Tou Logo Tahi ʼi Te Fiafia Mo Sehova Mo Tona ʼAlo
ʼE Fai Anai ʼi Te ʼAho 28 ʼo Malesio Te Toʼotoʼoga Maʼuhiga ʼAupito ʼo Te Taʼu
1 Kapau ʼe tou kau ki te Taumafa ʼo Te ʼAliki, ʼaē ka fai ʼi te ʼosi tō ʼo te laʼā ʼi te ʼaho 28 ʼo Malesio 2002, ʼe tou fakahā ai ʼe tou logo tahi ʼi te fiafia mo Sehova ʼAtua pea mo Sesu Kilisito. ʼI te toʼotoʼoga makehe ʼaia, ko te toe ʼo te kau Kilisitiano fakanofo, ʼe nātou kau anai ki te “fakatahi” makehe mo te tahi kau maʼu tofiʼa ʼo te Puleʼaga, mo te Tāmai pea mo tona ʼAlo. (1 Soa. 1:3; Ef. 1:11, 12) Ko te lauʼi miliona “tahi ʼu ōvi” ʼe nātou fakakaukauʼi anai tanatou pilivilesio makehe, ʼaē ko te logo tahi mo Sehova pea mo tona ʼAlo, ke nātou lototahi mo manatu tahi mo nātou ʼi te fakahoko ʼo te gāue ʼa te ʼAtua!—Soa. 10:16, MN.
2 Tou Gāue Tahi ʼAki He ʼu Felogoi Lelei: Ko Sehova pea mo Sesu, tuʼumaʼu pe neʼe nā logo tahi ʼi te fiafia. ʼE nā felogoi lelei talu mai fualoa, ka heʼeki fakatupu te tagata. (Mik. 5:2) Kua tuputupu ia nāua he feʼofaʼofani mālohi. ʼI tona fakatātā ki te poto, neʼe ʼui fēnei e te ʼuluaki Foha ʼaia ʼi tona maʼuli ʼi selo ka heʼeki tupu tagata: “Neʼe ʼau liliu ai ko he tahi neʼe ʼofa tāfito ki ai [ia Sehova] ʼi te ʼaho mo te ʼaho, ʼo ʼau fiafia ʼi ʼona muʼa ʼi te temi fuli pe.” (Taag. 8:30) Neʼe malave ʼaupito ki te ʼAlo ʼo te ʼAtua, te ʼu lauʼi sēkulō ʼaē neʼe fakatahi lelei ai mo te Matapuna ʼo te ʼofa!—1 Soa. 4:8.
3 Neʼe mole galo kia Sehova ʼe tonu ke totogi te malamanei mai te agahala, koia neʼe ina filifili ai tona ʼAlo ʼulu tokotahi, ʼaē neʼe ʼofa ʼaupito ki te malamanei, ke ina foaki te totogi faka sakilifisio, ʼaē ko tatatou ʼamanaki pe ʼaia e tahi. (Taag. 8:31) Ohage pe ko te logo tahi ʼa Sehova pea mo tona ʼAlo moʼo fakahoko tanā fakatuʼutuʼu, koia ʼe tou logo tahi mo nāua, pea mo tou logo tahi ʼi he ʼofa mālohi, ʼo fai fakafiafia te finegalo ʼo te ʼAtua.
4 Tou Fakafetaʼi ʼAki Totatou Loto Katoa: Kapau ʼe tou kau ki te ʼAho Fakamanatu, ʼo tou fakalogo lelei pea mo aga fakaʼapaʼapa, pea ʼe tou lava fakahā ai ʼe tou fakafetaʼi moʼoni ki te ʼofa ʼa Sehova pea mo te sakilifisio ʼaē neʼe fai e tona ʼAlo maʼa tatou. ʼE tou talanoa tāfito anai ki te faʼifaʼitaki ʼofa ʼaē neʼe tuku mai e Sesu, tana agatonu ʼo aʼu ki tona mate moʼo foaki te totogi, mo tona nofo Hau ʼi te Puleʼaga ʼo te ʼAtua, pea mo te ʼu tapuakina ʼaē ka foaki anai e te Puleʼaga ʼaia ki te malamanei. ʼE toe fakamanatuʼi mai anai ke tou haga fakahā tatatou tui, ʼo tou gāue mālohi ʼo mulimuli ki te finegalo ʼa Sehova, ʼi totatou ʼuhiga “kaugā gāue ʼi te moʼoni.”—3 Soa. 8, MN; Skp. 2:17.
