‘Koutou Lototoʼa Pea Mo Mālohi!’
“Koutou lototoʼa! Kua ʼau mālo ʼi te malamanei.”—Soane 16:33, MN.
1. ʼUhi ko te ʼu meʼa neʼe ʼamanaki hoko ki te kau Iselaele ʼi Kanaane, koteā te tokoni ʼaē neʼe fai kia nātou?
ʼI TE ʼamanaki ʼaē ʼa te kau Iselaele ke nātou fakalaka ʼi te Vaitafe ʼo Solotane pea mo nātou hū ki te Kele ʼo Te Fakapapau, neʼe ʼui fēnei e Moisese kia nātou: “Koutou lototoʼa pea mo mālohi. ʼAua naʼa koutou matataku pea ʼaua naʼa koutou tekelili ʼi ʼonatou muʼa, heʼe ko Sehova tokotou ʼAtua ʼe ko ia ʼaē ʼe haʼele mo koe.” Pea neʼe pāuiʼi e Moisese ia Sosue, ʼaē neʼe fili ke ina taki te kau Iselaele ki Kanaane, pea neʼe ina toe fai kia ia te tokoni ʼaē ke lototoʼa. (Teutalonome 31:6, 7) Ki muli age, neʼe fakaloto mālohiʼi e Sehova totonu ia Sosue, ʼo ina ʼui fēnei: “Ke ke lototoʼa pea mo mālohi . . . Ke ke lototoʼa pea mo mālohi ʼaupito.” (Sosue 1:6, 7, 9) Neʼe ʼaoga ʼaupito ʼi te temi ʼaia te ʼu palalau ʼaia. Neʼe tonu ke lototoʼa te kau Iselaele moʼo tauʼi te ʼu fili mālohi ʼaē neʼe maʼuʼuli ʼi te tahi kauvai ʼo Solotane.
2. E feafeaʼi totatou ʼaluʼaga ia ʼaho nei, pea koteā ʼaē ʼe ʼaoga kia tatou?
2 Ia ʼaho nei, ʼe ʼamanaki te kau Kilisitiano moʼoni ke nātou hū ki te mālama foʼou ʼaē neʼe fakapapauʼi mai pea ohage ko Sosue, ʼe tonu ke nātou lototoʼa. (2 Petelo 3:13; Apokalipesi 7:14) Kae ko totatou ʼaluʼaga ʼe kehekehe mo te ʼaluʼaga ʼo Sosue. Neʼe tau ia Sosue ʼaki he ʼu heletā pea mo he ʼu tao. Kae ko tatou ʼe tou kau ki he tau fakalaumālie, pea ʼe mole tou toʼo anai he ʼu mahafu moʼoni. (Isaia 2:2-4; Efeso 6:11-17) Tahi ʼaē meʼa, neʼe lahi te ʼu tau neʼe tonu ke kau kiai ia Sosue, māʼiape la ʼi tanatou ʼosi hū ki te Kele ʼo Te Fakapapau. Kae ʼe tou lolotoga fai nei tatatou tau lahi—ʼi muʼa ʼo tatatou hū ki te mālama foʼou. Tou vakaʼi ʼihi ʼu ʼaluʼaga ʼe tonu ai ke tou lototoʼa.
He Koʼe ʼe Tonu Ke Tou Tau?
3. Koteā ʼaē ʼe fakahā mai e te Tohi-Tapu ʼo ʼuhiga mo ia ʼaē ʼe fakafeagai tāfito kia tatou?
3 Neʼe tohi fēnei e te ʼapositolo ko Soane: “E tou iloi ko tatou e ʼa te Atua, kae e mauli te malama-nei katoa i te Kovi.” (1 Soane 5:19) ʼE fakahā e te ʼu palalau ʼaia te tupuʼaga tāfito ʼaē ʼe tonu ai ki te kau Kilisitiano ke nātou tau moʼo taupau tanatou tui. Ka nofo agatonu he Kilisitiano, pea ʼe mole mālo ia Satana. Koia ko Satana ʼe hage ko “he laione e gugulu” ʼe ina faigaʼi ke ina fakamatakuʼi pea mo folo te kau Kilisitiano agatonu. (1 Petelo 5:8) ʼI tona fakahagatonu, ʼe ina tauʼi te kau Kilisitiano fakanofo pea mo tonatou ʼu kaugā gāue. (Apokalipesi 12:17) ʼI te tau ʼaia, ʼe ina fakaʼaogaʼi te hahaʼi moʼo fakahoko tana ʼu fakatuʼutuʼu, peʼe nātou mālama kiai peʼe kailoa. ʼE tonu ke tou lototoʼa ke feala hatatou tauʼi ia Satana pea mo tana kau gāue fuli.
