Ke Koutou Lotomālohi!
“Koutou lotomālohi pea mo ʼui: ‘Ko Sehova ko toku tokoni.’ ” — Hepeleo 13:6.
1. Ko te lototoʼa fea ʼaē neʼe fakahā e nātou ʼaē neʼe nātou ako te moʼoni ʼa te ʼAtua ʼi te ʼuluaki sēkulō?
ʼE TOU lolotoga nei ʼi te ʼuluaki sēkulō ʼo totatou temi. Ko te Mesia ʼaē neʼe fualoa tona talitali kua haʼu. Neʼe ina ako fakalelei ʼana ʼu tisipulo pea neʼe ina kamata te gāue faka mafola maʼuhiga. Neʼe ko te temi tonu ʼaia ke fagono ai te hahaʼi ki te logo lelei ʼo te Puleʼaga ʼo te ʼAtua. Koia, ko te hahaʼi tagata feiā mo te hahaʼi fafine ʼaē neʼe nātou ako te moʼoni neʼe nātou tala ʼaki te lototoʼa te logo fakaofoofo ʼaia. — Mateo 28:19, 20.
2. He koʼe koa ʼe ʼaoga ʼi te temi nei te lotomālohi ki te kau Fakamoʼoni ʼa Sehova?
2 Neʼe mole heʼeki fakatuʼu te Puleʼaga ʼi te temi ʼaia. Kae ko te Hau ʼaē neʼe hinoʼi, ia Sesu, neʼe ina fakakikite tona temi ʼaē ʼe ʼafio fakapulipuli ai ʼi te temi ka haʼu ʼi te mālohi ʼo te Puleʼaga. ʼE fakaʼiloga anai ʼaki te ʼu faʼahiga meʼa ohage ko te ʼu tau ʼe mole hona tatau, te ʼu hoge, te ʼu mahaki fakamataku, te ʼu mafuike, pea mo te faka mafola ʼo te logo lelei ʼi te malamanei katoa (Mateo 24:3-14; Luka 21:10, 11). ʼI totatou ʼuhiga Fakamoʼoni ʼa Sehova, ʼe ʼaoga kia tatou te lotomālohi moʼo tauʼi ʼo te ʼu ʼaluʼaga ʼaia pea mo te fakataga ʼaē ʼe hoko kia tatou. Koia ʼe ʼaoga anai ke fakatokagaʼi te ʼu fakamatala faka tohi-tapu ʼo ʼuhiga mo te kau fai faka mafola ʼo te Puleʼaga ʼo te ʼuluaki sēkulō.
Ko te lotomālohi moʼo faʼifaʼitaki kia Kilisito
3. Ko ai te faʼifaʼitaki lelei ʼo te lotomālohi, pea koteā te meʼa neʼe ʼui ʼo ʼuhiga mo ia ia Hepeleo 12:1-3?
3 ʼE tuku mai e Sesu Kilisito te faʼifaʼitaki lelei ʼaupito ʼo ʼuhiga mo te lotomālohi. ʼI tana ʼosi talanoa ki te ‘toe ʼao’ ʼo te kau Fakamoʼoni ʼa Sehova ʼo te temi muʼa, neʼe talanoa tāfito ia Paulo kia Sesu ʼi tana ʼui ʼaē: “Mo tatou foki, ʼe tou maʼu te toe ʼao ʼo te kau fakamoʼoni ʼi ʼotatou tafa, tou līaki te meʼa mamafa fuli pea mo te agahala ʼaē ʼe ina fakahēʼi gafua tatou, kae ke tou faʼa kātaki ʼo feleleʼi ʼi te lele ʼaē neʼe fakaʼui mai kia tatou, ʼo fakahaga maʼu tatatou sio kia Sesu, ko te Meʼa Gāue tāfito ʼaia ʼo tatatou tui ʼaē ʼe ina taki ki te maʼuli haohaoa. ʼUhi ko te fiafia neʼe fakapapau age kia te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua. Ei, koutou tokagaʼi fakalelei, ia ia ʼaē neʼe ina kātakiʼi te ʼu palalau fakafeagai ʼaia mai te kau agahala, ʼaē neʼe ko he meʼa kovi kia nātou, koteʼuhi ke mole koutou fiu pea mo lotovaivai ʼi tokotou ʼu nefesi.” — Hepeleo 12:1-3.
