Ke Ke Lototoʼa Pea Mo Ke Gaue

1, 2. (1) Kotea ia te gaue maʼuhiga ʼae neʼe foaki kia Salomone? (2) He koʼe neʼe tuʼania ia Tavite ʼo ʼuhiga mo Salomone?

NEʼE filifili e Sehova ia Salomone ke ina fakahoko ia he gaue ʼe makehe. Neʼe tonu ke ina takitaki ia te laga ʼo te fale lotu ʼi Selusalemi, pea neʼe ko he toe gaue maʼuhiga ia. Neʼe tonu ke “lelei tukupau” te fale lotu pea ke logologona tona taulekaleka. Kaʼe ko te faʼahi ʼae ʼe maʼuhiga tafito, he ʼe ko ‘te fale ʼo Sehova te ʼAtua moʼoni.’—1 Koloniko 22:1, 5, 9-11.

² Neʼe falala te Hau ko Tavite ʼe lagolago anai ia te ʼAtua kia Salomone. Kaʼe neʼe kei tamasiʼi fau pea neʼe heʼeki fakapotopoto ia Salomone. ʼE ina maʼu anai koa te lototoʼa moʼo fakahoko ia te gaue? Peʼe mole ina lavaʼi anai ia ʼuhi ko tana kei tupulaga mo tana mole heʼeki fakapotopoto? Koia ke ina lavaʼi ia te gaue, neʼe tonu kia Salomone ke ina maʼu ia te lototoʼa pea ke ina fakahoko.

3. Kotea neʼe feala ke ako e Salomone ʼo ʼuhiga mo te lototoʼa ʼa tana tamai?

³ ʼE mahino ia, neʼe lahi te ʼu faʼahi neʼe ako e Salomone ʼo ʼuhiga mo te lototoʼa ʼo tana tamai, ia Tavite. ʼI tana kei tupulaga, neʼe tau mo te ʼu manu fekai ʼae neʼe natou ʼohofi ia te faga ovi ʼo tana tamai. (1 Samuele 17:34, 35) Neʼe ina fakaha foki ia tana lototoʼa ʼi tana tauʼi ia te toe tagata solia fakamataku ʼae ko Koliate. ʼEi, neʼe malo Tavite ia Koliate ʼaki te tokoni ʼa te ʼAtua pea mo te kiʼi foʼi maka momole.—1 Samuele 17:45, 49, 50.

4. He koʼe neʼe tonu ke maʼu e Salomone ia te lototoʼa?

⁴ Koia la ʼae ʼe tou mahino ai, neʼe ko Tavite ʼae neʼe tonu ke ina uga ia Salomone ke lototoʼa pea ke ina laga ia te fale lotu. Neʼe ui fenei e Tavite “ki tona foha ko Salomone: ‘Ke ke lototoʼa mo malohi pea mo ke gaue. ʼAua naʼa ke tuʼania, pea ʼaua naʼa ke mataku, koteʼuhi ko Sehova ʼAtua, toku ʼAtua, ʼe nofo mo koe. ʼE mole ina liakī anai koe, ʼe mole situʼa anai kia koe, ʼo kaku ki te hoki ʼosi fuli ʼo te gaue ʼo te fale ʼo Sehova.’” (1 Koloniko 28:20, MN) Ka na neʼe mataku la ia Salomone ʼo mole ina maʼu te lototoʼa, neʼe feala pe ke mole ina kamata te gaue. Pea ko te faʼahi ʼaia ʼe kovi age anai ia ʼi hana mole lavaʼi te gaue.

5. He koʼe ʼe tonu ke tou maʼu ia te lototoʼa?

⁵ Ohage ko Salomone, ʼe ʼaoga ke tokoni mai ia Sehova ke tou maʼu ia te lototoʼa pea ke tou fai te gaue ʼae neʼe ina foaki mai. Koia, tou vakaʼi te ʼu faʼifaʼitaki ʼo ni hahaʼi neʼe natou fakaha te lototoʼa ʼi te temi muʼa. Pea ʼe feala ke tou fakakaukauʼi pe ʼe feafeaʼi hatatou fakaha ia te lototoʼa mo tou fakahoko ʼatatou gaue.