4. Koteā te fakatokaga neʼe fai e Sesu, kae koteā te kalitate ʼe tonu ke fakahā e te kau Kilisitiano moʼoni?
4 Mai tona ʼaluʼaga ʼaē neʼe ʼiloʼi e Sesu ko Satana pea mo tana hahaʼi gāue ʼe nātou fakafeagai mālohi anai ki te logo lelei, neʼe Ina fakatokagaʼi fēnei ki tana kau tisipulo: “E natou tukuʼage anai koutou ki te fakataga, e tamatei anai koutou pea e fehia anai te atu puleaga ia koutou koteuhi ko toku huafa.” (Mateo 24:9) Neʼe moʼoni te ʼu palalau ʼaia ʼi te ʼuluaki sēkulō, pea ʼe toe moʼoni ia ʼaho nei. ʼI tona fakahagatonu, ko te fakatagaʼi ʼaē neʼe fai ki ʼihi kau Fakamoʼoni ʼa Sehova ʼi totatou temi neʼe kovi ʼaupito ʼi te hisitolia. Kae ʼe lototoʼa te kau Kilisitiano moʼoni ia muʼa ʼo te ʼu fakataga ʼaia. ʼE nātou ʼiloʼi ko “te mataku ki te tagata, koʼena te meʼa ʼaē ʼe liliu ko he hele,” pea ʼe mole nātou fia tō ki te hele.—Tāʼaga Lea 29:25.
5, 6. (a) Koteā te ʼu ʼaluʼaga ʼaē ʼe tonu ai ke tou lototoʼa? (b) ʼE tonu ke feafeaʼi te aga ʼa te kau Kilisitiano agatonu mokā ʼahiʼahiʼi tanatou tui?
5 ʼO hilifaki ki te fakataga, ʼe ʼi ai te tahi ʼu fihifihia ʼe tonu ke tou fakahā ai he lototoʼa. ʼE faigataʼa ʼaupito ki ʼihi ʼu kaugā fagona hanatou fakahā te logo lelei ki he ʼu hahaʼi ʼe mole nātou ʼiloʼi. ʼE ʼahiʼahiʼi te lototoʼa ʼo ʼihi ʼu fānau ʼi te faleako mokā kole age ke nātou hiva te hiva ʼo te puleʼaga peʼe ke nātou lau tanatou nonofo agatonu ki te puleʼaga ʼo te fenua peʼe ki te fuka. Mai tona ʼaluʼaga ʼaē ko te faʼahi ʼaia ʼe ko he faʼahiga lotu, koia ko te ʼu fānau Kilisitiano ʼe nātou fakatotonu mālohi ke nātou fai te meʼa ʼaē ʼe fakafiafia ai te ʼAtua, pea ʼe ko he meʼa fakafiafia kia ia te lelei ʼo tanatou aga.
