He Ko ʼe ʼe Mole Fakahigoaʼi e Te Kau Fakamoʼoni ʼa Sehova Tonatou Fale Fono Ko He ʼEkelesia?

ʼI te Tohi-Tapu, ko te kupu Fakakeleka ʼae ʼe tau fakaliliu ʼaki te kupu “ʼekelesia” ʼe fakaʼuhiga ia ki te kutuga ʼae ’e natou tauhi, kaʼe ʼe mole fakaʼuhiga ia ki te fale ʼae ʼe natou fakatahitahi ai.

Ko’eni te faʼifaʼitaki: ʼI te temi ʼae neʼe faitohi ai ia te apositolo ko Paulo ki te kau Kilisitiano ʼo Loma, neʼe ina momoli ai he ʼu ofa ki te taumatua ko Akilasi mo Pelesila, ʼo ina ui fenei: “Avage foki oku ofa ki te Ekelesia ae i tona api.” (Loma 16:5) Neʼe mole manatu ia Paulo ke momoli ʼona ofa ki te foʼi sinoʼi fale. Kaʼe ne’e ina momoli ’ona ’ofa ki te haha’i, ko tona faka’uhiga ki te kokelekasio ʼae neʼe fakatahitahi ʼi te loto fale ʼaia.a

Koia, ʼe mole matou fakaʼaogaʼi ai te kupu ʼekelesia kaʼe ko te kupu “Fale Fono.”

He koʼe ʼe fakahigoa ko te “Fale Fono ʼa te kau Fakamoʼoni ʼa Sehova”?

Ko he higoa ʼe tuha mo te ʼu meʼa ʼae ʼe fai ai pea ʼe lahi ʼona tupuʼaga:

• Ko te fale ʼaia ʼe fai ai te ʼu fono peʼe ko te ’u fakatahi lalahi.

• ʼE matou fakatahitahi ai ʼo ʼatolasio kia Sehova, te ʼAtua ʼo te Tohi-Tapu, mo fakamo’oni kia te ia pea mo fakakololiaʼi ia te ia.​—Pesalemo 83:18; Esaia 43:12.

• ʼE matou toe akoʼi ai foki ʼo ʼuhiga mo te Puleʼaga ʼo te ʼAtua, ʼae neʼe tau palalau ki ai ia Sesu.​—Mateo 6:9, 10; 24:14; Luka 4:43.

ʼE matou fakaafe atu koe ke ke kumi he Fale Fono ʼe tu’u ovi atu, ke feala hau sio pe feafeaʼi te fai ʼo te ʼu fono ʼa te kau Fakamoʼoni ʼa Sehova.