KO HE ʼU FAʼIFAʼITAKI ʼO TE LOTOTOʼA

6. ʼE malave feafeaʼi kia koe ia te lototoʼa ʼa Sosefo?

⁶ Neʼe fakaha e Sosefo ia tona lototoʼa ʼi te temi ʼae neʼe loto ai e te ʼohoana ʼo Potifale ke nā momoe. ʼE mahino ia kua ina iloʼi pe, neʼe feala ke tuʼutamakiʼia tona maʼuli mo kapau ʼe fakafisi ki te faʼahi ʼaia. Kaʼe neʼe lototoʼa ia pea ina teteke fakavilivili ia te fakahala.—Senesi 39:10, 12.

7. Neʼe fakaha feafeaʼi e Laape ia te lototoʼa? (Vakaʼi te ʼuluaki pāki.)

⁷ Ko te tahi faʼifaʼitaki ʼo te lototoʼa, ʼe ko Laape. ʼI te temi ʼae neʼe feulufi ai te ʼu malomu Iselaele ki tona ʼapi ʼi Seliko, neʼe feala pe ke mataku ʼo mole fia tokoni ki te ʼu tagata ʼaia. Kaʼe neʼe falala ia kia Sehova. Koia ʼaki he lototoʼa, neʼe ina fakanono te ʼu tagata ʼaia ʼe toko lua pea mo ina fakahola ia naua. (Sosue 2:4, 5, 9, 12-16) Neʼe tui ia Laape ko Sehova ʼe ko te ʼAtua moʼoni. Pea neʼe falala ia ʼe foaki anai e Sehova ia te fenua ki te kau Iselaele. Neʼe mole loto ke taʼofi ia ia e tona mataku ki ʼihi pea mo te hau ʼo Seliko mo ʼana tagata solia. Kaʼe neʼe ina fakaha ia te lototoʼa, ʼo ina haofaki ia ia mo tona famili.—Sosue 6:22, 23.

8. Neʼe malave feafeaʼi te lototoʼa ʼa Sesu ki te kau apositolo?

⁸ Neʼe toe fakaha foki e te kau apositolo agatonu ʼa Sesu ia he lototoʼa lahi. Neʼe natou sisio ki te lototoʼa ʼa Sesu, koia ʼae neʼe feala ai ke natou faʼifaʼitakiʼi ia ia. (Mateo 8:28-32; Soane 2:13-17; 18:3-5) Neʼe fakafisi te kau apositolo ki te faigaʼi ʼae e te kau Satuseo ke fakagata tanatou palalau ʼo ʼuhiga mo Sesu ki te hahaʼi.—Gaue 5:17, 18, 27-29.

9. Ia 2 Timoteo 1:7, kotea ʼae ʼe tou mahino ki ai ʼo ʼuhiga mo te haʼuʼaga ʼo te lototoʼa?

⁹ Neʼe fakatotonu e Sosefo, mo Laape, mo Sesu pea mo te kau apositolo ke natou fai te meʼa ʼae ʼe lelei. Neʼe natou maʼu te lototoʼa, koteʼuhi neʼe natou falala kia Sehova, kaʼe mole ki ʼonatou fealagia. ʼI ʼihi temi ʼe ʼaoga ke tou maʼu ia te lototoʼa. Koia, ʼe tonu foki mo tatou ke tou falala kia Sehova, kaʼe mole kia tatou totonu. (Lau ia 2 Timoteo 1:7.) Tou vakaʼi te ʼu faʼahi ʼe lua ʼe ʼaoga ai ke tou maʼu ia te lototoʼa: ʼi totatou famili pea mo te kokelekasio.