6 ʼE toe ʼaoga ke tou lototoʼa mokā fakaʼaogaʼi e te hahaʼi fakafeagai ia te ʼu nusipepa, mo te lātio pea mo te televisio moʼo faka mafola he ʼu fakamatala loi ʼo ʼuhiga mo te ʼu kaugana ʼa te ʼAtua, peʼe mokā nātou faiga ke nātou faka tuʼakoi te tauhi moʼoni ʼaki tanatou “fakatuʼutuʼu te malaʼia ʼaki te lao.” (Pesalemo 94:20) Ohage la, ʼe tonu ke tou feafeaʼi mokā fakahā ʼi te nusipepa, ʼi te lātio, peʼe ʼi te televisio he ʼu loi ʼo ʼuhiga mo te kau Fakamoʼoni ʼa Sehova? ʼE tonu koa ke tou punamaʼuli kiai? Kailoa. ʼE tou ʼiloʼi ʼe tonu ke hoko te ʼu meʼa ʼaia. (Pesalemo 109:2) Pea ʼe mole tou punamaʼuli mokā faka tui ʼihi ki te ʼu loi ʼaia, heʼe “ko ia ʼaē ʼe mole heʼeki fakapotopoto ʼe tui ki te ʼu palalau fuli.” (Tāʼaga Lea 14:15) Kae ko te kau Kilisitiano agatonu ʼe mole nātou tui ki te ʼu fakamatala ʼo ʼuhiga mo tonatou ʼu tēhina, pea ʼe mahino ia ʼe mole nātou tō anai ʼi te ʼu fono ʼuhi ko te ʼu fakamatala loi ʼaia, peʼe fakasiʼisiʼi tanatou kau ki te minisitelio, peʼe vaivai ai tanatou tui. Kae ʼe nātou “fakahā ko [nātou] ko te ʼu minisi ʼa te ʼAtua . . . ʼi te faka kolōlia pea mo te fakalainoa, ʼi te ʼu logologona kovi pea mo te ʼu logologona lelei, ohage ko he hahaʼi kākā [ohage ko tona ʼui e te hahaʼi fakafeagai] kae [ʼi tona ʼuhiga moʼoni] ko he hahaʼi moʼoni.”—2 Kolonito 6:4, 8, MN.
7. Koteā te ʼu fehuʼi maʼuhiga ʼe feala ke tou fai takitokotahi?
7 Neʼe ʼui fēnei e Paulo, ʼi tana faitohi kia Timoteo: “Nee mole foaki mai kia tatou e te Atua he laumalie o te mataku, kae o te malohi . . . Koia, aua naa ke ufiufi i te fai o te fakamooni o totatou Aliki.” (2 Timoteo 1:7, 8; Maleko 8:38) ʼI tatatou lau te ʼu palalau ʼaia, ʼe feala ke tou feʼekeʼaki fēnei: ‘ ʼE ʼau ufiufi koa ki te ʼu meʼa ʼaē ʼe ʼau tui kiai peʼe ʼau lototoʼa? ʼI te faʼahi ʼaē ʼe ʼau gāue ai (peʼe ʼi te faleako), ʼe ʼau fakahā koa ki te hahaʼi ko ʼau ko te Fakamoʼoni ʼa Sehova peʼe ʼau faiga koa ke mole nātou ʼiloʼi? ʼE ʼau ufiufi koa heʼe mole ʼau tatau mo te hahaʼi peʼe ʼau fiafia ai ʼuhi ko taku ʼu felogoi mo Sehova?’ Kapau ʼe mole lelei te ʼu manatu ʼa he tahi ʼo ʼuhiga mo te faka mafola ʼo te logo lelei peʼe ʼo ʼuhiga mo tana agatonu ki he faʼahi ʼe mole leleiʼia e te hahaʼi, pea ʼe tonu ke ina manatuʼi te tokoni ʼa Sehova kia Sosue: “Ke ke lototoʼa pea mo mālohi.” Tou manatuʼi tuʼumaʼu, ʼe mole ko te manatu ʼa totatou ʼu kaugā gāue peʼe ko totatou ʼu kaumeʼa ʼi te faleako ʼaē ʼe maʼuhiga, kae ʼe ko te manatu ʼa Sehova pea mo Sesu Kilisito.—Kalate 1:10.
ʼE Tou Maʼu Feafeaʼi Te Lototoʼa
8, 9. (a) ʼI te tahi lakaga, neʼe ʼahiʼahiʼi feafeaʼi te lototoʼa ʼa te ʼu ʼuluaki Kilisitiano? (b) Neʼe koteā ʼaē neʼe fai e Petelo pea mo Soane ʼi te fakamatakuʼi ʼo nāua, pea koteā ʼaē neʼe hoko kia nāua pea mo tonā ʼu tēhina?
