Te Tohi Mai Te Kolesi Pule

“Ke koutou maʼu te ʼofa makehe pea mo te tokalelei mai te ʼAtua, totatou Tāmai pea mo te ʼAliki ko Sesu Kilisito.” Neʼe ko te ʼu palalau ʼaia ʼa Paulo neʼe ina fakaʼaogaʼi putuputu ʼi tana ʼu tohi moʼo fakamālo ki te ʼu kokelekasio. Ko he ʼu palalau ʼe mātou fakaʼamu kiā koutou fuli.​—Ef. 1:​2, MN.

ʼE tou loto fakafetaʼi ki te fakahā e Sehova tona ʼofa makehe ʼaki ia te sākilifisio faitotogi ʼo Kilisito Sesu! ʼAki te totogi ʼaia, ʼe tali leleiʼi tatou e te ʼAtua. Neʼe mole feala ke leleiʼia tatou e te ʼAtua ʼaki pe tatatou ʼu faiga ʼo tatou totonu, tatau aipe peʼe tou ako fakamalotoloto ia te Tohi-Tapu, peʼe tou faka mafola te logo lelei, peʼe tou fakahoko he tahi age ʼu gāue lelei. Ko te fakamolemole ʼo te ʼu agahala pea mo te maʼuli heʼegata ʼe foaki mai kiā tatou, ʼe mole ko he fakapale ʼuhi ko tatatou ʼu faiga, kae ʼe ko he ʼu meʼa ʼofa ʼe ʼiloga ai ia te ʼofa makehe ʼa Sehova ʼaki ia Sesu Kilisito.​—Loma 11:⁠6.

Neʼe tohi fēnei e Paulo ki tona ʼu tēhina: “ ʼE mātou . . . kole mamahi atu kiā koutou ke ʼaua naʼa ʼalu noa takotou tali ia te ʼofa makehe ʼo te ʼAtua. Heʼe ina ʼui fēnei: ‘Neʼe au fagono kiā te koe ʼi te temi faigamālie, pea ʼi te ʼaho ʼo te hāofaki neʼe au tokoni kiā te koe.’ Koʼeni! Ko te temi ʼaenī ʼe faigamālie tāfito. Koʼeni! Ko te temi ʼaenī ʼe ko te ʼaho ʼo te hāofaki.” Neʼe ʼi ai “te temi faigamālie” ʼi muʼa ʼo te fakaʼauha ʼo Selusalemi ʼi te ʼuluaki sēkulō. Ko te hahaʼi loto moʼoni ʼaē neʼe ʼoʼofa kiā Sehova neʼe kua hāofaki nātou ʼi te faʼahi fakalaumālie. Koia neʼe tupu ai te hāofaki fakasino ʼo te kau agatonu fuli ʼaia ʼaē neʼe feholaki mai Selusalemi ʼi muʼa ʼo tona fakaʼauha ʼi te taʼu 70 ʼo totatou temi.​—2 Ko. 6:​1, 2, MN.

ʼO toe feiā iā ʼaho nei, ʼe tou māʼuʼuli ʼi he “temi faigamālie” pea mo he “ ʼaho ʼo te hāofaki.” Ko nātou ʼaē ʼe tali e Sehova ohage ko tana ʼu kaugana pea mo hāofaki nātou ʼi te faʼahi fakalaumālie, ʼe nātou ʼamanaki ke hāofaki nātou ʼi “te ʼaho lahi ʼo Sehova” ʼaē kua ōvi mai.​—Sofo. 1:⁠14.

Ko te hoko mai ʼo te ʼaho ʼo Sehova ʼe ina tuku mai kiā tatou he maʼua. ʼE tonu ke tou fakatokaga ki te hahaʼi ia te ʼaho ʼaia pea mo tokoni ki te hahaʼi loto moʼoni ke nātou maʼu te ʼofa makehe ʼo Sehova, ke feala ke hāofaki mo nātou. Neʼe mahino kiā Paulo ia te maʼuhiga ʼo te maʼua ʼaia. Neʼe ina tohi fēnei: “Malaia kia te au kapau e mole au fagonogono te Evaselio!” Neʼe ina toe fakahā te meʼa ʼaē neʼe ina logoʼi ʼi tona loto ʼi tana ʼui fēnei: “ ʼE ʼi ai toku maʼua . . . ki te hahaʼi ʼatamai pea mo nātou ʼe vavale: koia la ʼaē ʼe au toe lotomālohi ai foki ke au fakahā . . . te logo lelei.”​—1 Ko. 9:16; Loma 1:​14, 15, MN.