4. Neʼe feafeaʼi te fakahā e Sesu te lotomālohi ʼi te temi ʼaē neʼe fakahalaʼi ai e Satana?
4 Hili tona papitema pea mo ʼaho e 40 ʼo te metitasio, pea mo te faikole, pea mo te ʼaukai ʼi te toafa, neʼe fakafihiʼi fakahagatonu e Sesu ia Satana. ʼI te fakahalaʼi e te Tevolo ke ina fakaliliu te ʼu maka ko he ʼu pane, neʼe fakafisi ia Sesu koteʼuhi neʼe ko he meʼa kovi te fakahoko he milakulo moʼo fakafimālieʼi he holi ʼo ia tokotahi pe. Neʼe ʼui fēnei e Sesu: “ ʼE tohi fēnei: ‘Ko te tagata ʼe mole tonu ke maʼuli ʼaki pe te pane, kae ʼaki te folafola fuli pe ʼe haʼu mai te gutu ʼo Sehova.’ ” ʼI tona fakafihiʼi e Satana ke fakatō ifo mai te fuga fale lotu, ko Sesu neʼe fakafisi koteʼuhi neʼe ko he agahala he ʼahiʼahiʼi ʼo te ʼAtua ke hāofaki ia ia mai hana faigaʼi ʼo he fakapogi pe ʼo ia. Neʼe tala fēnei e Kilisito: “ ʼE toe tohi fēnei foki: ‘ ʼAua naʼa ke ʼahiʼahiʼi ia Sehova tou ʼAtua.’ ” ʼO fakaʼui age leva e Satana ke ina foaki age te ʼu puleʼaga fuli ʼo te kele mo kapau ʼe ina fai he “atolasio” pe e tahi, kae neʼe mole fia ʼaposita ia Sesu pea mo lagolago ki te lau ʼaē ʼa te Tevolo ko te tagata ʼe mole nofo agatonu anai ia ʼi he ʼahiʼahi. Koia neʼe fēnei ai e Sesu ki ai: “ ʼAlu, Satana, heʼe tohi fēnei: ‘Ko Sehova, tou ʼAtua, ʼaē ʼe maʼua ke ke atolasio ki ai, pea ko ia tokotahi pe ʼe maʼua ke ke tauhi ki ai ʼaki he tauhi tapu.’ ” ʼAki te tali ʼaia, ko te fai fakahala “neʼe mavae mai ia ia ʼo aʼu ki he tahi temi faigamālie”. — Mateo 4:1-11; Luka 4:13.
5. Koteā ʼaē ʼe feala ke tokoni mai kia tatou ke tou lava tekeʼi te fakahala ʼaki te lotomālohi?
5 Neʼe fakalogo ia Sesu kia Sehova kae fakafeagai ia kia Satana. Kapau ʼe feiā tatatou ‘fakalogo ki te ʼAtua pea mo tou fakafeagai ki te Tevolo, pea ʼe hola mamaʼo anai ia ia tatou’. (Sake 4:7.) Ohage ko Sesu, ʼe feala ke tou tekeʼi ʼaki te lotomālohi te fakahala mo kapau ʼe tou maʼuliʼi te Tohi-Tapu, peʼe feala pe la mo te lau ʼo te Tohi-Tapu ʼi te temi ʼaē ʼe fakahalaʼi ai tatou ke tou fai he meʼa ʼe kovi. ʼE feala koa ke tou faka fealagia ke fakahalaʼi tatou ke tou kaihaʼa mo kapau ʼi te temi ʼaia ʼe tou lau ʼo liuliuga te lao ʼaenī ʼa te ʼAtua: “ ʼAua naʼa ke kaihaʼa”? ʼO toe feiā aipe, ʼe tono anai koa he ʼu kilisitiano mo kapau ʼe ʼi ai he tahi ia nāua ʼe ina lau ʼaki he lotomālohi te ʼu palalau ʼaenī: “ ʼAua naʼa ke tono”? — Loma 13:8-10; Ekesote 20:14, 15.
6. Neʼe feafeaʼi koa ia te mālo ʼa Sesu ʼi te malamanei?
6 ʼI totatou ʼuhiga kilisitiano ʼe fehiʼa kia tatou te mālama ʼaenī, ʼe feala ke tou fakamamaʼo mai tana faʼahiga manatu pea mo tona faʼahiga maʼuli agahala. Neʼe ʼui fēnei e Sesu ki tana ʼu tisipulo: “ ʼI te malamanei, ʼe koutou maʼu te mamahi, kae ke koutou lotomālohi! Neʼe ʼau mālo ʼi te malamanei.” (Soane 16:33). Neʼe mālo ʼi te malamanei ʼi tana mole liliu ohage ko te malamanei. Ko tana faʼifaʼitaki ʼi tona ʼuhiga mālo pea mo te fua ʼo tana haga taupau tana agatonu ʼe feala ke ina fakafonu ia tatou te lotomālohi ke tou faʼifaʼitaki kia ia ʼaki tatatou nonofo ʼāteaina mai te mālama ʼaenī pea mo fehiʼaʼinaʼi e ia. — Soane 17:16.
