ʼE Feafeaʼi Hau Hikihiki ʼAu Faikole?

1-2. (1) Kotea ʼae ʼe faigataʼa ai hatatou avahi ʼotatou loto kia Sehova? (2) ʼE tou iloʼi feafeaʼi ʼe fagono lelei ia Sehova ki ʼatatou faikole?

ʼE KE logoʼi koa ʼi ʼihi temi ʼe tatau pe te ʼu meʼa ʼae ʼe ke ui ʼi ʼau faikole, peʼe mole ke fakaha fuli kia Sehova te ʼu meʼa ʼae ʼe ke logoʼi moʼoni? Kapau koia, ʼe mole ko koe pe. ʼE tou maʼumaʼua ʼaupito, koia ʼi ʼihi temi ʼe tou fai fakavilivili ai ʼatatou faikole. Peʼe faigataʼa hatatou avahi ʼotatou loto kia Sehova he ʼe tou logoʼi ʼe mole tou tuha ke tou fakaovi kia te ia.

² ʼE ui mai ʼi te Tohi-Tapu ko te meʼa ʼae ʼe maʼuhiga kia Sehova ke tou faikole age mo totatou loto katoa, pea ʼaki he agavaivai. Kae ʼe mole ko te ʼu faikole ʼae ʼe faigataʼa pea ke tokagaʼi ai kita. ʼE fagono ki “te kole ʼa te kau agavaivai.” (Pes. 10:17) ʼE fagono lelei ki te ʼu palalau fuli ʼe tou fai, he ʼe tokaga moʼoni kia tatou.​—Pes. 139:​1-3.

3. Kotea te ʼu fehuʼi ka tou vakaʼi ʼi te alatike ʼaeni?

³ ʼE feala ke tou fai te ʼu fehuʼi ʼaeni: He koʼe ʼe mole tonu ke tou tuʼania ʼi te faikole kia Sehova? ʼE feafeaʼi hatatou faikole ke tou fakaovi lahi ai kia Sehova? Kotea ʼe tou ako mai te ʼu faikole ʼa te ʼu kaugana ʼa Sehova ʼae ʼe tuʼu ʼi te Tohi-Tapu? Pea ʼe tokoni feafeaʼi mai ke hikihiki ai ʼatatou faikole? Pea kotea ʼe feala ke tou fai mo kapau ʼe tou lotohoha ʼaupito, ʼo mole tou lava avahi ʼotatou loto kia Sehova? ʼE tou vakaʼi anai te tali ki te ʼu fehuʼi ʼaia.

ʼAUA NAʼA KE TUʼANIA ʼI TE FAIKOLE KIA SEHOVA

4. Kotea ʼae ʼe tokoni mai ke ʼaua naʼa tou tuʼania ʼi te faikole kia Sehova? (Pesalemo 119:145)

⁴ Ka tou iloʼi ko Sehova ʼe ko he kaumeʼa agatonu pea ʼe ina loto ke fua manuʼia totatou maʼuli, ʼe tou palalau faʼifaʼitaliha anai kia te ia ʼi te faikole. Neʼe faiga te tagata ʼae neʼe ina tohi te Pesalemo 119 ke ina maʼu he ʼu felogoi lelei feia mo Sehova. Neʼe mole hao mai te ʼu fihifihia. Neʼe fakamamahiʼi ia ia e he ʼu tagata faikaka. (Pes. 119:​23, 69, 78) Pea neʼe toe lotovaivai ʼuhi ko ʼana lakahala. (Pes. 119:5) Logo la te ʼu faʼahi ʼaia, kae neʼe mole tuʼania ʼi te avahi ʼo tona loto kia Sehova.​—Lau ia Pesalemo 119:145.

5. He koʼe ʼe mole tonu ke tou tuku te ʼu manatu fakalotovaivai ke mole tou faikole ai kia Sehova? Tuku mai he faʼifaʼitaki.

