Neʼe Liliu Te ʼu Tisipulo ʼe Toko Fa Ko He ʼu Tautai Tagata

Hili te fia matehi ʼo Sesu e te hahaʼi ʼo Nasaleti, neʼe alu leva ki te kolo ko Kapenaume ʼae neʼe tuʼu ovi ki te Tai ʼo Kalilea ʼae ʼe toe higoa ko “te kauvai ʼo Senesaleti.” (Luka 5:1) Neʼe fakahoko ai ia te lea fakapolofeta ʼa Isaia ʼae neʼe ui ai ʼe sisio anai te hahaʼi ʼo Kalilea ʼae ʼe nonofo ovi ki te tai ki he malama lahi.—Esaia 8:23; 9:1.

Pea ʼi Kalilea neʼe hoko atu ai e Sesu ia tana tala “kua ovi mai te Puleʼaga ʼo selo.” (Mateo 4:17) Neʼe felaveʼi ai mo ʼana tisipulo ʼe toko fa. Neʼe natou feoloʼaki mo Sesu ʼi muʼa atu, kaʼe ʼi tanatou toe liliu mai mai Sutea, neʼe natou toe hoko atu pe tanatou gaue tautai. (Soane 1:35-42) Kaʼe ʼi te temi nei, kua tonu ke natou muliʼi tuʼumaʼu ia Sesu ke feala hana akoako natou ki tanatou hoko atu tona minisitelio moka mavae anai.

ʼI te haʼele ʼa Sesu ʼi te matatai, neʼe sio ai kia Simone Petelo, mo tona tehina ko Atelea pea mo ʼonā kaugā gaue ʼe natou fakamaʼa ʼonatou kupega. Pea neʼe alu leva ia Sesu ʼo kake ki te vaka ʼo Petelo pea ina kole age ke fakamamaʼo atu mai te kauvai. ʼI tanatou kua mamaʼo, neʼe nofo ifo leva ki lalo ʼo kamata faiakonaki ʼo ʼuhiga mo te Puleʼaga ki te hahaʼi kaugā malie ʼae neʼe nonofo ʼi te matatai.

Hili ʼaia, neʼe ui fenei age e Sesu kia Petelo: “Hoho atu ki te loloto, ʼo kotou ʼaʼau ʼokotou kupega.” Kaʼe neʼe tali fenei age e Petelo: “ ʼAliki, neʼe matou kinakina ʼi te po katoa pea neʼe mole matou maʼu he meʼa, kaʼe ʼuhi ko tau palalau ʼe au toe ʼaʼau anai te ʼu kupega.”—Luka 5:4, 5.

Pea ʼi tanatou ʼaʼau ʼonatou kupega neʼe natou maʼu ai te ʼu tuʼuga ika, ʼo kamata motumotu ai te ʼu kupega. Koia neʼe natou foimo taukalo ai ki ʼonatou kaugā gelu ʼi te tahi age vaka ke ʼomai ʼo tokoni age. Kua vave fofonu pe te ʼu vaka lua ko te ika, pea mo kamata mou. ʼI te sio ʼa Petelo ki te faʼahi ʼaia, neʼe tuʼutuli ifo ia muʼa ʼo Sesu ʼo ina ui fenei: “Fakamamaʼo atu, ʼAliki, koteʼuhi ko au ko he tagata agahala.” Neʼe tali fenei age e Sesu: “Tuku tau mataku. ʼO kamata atu ʼi te temi nei, ko te ʼu tagata ʼae ka ke puke maʼuli anai.”—Luka 5:8, 10.

Neʼe ui fenei age e Sesu kia Petelo mo Atelea: “Kolua muli mai ia te au, pea ʼe au fakaliliu anai koulua ko he ʼu tautai tagata.” (Mateo 4:19) Neʼe ina fakaafe mo te ʼu tagata tautai ʼe toko lua ko Sakopo mo Soane te ʼu foha ʼo Sepeteo. Neʼe nā tali atu aipe. Koia, neʼe liakī e te toko fa ʼaia tanatou gaue kaʼe natou liliu leva ko te ʼu ʼuluaki tisipulo ʼa Sesu ʼo natou muliʼi tuʼumaʼu anai ia ia.