Kotou Tokoni Ki Te Kau Matapule Ke Natou Tauhi Kia Sehova ʼi Te Fiafia

1, 2. (1) Kotea te ʼu fihifihia ʼe felaveʼi mo ʼotatou tehina mo tuagaʼane matapule? (2) Kotea te ʼu fehuʼi ʼe feala ke tou fai?

ʼE FAKAMATALA fenei e te tehina ko Lije: “Neʼe kamata fetauʼaki te hahaʼi ʼi Burundi, kaʼe lolotoga fai tamatou fakatahi. Neʼe ko au mo ʼaku matuʼā pea mo te toko 11 ʼo toku famili. Pea neʼe matou sisio ki te feleleʼi ʼa te hahaʼi pea mo tanatou faifana. Neʼe matou feholaki atu aipe. Neʼe ʼi ai ʼihi ʼi toku famili neʼe kaku ki te nofoʼaga ʼo te kau matapule ʼi Malawi. Neʼe natou feholaki ia kilometa ʼe 1 600 tupu. Kaʼe ko ʼihi neʼe natou feholaki ki he tahi age ʼu koga meʼa.”

² ʼI te malamanei katoa, ʼe lau ko te toko 65 miliona tupu hahaʼi neʼe natou feholaki mai ʼonatou nofoʼaga ʼuhi ko te tau peʼe ko te fakataga. Neʼe ko te hoki lau ʼae ʼo te toe kaugā malie feia.a (Vakaʼi te kiʼi nota.) Ia natou fuli ʼaia, ʼe ʼi ai te kau Fakamoʼoni ʼa Sehova ʼe toko lauʼi afe. Tokolahi ia natou, kua mamate ʼihi ʼi ʼonatou famili pea mo puli ʼonatou koloa fuli. Kotea te tahi ʼu fihifihia ʼe tau mo natou? ʼE feafeaʼi hatatou tokoni ki ʼotatou tehina mo tuagaʼane ke natou tauhi kia Sehova, pea mo taupau tanatou fiafia logo la te ʼu faigataʼaʼia? (Pesalemo 100:2) Kotea he faʼahiga faifakamafola ʼe tonu ke tou fai ki te kau matapule ʼae ʼe mole heʼeki natou iloʼi ia Sehova?

TE MAʼULI ʼO HE MATAPULE

3. He koʼe neʼe tonu ke feholaki te famili ʼo Sesu pea mo te tokolahi ʼo ʼana tisipulo?

³ Neʼe fekauʼi e Sehova tana ʼaselo ke alu ʼo fakatokaga kia Sosefo, ʼe faigaʼi e te Hau ko Helote ke matehi ia Sesu. Koia neʼe feholaki ai ia Sosefo mo Malia pea mo Sesu ki Esipito. Neʼe natou nonofo ai ʼo kaku ki te mate ʼo Helote. (Mateo 2:​13, 14, 19-21) ʼI ni taʼu ki muli age, neʼe fakatagaʼi te ʼu tisipulo ʼa Sesu. Koia “neʼe natou mavetevete fuli ʼi te ʼu potu fenua ʼo Sutea pea mo Samalia.” (Gaue 8:1) Neʼe iloʼi e Sesu, ko te tokolahi ʼi ʼana tisipulo, ʼe tonu anai ke natou feholaki mai ʼonatou ʼapi. Neʼe ina ui fenei: “Ka fakatagaʼi koutou ʼi he kolo, kotou feholaki ki he tahi age kolo.” (Mateo 10:23) Kaʼe ʼe mole faigafua takita liakī feiaʼi tokita ʼapi.

4, 5. Kotea te ʼu tuʼutamaki ʼe feala ke hoko kia natou ʼae (1) ʼe feholaki mai ʼonatou fenua? (2) ʼe maʼuʼuli ʼi te nofoʼaga ʼo te kau matapule?