Ko te lotomālohi moʼo haga faka mafola
7, 8. Koteā ʼaē ka tokoni anai kia tatou ke tou haga fai faka mafola logope te fakataga?
7 Neʼe falala ia Sesu mo tana ʼu tisipulo ki te ʼAtua ke nātou maʼu te lotomālohi moʼo haga faka mafola logope te fakataga. ʼAki te lototoʼa, neʼe fakahoko e Kilisito tana minisitelio logope te fakataga, pea hili te Penikosite ʼo te taʼu 33 ʼo totatou temi, ko tana ʼu tisipulo ʼaē neʼe fakatagaʼi neʼe nātou hoko atu te kalagaʼi ʼo te logo lelei, logo aipe te faigaʼi ʼaē ke tāʼofi nātou e te kau takitaki lotu faka sutea (Gāue 4:18-20; 5:29). Neʼe faikole fēnei te kau tisipulo: “Sehova, tokagaʼi ifo tanatou aga fakamataku, pea mo ke tuku ki ʼau ʼu kaugana ke nātou haga tala tau folafola ʼaki te lototoʼa.” Pea koteā te meʼa neʼe hoko ai? ʼE fēnei te ʼui ʼa te fakamatala: “ ʼI te temi ʼaē neʼe nātou faikole ai, ko te koga meʼa ʼaē neʼe nātou fakatahi ai neʼe gatu; pea neʼe nātou fonu fuli ʼi te laumālie maʼoniʼoni pea nātou talanoa ai ki te folafola ʼa te ʼAtua ʼaki te lototoʼa.” — Gāue 4:24-31.
8 Koteʼuhi tokolahi te hahaʼi ʼi te temi nei ʼe mole nātou tali te logo lelei, ʼe tau ʼaoga te lototoʼa moʼo haga fai ʼo te gāue faka mafola kia nātou. Tāfito mokā hoko he fakataga, ʼe ʼaoga ki te kau kaugana ʼa Sehova ke foaki age e te ʼAtua te lotomālohi ke nātou fagonogono (Gāue 2:40; 20:24). Koia, neʼe ʼui fēnei ai e te tagata fai faka mafola lotomālohi ʼo te Puleʼaga ko Paulo, ki tona kaugā fagona tūpulaga pea mo siʼisiʼi tona faiva: “Neʼe mole foaki mai e te ʼAtua he laumālie fula, kae ko he laumālie mālohi, ʼofa pea mo fakapotopoto. Koia ʼaua naʼa ke ufiufi ʼi te fagonogono ʼo ʼuhiga mo totatou ʼAliki, peʼe ko ʼau, ʼaē ʼe pilisoni ʼuhi ko ia, kae ke ke toʼo tau vahe ʼaē ko te kātakiʼi te mamahi ʼuhi ko te logo lelei, ʼo mulimuli ki te mālohi ʼa te ʼAtua.” (2 Timoteo 1:7, 8). Kapau ʼe tou faikole ke tou maʼu te lotomālohi, ʼe feala ke tou haga fai faka mafola, pea māʼia mo te fakataga ʼe mole ina faʼao anai tatatou fiafia ʼi totatou ʼuhiga fai faka mafola ʼo te Puleʼaga. — Mateo 5:10-12.
Ko te lotomālohi moʼo kau kia Sehova
9, 10. a) Neʼe koteā ʼaē neʼe fai e te kau Sutea mo te kau Senitile ʼo te ʼuluaki sēkulō ke nātou liliu ai ko he kau tisipulo ʼa Kilisito pea mo papitema? b) He koʼe koa ʼe tonu ke lotomālohi mokā liliu he tahi ko he kilisitiano?