HE ʼU ALUʼAGA ʼE FAKAMAʼUA KI AI TE LOTOTOʼA

10. He koʼe ʼe tonu ke lototoʼa ia te kau tupulaga Kilisitiano?

¹⁰ ʼE lahi te ʼu aluʼaga ʼe ʼaoga ai ke fakaha e te kau tupulaga Kilisitiano ia te lototoʼa ʼi tanatou tauhi kia Sehova. ʼE feala ke natou taʼofi he ʼu ako mai te faʼifaʼitaki ʼo Salomone. Koteʼuhi neʼe ina fakaha ia te lototoʼa ʼi te temi ʼae neʼe ina fai ai he ʼu tonu ʼe fakapotopoto moʼo fakaʼosi te laga ʼo te fale lotu. Logo la ʼe tonu ke takitaki te kau tupulaga e ʼanatou matuʼā, kaʼe ʼe ʼi ai te ʼu tonu maʼuhiga ʼe maʼua ke natou toʼo. (Taaga Lea 27:11) ʼE ʼaoga ke natou maʼu te lototoʼa ke natou nonofo maʼa ʼi te aga ʼae ʼe tonu ke fai, ke natou filifili fakalelei ʼonatou kaumeʼa mo ʼanatou fakafiafia, pea ke natou papitema. ʼE tonu ke natou lototoʼa, koteʼuhi ke natou fakafeagai ki te ʼu fakatuʼutuʼu ʼa Satana, ia ia ʼae ʼe ina manukiʼi ia te ʼAtua.

11, 12. (1) Neʼe fakaha feafeaʼi e Moisese ia te lototoʼa? (2) ʼE feala ke faʼifaʼitakiʼi feafeaʼi e te kau tupulaga ia Moisese?

¹¹ ʼE ʼi ai te faʼahi maʼuhiga ʼe kau ki te ʼu tonu ʼae ʼe natou toʼo, ko ʼanatou fakatuʼutuʼu. ʼI ʼihi fenua, ʼe fakaneke te kau tupulaga ke natou kau ki te ʼu ako lalahi pea ke natou maʼu hanatou gaue ʼe totogi lelei. Pea ʼuhi ko te faigataʼaʼia fakaekonomika ʼi ʼihi atu fenua, ʼi te manatu ʼa te kau tupulaga, ʼe tonu ke natou gaue moʼo tokoni ki ʼonatou famili. Kapau ʼe ke tau mo he aluʼaga ʼi te ʼu aluʼaga ʼaeni, fakakaukauʼi te faʼifaʼitaki ʼa Moisese. Neʼe taupau ia ia e te ʼofafine ʼo Falaone, pea neʼe feala pe ke ina fakatuʼutuʼu ke koloaʼia peʼe ke ina maʼu hona tuʼulaga maʼuhiga. Fakafuafua age muʼa te ʼu fakaneke ʼae neʼe feala ke felaveʼi mo ia mai tona famili Esipito, mo te kau faiako pea mo te kau faitokoni. Kaʼe neʼe lototoʼa ia Moisese pea neʼe ina filifili ke nofo mo te hahaʼi ʼa te ʼAtua. Pea hili tana mavae mai te ʼu koloa ʼo Esipito, neʼe ina tuku katoa ia tana falala kia Sehova. (Hepeleo 11:24-26) Koia, neʼe lahi tona tapuakinaʼi e Sehova, pea ʼe toe lahi age anai ʼona tapuakina ʼi te ka haʼu.

