Kua Kotou Iloʼi Koa?

He koʼe neʼe tauteaʼi e Sesu ia te ʼu faifakapapau?

NEʼE fakagafua ʼi te Lao ʼa Moisese ke fai e te hahaʼi hanatou ʼu fakapapau ʼaki hanatou ui, “ ʼE au fakamoʼoni atu ia muʼa ʼo te ʼAtua,” peʼe “ ʼE au fakamoʼoni atu ʼi te huafa ʼo Sehova.” Kaʼe, ʼi te temi ʼo Sesu, ko te ʼu palalau fuli ʼae neʼe fai e te kau Sutea neʼe natou fai ki ai he fakamoʼoni. Neʼe natou fai te faʼahi ʼaia ke tui te hahaʼi ki ʼanatou palalau. Kaʼe neʼe tauteaʼi tuʼa lua e Sesu ia te aga ʼaia, he neʼe mole hona ʼuhiga. Neʼe ina ui fenei: “Ko takotou ‘ ʼIo’ ke ʼio pea ko takotou ‘Kailoa’ ke kailoa.”—Mateo 5:33-37; 23:16-22;

ʼE ui ʼi te tikisionalio (Theological Dictionary of the New Testament), ko te Talmud ʼe tokoni mai ke tou mahino neʼe ko he agamahani ʼa te kau Sutea ia te fai ʼo he ʼu fakapapau, peʼe ko te fakamoʼoni ki ʼanatou palalau. Koteʼuhi ʼe fakamahino lelei ʼi te Talmud pe ʼe kotea te ʼu fakapapau ʼae neʼe tonu ke taupau pea mo ʼae neʼe feala ke mole taupau.

Neʼe mole ko Sesu tokotahi pe ʼae neʼe ina tauteaʼi ia te aga ʼaia ʼe kovi. Ohage la, ko te tagata faihisitolia Sutea ko Flavius Josèphe, neʼe faitohi ʼo ʼuhiga mo he magaʼi lotu Sutea ʼe mole fai ai te ʼu palalau ʼaeni: “ ʼE au fakamoʼoni atu.” ʼI te manatu ʼa te hahaʼi ʼo te magaʼi lotu ʼaia, ko te fai ʼo he fakapapau neʼe kovi age ia ʼi te loi. Neʼe natou ui, kapau neʼe tonu ke fai e he tahi ia he fakapapau ke tui age te hahaʼi, ʼe mahino ia neʼe ko he tagata ʼe gutuloi. Pea ʼe toe ui fenei ʼi te tohi Sutea ʼe higoa La Sagesse de Ben Sira: “Ko te tagata ʼae ʼe fakamoʼoni tuʼumaʼu ki ʼana palalau, ʼe ina meʼa noaʼi te lao.” Neʼe tauteaʼi e Sesu te fai ʼo he ʼu fakapapau ʼo ʼuhiga mo he ʼu faʼahi ʼe mole maʼuhiga. Kapau ʼe tou tala tuʼumaʼu ia te moʼoni, ʼe mole ʼaoga ia ke tou fakamoʼoni ki ʼatatou palalau ke tui mai te hahaʼi.