Te Tohi Mai Te Kolesi Pule
OHAGĒ ko tona fai e Sesu, ʼe tou faikole fakamālotoloto fēnei ki te ʼAtua: “Ke tapuha tou Huafa.” ʼI totatou ʼuhiga kau Fakamoʼoni ʼa Sehova, ʼe tou fakahā ʼi totatou maʼuli tatatou fia mulimuli ki te faikole ʼaia. ʼE mahino ia, ʼe mole tonu ke gata ʼaki pē tatatou ʼiloʼi ia te huafa ʼo te ʼAtua, kae ʼe toe maʼua foki ke tou fakaʼaogaʼi mo te ʼu faigamālie fuli moʼo fakakolōliaʼi ia te huafa ʼaia. Koia, ko te pilivilēsio maʼuhiga ʼaupitō ʼaē ʼe feala ke tou maʼu fuli, ʼe ko te fakahigoaʼi ʼo tātou ko he kau Fakamoʼoni ʼa Sehova.—Mat. 6:9; Isa. 43:10.
Ohagē ko tona ʼui iā Pesalemo 110:3, ʼe lotolelei ia te hahaʼi ʼa Sehova ke natou lagolago ki te gāue ʼaē neʼe fakatotonu age e Sehova. He koʼē koa ko te ʼu hahaʼi ʼo te ʼu taʼiake kehekehe pea mai te ʼu fenua kehekehe ʼe natou lagolago ki te gāue fai faka mafola? ʼE tupu tāfito heʼe natou ʼoʼofa ki te ʼAtua pea kua natou foaki ia tonatou maʼuli kiā te ia. Iā Teutalonome 6:5, 6, ʼe fakatotonu mai ke tou ʼoʼofa kiā Sehova ʼaki ‘totatou loto kātoa, mo totatou nefesi kātoa, pea mo totatou mālohi kātoa.’ Ko te ʼofa ʼaia ʼe ina uga tātou ke tou fakaʼaogaʼi totatou temi, mo totatou mālohi, pea mo totatou ʼu koloa moʼo lagolago ki te ʼu gāue ʼo te Puleʼaga ʼo te ʼAtua, ohagē lā ko tatatou lagolago mālohi ki te minisitelio ʼo mulimuli ki totatou ʼu fealagia.
ʼE ʼofa ia Sehova ki te mālamanei, ko te tupuʼaga lā ʼaia ʼo tana takitaki ia te tala ʼo te logo lelei ʼo tona Puleʼaga ʼi te mālamanei kātoa. ʼE mole ina loto ke fakaʼauha he tahi kae ke fakahemala ia te hahaʼi fuli mai tanatou ʼu aga ʼaē ʼe kovi pea mo fakaovi ki tonatou Tupuʼaga ke ina haofaki nātou. (2 Pet. 3:9) ʼE ʼui fēnei e Sehova: “ ʼE au leleiʼia, mole ko te mate ʼo te tagata agakovi, kae ke au sio ki he tahi ʼe agakovi ʼe toe liliu mai tona ala pea ke maʼuli.” (Esk. 33:11) Kā tou kau ki te minisitelio, pea ʼe tou sisio moʼoni ai ki te ʼofa ʼo Sehova ki te hahaʼi. ʼE mahino papau ia, ʼe tupu ai totatou fiafia mokā tou kau ki te gāue maʼuhiga ʼaia.