¹² ʼE tapuakinaʼi anai e Sehova ia te kau tupulaga ʼae ʼe natou fakatuʼutuʼu ke natou tauhi kia te ia pea mo natou fakamuʼamuʼa ia tona Puleʼaga. ʼE tokoni anai ia Sehova kia natou, ʼo ina foaki te ʼu meʼa ʼae ʼe ʼaoga ki ʼonatou famili. ʼI te ʼuluaki sekulo, ko te tupulaga ko Timoteo neʼe tokaga tafito ki tana tauhi ʼae ki te ʼAtua. ʼO toe feia pe mo tatou, ʼe feala ke tou fai te faʼahi ʼaia.a (Vakaʼi te kiʼi nota.)—Lau ia Filipe 2:19-22.

13. Neʼe tokoni feafeaʼi ia te lototoʼa ki he tuagaʼane kei finemui ke ina fakahoko ʼana fakatuʼutuʼu?

¹³ Ko te tuagaʼane ʼi Alabama, ʼi Amelika, neʼe ʼaoga ke ina maʼu ia te lototoʼa moʼo fai hana ʼu fakatuʼutuʼu ʼi tana tauhi ʼae ki te ʼAtua. ʼE ina tohi fenei: “ ʼI taku lahilahi ake, neʼe kovi ʼosi toku umiuminoa. Neʼe meihiʼi pe ke mole au palalau ki he tahi ʼi te fale fono, pea neʼe toe feia pe moka au alu ʼo faifakamafola ʼi te ʼu ʼapi ki he hahaʼi ʼe mole au iloʼi.” Kaʼe ʼaki te tokoni ʼo ʼana matuʼā mo ʼihi ʼi te kokelekasio, neʼe fakahoko e te tuagaʼane ʼaia ʼe kei finemui ia tana fakatuʼutuʼu ʼae ke pionie katoa. ʼE ina ui fenei: “ ʼI te malama ʼaeni ʼa Satana, ʼe takimuʼa ai te ʼu ako lalahi, mo te logologona ʼa he tahi, mo te paʼaga, mo te maʼu koloa, pea ʼi te manatu ʼa te hahaʼi ʼe ko he ʼu fakatuʼutuʼu lelei ia.” Kaʼe neʼe toe mahino foki ia te tuagaʼane, ʼe mole feala anai ki te hahaʼi fuli ke natou fakahoko te ʼu fakatuʼutuʼu ʼaia. Pea ko te ʼu fua pe leva ʼe feala ke natou maʼu ʼaki te ʼu fakatuʼutuʼu ʼaia, ko te lotohoha mo te lotomamahi. ʼE ina toe ui fenei: “Kaʼe, ʼi taku tauhi kia Sehova, ʼe au logoʼi ai he toe fiafia lahi.”

14. Kotea te ʼu aluʼaga ʼae ʼe ʼaoga ai ke maʼu e te ʼu matuʼā Kilisitiano ia te lototoʼa?

¹⁴ ʼE toe ʼaoga foki ki te ʼu matuʼā Kilisitiano ke natou maʼu ia te lototoʼa. Ohage la, ʼe lagi tau kole atu e tokotou patolo ke kotou fai ni hola fakalaka ʼi ʼihi ʼaho. Kaʼe ko te ʼu ʼaho ʼaia, neʼe kua kotou fakatuʼutuʼu ke kotou fai takotou ako fakafamili, peʼe ke kotou olo ʼo faifakamafola peʼe ʼo fono. ʼE tonu ai leva ke kotou lototoʼa ʼo kotou fakafisi ki tokotou patolo pea ke kotou tuku he faʼifaʼitaki lelei ki ʼakotou fanau. ʼI te kokelekasio, ʼe lagi ʼi ai ʼihi matuʼā ʼe natou tuku ke fai e ʼanatou fanau he ʼu meʼa ʼe mole kotou loto ke fai e ʼakotou fanau. Kaʼe ka fia iloʼi e te ʼu matuʼā ʼaia pe kotea tona tupuʼaga, ʼe kotou lototoʼa anai koa ʼo kotou fakamahino ʼaki he aga fakaʼapaʼapa ia takotou tonu?