8 ʼE lava feafeaʼi hatatou lototoʼa ke feala ai hatatou taupau tatatou agatonu ʼi te ʼu temi faigataʼaʼia? Neʼe maʼu feafeaʼi e te ʼu ʼuluaki Kilisitiano te lototoʼa? Tou vakaʼi te meʼa ʼaē neʼe hoko ʼi te temi ʼaē neʼe ʼui ai e te kau pelepitelo pule pea mo te kau matutuʼa ʼo Selusalemi kia Petelo pea mo Soane ke fakagata tanā fai faka mafola ʼi te huafa ʼo Sesu. Neʼe mole fakalogo ia te ʼu tisipulo pea neʼe fakamatakuʼi ai nāua pea mo faka ʼāteainaʼi leva nāua. Hili pe ʼaia, neʼe nā fakatahi mo te ʼu tēhina, pea neʼe nātou faikole fuli fakatahi, ʼo nātou ʼui fēnei: “Sehova, tokagaʼi tanatou ʼu fakamataku, pea ke foaki mai ki tau ʼu kaugana ke hoko atu tanatou tala tau folafola ʼaki he lotomālohi.” (Gaue 4:13-29, MN ) Moʼo tali kiai, neʼe fakaloto mālohiʼi nātou e Sehova ʼaki te laumālie maʼoniʼoni, pea ohage ko tona fakamoʼoni ki muli age e te kau takitaki Sutea, neʼe nātou “folahi i Selusalemi” tanatou ʼu faiakonaki.—Gaue 5:28.
9 Tou vakavakaʼi te meʼa ʼaē neʼe hoko. ʼI te fakamatakuʼi e te kau takitaki Sutea ia te ʼu tisipulo, neʼe mole nātou fia fakagata tanatou fai faka mafola ʼuhi ko te ʼu fakafeagai ʼaia. Kailoa, kae neʼe faikole te kau tisipulo ke nātou maʼu he lototoʼa ke nātou hoko atu tanatou fai faka mafola. Neʼe nātou mulimuli ki tanatou faikole, pea neʼe fakaloto mālohiʼi nātou e Sehova ʼaki tona laumālie. Ko te faʼahi ʼaia ʼaē neʼe hoko kia nātou ʼe ina fakahā mai ko te meʼa ʼaē neʼe tohi e Paulo ki muli age ʼi he tahi ʼaluʼaga, ʼe faka ʼuhiga ki te kau Kilisitiano mokā fakatagaʼi nātou. Neʼe ʼui fēnei e Paulo: “E au fealagia te meafuape ia Ia ae e ina fakamalohi au.”—Filipe 4:13.
10. ʼE tokoni feafeaʼi te meʼa ʼaē neʼe hoko kia Selemia kia nātou ʼaē ʼe umiuminoa?
10 Kae e feafeaʼi mo kapau ko he tahi ʼe umiuminoa. ʼE feala koa ke tauhi kia Sehova ʼaki he lototoʼa mo kapau ʼe hoko ki ai he fakafeagai? Ei! Koutou manatuʼi te tali ʼa Selemia ʼi te temi ʼaē neʼe fili ai ia ia e Sehova ke liliu ko he polofeta. Neʼe ʼui fēnei e te tūpulaga: “ ʼE kei ʼau tamasiʼi.” ʼE tou sio ai neʼe manatu ia Selemia neʼe mole tau mo ia te gāue ʼaia. Kae neʼe fakaloto mālohiʼi fēnei ia ia e Sehova: “ ʼAua tau ʼui ‘ ʼe kei ʼau tamasiʼi.’ Kae kia nātou fuli ʼaē ʼe ʼau fekauʼi anai koe kiai, ʼe tonu ke ke ʼalu kiai, pea ko meʼa fuli pe ʼaē ʼe ʼau fakatotonu atu anai, ʼe tonu anai ke ke tala. ʼAua naʼa ke mataku ʼuhi ko tonatou ʼu fofoga, heʼe ‘ ʼau nofo mo koe moʼo faka ʼāteainaʼi koe.’ ” (Selemia 1:6-10) Neʼe falala ia Selemia kia Sehova, koia ʼaki te mālohi ʼo Sehova neʼe ina tauʼi tana mataku ʼi te fai faka mafola pea neʼe liliu ko he fakamoʼoni lototoʼa lahi ʼo Iselaele.