9 Tokolahi te kau Sutea mo te kau Senitile ʼo te ʼuluaki sēkulō neʼe nātou līaki ʼaki te lotomālohi te ʼu talatuku ʼaē mole ʼalutahi mo te Tohi-Tapu pea neʼe nātou liliu ko te kau tisipulo ʼa Kilisito ʼo papitema. Mole faʼa fualoa ki te ʼosi ʼo te Penikosite ʼo te taʼu 33 ʼo totatou temi, “neʼe tuputupu te kau tisipulo ʼo lahi ʼaupito ʼi Selusalemi; pea ko te toe hahaʼi tokolahi ʼo te kau pelepitelo neʼe nātou fakalogo ki te tui”. (Gāue 6:7.) Ko te kau Sutea ʼaia neʼe nātou lotomālohi moʼo vevete te ʼu noʼo faka lotu pea mo tali ia Sesu ko ia ko te Mesia.
10 ʼI te kamataʼaga ʼo te taʼu 36 ʼo totatou temi, tokolahi te kau Senitile neʼe nātou liliu ko te kau hahaʼi tui. ʼI te temi ʼaē neʼe logo ai ia Kolonelio pea mo te ʼu hahaʼi ʼo tona famili ki te logo lelei, neʼe nātou tali atu aipe, pea neʼe foaki age kia nātou te laumālie maʼoniʼoni, pea mo “papitemaʼi ʼi te huafa ʼo Sesu Kilisito”. (Gāue 10:1-48.) ʼI Filipe, ko te tagata Senitile leʼoleʼo fale pilisoni pea mo tona loto fale neʼe nātou tali fakavilivili te lotu faka kilisitiano, pea “ko ia mo tona loto fale neʼe nātou papitema atu aipe”. (Gāue 16:25-34.) Ko te lotomālohi ʼe ʼaoga ki te fai ʼo te ʼu taʼi fakatuʼutuʼu ʼaia koteʼuhi ko te kau kilisitiano neʼe ko he ʼu hahaʼi e tokosiʼi pea neʼe fakatagaʼi, heʼe mole ʼofainaʼi nātou. ʼE feiā aipe ʼi te temi nei. Kae kapau mole heʼeki koutou foaki tokotou maʼuli ki te ʼAtua pea mo papitema ohage ko he Fakamoʼoni ʼa Sehova, ʼe mole koa la ko te temi ʼaē kia koutou ke koutou fai te ʼu taʼi fakatuʼutuʼu feiā ʼaki te lotomālohi?
Ko he lotomālohi ʼi te ʼu loto fale ʼe mavetevete
11. Ko te faʼifaʼitaki lelei feafeaʼi ʼaē neʼe foaki mai e Enise mo Timoteo ʼo ʼuhiga mo te lotomālohi?
11 Ko Enise mo tana tama ko Timoteo neʼe nā tuku te faʼifaʼitaki lelei ʼo ʼuhiga mo te tui pea mo te lotomālohi ʼi he loto fale ʼe mavetevete ʼi te faʼahi faka lotu. Logope ko Enise neʼe ko tona ʼohoana neʼe ko te tagata pagani, neʼe ina akoʼi ki tana tama “te ʼu tohi taputapu” talu mai tana kei tamasiʼi (2 Timoteo 3:14-17). ʼI tana liliu ʼaē ko te kilisitiano, neʼe ina fakahā he ‘tui ʼe mole malualoi’. (2 Timoteo 1:5.) Neʼe ina toe fakaʼilo foki te akonaki faka kilisitiano kia Timoteo pea mo fakaʼapaʼapa aipe ki te ʼuhiga pule ʼo tona ʼohoana ʼaē ʼe mole tui tahi mo ia. ʼE mahino ia, ko tana tui mo tana lotomālohi neʼe fakapale ia ʼi te temi ʼaē neʼe fili ai tana tama ʼaē neʼe lelei tona akoʼi moʼo kaugā fagona mo Paulo ʼi te ʼu folau faka misionea. ʼE ko he meʼa ʼe feala ke ina fakaloto mālohiʼi te ʼu mātuʼa faka kilisitiano ʼaē ʼe nātou tau mo te ʼu ʼaluʼaga tatau!
12. Neʼe liliu ia Timoteo ko te faʼahiga tagata feafeaʼi, pea ko ai ʼi te temi nei ʼe nātou fakamoʼoni ʼe nātou hage ko ia?
