Neʼe lagi ke loto ʼi he ʼaho ke ke lau ia te Tohi-Tapu, kaʼe neʼe mole ke fai he neʼe ke manatu ohage ko te foʼi toko tolu ʼaeni. Maʼa te tokolahi, ʼe faigataʼa te lau ʼo te Tohi-Tapu. Kaʼe ʼe feafeaʼi la mo kapau ʼe ke iloʼi ʼe feala ke tokoni atu te Tohi-Tapu ke ke maʼu he maʼuli ʼe fiafia age? Pea ʼe feafeaʼi la mo kapau ʼe fakaha atu he ʼu tokoni ke ke leleiʼia age tau lau ia te Tohi-Tapu? ʼE ke loto anai koa ke ke vakaʼi te ʼu lelei ʼae ʼe maʼu ʼi te Tohi-Tapu?

Tou vakaʼi he ʼu tala manatu mai ia natou ʼae neʼe fiafia ʼi tanatou kamata lau ia te Tohi-Tapu.

ʼE ui fenei e Ezekiel, ʼae ʼe taʼu 20 tupu: “ ʼI muʼa atu, neʼe au hage ko he tahi ʼe ina uli tana motoka kaʼe ʼe mole ina iloʼi pe ʼe alu kifea. Kaʼe ʼi taku lau ia te Tohi-Tapu, neʼe au iloʼi ai te ʼuhiga ʼo toku maʼuli. ʼE au maʼu ai he ʼu tokoni ʼe ʼaoga, ʼe feala ke au fakaʼaogaʼi ʼi te ʼaho fuli.”

ʼE ui fenei e Frieda, ʼae ʼe taʼu 20 tupu mo ia: “Neʼe au hoko ita. Kaʼe ʼaki taku lau ia te Tohi-Tapu, neʼe au ako te lotololomi. Neʼe faigafua ai taku felogoʼi lelei mo ʼihi, pea kua lahi age leva ʼoku kaumeʼa ʼi te temi nei.”

Ko te fafine ʼe higoa ko Eunice pea ʼe taʼu 50 tupu, ʼe ina ui fenei ʼo ʼuhiga mo te Tohi-Tapu: “ ʼE tokoni mai ke au liliu ko he fafine ʼe lelei age, ke au fetogi ʼaku agamahani ʼae ʼe mole faʼa lelei.”

Ko tau lau ia te Tohi-Tapu ʼe feala ke tokoni atu ke ke maʼu he maʼuli ʼe fiafia lahi age. Ko te faʼahi ʼaia neʼe hoko ki te foʼi toko tolu ʼaeni pea mo te toko lauʼi miliona hahaʼi ʼae ʼe natou lau ia te Tohi-Tapu. (Esaia 48:17, 18) ʼE feala ke tokoni atu te Tohi-Tapu (1) ke ke fai he ʼu tonu ʼe lelei, (2) ke ke maʼu hou ʼu kaumeʼa moʼoni, (3) ke ke tauʼi te lotohoha, (4) pea tafito, ke ke iloʼi te moʼoni ʼo ʼuhiga mo te ʼAtua. Ko te ʼu tokoni ʼae ʼe tuʼu ʼi te Tohi-Tapu ʼe haʼu ia mai te ʼAtua. Koia, kapau ʼe ke mulimuli ki ai, ʼe mole feala anai ke fua kovi kia koe, he ʼe mole foaki e te ʼAtua he ʼu tokoni ʼe kovi.

Ko te meʼa maʼuhiga ʼae ʼe tonu ke kita fai, ko takita kamata lau ia te Tohi-Tapu. Kotea la he ʼu tokoni ʼaoga ke faigafua age ai tatatou kamata lau ia te Tohi-Tapu pea mo tou fiafia lahi age ai?

