Te ʼu Tehina Foʼou ʼe Toko Lua ʼo Te Kolesi Pule

ʼI TE ʼaho 5 ʼo Oketopeli 2024, neʼe tala ifo ai te logo makehe ʼaeni ʼi te fakatahi lahi ʼae ʼe fai ʼi te taʼu fuli: Neʼe fakanofo te ʼu tehina ʼaeni ko Jody Jedele mo Jacob Rumph ke nā kau ki te Kolesi Pule ʼa te kau Fakamoʼoni ʼa Sehova. Neʼe tauhi agatonu kia Sehova te ʼu tehina ʼe toko lua ʼaia lolotoga ni taʼu.

Neʼe tupu te tehina ko Jedele ʼi Missouri, ʼi Amelika pea neʼe lahilahi ake ʼi te moʼoni. Neʼe maʼuli tona famili ʼi he koga meʼa neʼe mole hahaʼi ai he kau Fakamoʼoni ʼa Sehova. Koia, neʼe kaugamalie ai te ʼu tehina mo tuagaʼane mai te ʼu koga meʼa kehekehe ʼo te fenua, neʼe ʼomai ʼo tokoni ki te faifakamafola ʼi ai. Neʼe malave ʼaupito kia ia tonatou ʼofa pea mo tanatou logo tahi. Neʼe papitema ʼi te ʼaho 15 ʼo Oketopeli 1983, kae neʼe kei tupulaga. Neʼe manako ki te minisitelio pea hili tana ako ʼi te lise, neʼe kamata pionie katoa leva ʼi Sepetepeli 1989.

ʼI te kei tupulaga ʼa te tehina ko Jedele, neʼe ʼave e ʼana matuʼā ia ia mo tona kiʼi tokolua ʼo fakamamata te Petele. ʼI tanā mamata ʼaia, neʼe uga ai naua ke nā fakatuʼutuʼu ke nā gaue ʼi te Petele. Neʼe nā fakahoko moʼoni te fakatuʼutuʼu ʼaia. Neʼe hu te tehina ko Jedele ki te Petele ʼo Wallkill ʼi Sepetepeli 1990. Neʼe gaue muʼa ʼi te Selevisi Gaue Fakamaʼa, pea ki muli age ʼi te Selevisi Faifaitoʼo.

ʼI te temi ʼaia, neʼe tuputupu te ʼu kokelekasio ʼae ovi mai ʼo te lea Sepania, pea neʼe ʼaoga ki ai he ʼu tehina. Koia, neʼe kau te tehina ko Jedele ki te ʼu tehina ʼaia, pea neʼe ina kamata ako te lea Fakasepania. Mole faʼa fualoa ki ai, neʼe felaveʼi mo Damaris, ʼae ko he tuagaʼane neʼe pionie ʼi te siliko pe ʼaia. Ki muli age, neʼe nā ʼohoana pea neʼe nā gaue fakatahi leva ʼi te Petele.

ʼI te 2005, neʼe nā mavae ʼi te Petele ʼo tokakaga leva ki ʼanā matuʼā ʼae neʼe tauhi agatonu kia Sehova. ʼI te temi ʼaia, neʼe nā pionie katoa. Neʼe kau ʼi te kau faiako ʼo te Ako ʼo Te Kau Pionie, pea neʼe kau ʼi te Komite Fakafelogoi Mo Te Lopitali ʼo te potu fenua ʼaia. Pea neʼe gaue ʼi te Komite Laga Fale Fakakolo.

ʼI te 2013, neʼe fakaafe leva te tehina mo te tuagaʼane Jedele ke toe liliu ki te Petele ki te laga fale ʼae ʼi Warwick. Pea talu mai ai mo tanā gaue ʼi Patterson mo Wallkill. Neʼe gaue te tehina ko Jedele ʼi te Selevisi Gaue Laga Fale ʼo Te Fenua, pea mo te Selevisi Kumi Logo Fakatoketa. ʼI Malesio 2023, neʼe fakanofo ia ia ke tokoni ki te Komite ’o Te Gaue. ʼI tana toe fakakaukauʼi ʼana gaue ʼaia, ʼe ina ui fenei: “Ka tuku atu he ʼu gaue foʼou ke kotou fai, ʼe feala ʼi ʼihi temi ke kotou logoʼi ʼe mole kei kotou lavaʼi. Kae ʼe ko te temi ʼaia ʼe tonu ai ke tou manatuʼi, ʼo tuku ia meʼa fuli kia Sehova, he ʼe ko ia pe ʼae ʼe ina fakaliliu kita ko he meʼa pe ʼe loto ki ai.”