⁵ ʼE toe fakaafe e Sehova mo natou ʼae neʼe natou fai he ʼu agahala mamafa ke natou faikole kia te ia. (Esa. 55:​6, 7) Koia ʼaua naʼa tou tuku he ʼu manatu fakalotovaivai ke mole tou faikole ai kia te ia. Tou toʼo he faʼifaʼitaki. ʼE iloʼi e te pailate ʼo he vakalele ʼe feala ke felogoi mo natou ʼae ʼe natou sioʼi te feoloʼaki ʼo te ʼu vakalele. Kae kapau ʼe ʼaoga ki ai he tokoni, ʼi tau manatu la ʼe ina fakatotonu anai koa ke mole pauʼi kia natou ʼuhi he ʼe ufiufi pe neʼe faihala? Kailoa ia. ʼO toe feia pe, tatau aipe pe ʼe tou logoʼi ʼe mole kei tou iloʼi te meʼa ʼae ʼe tonu ke fai, pe neʼe tou agahala, kae ʼe tonu ke tou haga kia Sehova ʼi te faikole.​—Pes. 119:​25, 176.

ʼE FEAFEAʼI HAU FAIKOLE KE KE FAKAOVI LAHI AI KIA SEHOVA?

6-7. Kotea ʼae ʼe tokoni mai ke tou fakaha kia Sehova ʼi te faikole te ʼu meʼa ʼae ʼe tou logoʼi moʼoni? Tuku mai he faʼifaʼitaki. (Vakaʼi mo te nota.)

⁶ Ka tou fakaha kia Sehova ʼi te faikole ʼatatou manatu mo te ʼu meʼa ʼae ʼe tou logoʼi moʼoni, pea ʼe lahi age anai tatatou fia fakaovi kia te ia. Koia, kotea ʼe feala ke tou fai ke hikihiki ai te loloto ʼo ʼatatou faikole?

⁷ Fakakaukauʼi te ʼu kalitate ʼo Sehova.a Ka tou fakakaukauʼi tuʼumaʼu ʼona kalitate, pea ʼe toe lahi age anai tatatou fakaha faʼifaʼitaliha kia te ia ʼatatou manatu. (Pes. 145:​8, 9, 18) Tou vakaʼi te faʼifaʼitaki ʼo Kristine, ʼae ko he tuagaʼane neʼe agamalohi tana tamai. ʼE ina ui fenei: “Neʼe faigataʼa kia au taku tui ʼae ko Sehova ʼe ko te Tamai ʼofa pea ke au palalau kia te ia. Neʼe au manatu ʼe ina liʼaki anai au ʼuhi ko ʼoku vaivaiʼaga.” Kotea te kalitate ʼo Sehova neʼe tokoni ki ai? ʼE ina ui fenei: “Neʼe lahi taku fakakaukauʼi te ʼofa agatonu ʼo Sehova, pea neʼe au lotofimalie ai he ʼe au iloʼi ʼe ʼofa Sehova ia au. ʼE au iloʼi ʼe ina puke tuʼumaʼu pe anai toku nima. Tatau aipe pe ʼe au toka, kae ʼe ina fakatuʼu ake anai au he ʼe ko te ʼAtua ʼofa. Koia, ka au fakakaukauʼi te ʼu fahaʼi ʼaia, ʼe tokoni mai ke au fakaha kia te ia ʼoku fiafia pea mo ʼoku mamahi.”

8-9. Kotea te ʼu fua lelei ʼe ke maʼu moka ʼe ke fakakaukauʼi te meʼa ʼae ka ke ui ʼi muʼa ʼo tau faikole? Tuku mai he faʼifaʼitaki.

⁸ Fakakaukauʼi te meʼa ʼae ka ke ui. ʼI muʼa ʼo hau faikole, ʼe lelei ke ke fai te ʼu fehuʼi ʼaeni: ‘Kotea te ʼu fihifihia ʼe au tau nei mo ia? ʼE ʼi ai koa he tahi ʼe tonu ke au fakamolemole ki ai? ʼE ʼaoga mai koa te tokoni ʼa Sehova moka hoko he aluʼaga ʼo fetogi ai toku maʼuli?’ (2 Hau 19:​15-​19) ʼE feala hau toe muliʼi te faikole faʼifaʼitaki ʼae neʼe akoʼi mai e Sesu. ʼO feafeaʼi? ʼAki hau fakakaukauʼi te meʼa ʼae ʼe feala ke ke ui kia Sehova ʼi te faikole ʼo ʼuhiga mo Tona huafa, mo Tona Puleʼaga pea mo Tona finegalo.​—Mat. 6:​9, 10.