12 Logope ko Timoteo neʼe maʼuli ʼi te loto fale ʼe mavetevete ʼi te faʼahi faka lotu, neʼe ina tali ʼaki te lotomālohi te lotu faka kilisitiano pea neʼe liliu ko he tahi ʼe maʼuli fakalaumālie ʼo feala ai kia Paulo ke ina ʼui fēnei: “ ʼE ʼau fakaʼamu ʼi te ʼAliki Sesu, kua ōvi pe ʼo haku fekauʼi atu ia Timoteo, ke ʼau liliu ko he nefesi fiafia mokā ʼau maʼu mai anai he ʼu logo mai ia koutou. Koteʼuhi ʼe mole ʼau maʼu he tahi age ʼe lotolelei ohage ko ia, ke tokaga lelei ki te ʼu meʼa ʼo ʼuhiga mo koutou. (...) ʼE koutou ʼiloʼi te ʼu fakamoʼoni neʼe ina fakahā ʼo ʼuhiga mo ia: ohage pe he tamasiʼi mo hana tāmai, neʼe gāue mo ʼau ohage he tagata kaugana ʼuhi pe ko te logo lelei.” (Filipe 2:19-22). ʼI te temi nei, tokolahi te tamaliki tagata feiā mo fafine ʼi te ʼu loto fale ʼaē ʼe mavetevete ʼi te faʼahi faka lotu, ʼe nātou tali te lotu faka kilisitiano moʼoni. Ohage pe ko Timoteo, ʼe nātou fakahā te ʼu fakamoʼoni ʼo ʼuhiga mo nātou, pea ʼe ko he toe fiafia ʼe tou maʼu ʼi tanatou kau ʼaē ʼi te kautahi ʼa Sehova!
Ko te lotomālohi ʼaē ki te ‘foaki ʼo totatou maʼuli’
13. Ko te ʼaluʼaga fea ʼaē neʼe fakahā ai e Akila mo Pilisika te lotomālohi?
13 Neʼe tuku e Akila pea mo tona ʼohoana, ko Priscille (Pilisika), te faʼifaʼitaki ʼaki te lotomālohi ʼi te meʼa ʼaē ke nā ‘foaki tonā maʼuli’ maʼa he kaugā fagona tui. Neʼe nā tali ia Paulo ki tonā ʼapi, pea neʼe nā gāue mo ia ki te fai fale lā, pea mo tokoni kia ia ki te fakatuʼu ʼo te kokelekasio foʼou ʼi Kolonito (Gāue 18:1-4). ʼI te lolotoga ʼo tanatou fakakaumeʼa ia taʼu e 15, neʼe teitei pe ke nā foaki tonā maʼuli ʼi he ʼaluʼaga ʼe mole fakahāhā lelei mai ʼi henī ʼuhi ko ia. Neʼe nā nonofo ʼi Loma ʼi te temi ʼaē neʼe ʼui fēnei ai e Paulo ki te kau kilisitiano ʼo Loma: “ ʼOʼofa age kia Pilisika mo Akila, ʼoku ʼu kaugā gāue ia Kilisito Sesu, ʼaē neʼe teitei pe ke nā foaki tonā maʼuli ʼuhi ko toku nefesi, pea ʼe ʼau fakamālo kia nāua, ʼo mole gata ʼaki pe ia ʼau, kae feiā mo te ʼu kokelekasio fuli ʼo te ʼu puleʼaga.” — Loma 16:3, 4.
14. ʼAki te teu ʼaē ke nā foaki tonā maʼuli maʼa Paulo, ko te folafola fea ʼaē neʼe muliʼi e Akila mo Pilisika?
14 ʼI tana fia hāofaki ʼaē ia Paulo, ko te aga ʼa Akila mo Pilisika neʼe ʼalutahi mo te ʼu palalau ʼa Sesu: “ ʼE ʼau foaki atu kia koutou he folafola foʼou: ke koutou feʼofaʼofaniʼaki ia koutou, pea ohage pe ko taku ʼofa ʼaē kia koutou, ke toe feiā foki mo koutou, ke koutou feʼofaʼofaniʼaki.” (Soane 13:34). Ko te folafola ʼaia neʼe “foʼou” ʼi te ʼaluʼaga ʼo tana fakalaka ʼi te fakamaʼua ʼaē ʼo te Lao ʼa Moisese ʼaē ke ʼofa he tahi ki tona kāiga ohage pe ko ia totonu (Levitike 19:18). Neʼe fakamaʼua te ʼofa ʼaki te maʼuli faka sakilifisio ʼaē ʼe feala ke fakakaku ʼosi ki takita foaki tokita maʼuli maʼa ʼihi, ohage ko tona fai e Sesu. Neʼe fakatokagaʼi e Tertullien, tagata faitohi ʼo te lua mo te tolu sēkulō ʼo te hisitolia, te ʼu palalau ʼa te hahaʼi ʼo te mālama ʼo ʼuhiga mo te kau kilisitiano ʼi tana tohi fēnei: “ ʼE nātou ʼui: ‘Koutou sisio muʼa ki tanatou feʼofaʼofaniʼaki ia nātou, pea mo te feala ʼaē ke nātou fefoakiʼaki pe ʼonatou maʼuli maʼa nātou.’ ” (Apology, kapite 39, 7). Ka hoko he fakataga, ʼe maʼua tāfito ke tou fakahā te ʼofa fakatautehina ʼaki hatatou teuteu ʼaki te lotomālohi ki te foaki ʼo totatou maʼuli ke ʼaua naʼa fai he ʼu aga mālohi ki tatatou ʼu kaugā fagona ʼi te tui peʼe ki te tāmateʼi ʼo nātou e te hahaʼi fakafeagai. — 1 Soane 3:16.
