Neʼe Ina Akoʼi Te Moʼoni Ki He Fafine Samalitana

ʼI tanatou mavae ʼi Sutea ʼo olo ki Kalilea, neʼe fakalaka ia Sesu mo ʼana tisipulo ʼi Samalia. Neʼe natou gaʼegagaʼe. Neʼe ko te vaʼevaʼe fetapa ʼaia, pea neʼe natou tutuʼu ovi ki te kolo ko Sikale, ʼo natou malolo ʼi he vai keli. Ko te vai keli ʼaia neʼe lagi keli ʼi muʼa atu e Sakopo pe neʼe lagi ina totogi he ʼu hahaʼi ke natou keli. ʼI totatou temi, ʼe kei feala ke tou maʼu te vai keli ʼaia ʼe ovi ki te kolo ko Naplouse.

Neʼe malolo ia Sesu ʼi te vaʼe vai keli, kaʼe olo ʼana tisipulo ki te kolo ʼae neʼe ovi age ʼo totogi mai hanatou meʼa kai. ʼI tanatou olo, neʼe haʼu he fafine Samalitana ʼo ohu vai. Neʼe ui fenei age e Sesu: “Foaki mai he moʼi vai ke au inu.”—Soane 4:7.

ʼI te agamahani neʼe mole felogoʼi te kau Sutea mo te kau Samalitana he neʼe natou felotokoviʼaki. Koia neʼe punamaʼuli ai te fafine ʼo ina fehuʼi fenei age: “Ko koe ko te Sutea, pea he koʼe ʼe ke kole mai he moʼi vai kia au ʼaeni ko te fafine Samalitana?” Neʼe tali fenei age e Sesu: “Ka na pau la neʼe ke iloʼi te meʼa ʼofa ʼae ʼe foaki noa e te ʼAtua pea mo ia ʼae ʼe ina ui fenei atu: ‘Foaki mai he moʼi vai ke au inu,’ pea ʼe ko koe anai ʼae ʼe ke kole kia ia, pea ʼe ina foaki atu anai te vai maʼuli.” Neʼe ina ui fenei age: “Tagata, ʼe mole pe la hau pakete moʼo ohu vai, pea ʼe loloto te vai keli. Koia, ʼe ke maʼu maifea te vai maʼuli ʼaia? ʼE mole ke lahi age leva koe ʼi tamatou kui ko Sakopo ʼae neʼe ina foaki mai te vai keli pea neʼe inu ia ki ai, ʼo toe feia mo ʼona foha pea mo tana faga manu.”—Soane 4:9-12.

Neʼe ui fenei e Sesu: “Ko he tahi ʼe inu ki te vai ʼaeni ʼe toe fia inu anai. Kaʼe ko ʼae ʼe inu ki te vai ʼae ʼe au foaki age anai ki ai, ʼe mole toe fia inu anai, kaʼe ʼe liliu anai te vai ʼae ʼe au foaki age ki ai ko he matapuna vai ia ia, ʼe ina foaki ia te maʼuli heʼe gata.” (Soane 4:13, 14) ʼEi, logo la te kua gaʼegaʼe ʼa Sesu, kaʼe neʼe lotolelei pe ʼo vaevae mo te fafine Samalitana ʼaia te ʼu folafola ʼo te moʼoni, ke ina maʼu ai te maʼuli.

Pea neʼe ui fenei e te fafine: “Tagata, foaki mai te vai ʼaia, ke ʼaua naʼa au toe fia inu pea mo tatuʼu mai ki heni ʼo ohu vai.” Kaʼe neʼe mole fia hoko atu e Sesu tana palalau ki te faʼahi ʼaia, he neʼe ina ui fenei ki te fafine: “Alu ʼo pauʼi mai tou ʼohoana.” Neʼe ina tali fenei: “ ʼE mole ʼi ai hoku ʼohoana.” Neʼe lagi punamaʼuli ʼaupito te fafine ʼi te iloʼi e Sesu ia tona aluʼaga, he neʼe ui fenei e Sesu ki ai: “ ʼE tonu tau ui ʼae ‘ ʼE mole ʼi ai hoku ʼohoana.’ Koteʼuhi neʼe ko ʼou ʼohoana ʼe toko nima, pea ko te tagata ʼae ʼe maʼuli nei mo koe ʼe mole ko tou ʼohoana.”—Soane 4:15-18.