⁹ Neʼe ʼi ai te tuagaʼane ʼe higoa ko Aliska, neʼe fakaha age ko tona ʼohoana kua vave mate ʼuhi ko he kosea ʼi te ʼulu. Pea neʼe faigataʼa kia ia tana faikole. ʼE ina ui fenei: “Neʼe au lotomamahi ʼaupito, koia neʼe faigataʼa kia au haku lava fakakaukauʼi te ʼu palalau ke au fai ʼi te faikole.” Kotea ʼae neʼe tokoni ki ai? ʼE ina ui fenei: “ ʼE au toʼo muʼa he kiʼi temi ʼi muʼa ʼo taku faikole ke au fakakaukauʼi lelei ʼaku manatu. Pea ʼe tokoni mai ke mole au palalau pe kia au pea mo te mahaki ʼo siʼoku ʼohoana. Ka au fai feia, ʼe mole kei au hoha, pea ʼe tokalelei ai taku fakakaukau ke au faikole kia Sehova.”

10. He koʼe ʼe tonu ke tou faikole loaloaga? (Vakaʼi mo te ʼu pāki.)

¹⁰ ʼAua naʼa ke faikole fakavilivili. ʼE moʼoni, ʼe feala ke tou fakaovi kia Sehova, maʼia pe ʼe nounou ʼatatou faikole. Kae kapau ʼe tou toʼo he temi ke tou faikole fualoa ai kia Sehova, ʼe lahi anai te ʼu faʼahi ka tou fia fakaha kia te ia ʼo ʼuhiga mo te ʼu meʼa ʼae ʼe tou logoʼi mo manatu ki ai.b ʼE ui fenei e Elijah, te ʼohoana ʼo Aliska: “ ʼE au faiga ke au faikole tuʼa lahi ʼi te ʼaho katoa. Pea ʼe au logoʼi ʼe toe lahi age taku fakaovi kia Sehova moka au toʼo he temi ke au faikole loaloaga kia te ia. ʼE faʼa kataki ia Sehova he ʼe mole piko ia ʼi te talitali ke ʼosi taku faikole. Koia, ʼe au faikole loaloaga ai kia te ia.” ʼE feala hau ʼahiʼahi fai te fahaʼi ʼaeni: Faiga ke ke maʼu te temi mo te koga meʼa ʼae ʼe feala hau faikole ai. Pea ʼe feala ai hau faikole leʼo lahi pea ʼe mole fakaleluʼi ai koe. Pea faiga leva ke ke fakamamahani ʼo faikole loaloaga.

TE ʼU AKO MAI TE ʼU FAIKOLE ʼA TE ʼU KAUGANA ʼA SEHOVA ʼAE ʼI TE TOHI-TAPU

11. He koʼe ʼe ʼaoga anai ke tou fakakaukauʼi te ʼu faikole ʼa te ʼu kaugana ʼa Sehova ʼae ʼe tuʼu ʼi te Tohi-Tapu? (Vakaʼi mo te ʼa takai “ ʼE Tatau Koa Tou Aluʼaga Mo ʼAe Neʼe Natou Tau Mo Ia?”)

¹¹ ʼE lagi ʼaoga anai ke ke fakakaukauʼi te ʼu faikole ʼa te ʼu kaugana ʼa Sehova ʼi te Tohi-Tapu, mo ʼanatou hiva fakavikiviki kia Sehova. Ka ke metitasio ki te faʼahiga fakaha e te ʼu kaugana ʼa te ʼAtua ʼanatou manatu loloto, ʼe uga anai koe ke ke avahi tou loto kia Sehova. ʼE feala ke toe tokoni atu ʼanatou faikole ke ke fakaʼaogaʼi he tahi ʼu kupuʼi palalau ʼi ʼau faikole. Pea ʼe lagi ʼe ke maʼu anai he ʼu faikole ʼe tatau mo tou aluʼaga mo te ʼu meʼa ʼae ʼe ke logoʼi.