15. ʼE tokoni feafeaʼi ia Pesalemo 37:25 pea mo Hepeleo 13:5 ki te ʼu matuʼā?

¹⁵ ʼE tou fakaha te lototoʼa moka ʼe tou tokoni ki ʼatatou fanau ke natou fakahoko ʼanatou fakatuʼutuʼu ʼi te tauhi ʼae ki te ʼAtua. Ohage la, ko ʼihi matuʼā ʼe lagi natou matataku ʼi te fakalotomalohiʼi ʼanatou fanau ke natou kau ki te selevisi temi katoa, ke natou olo ki te ʼu koga meʼa ʼae ʼe ʼaoga lahi ai he kau faifakamafola, ke natou gaue ʼi te Petele, peʼe ke natou tokoni ki te laga ʼo te ʼu Fale Fono pea mo te ʼu Fale Fakatahi Lalahi. ʼE lagi natou tuʼania naʼa mole tokakaga ʼanatou fanau ki ʼanatou matuʼā, peʼe kia natou totonu ʼi te ʼu taʼu ʼae ka haʼu. Kaʼe, ko te ʼu matuʼā ʼae ʼe fakapotopoto, ʼe natou lototoʼa pea ʼe natou tui ʼe fakahoko anai e Sehova ʼana fakapapau. (Lau ia Pesalemo 37:25; Hepeleo 13:5.) Koia, ka fakaha e te ʼu matuʼā ia te taʼi lototoʼa ʼaia pea mo natou falala kia Sehova, ʼe natou tokoni ai ki ʼanatou fanau ke natou toe fai feia.—1 Samuele 1:27, 28; 2 Timoteo 3:14, 15.

16. Neʼe tokoni feafeaʼi ʼihi matuʼā ki ʼanatou fanau ke natou fai he ʼu fakatuʼutuʼu ʼi tanatou tauhi ʼae ki te ʼAtua? Pea neʼe fua lelei feafeaʼi ki ʼanatou fanau?

¹⁶ ʼI Amelika, neʼe tokoni te taumatuʼa ki ʼanā fanau ke nā fai he ʼu fakatuʼutuʼu ʼi tanā tauhi ʼae kia Sehova. ʼE ui fenei e te tamai: “ ʼI tanā heʼeki popoto ʼi te palalau pea mo haʼele, neʼe ma palalau age ki tamā kiʼi taʼahine mo tamā kiʼi tama ki te ʼu fiafia ʼo te selevisi pionie pea mo te ʼu gaue ʼi te kokelekasio. Pea kua nā fai nei ʼana fakatuʼutuʼu ʼo ʼuhiga mo te ʼu aluʼaga ʼaia.” ʼE ina toe ui, neʼe fai e ʼana tamaliki te ʼu fakatuʼutuʼu ʼaia pea neʼe nā fakahoko. Koia neʼe feala ai ke nā tekeʼi te ʼu fakahala ʼo te malama ʼa Satana pea ke nā tokakaga tafito ki tanā tauhi ʼae kia Sehova. Ko te tahi tehina ʼe ʼi ai ʼana fanau ʼe toko lua, neʼe ina tohi fenei: “Tokolahi te ʼu matuʼā ʼe natou fakaʼaogaʼi tonatou malohi mo ʼonatou koloa moʼo tokoni ke fakahoko e ʼanatou fanau te ʼu fakatuʼutuʼu ʼae ki te faigaoʼi, peʼe ko te faiva ʼi te fai pena peʼe ko te fai musika, peʼe ko te ako. Kaʼe ʼe lelei age tatatou fakaʼaogaʼi totatou malohi mo ʼotatou koloa moʼo tokoni ke fakahoko e ʼatatou fanau ʼanatou fakatuʼutuʼu ʼae ʼe feala ai ke leleiʼia natou e Sehova. Ko he toe fiafia ʼe tou logoʼi moka ʼe tou sisio ʼe fakahoko e ʼatatou fanau ʼanatou fakatuʼutuʼu, pea ʼe hage pe ia ʼe tou maʼu tapuakina fakatahi mo natou.” ʼE feala ke tou tui papau, ʼe tapuakinaʼi anai e te ʼAtua te ʼu matuʼā ʼae ʼe tokoni ki ʼanatou fanau ke natou fai pea mo natou fakahoko ʼanatou fakatuʼutuʼu ʼi tanatou tauhi ʼae kia te ia.