Kotea ʼae ʼe feala ke ke fai ke tokoni atu ke ke fiafia ʼi tau lau ia te Tohi-Tapu pea mo fua lelei kia koe? Koʼeni te ʼu tokoni ʼe nima neʼe ʼaoga ki te tokolahi.

Tokaga ke lelei te koga meʼa ʼae ʼe ke lautohi ai. ʼE ʼaoga ke ke kumi he koga meʼa ʼe mole logoaʼa, pea mo matehi ia meʼa fuli ʼe feala ke fakalelu atu. ʼE feala ai ke ke tokaga tafito ki te meʼa ʼae ʼe ke lau. Ke fua lelei kia koe tau lautohi, ʼe tonu ke malama lelei pea mo mokomoko te koga meʼa ʼaia.

Ke ke maʼu te faʼahiga manatu ʼae ʼe lelei. ʼE haʼu te Tohi-Tapu mai tatatou Tamai ʼae ʼi selo. Koia, ʼe fua lelei lahi anai kia koe tau lautohi mo kapau ʼe ke hage ko he kiʼi tamasiʼi ʼe lotolelei ke akoʼi ia ia e tana tamai peʼe ko tana faʼe ʼofa. Kapau ʼe ke maʼu he ʼu manatu ʼe mole lelei ʼo ʼuhiga mo te Tohi-Tapu, faiga ke ke tuku keheʼi te ʼu manatu ʼaia, ke feala ke akoʼi koe e te ʼAtua.—Pesalemo 25:4.

Ke ke faikole ʼi muʼa ʼo tau lautohi. ʼE maʼu ʼi te Tohi-Tapu te ʼu manatu ʼa te ʼAtua. Koia ʼe ʼaoga kia tatou tana tokoni ke tou mahino ki ai. ʼE fakapapau e te ʼAtua ʼe ina foaki anai “te laumalie maʼoniʼoni kia natou ʼae ʼe natou kole age.” (Luka 11:13) ʼE feala ke tokoni atu te laumalie maʼoniʼoni ke ke mahino ki te manatu ʼa te ʼAtua. ʼAki te temi, ʼe ina avahi anai tou ʼatamai ke ke mahino “maʼia mo te ʼu meʼa loloto ʼo ʼuhiga mo te ʼAtua.”—1 Kolonito 2:10.

Faiga ke ke mahino ki te meʼa ʼae ʼe ke lau. ʼAua naʼa ke faiga pe ke ke lau he ʼu tuʼuga pasina. Fakakaukauʼi lelei te meʼa ʼae ʼe ke lau. Fai kia koe he ʼu fehuʼi ohage ko te ʼu fehuʼi ʼaeni: ‘Kotea te ʼu kalitate neʼe au tokagaʼi ʼi te hisitolia ʼo ia ʼaeni neʼe au lau? ʼE feafeaʼi haku maʼuliʼi?’

Ke ke lau ʼaki hau ʼu fakatuʼutuʼu. Ke fua lelei kia koe tau lau ia te Tohi-Tapu, fakatuʼutuʼu ke ke taʼofi mai ai he ako ʼe ʼaoga moʼoni anai ki tou maʼuli. Koʼeni he ʼu fakatuʼutuʼu ʼe lagi feala ke ke fai: ‘ ʼE au loto ke lahi age te ʼu meʼa ʼae ʼe au ako ʼo ʼuhiga mo te ʼAtua.’ ‘ ʼE au fia liliu ko he tahi ʼe lelei age, ko he tagata ʼohoana peʼe ko he fafine ʼohoana ʼe lelei age.’ Pea ke ke filifili leva he ʼu koga Tohi-Tapu ʼe tokoni atu anai ke ke fakahoko te ʼu fakatuʼutuʼu ʼaia.a

ʼE tokoni atu anai te ʼu manatu ʼaia ʼe nima ke ke kamata lau te Tohi-Tapu. Kaʼe kotea ʼae ʼe feala ke ke fai ke lahi age tau leleiʼia tau lau ia te Tohi-Tapu? ʼE foaki ʼi te alatike ka hoa mai he ʼu tokoni.