⁴ Tatau aipe pe ʼe hola he tahi ʼi tona ʼapi peʼe nofo ʼi te nofoʼaga ʼo te kau matapule, ʼe feala pe ke tuʼutamakiʼia tona maʼuli. Neʼe ui fenei e te kiʼi tehina ʼo Lije, ʼe higoa ko Gad: “Neʼe matou haʼele lolotoga ni vahaʼa, pea neʼe matou sisio ki te ʼu lauʼi teau sino mate. Kaʼe neʼe kei au taʼu 12 pe. Neʼe au ui age ki toku famili ke natou mumuʼa he ʼe mamahi fau ʼoku vaʼe. Kaʼe neʼe mataku taku tamai naʼa maʼu au e te kau fakafeagai, koia ʼae neʼe ina fata ai au. ʼI te ʼaho fuli, neʼe matou faiga ke matou maʼuʼuli. Neʼe matou faikole pea mo tuku tamatou falala kia Sehova. ʼI ʼihi temi neʼe matou kakai pe ki te ʼu mago ʼae neʼe matou maʼu ʼi te vaʼe ala.”​—Filipe 4:​12, 13.

⁵ Tokolahi ’i te famili ʼo Lije neʼe maʼuʼuli lolotoga ni taʼu ʼi te ʼu nofoʼaga ʼo te kau matapule ʼo te Kautahi ʼo Te ʼu Puleʼaga. Kaʼe ʼe toe faigataʼa foki te maʼuli ʼi te ʼu nofoʼaga ʼaia. ʼI te temi nei, kua liliu ia Lije ko he taupau ʼo te siliko. ʼE ina ui fenei: “Tokolahi te hahaʼi ʼe mole hanatou gaue. ʼE natou faifatufatu, mo inu kava, mo gaoʼi paʼaga, mo kaihaʼa pea mo fai ni aga heʼe ʼaoga.” Koia ke feala honatou puipui mai te ʼu aga ʼaia, neʼe tonu ki te kau Fakamoʼoni ʼa Sehova ke natou maʼumaʼua ʼi te ʼu gaue ʼo te kokelekasio. (Hepeleo 6:​11, 12; 10:​24, 25) Neʼe natou fakaʼaogaʼi lelei tonatou temi, ke feala ai hanatou fakamalohi tanatou tui, pea tokolahi ia natou neʼe natou toʼo tanatou selevisi pionie. ʼE natou manatuʼi ʼe mole natou nonofo anai ʼi te nofoʼaga ʼo te kau matapule ʼo talu ai. Ohage pe ko te kau Iselaele, neʼe ʼi ai pe te ʼaho neʼe gata ai tanatou feoloʼaki ʼi te toafa. Neʼe ko he tokoni ʼaia kia natou ke natou taupau he ʼamanaki lelei ʼo ʼuhiga mo te ka haʼu.​—2 Kolonito 4:18.

TOU ʼOʼOFA KI TE KAU MATAPULE

6, 7. (1) Kapau ʼe tou “ ʼofa ki te ʼAtua,” ʼe feafeaʼi anai hatatou fakaha totatou ʼofa ki ʼotatou tehina mo tuagaʼane? (2) Kotou tuku mai he faʼifaʼitaki.

⁶ ʼE tou ʼoʼofa ki ʼotatou tehina mo tuagaʼane ʼuhi ko totatou “ ʼofa ki te ʼAtua.” Pea ʼe tou fakaha totatou ʼofa, tafito la moka hoko he ʼu aluʼaga faigataʼa. (Lau ia 1 Soane 3:​17, 18.) Ohage la, ʼi te temi muʼa, neʼe ʼi ai te hoge lahi neʼe hoko ʼi te potu fenua ko Sutea. Pea neʼe fakatuʼutuʼu ai e te ʼu tisipulo ke natou momoli he tokoni ki te ʼu tehina Kilisitiano ʼae neʼe maʼuʼuli ʼi ai. (Gaue 11:​28, 29) Neʼe fakalotomalohiʼi e te ʼu apositolo ko Paulo pea mo Petelo ia te kau Kilisitiano ke natou fefakahaʼaki tanatou tali kaiga lelei. (Loma 12:13; 1 Petelo 4:9) ʼE fakalotomalohiʼi te kau Kilisitiano ke natou agalelei ki ʼonatou tehina mo tuagaʼane ʼae ʼe ʼomai mai he tahi age ʼu fenua. Koia ʼae ʼe tonu ai ke tou agalelei mo tatou ki ʼotatou tehina mo tuagaʼane ʼae neʼe natou feholaki mai moʼo haofaki ʼonatou maʼuli, peʼe ko natou ʼae neʼe fakatagaʼi ʼuhi ko tanatou tui.b (Vakaʼi te kiʼi nota.)​—Lau ia Taaga Lea 3:27.

