Ke Ke Fiafia Mo Ke Hikihiki Tau Ako Te Tohi-Tapu

KO SOSUE, neʼe tonu ke ina taki te puleʼaga ʼo Iselaele ki te Kele ʼo Te Fakapapau pea ʼe natou fakalaka anai ʼi he ʼu faigataʼaʼia. Kae, neʼe fakalotomalohiʼi ia ia e Sehova ʼo ina ui fenei: “Ke ke lototoʼa pea mo ke malohi ʼaupito.” Neʼe ina fakatotonu kia Sosue ke ina lau pea mo fakalogo ki te Lao, he ʼe fakapotopoto anai te ʼu tonu ʼae ka ina toʼo mo fua lelei anai ki tona maʼuli.—Sosue 1:7, 8, MN.

ʼE tou maʼuʼuli nei ʼi “he ʼu temi makehe pea mo faigataʼa,” koia ʼae ʼe feala ai ke tou tau mo he ʼu fihifihia. (2 Timoteo 3:1) Kapau ʼe tou loto ke fua lelei totatou maʼuli ohage ko Sosue, ʼe ʼaoga ke tou mulimuli ki te ʼu tokoni ʼae neʼe foaki age e Sehova ki ai. ʼE tonu ke tou lau tuʼumaʼu te Tohi-Tapu mo maʼuliʼi te ʼu manatu ʼae ʼe tou ako ke tou toʼo ai he ʼu tonu ʼe lelei.

Kae ko ʼihi ia tatou ʼe lagi mole tou leleiʼia te ako ʼo te Tohi-Tapu peʼe lagi mole tou iloʼi pe ʼe feafeaʼi tona ako. Moka ke vakaʼi te fakamatala ʼae ʼi te ʼa takai “ ʼAhiʼahi Fai Te ʼu Tokoni ʼAeni,” e ke maʼu anai he ʼu manatu ʼe tokoni atu ke fua lelei tau ako kia koe pea mo ke fiafia lahi ai.

Neʼe hiva fenei te tagata faipesalemo: “Taki au ʼi te ala ʼo ʼau fakatotonu, koteʼuhi ʼe au fiafia ai.” (Pesalemo 119:35, MN) ʼE toe feala pe foki la mo koe ke ke fiafia ʼi te ako ʼo te Folafola ʼa te ʼAtua. Kapau ʼe ke fakaloloto tau ako, ʼe ke maʼu ai anai he ʼu koloa Fakatohi-tapu.

Tatau aipe pe ʼe mole he puleʼaga ʼe ke taki ohage ko Sosue, kae ʼe ʼi ai pe la mo ʼou faigataʼaʼia. Koia, haga ako pea mo fakalogo ki te Folafola ʼa te ʼAtua ohage ko Sosue. Kapau ʼe ke fai te faʼahi ʼaia, ʼe fakapotopoto anai te ʼu tonu ʼae ʼe ke toʼo pea mo fua lelei anai ki tou maʼuli.