Kiā mata ʼo Sehova, ʼe ko tatatou hala anai mo kapau ʼe mole tou fakahoko fakalelei te gāue maʼuhiga ʼaē ko te fakaʼiloʼilo ki te hahaʼi. ʼE tou ʼiloʼi te ʼu palalau ʼaē neʼe fai e Sehova ki te polofeta ko Esekiele: “Foha ʼo te tagata​—neʼe au fakanofo koe ko te tagata leʼo ʼo te ʼapi ʼo Iselaele, pea ʼe tonu anai ke ke fakalogo ki te ʼu folafola mai toku gutu pea ʼe tonu anai ke ke fakatokagaʼi nātou maʼa aku. Kapau ʼe au ʼui age ki he tahi ʼe agakovi, ‘ ʼE ke mate moʼoni anai,’ pea kapau ʼe mole ke fakatokagaʼi ia ia pea mo palalau moʼo fakatokagaʼi ʼo te tagata agakovi ke maliu mai tana agakovi, ke feala ai he hāofaki ʼo tona maʼuli, ko te tagata agakovi ʼaia, ʼe mate anai ʼi tana hala, kae ko tona toto, ʼe au kole atu anai mai tou nima.”​—Esk. 3:​17, 18.

ʼE faigataʼa te maʼuli ʼi te ʼu ʼaho fakaʼosi ʼaenī. ʼE mole faigafua hatatou fakafuafua lelei te fai ʼo totatou ʼu maʼua faka famili, tatatou gāue fakamālama, tatatou ʼu gāue ʼi te kokelekasio, pea mo te fai faka mafola. Tahi ʼaē meʼa, tokolahi ia koutou ʼe māhahaki, mo lotovaivai, mo mātutuʼa, pea lagi koutou tau mo te ʼu fakafeagai. Tokolahi ia koutou ʼe “mafasia.” ʼE mātou fia fakahā atu tamatou lotomahino ki tokotou ʼu ʼaluʼaga, ohage pe ko tona ʼui e Sesu: “Ke omai kia te au, ia natou fuape e mamahi pea mo natou e mafasia i te fua kavega, pea e au fakafimalieʼi anai koutou.” (Mat. 11:28) ʼE mātou fia vikiʼi ia koutou fuli ʼaē ʼe koutou faiga ke koutou haga tauhi agatonu kiā Sehova logola te ʼu faigataʼaʼia kehekehe.

ʼAki takotou faʼafai ʼi te gāue fai faka mafola pea mo te faiako, pea ʼaki te tapuakina ʼa Sehova, ko hahaʼi ʼe teitei 4 762 ʼi te malamanei ʼe nātou papitema ʼi te vāhaʼa fuli. ʼI te taʼu ʼaenī kua hili, neʼe fakatuʼu te ʼu kokelekasio foʼou e 1 375. ʼE mātou fakaʼamu pea mo faikole ko te tohi foʼou Koteā ʼaē ʼe akoʼi moʼoni mai ʼi te Tohi-Tapu?, ʼaē kua fakaliliu ia lea e 120, ʼe tokoni anai ki te ʼu lauʼi miliona hahaʼi ke nātou maʼu te ʼofa makehe pea mo te tokalelei ʼo Sehova ʼi te “ ʼaho ʼo te hāofaki” ʼaenī.

ʼE ʼofa mamahi atu ia te Kolesi Pule pea ʼe mātou hūfakiʼi koutou. ʼE mātou toe fakamālo atu ki takotou hūfakiʼi ʼo mātou.

Tokotou ʼu tēhina,

Te Kolesi Pule ʼa Te Kau Fakamoʼoni ʼa Sehova