TE LOTOTOʼA ʼI TE KOKELEKASIO

17. Tuku mai he ʼu faʼifaʼitaki ʼo te lototoʼa ʼi te kokelekasio.

¹⁷ ʼE toe ʼaoga foki ke tou fakaha ia te lototoʼa ʼi te kokelekasio. Ohage la, ʼe ʼaoga ke lototoʼa te kau tagata ʼafeā moka ʼe natou vakavakaʼi ia he ʼu aluʼaga ʼo ʼuhiga mo he agahala mamafa. Peʼe moka ʼe natou tokoni kia natou ʼae ʼe kovi ʼonatou mahaki pea ʼe tonu ke foimo fai kia natou he faitoʼo. Ko ʼihi tagata ʼafeā ʼe natou olo ʼo fai he ʼu fono ʼi te ʼu fale pilisoni peʼe natou ʼaʼahi te kau pilisoni ke natou ako ia te Tohi-Tapu mo natou ʼae ʼe natou fia logo ki te logo lelei. Kaʼe ʼe feafeaʼi ki te ʼu tuagaʼane selipatea? ʼE lahi te ʼu faigamalie ʼe feala ai ke natou fakaha ia te lototoʼa pea mo tauhi kia Sehova. ʼE feala ke natou pionie, ke natou olo ki te ʼu koga meʼa ʼae ʼe ʼaoga lahi ai te kau faifakamafola, ke natou kau ki te gaue laga fale, peʼe ke natou kau ki te Ako ʼo Te Kau Faifakamafola ʼo Te Puleʼaga. Pea ʼe ʼi ai foki ʼihi tuagaʼane kua fakaafe ke natou kau ki te Ako ʼo Kileate.

18. ʼE feafeaʼi he fakaha e te ʼu tuagaʼane kua finematuʼa ia te lototoʼa?

¹⁸ ʼE tou ʼoʼofa ki ʼotatou tuagaʼane matutuʼa. Pea ʼe tou lotofakafetaʼi ki tanatou kau ʼi te kokelekasio. Ko ʼihi ʼe mole kei natou lava fai te ʼu gaue ʼae neʼe natou fai ʼi muʼa atu ʼi te tauhi ki te ʼAtua. Kaʼe ʼe kei natou fakaha pe ia te lototoʼa pea mo natou fai he ʼu gaue. (Lau ia Tito 2:3-5.) Ohage la, ʼe ʼaoga ki he tuagaʼane kua finematuʼa ke ina maʼu te lototoʼa moka kole age e te kau tagata ʼafeā ke palalau ki he tuagaʼane ʼe kei finemui ʼo ʼuhiga mo tana faʼahiga faiteuteu. ʼE mole ina fakatonutonuʼi anai ia te tuagaʼane ʼo ʼuhiga mo ʼona mutuʼi meʼa. Kaʼe ʼe tokoni ki ai ʼi te ʼofa, ke ina fakakaukauʼi pe ʼe malave feafeaʼi anai tana faʼahiga faiteuteu ki ʼihi. (1 Timoteo 2:9, 10) Ka fakaha e te ʼu tuagaʼane kua finematuʼa ia tonatou ʼofa ʼi te ʼu aluʼaga ʼaia, ʼe fua lelei anai ki te kokelekasio.

19. (1) ʼE lava fakaha feafeaʼi e te ʼu tehina ia te lototoʼa? (2) ʼE lava tokoni feafeaʼi ia Filipe 2:13 mo Filipe 4:13 ki te ʼu tehina ke natou lototoʼa?