11. Koteā ʼaē ʼe tokoni ki te kau Kilisitiano ia ʼaho nei ke nātou hage ko Selemia?
11 ʼE toe tatau te gāue ʼa te kau Kilisitiano fakanofo ia ʼaho nei mo te gāue ʼa Selemia, pea ʼaki te tokoni ʼa te “hahai kaugamalie” ʼo te “tahi ʼu ōvi,” ʼe nātou haga kalagaʼi te ʼu fakatuʼutuʼu ʼa Sehova, tatau aipe peʼe mole fia logo te hahaʼi, peʼe nātou manukinukiʼi pea mo fakatagaʼi nātou. (Apokalipesi 7:9; Soane 10:16, MN ) ʼE fakaloto mālohiʼi nātou e te ʼu palalau ʼaenī neʼe fai e Sehova kia Selemia: “ ʼAua naʼa ke mataku.” ʼE mole galo kia nātou ko te ʼAtua ʼaē neʼe ina fekauʼi nātou pea ʼe nātou faka mafola tana logo.—2 Kolonito 2:17.
Ko He ʼu Faʼifaʼitaki ʼo Te Lototoʼa ʼe Tonu Ke Tou Mulimuli Kiai
12. Koteā te faʼifaʼitaki lelei ʼo te lototoʼa neʼe foaki e Sesu, pea neʼe ina fakaloto mālohiʼi feafeaʼi tana kau tisipulo?
12 Ko te faʼahi ʼaē ʼe feala ke tokoni mai ʼi tatatou ʼu faiga ʼaē ke tou maʼu te lototoʼa, ʼe ko te metitasio ki te ʼu faʼifaʼitaki ʼo ʼihi, ohage ko Selemia, ʼaē neʼe nātou gāue ʼaki he lototoʼa. (Pesalemo 77:12) Ohage la, ka tou vakaʼi te minisitelio ʼo Sesu, pea ʼe tou ōfo ʼi tana lototoʼa ʼi te temi ʼaē neʼe ʼahiʼahiʼi ai ia ia e Satana, pea ʼi te temi ʼaē neʼe ina tauʼi ai te fakafeagai mālohi ʼa te kau takitaki Sutea. (Luka 4:1-13; 20:19-47) ʼAki te mālohi ʼo Sehova, neʼe mole vaivai ia Sesu, pea ʼi muʼa pe ʼo tona mate, neʼe ina ʼui fēnei ki tana kau tisipulo: “ ʼI te malamanei ʼe koutou maʼu te mamahi, kae ke koutou lototoʼa! Kua ʼau mālo ʼi te malamanei.” (Soane 16:33, MN; 17:16) Kapau neʼe mulimuli te kau tisipulo ʼa Sesu ki tana faʼifaʼitaki, pea neʼe nātou toe mālo mo nātou. (1 Soane 2:6; Apokalipesi 2:7, 11, 17, 26) Kae neʼe tonu ke nātou “lototoʼa.”
13. Koteā te fakaloto mālohi neʼe foaki e Paulo ki te kau Filipe?
13 Hili ni ʼu taʼu ʼi te ʼosi mate ʼa Sesu, ko Paulo pea mo Silasi neʼe ʼave ʼo pilisoniʼi ʼi Filipe. Ki muli age, neʼe fakaloto mālohiʼi fēnei e Paulo te kokelekasio ʼo Filipe: “Koutou nonofo mālohi ʼi he ʼatamai e tahi, ʼo . . . faiga ʼaki he nefesi e tahi ki te tui ʼo te logo lelei, ʼo mole koutou matataku ʼi tokotou ʼu fili.” Moʼo fakaloto mālohiʼi nātou ʼo ʼuhiga mo te faʼahi ʼaia, neʼe ʼui fēnei e Paulo: “Ko te meʼa ʼaia [te fakatagaʼi ʼo te kau Kilisitiano] ʼe ko he fakamoʼoni ʼo tonatou fakaʼauha [ʼo te hahaʼi fakafeagai], kae kia koutou ko he fakamoʼoni ki te maʼuli; pea ko te fakaʼiloga ʼaia ʼe haʼu mai te ʼAtua, he neʼe foaki atu kia koutou te pilivilesio ʼo ʼuhiga mo Kilisito, ke koutou tui kia te ia, pea ke koutou mamahi maʼa te ia.”—Filipe 1:27-29, MN.