ʼE feafeaʼi anai kia koe tau lau ia te Tohi-Tapu? ʼE fakapiko peʼe fakafiafia? ʼE fakalogo tafito te faʼahi ʼaia ki te ʼu fakatuʼutuʼu ʼae ʼe ke fai moʼo lau ia te Tohi-Tapu. Tou vakaʼi he ʼu meʼa ʼe feala ke ke fai ke ke leleiʼia tau lautohi pea mo fiafia lahi age.

Filifili he Tohi-Tapu ʼe tuha mo te falala pea ʼe ke mahino ki ai. Kapau ʼe ke lau he tohi ʼe lahi ai te ʼu kupu ʼe mole ke mahino ki ai he ʼe faigataʼa peʼe kua ʼafeā, pea ʼe lagi mole ke fiafia anai ʼi tona lau. Koia, kumi he Tohi-Tapu ʼe ke mahino gafua ki ai pea ʼe malave anai ki tou loto. Kaʼe ʼe tonu foki ko he Tohi-Tapu neʼe lelei pea mo totonu tona fakaliliu.a

Fakaʼaogaʼi te ʼu masini foʼou. ʼE kei ta ia ʼaho nei te ʼu Tohi-Tapu. Kaʼe ʼe toe feala ke ke lau te Tohi-Tapu ʼi te ʼu masini. Ko ʼihi ʼe natou lau te Tohi-Tapu ʼi te Neti peʼe natou toʼo mai ai ʼo ʼai ki he olotinatea, he tablette, peʼe ko he telefoni toʼotoʼo. ʼI ʼihi Tohi-Tapu, ʼe feala ke ke vakaʼi fakavilivili he tahi age ʼu vaega ʼe talanoa ki he manatu ʼe tahi peʼe ke ke vakaʼi he tahi ʼu fakaliliu. Kapau ʼe ke leleiʼia age koe hau fagono ki te lau ʼo te Tohi-Tapu, ʼe kua toe puke foki ʼi ʼihi lea. Tokolahi ʼe natou fagono ki ai ʼi tanatou feoloʼaki ʼi te ʼu ka, ʼi tanatou faifo, peʼe ʼi tanatou fai he tahi ʼu gaue. He koʼe ʼe mole ke ʼahiʼahi he faʼahi ʼe alu tahi mo tou aluʼaga?

Fakaʼaogaʼi ni tohi ʼe tokoni atu ke ke mahino ki te Tohi-Tapu. ʼAki te ʼu tohi ʼaia ʼe lahi age anai te ʼu fua lelei ʼe ke maʼu ʼi tau lautohi. Ohage la, ʼe ʼi ai te ʼu mape ʼo te ʼu fenua ʼae ʼe talanoa ki ai te Tohi-Tapu. ʼE tokoni atu anai ke ke iloʼi te tuʼuʼaga ʼo te ʼu koga meʼa ʼae ʼe ke lau ʼi te Tohi-Tapu, pea ke hage ʼe ke sio ki te ʼu meʼa ʼae neʼe hoko ʼi te ʼu koga meʼa ʼaia. Ko te ʼu alatike, ohage ko te ʼu alatike ʼi te nusipepa ʼaeni peʼe ʼi tamatou tuʼasila ʼi te Neti, jw.org, ʼe lava tokoni atu ke ke maʼu he ʼu fakamahino ʼo ʼuhiga mo te ʼu koga Tohi-Tapu kehekehe.