Neʼe mahino ai te fafine ko Sesu neʼe mole hage ia ko te tagata fuli, koia neʼe ina ui fenei age ki ai: “Tagata, ʼe au sio ko koe ko he polofeta.” Pea neʼe fakaha leva e te fafine tana leleiʼia te ʼu manatu fakalaumalie, ʼi tana ui fenei: “Neʼe atolasio ʼamatou kui [te kau Samalitana] ʼi te moʼuga ʼaeni [te Moʼuga ko Kalisimi, ʼae neʼe tuʼu ovi age], kaʼe ʼe kotou ui koutou [te kau Sutea] ʼe tuʼu ʼi Selusalemi ia te koga meʼa ʼae ʼe tonu ke atolasio ai te hahaʼi.”—Soane 4:19, 20.

Kaʼe neʼe fakamahino age e Sesu ʼe mole ko te koga meʼa ʼae ʼe fai ai te tauhi ʼae ʼe maʼuhiga. Neʼe ina ui fenei: “ ʼE hoko mai te hola ʼae ʼe mole kotou toe atolasio anai ki te Tamai ʼi te moʼuga ʼaeni peʼe ʼi Selusalemi.” Pea neʼe ina hoko atu fenei: “ ʼE hoko mai te hola, pea ʼe ko te temi nei, ʼae ka atolasio anai te kau atolasio moʼoni ki te Tamai ʼaki te laumalie mo te moʼoni, koteʼuhi ʼe kumi e te Tamai te faʼahiga hahaʼi ʼaia ke natou atolasio kia te ia.”—Soane 4:21, 23, 24.

Maʼa te Tamai, ʼe mole ko te koga meʼa ʼae ʼe fai ai e te kau atolasio moʼoni tanatou tauhi ʼae ʼe maʼuhiga, kaʼe ʼe ko tanatou faʼahiga tauhi. Neʼe punamaʼuli ai te fafine. Neʼe ina ui fenei: “ ʼE au iloʼi ʼe haʼu ia te Mesia, ʼae ʼe higoa ko Kilisito. Pea ka haʼu anai, ʼe ina fakaha fakahagatonu mai anai kia matou ia meʼa fuli.”—Soane 4:25.

Neʼe fakaha age leva e Sesu te moʼoni maʼuhiga ʼaeni: “Ko au ʼaeni ʼe au palalau atu, ʼe ko au ia ia.” (Soane 4:26) Ke ke fakakaukauʼi age muʼa te faʼahi ʼaia! Neʼe foaki age e Sesu ia he pilivilesio lahi ki te fafine ʼaia neʼe haʼu ʼi te fetapa ʼo ohu vai. Neʼe ina fakaha fakahagatonu age ki ai, ʼe ko ia te Mesia. ʼE mahino ia, ʼe ko he faʼahi neʼe heʼeki ina fakaha ki he tahi age.

NEʼE HAHAʼI TE KAU SAMALITANA ʼAE NEʼE TUI

Neʼe liliu mai te kau tisipulo ʼa Sesu mai Sikale mo tanatou meʼa kai. Neʼe kei nofo pe ia Sesu ʼi te vai keli ʼo Sakopo, pea neʼe faipalalau mo te fafine Samalitana. ʼI te tau mai ʼa te kau tisipulo, neʼe tuku leva e te fafine tana ʼutuʼaga vai kaʼe alu ki te kolo.

ʼI tana tau atu ki Sikale, neʼe ina fakamatala ki te hahaʼi te ʼu meʼa ʼae neʼe ui age e Sesu. ʼAki he lotofiafia, neʼe ina ui fenei kia natou: “Kotou ʼomai ʼo sisio ki he tagata neʼe ina fakaha mai te ʼu meʼa fuli ʼae neʼe au fai.” Pea moʼo lagi uga ʼo tanatou fia iloʼi ia te tagata ʼaia, neʼe ina fai te fehuʼi ʼaeni: “ ʼE mole ko Kilisito ʼape?” (Soane 4:29) Neʼe ko te fehuʼi ʼo ʼuhiga mo he faʼahi maʼuhiga, pea ko he faʼahi neʼe fia iloʼi e te hahaʼi talu mai te temi ʼo Moisese. (Tetelonome 18:18) Neʼe mavae ai te hahaʼi mai te kolo ʼo natou olo kia Sesu.