12. Kotea te ʼu fehuʼi ʼe feala ke tou fai moka tou metitasio ki he faikole ʼi te Tohi-Tapu?

¹² Ka ke metitasio ki he faikole ʼi te Tohi-Tapu, ke ke fai te ʼu fehuʼi ʼaeni: ‘Ko ai ʼae neʼe ina fai te ʼu palalau ʼaia? Neʼe feafeaʼi tona maʼuli? He koʼe neʼe faikole feia? Ko te ʼu manatu ʼae ʼe ina logoʼi ʼi tana faikole ʼe au toe logoʼi koa mo au? Kotea te ʼu ako ʼe au taʼofi mai ai?’ ʼE lagi ʼaoga anai ke ke fai he tahi ʼu fekumi moʼo tali ki te ʼu fehuʼi ʼaia, pea ʼe fua lelei pe anai kia koe. Tou vakaʼi he ʼu faʼifaʼitaki.

13. Kotea te ako ʼe tou taʼofi mai te faikole ʼa Ana? (1 Samuele 1:​10, 11) (Vakaʼi mo te pāki ʼo te takafi.)

¹³ Lau ia 1 Samuele 1:​10, 11. ʼI te fai e Ana ia te faikole ʼaia, neʼe tau mo he ʼu fihifihia ʼe lua. Neʼe paʼa pea neʼe gaohi koviʼi ia ia e te lua ʼohoana ʼo tona ʼohoana. (1 Sam. 1:​4-7) Kapau kua fualoa tau tau mo he fihifihia, kotea ʼe feala ke ke ako mai te faikole ʼa Ana? Neʼe faikole fualoa kia Sehova ʼo fakaha kia te ia ʼana tuʼania fuli. Pea neʼe ina maʼu ai hona toe fimalie. (1 Sam. 1:​12, 18) ʼE feala mo tatou ke tou toe maʼu he fimalie moka tou ‘li tatatou kavega kia Sehova.’ ʼO feafeaʼi? ʼAki hatatou fakaha fuli kia te ia ʼotatou fihifihia mo te ʼu meʼa ʼae ʼe tou logoʼi.​—Pes. 55:22.

14. (1) Kotea te tahi ako ʼe tou taʼofi mai te faikole ʼa Ana? (2) Ka tou lau mo metitasio ki te Tohi-Tapu, he koʼe ʼe tokoni mai ke toe lahi age te ʼu meʼa ʼae ʼe tou ui ʼi ʼatatou faikole? (Vakaʼi mo te nota.)

¹⁴ Hili pe ki ai ni kiʼi taʼu ki te tupu ʼo tana kiʼi tama ko Samuele, neʼe ʼave e Ana ia ia ki te Pelepitelo Lahi ko Eli. (1 Sam. 1:​24-​28) Neʼe faikole fakamalotoloto kia Sehova ʼo fakaha ʼe tui papau ʼe ina puipui mo tokaga lelei anai ki ʼana kaugana agatonu.c (1 Sam. 2:​1, 8, 9) Logo la neʼe kei tau pe ia Ana mo tona ʼu fihifihia ʼi tona loto fale, kae neʼe tokaga tafito pe ki tona faʼahiga tapuakiʼi e Sehova. Kotea te ako ʼe tou maʼu mai ai? Kapau ʼe tou tokaga tafito ki te tokoni mai pe ʼa Sehova kia tatou ʼo kaku mai ki te ʼaho nei, pea ʼe tou lava katakiʼi anai ʼotatou fihifihia.

15. Ka tou tau mo he aluʼaga heʼe faitotonu, kotea ʼe tou ako mai te faikole ʼa te polofeta ko Selemia? (Selemia 12:1)

¹⁵ Lau ia Selemia 12:1. Neʼe lotovaivai ia Selemia koteʼuhi neʼe sio ki ʼihi hahaʼi neʼe maʼuli fimalie, kae neʼe natou fai he ʼu aga ʼe kovi. Neʼe toe lotovaivai foki he neʼe fakalainoaʼi ia ia e ʼihi Iselaele. (Sel. 20:​7, 8) ʼE tou mahino ki te ʼu meʼa ʼae neʼe logoʼi e Selemia, he ʼe tou sisio ki te maʼuli fimalie ʼa ni hahaʼi kaka pea moka vaʼi tatou. Logo la neʼe fakaha e Selemia tona mamahi, kae neʼe mole ina tukugakoviʼi ʼe heʼe faitotonu ia Sehova. ʼI tana sio ʼae ki te faʼahiga fakatonutonuʼi e Sehova Tana hahaʼi agatuʼu, neʼe toe malohi age ai tana falala ʼae ki te faitotonu ʼa te ʼAtua. (Sel. 32:19) ʼE feala mo tatou ke tou fakaha ʼotatou mamahi ʼi te faikole, ʼo tou falala ʼe fakatokatoka anai e Sehova ʼi tona temi totonu te ʼu aluʼaga heʼe faitotonu.