⁷ Mole faʼa fualoa ki ai, neʼe feholaki te toko lauʼi afe kau Fakamoʼoni ʼa Sehova mai ʼonatou fenua, ʼuhi ko te tau pea mo te ʼu fakataga ʼae neʼe hoko ʼi te potu Esite ʼo Ukraine. Meʼa fakaʼofaʼofa, he neʼe ʼi ai ʼihi ia natou neʼe matematehi. Kaʼe tokolahi ʼi ʼotatou tehina ʼae neʼe feholaki mai, neʼe fakaʼapi natou e te ʼu tehina mo tuagaʼane ʼo te tahi ʼu potu fenua ʼo Ukraine pea mo Lusia. Neʼe nonofo agatonu te ʼu tehina ʼi te ʼu fenua ʼaia ʼe lua. Neʼe mole natou “kau ki te malama ʼaeni,” pea ʼe kei natou hoko atu pe tanatou fakamafola “te logo lelei ʼo te folafola.”​—Soane 15:19; Gaue 8:4.

TOU TOKONI KI TE KAU MATAPULE KE MALOHI TANATOU TUI

8, 9. (1) Kotea te ’u faigataʼaʼia ʼe tau mo te kau matapule? (2) He koʼe ʼe tonu ke tou faʼa kataki moka tou tokoni kia natou?

⁸ ʼE ʼi ai ʼihi neʼe maʼua ke natou olo ʼo maʼuʼuli ʼi he tahi age potu ʼo tonatou fenua. Kaʼe tokolahi natou ʼae neʼe maʼua ke olo ki he fenua matapule. ʼE moʼoni, ʼe tokoni te ʼu puleʼaga ki te kau matapule, ʼo natou foaki age hanatou meʼa kai, mo honatou ʼu mutuʼi meʼa pea mo honatou ʼu nofoʼaga, kaʼe ʼe ʼi ai pe te ʼu faigataʼaʼia. Ohage la, ʼe natou kakai ki he meʼa kai neʼe mole natou mahani ki ai. ʼE ʼi ai ʼihi neʼe ʼomai mai te ʼu fenua vevela, pea ʼe mole natou iloʼi pe ʼe kotea te ʼu mutuʼi meʼa ʼae ʼe tonu ke natou tui ʼi te temi momoko. Ko ʼihi ʼe tonu ke natou ako te fakaʼaogaʼi ʼo te ʼu masini foʼou.

⁹ ʼE ʼi ai ʼihi puleʼaga ʼe natou tokoni ki te hahaʼi matapule ke natou fakamamahani mo te faʼahiga maʼuli ʼo te fenua. Kaʼe ʼe tonu leva foki ki te kau matapule ke natou lava tokakaga ki ʼonatou maʼuli ʼi te hoko atu. Koia ʼe mole faigafua anai ia. Kotou fakakaukauʼi age muʼa te ʼu faʼahi fuli ʼae ʼe tonu ke natou ako: te lea, te agaʼi fenua, te ʼu lao ʼo ʼuhiga mo te huʼi ʼo te ʼu maʼua, mo te totogi ʼo te ʼu tukuhau, mo te maʼua ʼae ke fakaako te tamaliki pea mo tonatou fakatonutonuʼi. ʼE ʼi ai koa hotatou ʼu tehina mo tuagaʼane matapule ʼe tau mo te ʼu faigataʼaʼia ʼaia? ʼE feala koa ke tou tokoni kia natou ʼaki he faʼa kataki pea mo he aga fakaʼapaʼapa?​—Filipe 2:​3, 4.