5 Tou Tokoni Ki ʼIhi Ke Nātou Kau Mo Tatou: ʼE tonu ke faigaʼi mālohi e te kolesi ʼo te kau tagata ʼāfea ke nātou fakaloto mālohiʼi te kau Fakamoʼoni fuli ʼo te telituale ʼaē mole kei fai faka mafola, ke nātou kau ki te Fakamanatu ʼo te mate ʼa Kilisito. (Mat. 18:12, 13) Koutou tohi te ʼu higoa ʼo nātou ʼaē ʼe tonu ke ʼaʼahi, ke mole galoʼi he tahi, pea ke fakaafe fuli ia nātou ki te ʼaho ʼaia.
6 ʼE ʼi ai koa ʼihi hahaʼi ʼe koutou ʼiloʼi ʼe feala hanatou ʼōmai ki te Fakamanatu? Koutou faigaʼi ʼo uga nātou ke nātou fia ʼōmai ki te toʼotoʼoga ʼaia. Koutou ʼolo ʼo fakaafe mai nātou, pea ke nātou logoʼi ʼe tou tali lelei nātou. Tou faigaʼi mālohi ke tou fakaafe ki te toʼotoʼoga maʼuhiga ʼaia ʼo te taʼu, ia tatatou kau ako Tohi-Tapu fuli, mo te tahi ʼu hahaʼi ʼaē ʼe fia logo, mo totatou ʼu famili pea mo feʼilo. ʼE lava maʼu te ʼu tapuakina ʼo te totogi e te hahaʼi fuli ʼaē ʼe nātou ako “te mauhiga o te iloi o Kilisito Sesu.” (Filp. 3:8) Ko nātou ʼaē ʼe nātou tui ki te sakilifisio ʼa Sesu ʼe nātou lava maʼu te ʼamanaki mālohi ʼo te maʼuli heʼegata.—Soa. 3:16.
7 ʼAua naʼa galo kia tatou ʼe lava malave mālohi te Fakamanatu ki te hahaʼi fakamalotoloto. Kua hili kiai taʼu e lua, ʼi te motu ʼo Papua Niu Kini, ko te ʼu hahaʼi e toko 11 neʼe nātou ʼolo ʼi te kiʼi vaka lolotoga hola e 17 ʼi te tai tokakovi, ke feala hanatou kau ki te ʼaho ʼaia. Koteā tona tupuʼaga? Neʼe nātou ʼui fēnei: “Neʼe maʼuhiga kia mātou te ʼaho ʼaia, koia neʼe mātou fia kau ki te Fakamanatu ʼa Kilisito mo tomatou ʼu tēhina mo tuagaʼane.” Koutou fakakaukauʼi age muʼa te lotomālohi ʼo te ʼu hahaʼi ʼaia, pea mo tanatou loto fakafetaʼi ki tanatou logo tahi ʼi te fiafia mo Sehova, mo tona ʼAlo, pea mo te ʼu tēhina mo tuagaʼane!
8 Koutou kole ki te hahaʼi foʼofoʼou fuli ke fai hanatou ako Tohi-Tapu. Koutou fakaloto mālohiʼi nātou ke nātou ʼōmai tuʼumaʼu ki te ʼu fono, pea ke nātou fakahā ki ʼihi hahaʼi te ʼu moʼoni ʼaē ʼe nātou ako. Koutou tokoni age ke nātou “haʼele ʼi te mālama” pea mo “maʼuliʼi te moʼoni” ʼo nātou fakahoko te ʼu pelesepeto faka Tohi-Tapu ʼi tonatou maʼuli. (1 Soa. 1:6, 7, MN ) Koutou lagolago kia nātou ke feala hanatou maʼu he ʼu felogoi lelei mo Sehova, pea ke nātou haga fakatuputupu tanatou faka maʼuhigaʼi te pilivilesio ʼaē ko te fai ʼo tona finegalo ʼi te logo tahi.
9 ʼE ko he pilivilesio fakaofoofo hatatou logo tahi ʼi te fiafia “ ʼi he ʼatamai e tahi, ʼo [tou] faiga ʼaki he nefesi e tahi maʼa te tui ʼo te logo lelei”! (Filp. 1:27, 28, MN ) Tou fakatalitali ki te fakatahi fakafiafia ʼaē ka hoko ʼi te Fakamanatu ʼo te ʼaho 28 ʼo Malesio, ʼo tou fakafetaʼi tuʼumaʼu kia Sehova pea mo tona ʼAlo!—Luka 22:19.