Te Tohi Mai Te Kolesi Pule
ʼI te ʼu taʼu ʼaenī ʼaē kua kamata ai te 21 sēkulō, ʼe mātou fiafia ʼi te faitohi atu, ki “te famili katoa ʼo te ʼu tēhina” ʼi te malamanei katoa, pea mo vikiʼi koutou ʼuhi ko takotou gāue kinakina. (1 Pet. 2:17, MN ) Kua hili kiai teitei taʼu e 2 000, neʼe fehuʼi fēnei e Sesu: “Ka haele mai anai te Foha o te tagata, pe mau anai e ia te tui i te kelekele?” (Lu. 18:8) Ko te toe gāue lahi ʼaē neʼe koutou fai lolotoga te taʼu gāue ʼaenī kua hili, ʼe ko he ʼio mālohi ki te fehuʼi ʼaē neʼe fai e Sesu. Ko ʼihi ia koutou neʼe fehiʼaʼinaʼi pea mo vāʼi ʼuhi ko takotou tui. ʼE lahi takotou kātaki, ʼi te ʼu fenua ʼaē ʼe hoko ai te ʼu tau, te ʼu tuʼutāmaki faka natula, te ʼu mahaki peʼe ko te hoge. (Lu. 21:10, 11) ʼUhi ko takotou faiva ʼi te ʼu gāue ʼaē ʼe faitotonu, ʼe kei feala kia Sesu ke ina “mau . . . te tui i te kelekele.” ʼE mahino ia ʼe fiafia selo ʼuhi ko te faʼahi ʼaia!
ʼE mātou ʼiloʼi ʼe faigataʼa te faʼa kātaki. Koutou tokagaʼi te ʼu faigataʼaʼia ʼe tau mo totatou ʼu tēhina ʼi te kolo ʼi Asia, ʼi te potu uesite. ʼI te kolo ʼaia, kua liliu ko he agamāhani te gaohi koviʼi ʼo te kau Fakamoʼoni ʼa Sehova. Mole heʼeki faʼa fualoa, neʼe fakagata e te kau polisi te fakatahitahi ʼi te tokalelei ʼa te hahaʼi ʼe toko 700. Neʼe tāʼofi te ala ʼo mole feala ai ki te toko 1 300 ke nātou kau ki te fakatahi ʼaia. Ko te toe hahaʼi kaugamālie neʼe ʼuʼufi tonatou ʼu fofoga, ko ʼihi neʼe ko te kau polisi, neʼe nātou ʼohofi te koga meʼa ʼaē neʼe fai ai te fakatahi, neʼe nātou tā te hahaʼi tokolahi neʼe ʼōmai mai te tahi ʼu fenua, pea neʼe nātou tutu te ʼu faʼahi ʼaē neʼe teuteuʼi ki te fakatahi. ʼI te tahi ʼu ʼaluʼaga, ko te kau takitaki lotu aga fefeka neʼe nātou tā totatou ʼu tēhina ʼaki te ʼu kogaʼi ʼakau neʼe tutuki ai te ʼu faʼo.
ʼE fakamataku te gaohi koviʼi ʼaia kae neʼe mole ko he meʼa fakapunamaʼuli. Neʼe tohi fēnei e te ʼapositolo ko Paulo ʼaki te takitaki ʼa te ʼAtua: “Ko natou katoa e fia mauli fakalotu ia Kilisito Sesu, e fakatagai anai.” (2 Tim. 3:12) ʼI te ʼuluaki sēkulō, neʼe laukoviʼi te kau Kilisitiano pea neʼe fakatagaʼi nātou, pea neʼe matehi mo ʼihi. (Gaue 5:40; 12:2; 16:22-24; 19:9) Neʼe hoko te faʼahi ʼaia ʼi te 20 sēkulō, pea ʼe mahino ia ʼe toe hoko atu pe anai ʼi te 21 sēkulō. Koia ʼe ʼui fēnei mai kia tatou e Sehova: “Ko te ʼu mahafu tau fuli ʼaē ka faʼu anai moʼo fakafeagai kia te koe ʼe mole lava anai.” (Isa. 54:17) ʼE ko he fakapapau fakatalakitupua lahi ʼaia! Pea ʼe tou maʼuhiga ʼaupito kia mata ʼo Sehova, he neʼe ina ʼui fēnei ʼaki tana polofeta ko Sakalia: “Ko ʼaē ʼe kapa kia koutou ʼe kapa ia ki toku kanoʼi mata.” (Sakl. 2:8) ʼE mole feala ke mālo te kau fili ʼaē ʼe fakafeagai ki te kau atolasio ʼa Sehova. ʼE mālo pe anai te tauhi moʼoni!