10. Kotea ʼae ʼe tonu ke tou fai moʼo fakamalohiʼi te tui ʼo ʼotatou tehina mo tuagaʼane matapule? (Vakaʼi te ʼuluaki pāki.)

¹⁰ ’I ʼihi temi, ʼe feala ke taʼofi e te puleʼaga ʼotatou tehina matapule, ke ʼaua naʼa natou fakatahi mo te kokelekasio. Ko ʼihi kautahi fakapuleʼaga ʼe natou fakamatakuʼi ʼotatou tehina ʼaki tanatou ui ʼe natou fakagata ai anai tanatou foaki age he tokoni. ʼE lagi natou ui ʼe kapu anai natou ʼi te fenua mo kapau ʼe natou fakafisi ki he gaue ʼuhi pe ko tanatou mole fia to fono. Pea ʼe ʼi ai ʼihi ʼe natou tali te ʼu gaue ʼaia koteʼuhi ʼe natou tuʼania pea mo lotovaivai. Koia ʼe tonu ai ke tou foimo fakafelaveʼi ki ʼotatou tehina mo tuagaʼane matapule ʼi te temi pe ʼae ʼe natou tau mai ai. ʼE tonu ke natou logoʼi ʼe tou tokagaʼi natou. Kapau ʼe tou fai te faʼahi ʼaia pea mo tokoni kia natou, ʼe feala ai anai ke malohi tanatou tui.​—Taaga Lea 12:25; 17:17.

TOU TOKONI KI TE KAU MATAPULE

11. (1) Kotea ʼae ʼe ʼuluaki ʼaoga ki te kau matapule? (2) ʼE fakaha feafeaʼi e te kau matapule tanatou lotofakafetaʼi?

¹¹ ʼI te kamata, ʼe lagi ʼaoga ke tou foaki age he meʼa kai peʼe ko he ʼu mutuʼi meʼa, peʼe ko te tahi age ʼu meʼa ʼe ʼaoga kia natou.c (Vakaʼi te kiʼi nota.) Maʼia pe la mo te ʼu kiʼi meʼa ʼofa, ʼe maʼuhiga kia natou. Ohage la, ʼe feala ke tou foaki he hekesi ki he tehina. ʼE moʼoni, ʼe mole tonu anai ki te kau matapule ke natou fakamaʼua mai ke tou tokoni age kia natou. Kaʼe ʼe natou lotofakafetaʼi anai kia natou ʼae ʼe tokoni age kia natou. Pea ʼe fiafia ai anai te ʼu tehina mo tuagaʼane ʼi tanatou lotofoaki. Kaʼe, ʼaki te temi, ʼe maʼuhiga ki te kau matapule ke natou faigaʼi ke natou kumi he ʼu puleʼaki ke natou taupau ʼonatou maʼuli. He ʼe kapau ʼe natou fai feia, ʼe natou fiafia ai anai pea ʼe natou felogoʼi lelei anai mo ʼonatou tehina. (2 Tesalonika 3:​7-10) Kaʼe ʼe lagi kei ʼaoga pe anai ke tou tokoni ki ʼotatou tehina mo tuagaʼane matapule.

12, 13. (1) ʼE feafeaʼi hakotou tokoni ki te kau matapule? (2) Kotou tuku mai he faʼifaʼitaki.

¹² ʼE mole ʼaoga ke lahi tatatou foʼi falā ke feala ai hatatou tokoni ki te kau matapule. Ko te faʼahi ʼae ʼe ʼaoga tafito kia natou, ko totatou ʼofa mo totatou temi. Ohage la, ʼe feala ke kotou fakamahino age kia natou pe ʼe feafeaʼi hanatou toʼo te ka, peʼe ko te saliote afi. ʼE feala ke kotou fakaha age te ʼu fale koloa ʼae ʼe maʼu ai he ʼu meʼa kai lelei kaʼe ʼe mole totogi kovi. ʼE feala ke kotou akoʼi age te fakaʼaogaʼi ʼo he masini tui peʼe ko he masini huo, ke feala hanatou gaue ke natou maʼu ai hanatou foʼi falā. Kaʼe ko te maʼuhiga, ke kotou tokoni age kia natou ke natou fakatahi mo tonatou kokelekasio foʼou. Kapau ʼe feala, kotou ʼave natou ki te ʼu fono. ʼE feala ke kotou fakamahino age pe ʼe feafeaʼi hanatou faifakamafola ʼi tonatou telituale pea mo kotou kaugā faifakamafola mo natou.

