Ko Ai Te Alekaselo Ko Mikaele?

Te Tali ʼi Te Tohi-Tapu

Ko Mikaele ʼae ʼe fakahigoa’i ko “Sagato Mikaele” ʼi te tahi ʼu lotu, ne’e ko he higoa ne’e foaki kia Sesu ʼi mu’a ʼi tana mavae mai te lagi pea mo te temi ʼae ne’e mavae ai ʼi te kele.a Ko Mikaele ne’e tau mo Satana ʼi te ʼosi mate pe ʼa Moisese pea ne’e toe tokoni ki te ʼaselo ʼae ne’e ina ʼave te logo Fakaʼatua ki te polofeta ko Taniela. (Taniela 10:13, 21; Suta 9) Ko Mikaele ʼe tuha mo ia tona higoa, he ’e ko tona fakaʼuhiga “Ko Ai ʼAe ʼe Hage Ko Te ʼAtua?” ʼe lagolago ki te ʼuhiga pule ʼo te ʼAtua pea ʼe ina tau’i ʼona fili.​—Taniela 12:1; Apokalipesi 12:7.

Koʼeni te ʼu fakamoʼoni ko Sesu ia te ʼalekaselo ko Mikaele.

• Ko Mikaele te “alekaselo.” (Suta 9) Ko te kupu “alekaselo” ʼae ko tona faka’uhiga “pule ʼo te kau ʼaselo,” ʼe tu’u ia vaega pe ʼe lua ʼi te Tohi-Tapu, pea ʼe fakaʼaoga’i tu’uma’u ki te tokotahi, ʼo ha mai ai ko te ʼaselo pe ʼe tahi ʼe to’o ki ai te tu’ulaga. ʼI te vaega ʼo te ʼu vaega ʼe lua ʼae ʼe tu’u ai, ʼe ui ʼe ko te ʼAliki ia Sesu ʼae ne’e fakatu’uake ‘ʼe hifo mai anai mai te lagi. ʼE ina foaki anai he ʼu fakatotonu ʼaki te leʼo ʼo he alekaselo.’ (1 Tesalonika 4:​16) ʼE ma’u e Sesu te leʼo ʼo te “alekaselo” he ’e ko ia totonu te alekaselo ko Mikaele.

• ʼE puleʼi e Mikaele he foʼi kautau ʼaselo. “Ko Mikaele mo ʼana ʼaselo neʼe natou tauʼi te talakone,” ia Satana. (Apokalipesi 12:7) ʼUhi ʼe fakahigoa’i ko te ‘ʼaliki tafito ʼi te ʼu tama ʼaliki’ pea mo te ‘ʼaliki lahi,’ e ma’u e Mikaele te fealagia ʼae ke ina pule’i he koga maʼuhiga ʼo te malama fakalaumalie. (Taniela 10:13, 21; 12:1) Ne’e ui fenei e te tagata faiva ʼe ina ilo’i lelei te Tauhi Fo’ou ko David Aune, ʼe fakaha mai e te ʼu tu’ulaga ʼae ne’e fakaʼaoga’i kia Mikaele ʼe ko ia “te kamutoa lahi ʼo te ʼu malohi fakaʼaselo.”

  ʼE talanoa ʼi te Tohi-Tapu ki te higoa ʼo te tokotahi ʼe ina puleʼi he foʼi kautau ʼaselo. ʼE palalau ki te temi ʼe “ha te ʼAliki ko Sesu mai te lagi mo tana kau ʼaselo malolohi ʼi he afi kakaha. ʼI te temi ʼaia, ʼe lagavaka anai.” (2 Tesalonika 1:​7, 8; Mateo 16:27) Ko Sesu kua “hake ki selo, pea e fakalogo kia ia te kau ʼaselo, mo te ʼu pule pea mo te ʼu malohi.” (1 Petelo 3:​21, 22) ʼE mole tou fakapotopoto anai mo kapau ʼe tou manatu ne’e fakanofo e te ʼAtua ia Sesu pea mo Mikaele ko he ʼu kamutoa ʼe fakataupiepie anai pe ’e ko ai ʼae ka ina taki te ʼu ʼaselo maʼoni’oni. ʼE fakapotopoto age takita ui ko te ʼu higoa lua ʼaeni ko Sesu pea mo Mikaele ʼe fakaʼuhiga ki te foʼi tokotahi.

• Ko Mikaele “ʼe tuʼu ake” anai lolotoga “he temi mamahi” ʼe mole hona fakatatau talu mai te tuʼu ʼo te atu puleʼaga ʼo kaku mai ki te temi ʼaeni. (Taniela 12:1) ʼI te tohi ʼo Taniela, ko te kupu “tu’u ake” ʼe fakaʼuhiga ki he hau ʼe ina fakatu’utu’u ke ina fakahoko he gaue makehe. (Taniela 11:​2-4, 21) Ko Sesu Kilisito ʼae ʼe fakahigoa’i e te Tohi-Tapu ko “Te Folafola ʼa te ʼAtua” ina fakahoko anai he gaue fakatalakitupua ʼi tona ʼuhiga “Hau ʼo te ʼu hau” ʼi te temi ʼae ʼe ina molehi anai te ʼu fili ʼo te ʼAtua pea ʼe ina haofaki anai tana haha’i. (Apokalipesi 19:11-​16) ʼE ina fakahoko anai ʼi te “toe mamahi lahi ne’e heʼeki hoko talu mai te kamataʼaga ʼo te malamanei ʼo kaku mai ki te temi nei.”​—Mateo 24:21, 42.