Fetofetogi tau faʼahiga fai. Kapau ʼe faigataʼa kia koe tau lau ia te Tohi-Tapu mai tona kamataʼaga ʼo kaku ki tona fakaʼosi, ʼe lelei ke ke kamata lau muʼa he koga ʼo te Tohi-Tapu ʼe maʼuhiga kia koe. ʼE feala ke tupu ai hau fia hoko atu tau lautohi. Kapau ʼe ke fia iloʼi lelei he ʼu hahaʼi iloa ʼe tuʼu ʼi te Tohi-Tapu, ʼe feala ke ke ʼahiʼahi lau he ’u vaega ʼe talanoa ki te ʼu hahaʼi ʼaia, ohage ko tona fakaha ʼi te fakamatala ʼae ʼi te ʼa takai, ko tona kupu tafito: “Ke Ke Iloʼi Lelei Age Natou ʼAe ʼe Talanoa Ki Ai Te Tohi-Tapu.” Peʼe lagi feala ke ke lau he ʼu vaega ʼe talanoa ki he manatu ʼe tahi, peʼe ko te ʼu hisitolia ʼi te Tohi-Tapu ʼo mulimuli ki te temi ʼae neʼe hoko ai. He koʼe ʼe mole ke ʼahiʼahi he faʼahiga fai ʼi te ʼu faʼahiga fai ʼaia?

ʼE mole hage te Tohi-Tapu ko te ʼu tohi fuli ʼae. ʼE maʼu ai te ʼu tokoni ʼe haʼu mai totatou Tupuʼaga. (2 Timoteo 3:16) ʼE feala ke malave loloto kia tatou tana logo. ʼI tona fakahagatonu, ʼe ui fenei ʼi te Tohi-Tapu: “Ko te folafola ʼa te ʼAtua ʼe maʼuli pea mo malohi.” (Hepeleo 4:12) ʼE ina maʼu te malohi moʼo hikihiki ke lelei age totatou maʼuli ia faʼahi tafito ʼe lua: ʼE ina foaki mai he ʼu tokoni ʼe ʼaoga ki totatou maʼuli ʼi te ʼaho fuli pea ʼe tokoni mai ke tou iloʼi te ʼAtua pea mo ʼana fakapapau.—1 Timoteo 4:8; Sakopo 4:8.

ʼE ina hikihiki ke lelei age tou maʼuli ʼi te temi nei. ʼE feala ke tokoni mai te Tohi-Tapu ʼi te ʼu faʼahi kehekehe ʼo totatou maʼuli. ʼE ina foaki he ʼu tokoni ʼaoga ʼo ʼuhiga mo te ʼu faʼahi ʼaeni:

• Te ’u felogoʼi mo ʼihi.​—Efeso 4:31, 32; 5:22, 25, 28, 33.

• Te lelei ʼo te loto pea mo te maʼuli malolo.​—Pesalemo 37:8; Taaga Lea 17:22.

• Te ʼu aga ʼae ʼe mole tonu ke fai.​—1 Kolonito 6:9, 10.

• Te faʼahi fakapaʼaga.​—Taaga Lea 10:4; 28:19; Efeso 4:28.a

ʼI Asia, ko he taumatuʼa kei tupulaga neʼe nā leleiʼia ʼaupito te ʼaoga ʼo te ʼu tokoni mai te Tohi-Tapu. Ohage pe ko te ʼu taumatuʼa foʼou ʼe tokolahi, neʼe nā tau mo he ʼu faigataʼaʼia he neʼe mole tatau ʼonā ʼulugaaga pea neʼe faigataʼa tanā fakaha te ʼu meʼa ʼi tonā loto. Kaʼe neʼe nā kamata maʼuliʼi leva te ʼu meʼa ʼae neʼe nā lau ʼi te Tohi-Tapu. Kotea ʼae neʼe hoko? ʼE ui fenei e Vicent, te tagata ʼohoana: “Ko te ʼu meʼa ʼae neʼe au lau ʼi te Tohi-Tapu, neʼe tokoni mai ke au fakatokatoka ʼaki te ʼofa te ʼu faigataʼaʼia ʼo toma maʼuli fakataumatuʼa. ʼI tamā mulimuli ki te Tohi-Tapu ʼi toma maʼuli, neʼe ma liliu ai ʼo fiafia.” ʼE manatu tahi mo ia tona ʼohoana, ia Annalou. ʼE ina ui fenei: “Neʼe tokoni mai kia maua tamā lau te ʼu faʼifaʼitaki ʼae ʼe tuʼu ʼi te Tohi-Tapu. ʼI te temi nei kua au fiafia ʼi toma maʼuli fakataumatuʼa pea mo te ʼu fakatuʼutuʼu ʼae ʼe ma fai.”