¹³ Neʼe ʼi ai te kau tupulaga matapule ʼe toko fa, neʼe ʼomai ki te kokelekasio. Pea neʼe tokoni te kau tagata ʼafeā kia natou. Neʼe natou akoʼi age te ʼuli motoka, mo te fai ʼo he tohi pea mo te kumi ʼo he gaue. Pea neʼe natou akoʼi age te fakaʼaogaʼi lelei ʼo tonatou temi, ke feala hanatou fakamuʼamuʼa tanatou tauhi ʼae kia Sehova. (Kalate 6:10) Mole faʼa fualoa ki ai, pea neʼe liliu leva te ʼu tehina ʼe toko fa ʼo pionie. Neʼe fua lelei ʼanatou faiga pea mo te tokoni ʼa te kau tagata ʼafeā ke natou fakahoko ʼanatou fakatuʼutuʼu ʼi tanatou tauhi kia Sehova. Koia neʼe natou tuputupu ai ʼi te faʼahi fakalaumalie pea neʼe mole natou kau ki te malama ʼa Satana.

14. (1) Kotea te ʼu fakahala ʼe tonu ke tekeʼi e te kau matapule? (2) Kotou tuku mai he faʼifaʼitaki.

¹⁴ ʼE hage pe ʼotatou tehina mo tuagaʼane matapule ko te kau Kilisitiano fuli. ʼE tonu ke natou tauʼi te ʼu fakahala mo te ʼu fakaneke ʼae ke natou fakamuʼamuʼa te ʼu koloa fakamalama ʼi tanatou tauhi ʼae kia Sehova.d (Vakaʼi te kiʼi nota.) ʼE manatuʼi e Lije pea mo ʼona tehina mo tuagaʼane, te ʼu ako ʼae neʼe natou maʼu mai tanatou tamai, ʼi te temi ʼae neʼe natou feholaki ai mai tonatou fenua. ʼE natou ui fenei: “Neʼe matou taki te kato neʼe fafaʼo ai te ʼu meʼa. Pea neʼe ina liakī takitahi te ʼu meʼa ʼae neʼe ʼi loto. Neʼe mole kei he meʼa ʼi te kato. Neʼe malimali ai pea mo ina ui mai kia matou: ‘Sio la koutou, ko te meʼa pe ʼaeni ʼe ʼaoga kia tatou!’”​—Lau ia 1 Timoteo 6:8.

TE TOKONI ʼAE ʼE MAʼUHIGA TAFITO KI TE KAU MATAPULE

15, 16. (1) Kotea ʼe feala ke tou fai moʼo fakamalohiʼi te tui ʼo ʼotatou tehina mo tuagaʼane matapule? (2) Kotea ʼe feala ke tou fai moʼo fakafimalieʼi ʼonatou loto?

¹⁵ ʼE mole ʼaoga pe ki te kau matapule ia te meʼa kai pea mo te ʼu mutuʼi meʼa. He ʼe toe ʼaoga foki ke fakalotofimalieʼi pea mo fakalotomalohiʼi natou ʼaki te Tohi-Tapu. (Mateo 4:4) ʼE feala ke foaki age e te kau tagata ʼafeā he ʼu tohi ʼi tanatou lea pea mo tokoni kia natou ke natou fakafelaveʼi mo he ʼu tehina mo tuagaʼane ʼe palalau ʼi tanatou lea. ʼE maʼuhiga ʼaupito ke fai te faʼahi ʼaia, koteʼuhi tokolahi te kau matapule neʼe natou tuku ia meʼa fuli, kaʼe natou feholaki mai ʼonatou fenua. Neʼe natou tuku ʼonatou famili pea mo tonatou kokelekasio. Koia ʼae ʼe tonu ai ke natou logoʼi te ʼofa ʼo Sehova pea mo te manavaʼofa ʼi te lotolotoiga ʼo te kokelekasio. He ʼe kapau ʼe mole natou logoʼi te faʼahi ʼaia, ʼe feala pe ke natou kumi tokoni ki te hahaʼi ʼae neʼe natou feholaki fakatahi mai, ʼae ʼe mole tauhi kia Sehova. (1 Kolonito 15:33) ʼE tonu foki ke natou logoʼi ʼe toe maʼuhiga mo natou ʼi totatou kokelekasio. Kapau ʼe tou fai feia, ʼe tou gaue fakatahi anai mo Sehova ki te puipui ʼo “te kau matapule.”​—Pesalemo 146:9.

