼi e ʼana kaugana tona ʼofa.
17-18. ʼE ha feafeaʼi ʼi ʼatatou faikole ʼe tou ʼoʼofa ki ʼotatou tehina? Tuku mai he faʼifaʼitaki.
17 ʼI ʼihi temi, ʼe mole feala ke fetogi te aluʼaga ʼo ʼotatou tehina mo tuagaʼane moka tou faikole. Kae ʼe ha ʼi ʼatatou faikole totatou ʼofa kia natou, pea ʼe tokagaʼi e Sehova. ʼE feala ke tou toʼo he faʼifaʼitaki: Ohage la, ko he kiʼi famili, ʼe ʼi ai te ʼu fanau ʼe lua, ko te tama mo te taʼahine. ʼE takoto mahaki te tama. ʼE kole mamahi fenei e te taʼahine ki tana tamai: “Papa, fakalelei siʼou loto, fai foki he meʼa, he ʼe mahaki siʼoku tokolua!” Neʼe kua fai e te tamai he puleʼaki ki ai. ʼE ʼofa ʼi tona foha pea ʼe tokaga lelei ki ai. Kae ʼe fiafia ʼaupito te tamai ʼi tana sio ʼae ki te lototokaga ʼo siʼona ʼofafine ki siʼona kiʼi tokolua, he ʼe ina kole mamahi age ke tokoni ki ai.
18 Pea ko te aluʼaga pe ʼaia ʼe fakalotomalohiʼi tatou e Sehova ke tou fai. ʼE ina loto ke tou fetokagaʼaki pea mo fehufakiʼaki. Ka tou fai feia, ʼe tou fakaha ai ʼe mole tou tokaga pe kia tatou totonu, kae ʼe tou ʼofa moʼoni ki ʼotatou tehina mo tuagaʼane. Pea ko te aluʼaga ʼaia ʼe tokagaʼi e Sehova. (2 Tes. 1:3; Hep. 6:10) Pea tahi, neʼe tou vakaʼi ʼe feala ʼi ʼihi temi ke fetogi te aluʼaga ʼo he tahi moka tou hufakiʼi. Koia, tou hoko atu pe tatatou haga fehufakiʼaki.
KATIKO 101 Tou Gaue ʼi Te Logo Tahi
a Neʼe fetogi ʼihi higoa.
b Vakaʼi ʼi te jw.org te ʼata viteo ʼo Takeshi Shimizu: ʼE Fagono Sehova Ki Te ʼu Faikole.
c Kapau ʼe ke fia maʼu te ʼu higoa ʼo ʼotatou tehina mo tuagaʼane, fai he ʼu fekumi ʼi te jw.org ʼi te manatu ʼaeni “ Témoins de Jéhovah emprisonnés en raison de leur foi (par pays). ”
d FAKAMATALA ʼO TE PĀKI: ʼE hufakiʼi e te ʼu tehina mo tuagaʼane ʼihi, logo pe la ʼe natou tau mo ʼonatou fihifihia.