¹⁹ ʼE toe ʼaoga foki ki te ʼu tehina ke natou lototoʼa pea ke natou fai he ʼu gaue. Ka natou lotolelei ke natou liliu ko he kau faifekau fakaminisitelio pea mo tagata ʼafeā, ʼe fua lelei ʼaupito anai ki te kokelekasio. (1 Timoteo 3:1) Kaʼe, ko ʼihi ʼe lagi natou lotolotolua ʼi te fai ʼo te faʼahi ʼaia. Ko he tehina neʼe ina fai he ʼu lakahala ʼi te temi muʼa, ʼe lagi manatu ʼe mole tuha ia ke liliu ko he faifekau fakaminisitelio peʼe ko he tagata ʼafeā. Pea ko he tahi tehina ʼe lagi manatu ia ʼe mole ʼi ai hona ʼu fealagia. Kapau ʼe ke manatu feia, ʼe feala ke tokoni atu ia Sehova ke ke maʼu ia te lototoʼa. (Lau ia Filipe 2:13; 4:13.) Manatuʼi ia te faʼifaʼitaki ʼa Moisese. ʼI tana manatu, neʼe mole feala ia ke ina fai te gaue ʼae neʼe kole age e Sehova ke ina fai. (Ekesote 3:11) Kaʼe neʼe tokoni ia Sehova kia ia ke ina maʼu ia te lototoʼa pea ke ina fai te gaue ʼaia. ʼE maʼu feafeaʼi anai e he tehina ia te taʼi lototoʼa ʼaia? ʼE ina lava kole te tokoni ʼa Sehova pea mo lau ia te Tohi-Tapu ʼi te ʼaho fuli. ʼE feala ke metitasio ki te ʼu faʼifaʼitaki Fakatohi-tapu ʼo natou ʼae neʼe natou fakaha ia te lototoʼa. ʼAki te agavaivai, ʼe feala ke ina kole ki te kau tagata ʼafeā ke natou akoako ia ia ke feala hana tokoni ki te fakahoko ʼo te ʼu gaue ʼi te kokelekasio. ʼU tehina, ʼe matou kole atu ke kotou fakaha ia takotou lototoʼa pea ke kotou gaue malohi ʼi te kokelekasio.

‘KO SEHOVA ʼE NOFO MO KOE’

20, 21. (1) Kotea ʼae neʼe fakamanatuʼi age e Tavite kia Salomone? (2) Kotea ʼe feala ke tou tui papau ki ai?

²⁰ Neʼe fakamanatuʼi e te Hau ko Tavite kia Salomone ʼe nofo anai ia Sehova mo ia ʼo kaku ki te fakaʼosi ʼo te laga ʼo te fale lotu. (1 Koloniko 28:20, MN) ʼE mahino ia, neʼe metitasio ia Salomone ki te ʼu palalau ʼaia. Pea neʼe ina fakahoko te gaue logo la tana kei tupulaga mo tana mole heʼeki fakapotopoto. Neʼe lototoʼa ia Salomone, pea ʼaki te tokoni ʼa Sehova, neʼe ina fakaʼosi ia te fale lotu taulekaleka ia taʼu ʼe fitu vaelua.

²¹ Neʼe tokoni ia Sehova kia Salomone. Pea ʼe toe feala pe ke tokoni mai ke tou lototoʼa pea ke tou fakahoko ʼatatou gaue, ʼi totatou famili pea mo te kokelekasio. (Esaia 41:10, 13) Kapau ʼe tou lototoʼa ʼi tatatou tauhi ʼae kia Sehova, ʼe feala ai ke tou tui papau ʼe ina tapuakinaʼi anai tatou ʼi te temi nei pea mo te ka haʼu. Koia, ke tou lototoʼa pea mo tou gaue.