Ohage la, ʼi te kolo ʼaē neʼe tou talanoa kiai ʼi muʼa atu, neʼe hoko ki te kau Fakamoʼoni ʼa Sehova te ʼu tuputupu foʼou ʼa te ʼu kaugā fagona ʼi te taʼu gāue 2001. Ei, logola te ʼu faigataʼaʼia kae neʼe faʼa kātaki pe totatou ʼu tēhina ʼi te kolo ʼaia, ohage pe ko tanatou fai ʼi te ʼu potu fuli pe. ʼI te malamanei katoa, lolotoga te taʼu gāue ʼaē kua hili, ko hahaʼi e toko 5 066 neʼe nātou papitema ʼi te vāhaʼa fuli moʼo fakahā ia tanatou foaki ʼo tonatou maʼuli kia Sehova. Kua fakatotonu e te hahaʼi foʼou ʼaia, ʼo feiā mo tatou, ke tou “katoa pea mo [tou] tui mālohi ʼo ʼuhiga mo te finegalo katoa ʼo te ʼAtua.”—Kol. 4:12, MN.
Koutou tokagaʼi mo te tuputupu ʼaē neʼe hoki hoko pe nei ʼi Heleni. Logola te ʼu taʼu ʼaē neʼe fakafeagai mālohi ai te ’Ēkelesia Orthodoxe ʼo Heleni, kae ʼi te temi nei, kua ʼiloʼi te kau Fakamoʼoni ʼa Sehova e te puleʼaga ko he “lotu kua ʼiloa.” Ko te pepa ʼaē ʼe tohi ai te fakamoʼoni ʼaia ʼe ina toe ʼui ko te Petele ʼi Heleni, ʼe ko “he potu taputapu pea ʼe fakaʼaogaʼi moʼo tauhi ki te ʼAtua, ko he fale ki te tauhi ki te ʼAtua.” ʼE mātou toe fiafia ʼi te fakahā atu, lolotoga te taʼu gāue ʼaē kua hili, neʼe fai e te ʼu telepinale he ʼu tonu lelei ʼo ʼuhiga mo tatatou tauhi, ʼi Amelika, mo Kanata, mo Lomania, mo Lusia, mo Pulukalia, mo Saponia, pea mo Siamani. ʼE tou loto fakafetaʼi lahi kia Sehova ʼi tana fakagafua ʼaē ke hoko atu te gāue ʼi te ʼu fenua ʼaia!
Ka tou sio ki te ʼu ʼaluʼaga ʼaē ʼe tokoni ai Sehova ki tana hahaʼi ʼi te ʼu ʼaho fakamuli ʼaenī, pea ʼe tou mahino ai ko ia totatou Kaumeʼa lelei tokotahi. ʼE tou fiafia ʼi tatatou ʼu felogoi mo ia, ʼi tatatou ʼiloʼi ʼaē ʼe ʼofa kia tatou, ʼe ina akoʼi tatou, pea mo fakatonutonuʼi tatou. ʼE moʼoni, ʼe hoko atu pe anai tatatou tau mo he ʼu ʼahiʼahiʼi ʼo tatatou tui. Kae kapau ʼe tou maʼu he tui ʼe mālohi kia Sehova pea ʼe tokoni mai te faʼahi ʼaia kia tatou. Neʼe tohi fēnei e Sakopo: “Koutou faka ʼuhigaʼi te faʼahi ʼaia ohage ko he fiafia katoa, ʼoku ʼu tēhina, mokā koutou felāveʼi mo he ʼu faʼahiga ʼahiʼahi kehekehe, ʼi takotou ʼiloʼi ʼaē ko te maʼuhiga ʼo takotou tui ʼaē kua ʼahiʼahiʼi ʼe ina fakatupu te faʼa kātaki.” (Skp. 1:2, 3, MN ) Tahi ʼaē meʼa, ko tatatou faʼa kātaki ʼe ina fakahā ai tatatou ʼofa kia Sehova, pea ʼe tou fiafia lahi ai! Ke koutou ʼiloʼi papau ʼu tēhina ʼofaina, ʼe tokoni anai ia Sehova kia tatou takitokotahi. Kapau ʼe tou nofo agatonu, ʼe tokoni moʼoni anai kia tatou ke tou lava hū ki te mālama foʼou. ʼE ina loto ke tou aʼu kiai.
Koia ʼe mātou fakaloto mālohiʼi koutou, ʼu tēhina pea mo tuagaʼane, kau tūpulaga pea mo matutuʼa, ke koutou manatuʼi te ʼu tapuakina fakaofoofo ʼaē ka tou maʼu. ʼOfa pe ke tou hage ko te ʼapositolo ko Paulo, ʼaē neʼe ina tohi fēnei: “E au amanaki, e mole feala ke fakatatau te u mamahi o te temi-nei mo te kololia e maua ke fakaha mai kia tatou.” (Loma 8:18) Koutou falala kia Sehova mokā koutou tau mo he ʼu faigataʼaʼia kehekehe. Koutou kātaki pea ʼaua naʼa koutou līaki takotou agatonu. ʼE mole koutou fakahemala anai ʼi he temi. ʼE ʼui papau mai e te Folafola ʼa te ʼAtua: “Ko te faitotonu, ʼe maʼuli anai ʼuhi ko tana agatonu.”—Hap. 2:4.
Tokotou ʼu tēhina,
Te Kolesi Pule ʼa Te Kau Fakamoʼoni ʼa Sehova