¹⁶ Neʼe mole feala ke toe liliu ia Sesu mo tona famili kio natou. Neʼe tonu muʼa ke natou atalitali ke mamate te kau takitaki ʼae neʼe natou fia matehi ia natou. ʼE toe feia pe mo te kau matapule ia ʼaho nei, ʼe lagi mole feala peʼe mole natou toe fia liliu kio natou. Neʼe ui e Lije, ko te tokolahi neʼe natou sisio ki te fakaʼalikiʼi peʼe ko te fakapogi ʼo ʼihi ʼi ʼonatou famili. Koia ʼe mole kei natou toe fia liliu ai ki tonatou fenua mo ʼanatou fanau. Kapau ʼe kotou fia tokoni ki ʼokotou tehina mo tuagaʼane, ʼe tonu ke kotou “kaugā mamahi fakatahi, mo kotou maʼu te ʼofa fakatautehina, mo te manavaʼofa pea mo te agavaivai.” (1 Petelo 3:8) ʼE ʼi ai ʼihi kau matapule ʼe mole natou fia fakatahi mo te hahaʼi, koteʼuhi neʼe gaohi koviʼi natou. Pea ʼe lagi mole natou fia fakamatala te ʼu mamahi ʼae neʼe tau mo natou he ʼe natou ufiufi, tafito la moka nonofo ovi age ʼanatou fanau. Kotou fai te fehuʼi ʼaeni kia koutou: ‘Kapau la neʼe hoko te ʼu aluʼaga ʼaia kia au, kotea te aga ʼe au loto anai ke fai mai e te hahaʼi?’​—Mateo 7:12.

KA TOU FAIFAKAMAFOLA KI TE KAU MATAPULE ʼAE ʼE MOLE TAUHI KIA SEHOVA

17. He koʼe ʼe tou fakafimalieʼi te loto ʼo te kau matapule moka tou faifakamafola?

¹⁷ Ia ʼaho nei, tokolahi te kau matapule ʼe natou ʼomai mai te ʼu fenua ʼe tapuʼi ai te gaue faifakamafola. Koia, ko te toko lauʼi afe hahaʼi matapule, ʼe ko tanatou hoki logo ʼae ki “te logo ʼo te Puleʼaga” ʼuhi ko te ʼu faiga ʼa te kau Fakamoʼoni ʼa Sehova. (Mateo 13:​19, 23) Tokolahi ia natou ʼae ʼe “mafasia,” ʼe fakafimalieʼi ʼonatou loto ʼi tanatou kau ki ʼatatou fono. Koia neʼe natou ui atu aipe: “ ʼE nofo moʼoni te ʼAtua ia koutou.”​—Mateo 11:​28-​30; 1 Kolonito 14:25.

18, 19. Kotea ʼae ʼe tonu ke tou fai moka tou faifakamafola ki te kau matapule?