16. Kotea ʼe tou ako mai te faikole ʼa te tagata Levite ʼae neʼe ʼave popula? (Pesalemo 42:​1-4) (Vakaʼi mo te ʼu pāki.)

¹⁶ Lau ia Pesalemo 42:​1-4. Neʼe fatu te hiva ʼaia e te tagata Levite ʼae neʼe ʼave popula, pea neʼe mole feala ke tauhi fakatahi mo ʼona tehina Iselaele ʼi te fale lotu. ʼE ha ʼi tana pesalemo ʼaia te meʼa ʼae neʼe ina logoʼi. ʼE feala mo tatou ke tou toe logoʼi te meʼa ʼae neʼe ina logoʼi, mo kapau ʼe tou nofo punupunu ʼi totatou ʼapi, peʼe pilisoniʼi tatou ʼuhi ko tatatou tui. ʼE feala ʼi ʼihi temi ke tou fiafia ai pea ʼi ʼihi temi ke tou lotovaivai ʼaupito. Kae ʼe lelei ke tou palalau ki te faʼahi ʼaia ʼi te faikole. Ka tou fai feia, ʼe tokoni mai anai ke tou mahino lelei age ki te ʼu meʼa ʼae ʼe tou logoʼi, pea mo maʼu ai he tahi age faʼahiga sio ki totatou aluʼaga. Ohage la, neʼe mahino te tagata Levite ʼe ina maʼu anai he tahi ʼu faigamalie ke ina vikiʼi ai ia Sehova. (Pes. 42:5) Neʼe ina toe fakakaukauʼi pe neʼe tokaga lelei feafeaʼi ia Sehova ki ai. (Pes. 42:8) Ka tou faikole fakamalotoloto ki te ʼAtua, ʼe tokoni mai ai ke tou vakavakaʼi te ʼu meʼa ʼe tou logoʼi, mo tou toe maʼu te tokalelei pea mo te malohi ʼae ke tou faʼa kataki.

17. (1) Kotea ʼe tou ako mai te faikole ʼa te polofeta ko Sonasi? (Sonasi 2:​1, 2) (2) Ka tou tau mo ni faigataʼaʼia, he koʼe ʼe lelei ke tou manatuʼi ʼihi kupuʼi palalau ʼa te ʼu Pesalemo? (Vakaʼi mo te nota.)

¹⁷ Lau ia Sonasi 2:​1, 2. Neʼe fai e te polofeta ko Sonasi te faikole ʼaia, kae neʼe nofo ʼi te fatu ʼo he toe ika lahi. Logo la neʼe talagataʼa kia Sehova, kae neʼe tui papau ʼe fagono anai te ʼAtua ki tana faikole. ʼI te faikole mamahi ʼaia ʼa Sonasi, neʼe lahi te ʼu kupuʼi palalau neʼe ina fakaʼaogaʼi mai te ʼu Pesalemo.d ʼE lagi neʼe ina iloʼi lelei te ʼu vaega ʼaia. Koia, ʼi te fakakaukauʼi e Sonasi te ʼu vaega ʼaia neʼe tui papau ai ʼe tokoni age anai ia Sehova. ʼO toe feia pe, tou faiga ke tou ako fakaʼatamai ʼihi vaega. Ka tou fai feia, ʼe feala ke tou toe manatuʼi pea mo fakalotofimalie kia tatou moka tou faikole kia Sehova ʼi te ʼu temi faigataʼa.

KE HOKO ATU PE TAU FAKAOVI KIA SEHOVA ʼI TE FAIKOLE

18-19. Kapau ʼe mole tou iloʼi ʼi ʼihi temi te ʼu kupu ʼae moʼo fakaha te ʼu meʼa ʼae ʼe tou logoʼi, kotea te manatu fakalotofimalie ʼe tou maʼu ia Loma 8:​26, 27? Tuku mai he faʼifaʼitaki.

