ʼE Lolotoga Hoko Koa Te Finegalo ʼo Te ʼAtua?
“Ke aumai tau pule, ke fai tou finegalo i te kelekele o hage ko Selo.”—Mateo 6:10.
NEʼE sioʼi fakaʼofaʼofa e Julio pea mo Christina te vela ʼo tanā ʼu tamaliki e toko fā. Neʼe ulo tanatou motokā ʼaē neʼe tau ʼi te taulaga motokā, he neʼe fakaʼī e te tahi motokā ʼe uli e te tagata konahia. Ko tana nima tamasiʼi ko Marcos neʼe hāo mai te vela fakamataku ʼaia, kae neʼe vela tona sino, ʼo patupatu ai tona ʼu fofoga. Neʼe ko tona taʼu hiva. Neʼe hanu te loto ʼo tana tāmai. ʼAki te ʼu palalau ʼaenī neʼe ina fakaloto mālohiʼi ia ia pea mo tona famili: “ ʼE tonu ke mahino kia tatou ʼe ko te finegalo ʼaia ʼo te ʼAtua, peʼe lelei peʼe kovi.”
Mokā hoko he ʼu meʼa feiā, tokolahi ʼe nātou maʼu te taʼi manatu ʼaia. ʼE nātou ʼui fēnei: ‘Kapau ko te ʼAtua ʼe māfimāfi pea mo tokaga kia tatou, ko te meʼa ʼaē neʼe hoko ʼe ʼi ai tona ʼaoga kia tatou, logola ʼe faigataʼa.’ ʼE koutou tali koa te manatu ʼaenī?
ʼI te agamāhani ko te ʼu palalau ʼaia, ʼaē ʼe ina ʼui ʼe ko te finegalo ʼo te ʼAtua, peʼe lelei peʼe kovi, ʼe fakatafito ki te ʼu palalau ʼaē neʼe fai e Sesu ʼi te Faikole ʼo Te Tāmai ʼe ʼi selo ʼaē neʼe tou talanoa kiai ʼi te kamata. ʼE moʼoni kua hoko te finegalo ʼo te ʼAtua ʼi selo. ʼI tatatou kole ‘Ke fai tou finegalo ʼi te kele,’ ʼe mole tou tali koa la ko te ʼu meʼa ʼaē ʼe hoko ʼi te kele ʼe ko te finegalo ʼo te ʼAtua?
Tokolahi ʼe nātou lotolotolua ʼo ʼuhiga mo te manatu ʼaia. Maʼa nātou, ko te ʼAtua ʼe mole ina tokagaʼi te ʼu mamahi ʼo tana hahaʼi. ʼE nātou feʼekeʼaki fēnei, ‘ ʼE lava feafeaʼi ki he ʼAtua ʼofa ke ina fia fakamamahiʼi ni hahaʼi neʼe mole nātou fai he meʼa ʼe kovi? Kapau ʼe ʼi ai hona ʼaoga ke hoko kia tatou he ʼu meʼa ʼe kovi, koteā koa tona ʼaoga?’ ʼE lagi koutou manatu feiā.
ʼI te faʼahi ʼaia, ko te tēhina ʼo Sesu ia te tisipulo ko Sakopo neʼe ina tohi fēnei: “Aua naa lau e he tahi moka fakahalai: ‘Kua fakahalai au e te Atua.’ Koteuhi e mole mafai e te Atua ke ina ahiahi te kovi pea e mole ina fakahalai he tahi.” (Sakopo 1:13) ʼE mole ko te ʼAtua ʼaē ʼe tupu ai te ʼu meʼa kovi. Koia ʼe mahino mai, ko te ʼu meʼa fuli ʼaē ʼe hoko ʼi te kele ʼe mole ko te finegalo ʼo te ʼAtua. ʼE toe palalau foki te Tohi-Tapu ki te finegalo ʼo te tagata, te finegalo ʼo te ʼu puleʼaga, pea mo te finegalo ʼo te Tevolo. (Soane 1:13; 2 Timoteo 2:26; 1 Petelo 4:3) ʼE koutou manatu koa ko te meʼa ʼaē neʼe hoko ki te famili ʼo Julio mo Christina ʼe ko te finegalo ʼaia ʼo he Tāmai ʼofa ʼe nofo ʼi selo?
Koia, koteā koa ʼaē neʼe fia ʼui e Sesu ʼi tana akoʼi tana ʼu tisipulo ke nātou faikole: ‘Ke fai tou finegalo’? Neʼe ko he faikole koa ki te ʼAtua ke tokoni mai ʼi he ʼu ʼaluʼaga makehe, pe neʼe akoʼi mai koa e Sesu ke tou faikole ki he meʼa ʼe lahi age pea mo lelei age, ki he fetogi ʼe fakaʼamu fuli kiai te hahaʼi? Tou vakaʼi muʼa peʼe koteā ʼe ʼui e te Tohi-Tapu ʼo ʼuhiga mo te faʼahi ʼaia.
[Haʼuʼaga ʼo te paki pasina 3]
Car: Dominique Faget-STF/AFP/Getty Images; child: FAO photo/B. Imevbore