¹⁸ ʼE tonu ke tou fakapotopoto pea mo tou “tokakaga” moka tou faifakamafola ki te kau matapule. (Mateo 10:16; Taaga Lea 22:3) Tou faʼa kataki ʼo fakalogo lelei moka natou palalau mai, kaʼe ʼe mole tonu ke tou palalau ki te politike. ʼE mole tonu ke tou fai he meʼa ʼe feala ke fakatupu tuʼutamaki ai kia tatou peʼe ko ʼihi atu. Koia ʼe tonu ai ke tou mulimuli fakalelei ki te ʼu tokoni ʼae ʼe foaki mai e te filiale pea mo te puleʼaga. Tou manatuʼi ʼe kehekehe te ʼu lotu pea mo te ʼu agaʼi fenua ʼa te kau matapule. Koia ʼe tonu ai ke tou ako te ʼu faʼahi ʼaia ke tou mahino ki ai pea mo tou fakaʼapaʼapa ki ʼanatou manatu. Ohage la, ʼe ʼi ai ʼihi ʼe natou ʼomai mai he ʼu fenua ʼe mole feala ke faiteuteu faʼifaʼitaliha te hahaʼi fafine. Koia ka tou faifakamafola kia natou ʼaia, ʼe tonu ke tou tokakaga ki tatatou faʼahiga faiteuteu ke ʼaua naʼa natou iita.

¹⁹ ʼE tou fia tokoni ki te hahaʼi fuli ʼae ʼe lotomamahi, ʼo feia foki mo natou ʼae ʼe mole tauhi kia Sehova. Kapau ʼe tou fai te faʼahi ʼaia, ʼe tou faʼifaʼitakiʼi ia te tagata Samalitana ʼae neʼe talanoa ki ai ia Sesu. (Luka 10:​33-37) Kapau ʼe tou fia tokoni moʼoni ki te hahaʼi, ʼe tou akoʼi age anai kia natou te logo lelei. Neʼe ʼi ai te tagata ʼafeā neʼe tokoni ki te kau matapule. Neʼe ina ui ʼe maʼuhiga ke tou foimo fakaha age kia natou, ko tatou ko te kau Fakamoʼoni ʼa Sehova. ʼE tonu muʼa ke tou ui age, ʼe tou fia tokoni kia natou ke natou iloʼi te ʼamanaki taulekaleka ʼae ʼe tou maʼu ʼi te Tohi-Tapu. Pea ʼe maʼuhiga age te faʼahi ʼaia ʼi te ʼu koloa fakamalama ʼae ʼe feala ke tou foaki age kia natou.

TE ʼU FUA LELEI

20, 21. (1) Kotea te ʼu fua lelei moka tou ʼoʼofa fakamalotoloto ki te kau matapule? (2) Kotea ʼae ka tou vakaʼi anai ʼi te alatike ʼae ka hoa mai?

²⁰ ʼE ʼi ai te ʼu fua lelei moka tou ʼoʼofa fakamalotoloto ki “te kau matapule.” Tou vakaʼi te aluʼaga neʼe hoko ki te tuagaʼane ʼe higoa ko Alganesh. ʼI te mate ʼo tona ʼohoana neʼe feholaki mo ʼana fanau ʼe toko ono, mai te fenua ko Érythrée, ʼuhi ko te fakataga. Neʼe ʼaho valu tanatou feholaki ʼi te toafa. Hili ʼaia, neʼe natou tau atu leva ki te fenua ko Soudan. Neʼe natou gaʼegagaʼe ʼaupito. ʼE ina ui fenei: “Neʼe agalelei ʼosi te ʼu tehina mo tuagaʼane kia matou ohage pe neʼe matou famili. Neʼe natou foaki mai hamatou meʼa kai, mo homatou ʼu mutuʼi meʼa, mo homatou nofoʼaga, pea mo natou feʼaveʼaki matou. Ko ai ʼape ʼe ina fakatalitali lelei feia he ʼu matapule ʼi ʼonatou ʼapi, ʼuhi pe he ʼe natou tauhi ki te ʼAtua ʼe tahi? ʼE gata pe ki te kau Fakamoʼoni ʼa Sehova.”​—Lau ia Soane 13:35.

²¹ Kaʼe ʼe feafeaʼi leva ki te ʼu fanau ʼae neʼe ʼomai fakatahi mo ʼanatou matuʼā? ʼE tou vakaʼi anai ʼi te alatike ʼae ka hoa mai, pe ʼe tou lava tokoni feafeaʼi ki te ʼu famili ʼaia ke natou tauhi fakafiafia kia Sehova.