¹⁸ Lau ia Loma 8:​26, 27. ʼI ʼihi temi, ʼe feala ke tou taʼomia ʼuhi ko te ʼu tuʼania, ʼo mole tou iloʼi ai pe feafeaʼi hatatou fakaha kia Sehova te ʼu meʼa ʼe tou logoʼi. Kae ʼe tou maʼu tuʼumaʼu pe he tokoni. ʼI te ʼu lakaga ʼaia, ʼe “hufakiʼi” tatou e te laumalie maʼoniʼoni ʼo te ʼAtua. ʼO feafeaʼi? Neʼe fakaʼaogaʼi e Sehova tona laumalie maʼoniʼoni moʼo uga te kau tagata faitohi ʼo te Tohi-Tapu ke lahi te ʼu faikole ʼe natou tohi ʼi tana Folafola. Ka mole tou iloʼi te ʼu kupu ʼae moʼo fakaha te ʼu meʼa ʼae ʼe tou logoʼi, ʼe feala ke tou fakaʼaogaʼi ʼihi manatu ʼi te ʼu faikole ʼaia ʼi te Tohi-Tapu, ohage pe ko hatatou ʼu kole. Pea ʼe tou iloʼi ʼe tali mai anai ia Sehova ki ai.

¹⁹ Neʼe tokoni te manatu ʼaia ki te tuagaʼane Lusia ʼaeni ko Yelena. Neʼe puke ia ia ʼuhi ʼae neʼe faikole pea mo ina lau te Tohi-Tapu. Neʼe hoha ʼaupito ia Yelena, ʼo faigataʼa ai kia ia tana faikole. ʼE ina ui fenei: “ ʼE au manatuʼi ka au logoʼi kua au taʼomia ʼuhi ko te hoha, ʼo mole au iloʼi pe kotea ka au ui kia Sehova, ʼe au fakaʼaogaʼi ʼihi kupuʼi palalau ʼi te ʼu faikole ʼa te ʼu kaugana ʼa te ʼAtua ʼo te temi muʼa . . . ohage pe ko haku ʼu faikole. Pea ʼe au iloʼi e tali e Sehova. . . . Neʼe fakalotofimalie ʼosi kia au ʼi te temi faigataʼa ʼaia.”

20. ʼE feafeaʼi hatatou tuku maʼu tatatou fakakaukau ki te faikole moka tou lotohoha?

²⁰ Ka tou lotohoha, ʼe feala ke faigataʼa hatatou tuku maʼu tatatou fakakaukau ki te faikole. Kapau ʼe ke loto ke tokalelei tau fakakaukau, ʼe feala hau lau leʼo lahi te ʼu Pesalemo. ʼE feala ke tou toe faiga ʼo tohi te ʼu meʼa ʼe tou logoʼi ohage ko tona fai e te Hau ko Tavite. (Pes. 18, 34, 142; te ʼu kupu ʼae neʼe tohi ʼi te kamataʼaga) ʼE mahino ia, ʼe mole he lao ki te faʼahiga teuteuʼi ʼo ʼatatou faikole. (Pes. 141:2) Kae ke ke fai ʼo mulimuli pe ki te meʼa ʼae ʼe lelei kia koe.

21. He koʼe ʼe feala ke tou faikole mo totatou loto katoa?

²¹ ʼE malave ʼaupito kia tatou tatatou iloʼi ʼae ʼe mahino ia Sehova ki te ʼu meʼa ʼae ʼe tou logoʼi, ʼi muʼa ʼo hatatou fakaha age kia te ia. (Pes. 139:4) Kae, ʼe fiafia ʼi tana logo ʼae ʼe tou ui age ʼe tou falala kia te ia. Koia, ʼaua naʼa ke tuʼania ʼi te faikole ki tau Tamai ʼae ʼe ʼi selo. Ke ke fakaʼaogaʼi te ʼu kupuʼi palalau ʼi te ʼu faikole ʼae ʼe tuʼu ʼi tana Folafola. Ke ke faikole mo tou loto katoa. Fakaha kia te ia ʼou fiafia mo ʼou mamahi. ʼEi, ʼe nofo tuʼumaʼu anai ia Sehova mo koe, he ʼe ko tou Kaumeʼa moʼoni ʼaia.