Ko te lotomālohi ʼe fakatupu fiafia
15, 16. Ohage ko tona fakahā ia Gāue kapite 16, koteā te pikipikiga ʼaē ʼe tou maʼu ʼi te lotomālohi mo te fiafia?
15 ʼE fakamoʼoni e Paulo mo Silasi ko te fakahā ʼo te lotomālohi ʼi te ʼu mamahi ʼe feala ke fakatupu fiafia. ʼAki te fakatotonu ʼa te kau tuʼi fakamāu sivile ʼi te kolo ʼo Filipe, neʼe kauʼi ʼakauʼi nāua ia muʼa ʼo te kaugamālie pea neʼe faka pilisoniʼi. Kae, neʼe mole nā manavasiʼi pea mo nā lotovaivai ai. Logope te ʼu ʼaluʼaga faigataʼa ʼaē neʼe tau mo nāua, neʼe kei nā maʼu te lotomālohi ʼaē ʼe foaki e te ʼAtua pea mo te fiafia ʼaē ʼe maʼu e te kau kilisitiano agatonu.
16 ʼI te lotomalie ʼo te pōʼuli, ko Paulo mo Silasi neʼe nā faikole pea mo hiva te ʼu katiko ki te ʼAtua. Fokifā pe, kua galulu te fale pilisoni ʼi te mafuike, ʼo mavetevete ai te ʼu haʼi pea mo ava te ʼu matapā. ʼO fai ai te fagonogono fakahagatonu ki te tagata leʼoleʼo ʼo te fale pilisoni mo tona famili, ʼo iku ai ki te papitemaʼi ʼo nātou ko he kau kaugana ʼa Sehova. Neʼe “fakafiafia lahi mo tona famili fuli ʼi tana kua tui ki te ʼAtua”. (Gāue 16:16-34.) Ko he toe fiafia neʼe lagi maʼu e Paulo mo Silasi! ʼI tatatou vakaʼi te faʼifaʼitaki ʼaenī pea mo ʼihi ʼu faʼifaʼitaki faka tohi-tapu ʼo ʼuhiga mo te lotomālohi, e feafeaʼi he fealagia kia tatou ke tou nonofo lotomālohi ʼi totatou ʼuhiga kaugana ʼa Sehova?
Ke tou haga lotomālohi
17. Ohage ko tana fakahā ia Pesalemo kapite 27, koteā te pikipikiga ʼo te falala ʼaē kia Sehova mo te lotomālohi?
17 Ko te ʼamanaki ʼaē kia Sehova ʼe tokoni anai kia tatou ke tou nonofo lotomālohi. Neʼe hiva fēnei e Tavite: “ ʼAmanaki kia Sehova, ke ke lotomālohi, pea ke mālohi tou loto! ʼIo, falala kia Sehova.” (Pesalemo 27:14). ʼE fakahā e te Pesalemo kapite 27 ko Tavite neʼe falala kia Sehova ohage “ko he tule mālohi” ʼo tona maʼuli (vaega 1). Neʼe lotomālohi ia Tavite ʼi tana sio ʼaē ki te ʼu faʼahi neʼe fai e te ʼAtua ki tana ʼu fili ʼi te temi ʼaē (ʼu vaega 2, 3). Ko te tokaga ʼaē ki te potu tāfito ʼo te tauhi kia Sehova neʼe ko te tupuʼaga ʼaia ʼo tona lotomālohi (vaega 4). Ko te falala ʼaē ki te tokoni ʼa Sehova, mo tana puipui, pea mo tana hāofaki neʼe ina toe fakatuputupu ai te lotomālohi ʼa Tavite (ʼu vaega 5-10). Ko tona akoʼi tuʼumaʼu ʼi te ʼu moʼoni ʼo te ala faitotonu ʼa Sehova neʼe toe ʼaoga kia ia (vaega 11). Ko te faikole mo falala ki te hāofaki mai tona ʼu fili, fakatahi mo te tui pea mo te ʼamanaki, neʼe tokoni kia Tavite ke lotomālohi (ʼu vaega 12-14). ʼE feala ke tou lagalagaʼi tatatou lotomālohi ʼi he ʼu ʼaluʼaga ʼe tatau, ʼaki te fakahā ʼaē ʼe tou ‘falala moʼoni kia Sehova’.