14. Koteā te ʼu fua ʼi Loma ʼo te lototoʼa ʼa Paulo?
14 ʼI te temi ʼaē neʼe faitohi ai ia Paulo ki te kokelekasio ʼo Filipe, neʼe toe pilisoniʼi ia ia ʼi Loma. Kae neʼe hoko atu pe tana fai faka mafola ki te hahaʼi ʼaki he lototoʼa. Neʼe koteā tona ʼu fua? Neʼe ina tohi fēnei: “Ko toku ʼu haʼi ʼuhi ko Kilisito neʼe hā lelei ki te kau Solia ʼo te Peletolio pea mo te hahaʼi fuli pe, pea ko te kau tēhina tokolahi ʼi te ʼAliki, ʼi tanatou kua falala ʼuhi ko toku ʼu haʼi, ʼe nātou lototoʼa lahi age ʼo tala te folafola ʼa te ʼAtua, ʼo mole nātou matataku.”—Filipe 1:13, 14, MN.
15. ʼE tou lava maʼu ʼifea he ʼu faʼifaʼitaki lelei ʼo te tui ʼaē ka fakaloto mālohiʼi ʼaki anai tatatou lototoʼa?
15 ʼE fakaloto mālohiʼi tatou e te faʼifaʼitaki ʼa Paulo. ʼO toe feiā mo te ʼu faʼifaʼitaki lelei ʼaē neʼe tuku mai e te kau Kilisitiano ʼo totatou temi, ʼaē neʼe nātou kātakiʼi te ʼu fakataga ʼi te ʼu fenua ʼaē ʼe puleʼaga fefeka peʼe pule ai te kau takitaki lotu. Ko te ʼu fakamatala ʼo te tokolahi ia nātou ʼaia neʼe tohi ʼi Te Tule Leʼo pea mo te Réveillez-vous ! pea mo te Annuaire des Témoins de Jéhovah. Ka koutou lau te ʼu fakamatala ʼaia, koutou manatuʼi ko te hahaʼi ʼaia ʼe ko he ʼu hahaʼi ohage pe ko tatou, kae ʼi te temi ʼaē neʼe nātou tau ai mo te ʼu ʼaluʼaga faigataʼa ʼaupito, neʼe foaki e Sehova kia nātou te mālohi ʼaē ʼe fakalaka ʼi te mālohi māhani ʼo feala ai hanatou kātakiʼi. ʼE tou lava tui papau ʼe ina toe foaki mai anai te mālohi ʼaia kia tatou mo kapau ʼe ʼaoga kia tatou.
Ko Tatatou Lototoʼa ʼe Ina Fakafiafia Pea Mo Faka Maʼuhigaʼi Ia Sehova
16, 17. ʼE lava feafeaʼi ia ʼaho nei ke tou lototoʼa?
16 Kapau ʼe lagolago mālohi he tahi ki te moʼoni pea mo te faitotonu, pea ʼe ko he tahi ʼe lototoʼa. Kapau ʼe fai e he tahi te faʼahi ʼaia logola tana mataku, pea ʼe toe lahi age anai tana lototoʼa. ʼI tona fakahagatonu, ko te kau Kilisitiano fuli ʼe feala ke nātou lototoʼa, mo kapau ʼe nātou loto moʼoni ke nātou fai te finegalo ʼo Sehova, mo kapau ʼe nātou fakatotonu ke nātou nonofo agatonu, mo kapau ʼe nātou falala tuʼumaʼu ki te ʼAtua, pea mo kapau ʼe nātou manatuʼi tuʼumaʼu ko Sehova neʼe ina fakaloto mālohiʼi te hahaʼi tokolahi ohage ko nātou ʼi te temi muʼa. Tahi ʼaē meʼa, ka tou ʼiloʼi ko tatatou lototoʼa ʼe ina fakafiafia pea mo faka maʼuhigaʼi ia Sehova, pea ʼe toe mālohi age tatatou fakatotonu ʼaē ke mole tou vaivai. ʼE tou lotolelei ke manukiʼi tatou peʼe gaohi koviʼi tatou heʼe tou ʼofa lahi kia te ia.—1 Soane 2:5; 4:18.