ʼE toe hā totatou ʼofa lahi kiā Sehova ʼi tatatou faʼahiga fakaʼaogaʼi ia tana Folafola, te Tohi-Tapu. Kanapau lā neʼe mole tou maʼu ia te Tohi-Tapu, pea neʼe mole feala ke tou ʼiloʼi ia te ʼAtua pea mo tou fakaovi kiā te ia, ohagē ko te fakaafe ʼaē ʼe tou maʼu iā Sakopo 4:8. Neʼe mole toe feala ai ke tou ʼiloʼi te tupuʼaga ʼo totatou maʼuli pea mo totatou kā haʼu. Neʼe mole toe feala ai foki ke tou mahino ʼe tou tau mo te ʼu fihifihia ʼuhi ko tatatou kui ia Atama. (Loma 5:12) Neʼe mole toe feala foki ke tou ʼiloʼi ia te ʼofa lahi ʼo te ʼAtua ʼi tana momoli mai tona ʼAlo ʼulu tokotahi ko he totogi maʼa tātou. Neʼe vaevae mai e Sehova he koga ʼo tona ʼatamai mālama, mo tona poto, pea mo tana mahino ʼi te tahi atu ʼu faʼahi. ʼE maʼuhiga ʼaupitō anai kiā tātou ia te meʼa ʼofa ʼaē neʼe ina foaki mai, tana Folafola ʼaē neʼe tohi ʼaki te takitaki ʼo tona laumālie. Ko totatou loto fakafetaʼi ki te meʼa ʼofa fakatalakitupua ʼaia, ʼe ina uga tātou ke tou ‘fakaʼaogaʼi totatou temi’ moʼo lau, mo ako pea mo metitāsioʼi ia tana ʼu folafola. (Efe. 5:15, 16; Pes. 1:1-3) ʼE mole tonu ʼi he ʼaho ke tou fakahemala ʼo ʼuhiga mo te temi ʼaē ʼe tou fakaʼaogaʼi moʼo lau ʼi te ʼaho fuli ia te Folafola ʼa te ʼAtua. Kae ʼi totatou ʼofa ki te ʼAtua, ʼe tonu ke tou nonofo ovi ki tana Folafola, ke feala ke tou ʼiloʼi lelei age ia ia pea mo lahi age totatou ʼofa kiā te ia.
Neʼe tou ako ʼi te Tohi-Tapu, ʼi te temi ʼaē neʼe agahala ai ia Atama kiā Sehova, neʼe ina foaki ki tona hōloga kātoa, ʼo kau kiai mo tātou takitokotahi, ia he maʼuli fakaʼofaʼofa pea mo te heʼe ʼamanaki. Kae neʼe fetogi e te ʼAtua te ʼaluʼaga ʼaia ʼo te mālamanei, ʼo ina fai ai he ʼu gāue ke hoko moʼoni tana fakatuʼutuʼu ʼaē ʼo ʼuhiga mo te kele.—Sen. 3:15.
ʼE mahino ia, ko tātou fuli ʼe tou loto moʼoni ke tapuhā te huafa fakatalakitupua ʼo totatou ʼAtua. ʼI te tuputupu ʼo tatatou mālama ʼaē ki te fakaofoofo ʼo Sehova ʼAtua, ʼe ina uga ai tātou ke tou lagolago kiā te ia pea mo tana kautahi, ke ʼiloʼi e te hahaʼi tona huafa lahi pea mo tana fakatuʼutuʼu. ʼE tou tui papau ai ʼe ʼofa kiā tātou pea mo ina tapuakina tātou, pea mo tou maʼu he kā haʼu heʼegata ʼi te mālama foʼou.
Ko mātou ʼo te Kolesi Pule ʼe matou fia fakahā atu tomatou ʼofa kiā koutou, ʼu tehina mo tuagaʼane. ʼE matou toe fia fakahā atu tomatou loto fakafetaʼi ʼaupitō ki takotou ʼu faiga moʼo fakaʼaogaʼi ʼo te temi ʼaē ʼe kei toe moʼo fakaaʼu ia te logo lelei ki te hahaʼi ʼi te mālamanei kātoa, ʼi muʼa ʼo te hoko mai ʼo “te mamahi lahi.” (Apk. 7:14, MN ) ʼI takotou fai ia te faʼahi ʼaia, ʼe kotou foaki ai kiā nātou ia te fealagia ʼaē neʼe kotou maʼu mo koutou, ʼaē ko te maʼu ʼo te ʼatamai mālama ʼo ʼuhiga mo te ʼAtua pea mo Kilisito ʼaē ʼe ina taki ki te maʼuli heʼegata.—Soa. 17:3.
Tokotou ʼu tehina
Te Kolesi Pule ʼo Te Kau Fakamoʼoni ʼa Sehova