18. a) Koteā ʼaē ʼe ina fakahā ko te fakakaugā tuʼumaʼu mo ʼotatou ʼu kaugā fagona tauhi kia Sehova ʼe feala ke tokoni kia tatou ke tou nonofo lotomālohi? b) Koteā te gāue ʼe fai e te ʼu fono faka kilisitiano ʼi te lagalagaʼi ʼo te lotomālohi?
18 Ko te fakakaugā tuʼumaʼu mo ʼotatou ʼu kaugā tauhi kia Sehova ʼe feala ke tokoni kia tatou ke tou nonofo lotomālohi. ʼI te temi ʼaē neʼe fai ai te tagi ʼa Paulo kia Sesale, pea neʼe folau ai ki Loma, neʼe felāveʼi mo te ʼu kaugā tui ʼi te Lapalasi fakatauʼaga meʼa kai ʼo Appius pea mo te Trois-Tavernes. ʼE fakamatala fēnei: “ ʼI tana sio ʼaē kia nātou, neʼe fakafetaʼi ia Paulo ki te ʼAtua pea neʼe lotomālohi.” (Gāue 28:15). Ka tou kau tuʼumaʼu ki te ʼu fono faka kilisitiano, ʼe tou fakalogo ki te tokoni ʼa Paulo: “Tou fetokagaʼaki ke tou feʼugaʼaki ki te ʼofa pea mo te ʼu gāue lelei, ke ʼaua naʼa tou lituʼa ki te fakatahiʼi ʼo tatou totonu, ohage ko te fakamāhani ʼa ʼihi, kae ke tou fefakaloto mālohiʼaki, tāfito la ʼe koutou mamata ki te fakaōviōvi mai ʼo te ʼaho.” (Hepeleo 10:24, 25). Koteā te faka ʼuhiga ʼo te fefakaloto mālohiʼaki? Ko te fakaloto mālohi ʼe faka ʼuhiga “ko te fonu ʼi te lotomālohi, peʼe ko te falala”. (Webster’s Ninth New Collegiate Dictionary.) E lahi te meʼa ʼe feala ke tou fai ke lotomālohi ʼihi kilisitiano, pea ko te ʼu fakaloto mālohi mai ia nātou ʼaia ʼe feala ke fakatuputupu te kalitate ʼaia ia tatou.
19. Koteā te pikipikiga ʼo te Tohi-Tapu mo te ʼu tohi faka kilisitiano ki tatatou nonofo lotomālohi?
19 Ke feala hatatou nonofo lotomālohi, ʼe tonu ke tou ako tuʼumaʼu te Folafola ʼa te ʼAtua pea mo tou maʼuliʼi tana ʼu tokoni (Teutalonome 31:9-12; Sosue 1:8). ʼE tonu ke maʼu ʼi tatatou ako tuʼumaʼu te ʼu tohi faka kilisitiano ʼaē ʼe fakatafito ki te Tohi-Tapu, koteʼuhi ko te tokoni loloto ʼaē ʼe maʼu ai ʼe tokoni anai kia tatou ke tou tauʼi te ʼu ʼahiʼahi ʼo te tui ʼaki te lotomālohi ʼe foaki mai e te ʼAtua. ʼI te ʼu fakamatala faka tohi-tapu, neʼe tou sio ai ki te ʼu ʼaluʼaga kehekehe neʼe lotomālohi ai te kau kaugana ʼa Sehova. ʼI te temi nei, e lagi mole tou ʼiloʼi peʼe feafeaʼi he tokoni mai kia tatou te logo ʼaia, kae ko te Folafola ʼa te ʼAtua ʼe mālohi, pea ko te meʼa ʼaē ʼe tou ako ʼi ai ʼe feala ke fua lelei tuʼumaʼu kia tatou (Hepeleo 4:12). Ohage la, ka kamata tuputupu ʼi tatatou minisitelio te mataku ʼaē ki te tagata, ʼe feala ke tou manatuʼi te haga ʼaē ʼa Enoke ʼaki te lotomālohi ʼo fakahā te logo ʼa te ʼAtua ki te hahaʼi aga heʼe faka lotu. — Suta 14, 15.