Lolotoga te temi ʼaia, neʼe ui age e te ʼu tisipulo kia Sesu ke ina kai te meʼa kai ʼae neʼe natou ʼaumai. Kaʼe neʼe ina tali fenei: “Kua ʼi ai taku meʼa kai, pea ʼe mole kotou iloʼi pe kotea.” Neʼe feʼekeʼaki fenei e te ʼu tisipulo: “Neʼe ʼaumai koa e he tahi hana meʼa kai?” Neʼe fai leva e Sesu he ʼu palalau ʼe maʼuhiga ki ʼana tisipulo fuli, ʼo ina ui fenei: “Ko taku meʼa kai ʼe ko te fai ʼo te finegalo ʼo ia ʼae neʼe ina fekauʼi mai au pea mo fakaʼosi tana gaue.”—Soane 4:32-34.

Ko te gaue ʼae neʼe talanoa ki ai ia Sesu neʼe mole ko te tanaki ʼo te taʼukai, he neʼe kei toe mahina ʼe fa ki ai. Kaʼe neʼe talanoa ia ki he tanaki ʼi te faʼahi fakalaumalie. Neʼe ina ui fenei: “Kotou hiki ake ʼokotou mata pea mo sisio ki te ʼu gaueʼaga, kua matutuʼa pea kua ʼaoga ke tanaki. Kua maʼu e te tagata tanaki taʼukai tona totogi pea ʼe ina tanaki he ʼu fua ki te maʼuli heʼe gata, ke fiafia fakatahi ai ia ia ʼae ʼe ina to pea mo ia ʼae ʼe ina utu.”—Soane 4:35, 36.

Neʼe kua lagi iloʼi e Sesu te ʼu fua ʼo tana faipalalau ʼaia mo te fafine Samalitana. Tokolahi te hahaʼi ʼo Sikale neʼe natou tui kia te ia ʼuhi ko te ʼu palalau ʼa te fafine, he neʼe ina ui fenei kia natou: “Neʼe ina fakaha mai te ʼu meʼa fuli ʼae neʼe au fai.” (Soane 4:39) Koia, ʼi tanatou mavae ʼi Sikale ʼo olo ki te vai keli, neʼe natou kole ai kia Sesu ke nofo mo natou pea ke ina akoʼi age he tahi ʼu meʼa. Neʼe tali e Sesu pea neʼe nofo ʼi Samalia ia ʼaho ʼe lua.

ʼI te fagono ʼa te kau Samalitana kia Sesu, neʼe tokolahi natou ʼae neʼe tui kia te ia. Neʼe natou ui fenei ki te fafine: “ ʼE mole matou tui ʼuhi pe ko te ʼu meʼa ʼae neʼe ke ui mai. Koteʼuhi kua matou logo tonu kia te ia, pea ʼe matou iloʼi ko te tagata ʼaeni ʼe ko ia moʼoni te fakamaʼuli ʼo te malamanei.” (Soane 4:42) ʼE mahino ia, neʼe tuku mai e te fafine Samalitana he faʼifaʼitaki lelei ʼi tana fakaha mai pe ʼe tou lava palalau feafeaʼi ki te hahaʼi ʼo ʼuhiga mo Kilisito. ʼE feala ke tou uga te hahaʼi ke natou fia iloʼi te logo ʼae ʼe tou tala, pea ke natou fia hoko atu tanatou faipalalau mo tatou.

ʼE ke manatuʼi, neʼe kei toe mahina ʼe fa pea hoko te tanaki ʼo te taʼukai, neʼe lagi ko te utu ʼo te olose, ʼae neʼe fai ʼi te mahina ʼo Malesio peʼe ko Apelili ʼi te koga fenua ʼaia. Koia neʼe lagi hoko te fakamatala ʼaeni ʼi te mahina ʼo Novepeli peʼe ko Tesepeli. ʼE tou mahino ai, neʼe nonofo ia Sesu mo ʼana tisipulo ia mahina ʼe valu peʼe laka atu ʼi Sutea, ʼo faiakonaki pea mo faipapitema talu mai te hili ʼo te Pasikate ʼo te taʼu 30 H.T.S. Neʼe natou olo leva ki Kalilea, ʼae ʼe tuʼu ʼi te potu noleto. Kotea ʼae ka hoko anai kia natou?