ʼE tokoni atu ke ke iloʼi te ʼAtua. Neʼe mole palalau pe ia Vicent ʼo ʼuhiga mo tona maʼuli fakataumatuʼa, kaʼe neʼe ina toe ui fenei: “ ʼI taku lau ia te Tohi-Tapu, kua au fakaovi lahi age kia Sehova ʼi te temi nei.” ʼE ha lelei ʼi te ʼu palalau ʼaia ʼa Vicent ia he manatu maʼuhiga: ʼE feala ke tokoni atu te Tohi-Tapu ke ke iloʼi te ʼAtua. ʼI tau iloʼi ʼaia te ʼAtua, ʼe ke sio anai ki te ʼaoga ʼo ʼana tokoni kia koe pea ʼe feala ke liliu ko hou kaumeʼa. Pea ʼe ina fakaha atu anai he ka haʼu ʼe lelei age, te temi ʼae ka ke maʼu anai ʼo talu ai ia “te maʼuli moʼoni.” (1 Timoteo 6:19) ʼE mole he tahi age tohi ʼe feala ke ina foaki atu te faʼahi ʼaia.

Kapau ʼe ke kamata lau ia te Tohi-Tapu pea mo hoko atu, ʼe feala ke ke toe maʼu mo koe te ʼu lelei ʼaeni: ʼE lelei age anai tou maʼuli ʼi te temi nei pea ʼe ke iloʼi anai te ʼAtua. Kaʼe, ʼi tau lau ʼaia te Tohi-Tapu, ʼe lahi anai ʼau fehuʼi ka ke fai. Pea ʼi te temi ʼaia, ke ke manatuʼi te faʼifaʼitaki lelei ʼo te tagata Etiopea neʼe gaue ʼi te fale hau pea neʼe maʼuli kua hili ki ai taʼu ʼe 2 000. Neʼe lahi ʼana fehuʼi ʼo ʼuhiga mo te Tohi-Tapu. ʼI te fakalavelave age ʼae pe ʼe mahino ki te meʼa ʼae neʼe ina lolotoga lau, neʼe ina tali fenei: “Ke au mahino feafeaʼi la mo kapau ʼe mole he tahi ʼe ina akoʼi au?”b Neʼe ina tali leleiʼi leva te tokoni ʼa Filipo, ʼae neʼe kau ki te ʼu ʼuluaki tisipulo ʼa Sesu. Neʼe kua liliu ia Filipo ko he tagata faiako faiva ʼo te Tohi-Tapu. (Gaue 8:30, 31, 34) ʼE toe feia, kapau ʼe ke fia maʼu he tahi age ʼu manatu ʼo ʼuhiga mo te Tohi-Tapu, ʼe matou fakaafe koe ke ke fakaui hau ako Tohi-Tapu ʼi te Neti, ʼi tamatou tuʼasila www.jw.org peʼe ke faitohi ki he tuʼasila ʼe tuʼu ʼi te nusipepa ʼaeni. ʼE toe feala foki ke ke felaveʼi mo te kau Fakamoʼoni ʼa Sehova peʼe ke ke mamata ki tanatou Fale Fono. ʼE matou fakalotomalohiʼi koe ke ke toʼo ʼi te ʼaho nei hau Tohi-Tapu, pea ke ke tuku ke ina takitaki koe ke ke maʼu ai he maʼuli ʼe lelei age.