Neʼe tupu te tehina ko Rumph ʼi Californie, ʼi Amelika. ʼI tana kei veliveli, neʼe mole kei faifakamafola tana faʼe mo kau ki te ʼu fono. Kae neʼe faiga tuʼumaʼu pe ke ina akoʼi ki ai te ʼu moʼoni Fakatohi-tapu. Pea tahi, neʼe alu ʼi te taʼu fuli ʼo fakasiosio tana kui fafine, ʼae neʼe tauhi kia Sehova. Neʼe tokoni tana kui ki ai ke fia mahino ki te moʼoni, pea ʼi tona taʼu 13, neʼe ina kole ke fai hana ako. ʼI te ʼaho 27 ʼo Sepetepeli 1992, neʼe papitema leva kae neʼe kei tupulaga. Meʼa lelei, neʼe toe toʼo e tana faʼe te ʼu gaue fakalaumalie. Pea neʼe fai e tana tamai mo ʼona kiʼi tehina mo tokolua he ʼu faiga, pea neʼe natou papitema leva.

ʼI te kei tupulaga ʼa te tehina ko Rumph, neʼe sio ki te fiafia lahi ʼa te kau pionie. Koia, hili tana ako ʼi te lise, neʼe pionie leva ʼi Sepetepeli 1995. ʼI te 2000, neʼe hiki leva ʼo maʼuli ʼi Équateur ʼo faifakamafola ai he neʼe ʼaoga lahi ki ai he kau faifakamafola. Pea neʼe felaveʼi ai mo Inga, ʼae ko he tuagaʼane pionie mai Kanata, pea neʼe nā ʼohoana leva. Hili tanā ʼohoana, neʼe nā faifakamafola leva ʼi he kolo ʼo Équateur mo he kiʼi kutuga faifakamafola. Ia ʼaho nei, kua tuʼu ai he kokelekasio ʼe tuputupu.

ʼAki te temi, neʼe hinoʼi leva te tehina mo te tuagaʼane Rumph ko he ʼu pionie makehe, pea ki muli age neʼe nā gaue ʼi te siliko. ʼI te 2011, neʼe fakaafe naua ke nā kau ki te kalasi 132 ʼo Kileate. Hili tanā maʼu pepa, neʼe nā gaue ia koga meʼa kehekehe ʼi te malamanei, pea neʼe nā leleiʼia te ʼu faʼahiga gaue kehekehe, ohage la ko te gaue ʼi te Petele, mo te gaue misionea pea mo te gaue ʼi te siliko. Neʼe toe maʼu e te tehina ko Rumph te pilivilesio ʼae ke faiako ʼi te Ako ʼo Te Kau Faifakamafola ʼo Te Pule’aga.

Neʼe toe liliu leva te tehina mo te tuagaʼane Rumph ki Amelika ʼuhi ko te to ʼo te taʼi mahaki COVID-19. Neʼe fakaafe leva naua ki te Petele ʼo Wallkill, ʼae neʼe akoako ai ia te tehina ko Rumph ki te Selevisi Gaue. Pea neʼe toe hinoʼi leva naua ke nā olo ʼo gaue ʼi te filiale ʼo Équateur, ʼae neʼe gaue ai te tehina ko Rumph ʼi te Komite ʼo Te Filiale. ʼI 2023, neʼe ʼave naua ki Warwick. ʼI Sanualio 2024, neʼe fakanofo te tehina ko Rumph ke tokoni ki te Komite ’o Te Gaue. Ka ina fakakaukauʼi te koga meʼa ʼae neʼe gaue ai, ʼe ina ui fenei: “ ʼE mole ko te koga meʼa ʼae ʼe kotou gaue ai ʼae ʼe makehe ai takotou gaue, kae ʼe makehe ia, ʼuhi ko te ʼu hahaʼi ʼae ʼe kotou gaue mo ia.”

ʼE tou lotofakafetaʼi lahi ki te gaue kinakina ʼa te ʼu tehina ʼaia, pea ʼe ‘tou haga fakaʼapaʼapaʼi te taʼi ʼu tagata ʼaia.’​—Flp. 2:​29.