20. He koʼe koa ʼe feala ke ʼui ko te faikole ʼe maʼuhiga mokā tonu ke tou nonofo lotomālohi ʼi totatou ʼuhiga kaugana ʼa Sehova?
20 Ke tou nonofo lotomālohi ʼi totatou ʼuhiga kaugana ʼa Sehova, ʼe tonu ke tou haga faikole (Loma 12:12). Neʼe kātakiʼi e Sesu ʼaki te lotomālohi te ʼu ʼahiʼahi koteʼuhi “neʼe ina momoli ʼaki te ʼu lāuga mālohi mo te ʼu loʼimata, tana ʼu tagi pea mo tana ʼu kole kia te Ia ʼaē ʼe feala ke ina hāofaki ia ia mai te mate, pea neʼe tali tana tagi koteʼuhi ko tana manavasiʼi faka lotu”. (Hepeleo 5:7.) ʼAki hatatou nofo ōvi ki te ʼAtua ʼi te faikole, ʼe mole tou hage anai ko te kau fula ʼo te mālama ʼaē ka nātou iku ki “te lua mate” ʼaē ʼe mole ʼi ai he toe fakatuʼuake (Fakahā 21:8). Ko te puipui fakaʼatua pea mo te maʼuli fakaʼatua ʼe maʼu anai e tana ʼu kaugana lotomālohi.
21. He koʼe koa ʼe feala ke lotomālohi te kau kaugana agatonu ʼa Sehova?
21 ʼI totatou ʼuhiga kau Fakamoʼoni agatonu ʼa Sehova, ʼe mole tonu ke tou manavasiʼi ki te ʼu fili fakatemonio pea mo te ʼu fili fakatagata, koteʼuhi ʼe tou maʼu te tokoni ʼa te ʼAtua pea mo te faʼifaʼitaki ʼaki te lotomālohi ʼa Sesu ʼi tona ʼuhiga tagata neʼe mālo ʼi te malamanei. Ko te fakatahi mo te hahaʼi ʼa Sehova ʼi te faʼahi fakalaumālie ʼe tokoni foki kia tatou ke tou lotomālohi. Ko tatatou lotomālohi ʼe toe hikihiki foki ʼaki te takitaki pea mo te tokoni ʼa te Tohi-Tapu pea mo te ʼu tohi faka kilisitiano. Pea ʼe toe tokoniʼi foki tatou e te ʼu fakamatala ʼo ʼuhiga mo te ʼu kaugana ʼa te ʼAtua ʼo te temi ʼāfea ke tou haʼele ʼi tona ʼu ala ʼaki te lotomālohi. Koia, ʼi te ʼu ʼaho fakamuli pea mo maʼuhiga ʼaenī, tou haga haʼele fakahagatonu ʼaki te lototoʼa ʼi te tauhi taputapu. ʼIo, ke lotomālohi fuli te hahaʼi ʼa Sehova!
ʼE feafeaʼi anai hakotou tali?
◻ E feafeaʼi ki te faʼifaʼitaki ʼa Sesu hana fakafonu ia tatou te lotomālohi?
◻ Koteā ʼaē neʼe foaki age kia Sesu mo ʼana ʼu tisipulo ke nātou lotomālohi ʼo haga fai faka mafola?
◻ He koʼe koa neʼe ʼaoga te lotomālohi ki te kau Sutea mo te kau Senitile ʼi tanatou kau ʼaē kia Sehova?
◻ Ko te ʼu faʼifaʼitaki feafeaʼi ʼaē neʼe foaki mai e Enise mo Timoteo ʼo ʼuhiga mo te lotomālohi?
◻ Koteā ʼaē ʼe ina fakamoʼoni mai, ʼi te fakataga, ko te lotomālohi ʼe ina foaki mai te loto fiafia?
[Paki ʼo te pasina 18]
Ohage ko Sesu, ʼe feala ke tou fakafeagai ʼaki te lotomālohi ki te fakahala mo kapau ʼe tou maʼuliʼi pea mo tokagaʼi te Tohi-Tapu.