17 Tou manatuʼi mokā tou mamahi ʼuhi ko tatatou tui, ʼe mole faka ʼuhiga leva neʼe tou fai he meʼa ʼe kovi. (1 Petelo 3:17) ʼE tou mamahi ʼuhi ko tatatou lagolago ki te tuʼi faʼitaliha ʼa Sehova, mo tatatou fai te meʼa ʼaē ʼe lelei, pea mo tatatou mole kau ki te mālama. ʼO ʼuhiga mo te faʼahi ʼaia, neʼe ʼui fēnei e te ʼapositolo ko Petelo: “Kapau ʼe koutou mamahi heʼe koutou fai te meʼa ʼaē ʼe lelei, pea mo koutou kātakiʼi, ko te meʼa ʼaia ʼaē ʼe leleiʼia e te ʼAtua.” Neʼe toe ʼui fēnei e Petelo: “Ko nātou ʼaē ʼe mamahi ʼo mulimuli ki te finegalo ʼo te ʼAtua, ke nātou haga foaki tonatou ʼu nefesi ki te Tupuʼaga agatonu kae nātou lolotoga fai te meʼa ʼaē ʼe lelei.” (1 Petelo 2:20, MN; 4:19, MN ) Ei, ʼe fiafia totatou ʼAtua ʼofa ko Sehova ʼuhi ko tatatou tui, pea ʼe faka maʼuhigaʼi ai ia ia. ʼE ko he tupuʼaga mālohi ʼaia ke tou lototoʼa.
Ia Muʼa ʼo Te ʼu Pule
18, 19. Ka tou lototoʼa ia muʼa ʼo he tuʼi fakamāu, koteā te logo ʼe tou tala kia nātou?
18 ʼI te ʼui ʼa Sesu ki tana kau tisipulo ʼe fakatagaʼi anai nātou, neʼe ina toe ʼui fēnei: “[Ko te hahaʼi ʼe] natou tuku anai koutou ki te sanetolio pea e natou huipiʼi anai koutou i onatou sinakoka. E natou ave anai koutou kia mua o te u kovana mo te u hau uhi ko au, koteuhi ko he fakamooni ia kia natou pea mo te u puleaga pagani.” (Mateo 10:17, 18) ʼE tonu ke tou lototoʼa mokā tou tutuʼu ia muʼa ʼo he tuʼi fakamāu, peʼe ko he pule ʼuhi ko he ʼu fakamatala loi neʼe fai ʼo ʼuhiga mo tatou. Kae ka tou lototoʼa ʼo fakaʼaogaʼi te ʼu ʼaluʼaga ʼaia moʼo fai faka mafola ki te hahaʼi ʼaia, pea ʼe tou fakaliliu te faigataʼaʼia ʼaia ko he fealagia moʼo fakahoko he faʼahi maʼuhiga. ʼE moʼoni, ʼe tou tala ki te hahaʼi ʼaē ʼe nātou fakamāuʼi tatou te ʼu folafola ʼa Sehova, ʼaē ʼe tuʼu ʼi te Pesalemo kapite 2: “ ʼI te temi nei, ʼu hau, koutou fakasiosio poto; koutou tuku ke akonakiʼi koutou, kau tuʼi fakamāu ʼo te kele. Koutou tauhi kia Sehova ʼi te manavasiʼi.” (Pesalemo 2:10, 11) ʼI te agamāhani, ka fakamāuʼi te kau Fakamoʼoni ʼa Sehova ʼi te ʼu telepinale ʼuhi ko he ʼu tukugakovi loi, pea ʼe faka maʼuhigaʼi e te ʼu tuʼi fakamāu te ʼāteaina ʼo te lotu, pea ʼe tou leleiʼia te faʼahi ʼaia. Kae ko ʼihi tuʼi fakamāu, neʼe nātou mulimuli ki te loto ʼo te kau fakafeagai. Kia nātou ʼaia, ʼe ʼui fēnei e te Tohi-Tapu: “Koutou tuku ke akonakiʼi koutou.”
19 ʼE tonu ke ʼiloʼi e te kau tuʼi fakamāu ko te lao ʼaē ʼe māʼoluga age ʼe ko te lao ʼa Sehova ʼAtua. ʼE tonu ke nātou manatuʼi ko te hahaʼi fuli, ʼo kau kiai mo te kau tuʼi fakamāu, ʼe nātou huʼi maʼua anai kia Sehova ʼAtua pea mo Sesu Kilisito. (Loma 14:10) Pea ko tatou, tatau aipe peʼe lelei peʼe kovi totatou fakamāuʼi, kae ʼe tou lototoʼa heʼe tokoni Sehova kia tatou. ʼE ʼui fēnei e te Tohi-Tapu: “Manuʼia ia nātou fuli ʼaē ʼe fenonoʼi ia te ia.”—Pesalemo 2:12.
20. He koʼe ʼe feala ke tou fiafia mo kapau ʼe tonu ke tou kātakiʼi te fakataga pea mo te ʼu fakamatala loi?
20 ʼI te Akonaki ʼi te Moʼuga, neʼe ʼui fēnei e Sesu: “Manuia ia koutou moka valoki koutou, mo fakatagai koutou pea mo lau atu te kovi fuape kia koutou, o natou lohi ai talia ko au. Koutou fakafiafia pea koutou fìafìa, koteuhi e lahi anai toutou fakapale i Selo; nee feiape tanatou fakatagai te kau polofeta nee muamua ia koutou.” (Mateo 5:11, 12) ʼE mahino ia ʼe mole ko he meʼa fakafiafia mokā fakatagaʼi tatou, kae ko tatatou nonofo mālohi logola te fakataga, ʼo kau kiai mo te ʼu fakamatala loi ʼi te televisio, mo te lātio pea mo te ʼu sulunale, ʼe ko he faʼahi fakatupu fiafia. Ko tona faka ʼuhiga ʼe tou fakafiafia ia Sehova pea ʼe tou maʼu anai te fakapale. Ko tatatou lototoʼa ʼe ina fakahā tatatou tui loloto, pea ʼe leleiʼia moʼoni tatou e te ʼAtua. ʼI tona fakahagatonu, ʼe hā ʼaki ai ʼe tou falala katoa kia Sehova. Ko te falala ʼaia ʼe maʼuhiga ki he Kilisitiano, ohage ko tona fakahā ʼi te alatike ʼaē ka hoa mai.
Koteā ʼAē Neʼe Koutou Ako?
• Koteā te ʼu ʼaluʼaga ʼe hoko ia ʼaho nei ʼe tonu ai ke tou lototoʼa?
• ʼE tou lava maʼu feafeaʼi te kalitate ʼaē ko te lototoʼa?
• Ko ai te ʼu faʼifaʼitaki lelei ʼo te lototoʼa?
• He koʼe ʼe tou fia gāue anai ʼaki he lototoʼa?
[Paki ʼo te pasina 9]
Ko Simone Arnold (ʼi te temi nei ko Liebster) ʼi Siamani, mo Widdas Madona ʼi Malawi, pea mo Lydia pea mo Oleksii Kurdas ʼi Ukraine, neʼe nātou fakahā te lototoʼa ʼaē ʼe foaki mai e Sehova pea neʼe nātou tauʼi te mālama agakovi
[Paki ʼo te pasina 10]
ʼE mole tou ufiufi ʼi te logo lelei
[Paki ʼo te pasina 11]
Ko te lototoʼa ʼa Paulo ʼi te fale pilisoni neʼe tokoni lahi ki te faka mafola ʼo te logo lelei
[Paki ʼo te pasina 12]
Kapau ʼe tou fakamahino ʼaki he lototoʼa tatatou manatu faka Tohi-Tapu ki he tuʼi fakamāu, pea ʼe ko he logo maʼuhiga ʼaē ʼe tou tala